Jerkakbiji eo Juõn Kejatdikdik Eaibujuij

TÕMAK in ilo jerkakbiji elap an ajeded. Book eo ekwojarjar an Islam, Koran eo, ewõr juõn chapter iloan me aolepen chapter in ej konono kin jerkakbiji eo. Surah 75 ej ba: “Ij kõnejnej kin Ran in Jerkakbiji eo . . . Armij rej tõmak ke bwe Kim jamin maroñ kobaik ibben don di ko diir? . . . Ej kajitõk: ‘Ñããt eo Ran in Jerkakbiji eo?’ Ejjab wõr Ibben ke, (ejja eo wõt), kajur eo ñan lelok mour ñan ro remij?”​—Surah 75:​1-6, 40.

“Zoroastrianism,” The New Encyclopædia Britannica ej ba, “ej tõmak kin anjo eo eliktata ion Nana, juõn jerkakbiji, Ekajet eo Eliktata, im jeblaktok eo an juõn lal erreo ñan ro rewãnik.”

Encyclopaedia Judaica ej kameleleik jerkakbiji einwõt “tõmak eo bwe ro remij renaj jerkakbiji kin enbwiniir ilo kanniek im bar mour ijin ion lal.” Ejja book eo wõt ej bareinwõt ba bwe tõmak eo me rar bõke ilo Judaism bwe juõn armij ewõr juõn aan eo eban mij ej kõmman juõn abañ elap. Ej kalikar: “Tõmak kein ruo kin jerkakbiji im kin aan eo eban mij rej idaptõk ibben don.”

Bwok Kin Katak eo kin Jerkakbiji

Katak in ilomij ko rej kõmmani ilo Christendom ekkã air konono kin aan bwe ej mour manlok elikin mij im kin jerkakbiji eo. Ñan wanjoñok, ri tel ro ilo kabuñ in Anglican ekkã air elij nan kein: “Kinke ej ankil an Anij eo Ekajur Bõtata ilo tiriamokake eo an elap ñan an bõk aan in an jeid im jatid emij, kin men in kimij likit enbwinin ilo bũdej; lal ñan lal, melkwaarar ñan melkwaarar, bũñalñal ñan bũñalñal; kin an wõr kejatdikdik eo emol kin Jerkakbiji ñan mour indio, ikijen Iroij eo ad Jesus Christ.”​—The Book of Common Prayer (Book in Jar).

Nan kein remaroñ kõmman bwe juõn en lemnak elañe Bible eo ej katakin kin jerkakbiji ak katak eo kin juõn aan eo eban mij. Bõtab, lale nan ko Protestant Professor eo ilo France Oscar Cullmann ear kwalok. Ear je ilo book eo an Immortality of the Soul or Resurrection of the Dead? (Juõn Aan eo Eban Mij ke ak Jerkakbiji eo an Ro Remij?): “Ewõr juõn oktak elap ikõtan kejatdikdik eo an Christian kin jerkakbiji eo an ro remij im tõmak eo an Ri Greek kin juõn aan eo eban mij. . . . Meñe kabuñ ko an Christian rar kobaik tõmak kein ruo tokelik, im rainin Ri Christian ro rej likjap in lo oktak eo ikõtair, ijjab lo unin aõ noje ta eo ña im jarlepju in ri meletlet ro rej watõke mol eo. . . . Ilo aolepen Kallimur eo Ekãl elap air kwalok kin tõmak eo kin jerkakbiji. . . . Aolepen armij eo, eo emij, ej kajeblaktoke ñan mour ikijen juõn jerbal in kõmanman ekãl an Anij.”

Jejjab bwilõñ kin unin an armij ro bwok kin mij im jerkakbiji. Ñan kamadmõde bwok in, jej aikwij lale Bible eo, eo ej kwalok kin mol ko me Ri Kõmanman eo an armij, Jehovah Anij, ear kwaloki. Bible eo ej konono kin elõñ ro rar jerkakbiji. Jen etale jilu ian bwebwenato kein im lale ta eo rej kalikare.

“Kõra Rõn R’ar Bõk Nukiir Ro Remij Kin Air Jerkakbiji”

Ilo letter eo an ñan Ri Jew ro rar oktak im Ri Christian ro, ri jilek Paul ear ba bwe kõrã ri tõmak ro rar “bõk nukiir ro remij kin air jerkakbiji.” (Dri Hibru 11:35) Juõn ian kõrã rein ear jokwe ilo Zarephath, juõn bukwon ilo Phoenicia ebak ñan Sidon iturin Mediterranean Coast eo. Ear juõn kõrã emij leo belen me ear karuwainenetok ri kanan eo an Anij Elijah im najidik e ilo ien elap ñitta. Ekaburomõjmõj, ladik eo nejin kõrã in ear nañinmij im mij. Ilo mõkaj Elijah ear bõklok e ñan bo eo ear bed ie im ear akwelap ñan Jehovah bwe en kajeblak mour eo an ladik eo. Juõn men in bwilõñ ear walok, im ladik eo “ej mour.” Elijah ear bar lelok ladik eo ñan jinen im ba: “Lo, nejõm ej mour.” Ewi wãwen an kar emmakit? Ilo mõnõnõ ear ba: “Kiõ I jela bwe kwe juõn armij õn Anij, im nan an Jeova i loñõm e mol.”​—1 Kiñ Ro 17:​22-​24.

Enañin 60 mile itu-rak in Zarephath kar jokwe ruo ri belele ro rejoij me rar lale aikwij ko an eo ear binej jenkwon Elijah, ri kanan eo Elisha. Lio eo ear juõn kõrã ebuñbuñ ilo bukwon eo an ilo Shunem. Erro leo belen rar errã ñan air lelok jikin an Elisha bed ilo bo eo ilo mweo imwiir. Buromõj eo air kin an ejelok nejiir ear oktak ñan lañliñ ke kõrã eo ear keotak juõn nejin ladik. Ke ladik eo ear rittolok, ekkã an kin etal ibben ri madmõd ro im bed ibben jemen ilo jikin kallip eo. Juõn ran ear walok juõn jorrãn. Ladik eo ear lamõj bwe emetak bõran. Juõn ri karejar ear mõkaj im bõklok e ñan mweo. Jinen ear likit e ion bukwen, ak ear mõjnolok im mij ajiri eo. Jinen kin an buromõj ear bebe ñan kajitõk ibben Elisha kin jibañ. Erro juõn ri karejaran rar etal itu-eañ tu-rilik ñan Tol Carmel, ijo Elisha ear bed ie.

Bwebwenato eo ilo 2 Kiñ Ro 4:​32-​37 ej ba: “Im ke Ilaisha e ar itok iloan mweo, lo, ladrik eo e mij, im e babu ion aowej eo an. Inem e ar dreloñ, im kil irro, im jar ñõn Jeova. Im e ar beroane ladrik eo, im likit loñin ion loñin, im mejen ion mejen, im pein ion pein ladrik eo: im e ar kõnkõn ion; im kõniekin ladrik eo e mãnãnlok. Inem e ar jeblak im itoitõk ilo mweo juõn alen; im e ar wõnliñlok im kõnkõn ion ladrik eo; im ladrik eo e ar mõji jiljilimjuõn alen, im ladrik eo e ar kabellok mejen. Im e ar kirtok Gihezai, im ba, Kwon kirtok lio dri Shunen. Ein drein e ar kirtok e. Im ke e ar dreloñ ñõn iben, e ar ba, Kwon kwotõke ladrik ne nejõm. Inem e ar dreloñ, im buñbero i neen, im barikrik ñõn lõl; im e ar kwotõke ladrik eo nejin im drioijlok.”

Einwõt kõrã eo ejako belen ilo Zarephath, kõrã eo ilo Shunem ear jelã bwe men in ear walok itok wõt jen kajur eo an Anij. Kõrã rein ruo rar jimor lo elap lañliñ ke Anij ear kajerkakbijeik nejiir rejitenburu ñan mour.

Jerkakbiji Ilo Ien Jerbal eo an Jesus

Enañin 900 yiõ ko tokelik, juõn jerkakbiji ear walok itu-eañ jidik jen Shunem ilikin bukwon in Nain. Ke Jesus Christ im ri kalor ro an rar etal jen Capernaum im kebake kejam in jikin kwelok in Nain, rar iion juõn jar rej ilok in kalbwin juõn ri mij, im Jesus ear lo juõn kõrã ejako belen eo ear luji likao eo ej make wõt nejin ilo mij. Jesus ear ba ñan e bwe en jab jañ. Luke, juõn doctor, ear kwalok kin ta eo ear walok: “Im Ej kebake im uñir kõtem: im ro rej bõke, re bwijrõk. Im E ba, Likao, Ij ba ñõn yuk, Kwon jerkak. Im eo e kar mij ej jijõt, im jino an konono. Im Ej lelok e ñõn jinen.” (Luk 7:​14, 15) Ro rar lo men in bwilõñ in rar wijtake Anij. Ennan eo kin jerkakbiji in ear jededlok itu-rak ñan Judea im jikin ko iturin.

Ta melele eo jej bõke jen bwebwenato kein jilu kin jerkakbiji eo? Kajjojo armij rein rar jerkakbiji einwõt ejja armij eo wõt. Aolep ro rar jelã kajjen, rar kile e. Ejelok juõn ian rein rar jerkakbiji ear konono kin ta eo ear walok ilo ien eo ekadu ke rar mij. Ejelok juõn ear konono kin an etal ñan bar juõn lal. Alikar, ir aolep rar jerkakbiji im ejmour. Ñan ir, ear einwõt ñe rar kiki iumin jidik ien inem ruj, einwõt Jesus ear ba. (Jon 11:11) Mekarta, elikin jet ien aolepeir rar bar mij.

Bar Koba Ibben Ro Rejitenburu Ibbed —Juõn Kejatdikdik Eaibujuij

Jemaroñ lo nan in kainemõn ko remol ilo Bible. Ijo jej katak bwe ro remij rejjab eñtan. Jen air iion eñtan ilo juõn jikin kijeek ilo hell ak an Anij bõk ir bwe ren enjel ro ilañ, ro remij rej kõttar ilo lup mae ien eo naj kworuj ir ilo jerkakbiji eo.​—Ekklisiastis 9:​5, 10; Ezekiel 18:⁠4, New World Translation.

Jorrãn enañin ke jelet family eo am? Kwoj lemnak ke kin ia eo ro rejitenburu ibbam remij rej bed ie im elañe kwomaroñ bar lo ir? Elañe eindein, kimij kirtok yuk bwe kwon etale ta eo Bible eo ej katakin kin jerkakbiji eo. Bõlen kwoj lemnak: ‘Ñããt enaj walok jerkakbiji eo? Wõn ro renaj bõk tokjen jen e?’ Joij im readi katak kein tok ñan etale kajitõk kein im ko jet.

[Pija eo ilo peij 3]

Elijah ear akwelap ibben Jehovah ñan kajerkakbijeik ladik eo

[Pija eo ilo peij 3]

Jehovah ear kajerbal Elisha ñan kajerkakbijeik ladik eo nejin Ri Shunem eo

[Pija eo ilo peij 4]

Jesus ear kajerkakbijeik likao eo nejin kõrã eo ejako belen ilo Nain

[Pija eo ilo peij 5]

Jerkakbiji eo enaj bar kobaik ro rejitenburu ibben ro nukiir