Nan eo an Jehovah Ej Mour Wõt

Katak ko Relap Jen Book eo Kein Karuo in Sam Ko

EINWÕT ri karejar ro an Jehovah, jej kõtmene bwe jenaj iion abañ im melejoñ ko. Ri jilek Paul ear je: “Ro otemjej re kõnan mour im kwojarjar ilo Kraist Jisõs, naj matõrtõre ir.” (2 Timote 3:12) Ta eo enaj jibañ kij ñan ad kijenmij wõt iumin abañ im matõrtõr ko, im kamol tiljek eo ad ñan Anij?

Mõttan eo kein karuo in lajrak in sam ko lalem ej letok jibañ ñan kij. Sam Ko 42 ñan 72 ej kwalok ñan kij bwe elañe jej kõnan lo tõbrak ilo ad kijenmij iumin abañ ko, jej aikwij likit liki eo ad eyu ilo Jehovah im katak ñan ad kõttar lomor eo jen e. Ej juõn katak elap an aorõk ñan kij! Ennan eo an Book Kein Karuo ilo Sam Ko, einwõt ennan ko aolep ilo Nan eo an Anij, emol ej “mour im jerbal wõt” meñe ilo ran kein.​—Dri Hibru 4:12.

JEHOVAH EJ AD “LIKEPIJÑÕK IM KAJUR”

(Sam Ko 42:1–50:23)

Juõn Ri Livai ej bed ilo jibokwe. Ej buromõj bwe ejjab maroñ etal ñan jikin kabuñ eo an Jehovah ekwojarjar, ej kainemõn e make, ej ba: “O aõ, im etke kwoj abnõnõ ilo ña? Kwon kejatrikrik yuk ilo Anij.” (Sam Ko 42:5, 11; 43:5) Nan in ekkã an walok ilo eon kein ej kobaik mõttan kein jilu ilo Sam Ko 42 im 43 ñan juõn jabõn kennan eyu. Sam Ko 44 ej juõn nan in akwelap kin Judah​—juõn ailiñ ej bed ilo jorrãn, bõlen iumin kauwatata eo ej itok jen Ri Assyria ro ilo ran ko an King Hezekiah.

Sam Ko 45, ej juõn al kin ien mare eo an juõn king, im ej kanan kin Messiah King eo. Sam Ko jilu elikin rej kwalok kin Jehovah einwõt juõn “likepijñõk im kajur,” juõn “kiñ elap ion aolepen lõl in,” im juõn “likepijñõk.” (Sam Ko 46:1; 47:2; 48:3) Eaibujuij an Sam Ko 49 kwalok bwe ejelok armij “e maroñ in wiaik jãtin man”! (Sam Ko 49:7) Sam Ko rualitõk mokta ilo mõttan eo kein karuo kar ñan lõmaro nejin Korah. Eo kein karatimjuõn, Sam Ko 50, Asaph ear jeje.

Emwij Uaki Kajitõk ko Rej Bedbed ilo Bible eo:

44:19—Kar ta “jikin kiru rawia”? Ri jeje sam ear bõlen konono kin melaj in juõn jikin tarinae, me kidu ko rawia rej kañ enbwinin ro rar mij ilo tarinae.

45:13, 14a—Wõn “kõra eo nejin kiñ” eo “naj tellok e ñõn Kiñ eo”? Liin ej kõrã eo nejin “Kiñ in Ailiñ ko,” Jehovah Anij. (Reveles̃õn 15:3) Liin ej jutak ikijen congregation eo emwij kaibujuije in 144,000 Ri Christian ro, me Jehovah ej bõk ir einwõt ro nejin ikijen an kabit ir kin jitõb eo an. (Dri Rom 8:16) “Kõra eo nejin” Jehovah, “emwij pojõk einwõt kõra ej litlit ñõn leo an,” naj bõktok e ñan leo belen—Messiah King eo.—Reveles̃õn 21:2.

45:14b, 15—Wõn eo “virjin ro” rej jutak ikijen? Rej jutak kin “jar eo elap” in ri kabuñ ro remol, ro im rej kobalok im rejetak bwen ri kabit ro. Kinke rein rar ellã im mour “jen iñtan eo elap,” renaj bed ijin ion lal ilo ien eo ñe ien kwojkwoj in belele eo an Messiah king eo enaj dedelok ilo lañ. (Reveles̃õn 7:9, 13, 14) Ilo ien en, renaj obrak kin “mõnõnõ im lõñliñ.”

45:16—Ilo wãwen et eo enaj wõr ro nejin maan renaj binej jenkwon ro jimman king eo? Ilo ien eo ke Jesus ear lotak ion lal, ear wõr ro jimman ilo lal. Rein renaj erom ro nejin ilo ien eo enaj kajerkakbijeik ir jen mij iloan Juõn Thousand Yiõ in Iroij eo an. Jet ian rein nejin renaj erom ian ro renaj jitõñ ir bwe ren “iroij i aolepen lõl.”

50:2—Etke kar naetan Jerusalem “men e wãppen an wõlio”? Ejjab kin jekjekin jikin kwelok eo. Ak, ej kinke Jehovah ear kajerbale im lelok aibujuij eo an ikijen an kar kõmman bwe en ijo temple eo an im jikin eo king ro an ear kabit ir ren jokwe im bed ie.

Tokjen Katak ko ñan Kij:

42:1-3. Einwõt juõn kidu hart, ak deer, eo ej bed ilo juõn ene emõrã im ekõnan den, Ri Livai eo ear kõnan Jehovah. An buromõj ear kanuij lap kinke ear jab maroñ kabuñ ñan Jehovah ilo temple eo An im ear kõmman bwe ‘an dren in kemjalal ear kijen ran im boñ’​—ear jab kõnan mõñã. Kij jejjab aikwij ke kaddeklok juõn kamolol emũlal kin kabuñ eo ad ñan Jehovah ilo ad kobalok ibben ri tõmak ro mõttad?

42:4, 5, 11; 43:3-5. Elañe kin jet un ko im jejjab maroñ ellã ioir jej makelok iar ilo juõn ien ejjab aetok jen congregation eo an Christian, ad kememej ien ko jaar ibben don ilo mõnõnõ ilo ien ko remotlok emaroñ kakajur wõt kij. Meñe ilo jinoin emaroñ kalaplok buromõj eo ad ilo ad makelok iar, ak emaroñ bareinwõt kakememej kij bwe Anij ej ad likepijñak im bwe jej aikwij kõttar wõt jibañ eo an.

46:1-3. Jekdon ta jorrãn eo jenaj jelmaiki, ej aikwij wõr ibbed juõn liki eo ebin bwe “Anij amuij likepijñõk im kajur.”

50:16, 19. Jabdewõt eo ej konono etao im jerbale men ko renana rejjab maroñ jutak kin Anij.

50:20. Jen ad kõnan konono kin likjap ko an ro jet, jej aikwij jeorilok.—Dri Kolosse 3:13.

“AÕ KWON KÕTAR ANIJ WÕT”

(Sam Ko 51:1–71:24)

Sam kein rej jino kin jar eo emũlal an David elikin an kar jerawiwi ibben Bath-sheba. Sam Ko 52 ñan 57 rej kwalok bwe Jehovah enaj lomoren ro rej jolok ine ko air reddo ion im kõttar lomor eo an. Einwõt ej kwalok ilo Sam Ko 58-64, ilo inebata ko an otemjej, David ej kõmman bwe Jehovah en likepijñak eo an. Ej al: “Aõ kwon kõtar Anij wõt, bwe aõ kõtõmene e jen E.”​—Sam Ko 62:5.

Kõtan eo ad elukkun ebak ibben Ri Lomor eo ad ej aikwij kamakit kij ñan ad “al im kwalok an etan aibujuij.” (Sam Ko 66:2) Ilo Sam 65 ej nebar Jehovah einwõt juõn ri letok elap an emmol, im ilo Sam Ko 67 im 68, einwõt juõn Anij in lomor, im einwõt juõn Ri Letok lomor ilo Sam Ko 70 im 71.

Emwij Uaki Kajitõk ko Rej Bedbed ion Bible:

53:1—Ewi wãwen an armij eo ej ba bwe ejelok Anij “bwebwe”? Bwebwe eo ijin ejjab konono kin juõn armij ejelok jelãlokjen ibben. Ak an juõn armij bwebwe ikijen mour emõn im nana ej alikar ilo ad lo an diklok mour erreo einwõt ej kwalok ilo Sam Ko 53:1-4.

58:3-5—Ilo wãwen et ko ri nana ro rej einwõt juõn serpent? Riap ko rej konono kaki kin ro jet rej einwõt poison eo jen loñin juõn serpent. Rej kananaik ãt eo emõn etan armij eo rej konono nae. “Einwõt kiru adder ej binej lojiliñin,” ri nana ro rejjab kõnan roñjake nan in tel ak nan in kajimwe ko.

58:7—Ewi wãwen ri nana ro rej “monlok einwõt dren eo etorlok mõkõj”? Bõlen David ear lemnak kin den ko rej torlok ilo juõn ian komlal ko ilo kar Enen Kallimur eo. Meñe juõn ibwijleplep emaroñ laplok im kobrak juõn komlal, ak den kein emõkaj air monlok im jako. David ear jar bwe ri nana ro ren jako ilo mõkaj.

68:13—Ewi wãwen “pein muli re libubu kin silver, im kolan bau ko kin gold emar”? Jet mule ko im unokair rej blue im gray jet ian kool ko kooliir rej rabõlbõl im ukoktak unokair. Kooliir rej oktak im einwõt mãl erabõlbõl ilo meram in al. Bõlen David ear kõkkar kin anjo eo an ri tarinae ro an Ri Israel ñe rej jeblak tok einwõt bao in​—ekajur ilo an jeblã im erabõlbõl. Einwõt an jet ri meletlet ro kin Bible ba, menin emaroñ bar jerbal ñan juõn kabel, juõn jinekjej, rej bõk einwõt menin rakim ak wõnãn. Ilo wãwen kein aolep, David ear kwalok kin anjo ko Jehovah ej lilok ñan armij ro an ion ro ri kijirãte ir.

68:18—Wõn kar “jurtak ko iben armij”? Armij rein kar armij ro ibwiljin ro rar bõk ir einwõt ri kamakoko ke rar anjo ion Enen Kallimur eo. Tokelik rar jitõñ armij rein bwe ren jibañ Ri Livai ro ilo jerbal eo air.​—Ezra 8:20.

68:30—Ta melelen nan in jiroñ eo ñan “kowe kiru rawia in koba ko”? Ej konono ilo kõkkar kin ri kijirãt ro an armij ro an Jehovah einwõt kidu awia ko, David ear kajitõk ibben Anij ñan an kauweik ir, ak bwe en lale im debij ir jen air kokkure armij ro an.

69:23—Ta melelen “kõmõn bwe ibir en wurirrir”? Muscle ko ilo ibid raorõk ñan an juõn kõmmani jerbal ko relap, einwõt kotak im ineki men ko reddo. Ib ko rejjab bin ej melelen bwe ejelok kajur. David ear jar bwe en ejelok an ro ri kijirãte kajur.

Tokjen Katak ko ñan Kij:

51:1-4, 17. Ad kõmman jerawiwi ejjab aikwij kõtollok kij jen Jehovah Anij. Elañe jej ukwelok, jemaroñ liki kin tiriamokake eo an.

51:5, 7-10. Elañe jaar kõmman bwid, jemaroñ akwelap ñan Jehovah bwe en jeorilok ad bwid kin jab wãppen eo jaar jolete. Jej aikwij bareinwõt jar ñan e bwe en karreoik kij, jibañ kij jolok kõnan eo enana jen buruõd, im letok ñan kij juõn jitõb in tiljek.

51:18. Jerawiwi eo an David ear likit ilo kauwatata mour eo an aolepen ailiñ eo. Inem ear jar ñan Anij kin joij eo an ñan Zion. Ñe jej kõmman bwid ko relap, menin ekkã an bõktok nana ion ãt eo etan Jehovah im ion congregation eo. Jej aikwij jar ñan Anij bwe en kamadmõde jorrãn eo jaar kõmmane.

52:8. Jemaroñ einwõt “wijki oliv e maroro, ilo imõn Anij”—bed ebak ñan Jehovah im kalle ilo jerbal eo an—ilo ad bokake e im ilo ad mõnõnõ in bõk nan in kauwe eo an.—Dri Hibru 12:5, 6.

55:4, 5, 12-14, 16-18. Jumae eo an Absalom leo nejin im kinaak eo an ri jibañ eo mõttan Ahithophel ear lukkun kõmetak David. Bõtab, menin ear jab kadiklok liki eo an David ilo Jehovah. Jen jab kõtlok bwe men ko rej kõmetak buruõd ren kamõjnoiklok liki eo ad ilo Anij.

55:22. Ewi wãwen ad jolok inebata ko ad ion Jehovah? Jej kõmmane menin (1) ilo ad jar ñan e kin juõn men jej inebata kake, (2) ilo ad atartar ion Nan eo an im dolul eo an ñan bõk nan in tel im jibañ, im (3) ilo ad kõmman jabdewõt men jemaroñe ñan kadiklok inebata eo.—Jabõn Kennan Ko 3:5, 6; 11:14; 15:22; Dri Pilippai 4:6, 7.

56:8. Jehovah ejelã ta abañ eo jej iione im bareinwõt wãwen ej jelet kij im eñjake ko ad.

62:11. Anij ejjab aikwij atartar ion jabdewõt kajur ko jet. E eo ej unjen kajur otemjej. Bwe ‘Kajur ej an Anij.’

63:3. “Joij [eo an Anij] emõn jen mour” kinke elañe ejako joij eo an, enaj ejelok melelen im ejelok tokjen mour. Ej juõn menin meletlet ñan ad kaddek juõn jimjera ibben Jehovah.

63:6. Ilo boñ​—ñe ejelok keroro im men in kamad ko—​emaroñ juõn ien elukkun emõn ñan ad kalmenlokjen.

64:2-4. Ñidemij emaroñ kokkure ãt eo emõn etan juõn eo ejelok ruõn. Jej jab aikwij roñjake nan in ba nae ko kin ro jet ak konono kake im kajeededlok ñan ro jet.

69:4. Ñan ad kejbãrok wõt ainemõn, jet ien enaj menin meletlet bwe jen “lelok men ko” ilo ad jolok bwid, meñe jejelã bwe ejjab kij eo jaar kõmman bwid.

70:1-5. Jehovah ej roñjake nan in akwelap ko ad kin jibañ. (1 Dri Tessalonika 5:17; Jemes 1:13; 2 Piter 2:9) Anij emaroñ kõtlok juõn melejoñ bwe en wõnmanlok wõt, ak enaj letok meletlet ñan kij ñan ad kamadmõde wãwen eo im kajur ñan ad kijenmij wõt. Ejamin kõtlok bwe ren melejoñe kij ellã jen joñan ad maroñ.​—1 Dri Korint 10:13; Dri Hibru 10:36; Jemes 1:5-8.

71:5, 17. David ear kaddeklok beran im kajur ilo an kõmman bwe Jehovah en an men in liki ilo ien ear jodikdik​—meñe ilo ien eo ear jutak nae ri inea in Philistia eo Goliath. (1 Samuel 17:34-37) Ro redik rej aikwij atartar ion Jehovah ilo men otemjej rej kõmmane.

“Aolepen Lõl In En Obrõk Kin An Wuj”

Al eo eliktata ilo mõttan eo kein karuo ilo sam ko, Sam 72, ej konono kin ien iroij eo an Solomon, im ej annañelok wãwen ko renaj bed iumin ien iroij eo an Messiah eo. Jet jerammõn ko raibujuij rej kwalok kaki​—ainemõn ilo ejelok joñan, ejelok ijjibed im kowadoñ, elõñ mõñã ko ion lal! Jenaj ke ian ro im renaj mõnõnõ kin men kein im bar jerammõn ko jet jen Ailiñ eo? Jemaroñ elañe, einwõt ri jeje sam, jej juburu wõt im kõttar Jehovah, im kõmman bwe en ad likepijñak im kajur.

“Jar ko an Devid” rej kamwijlok kin nan kein: “Emõnõnõ Jeova Anij, Anij in Israel, eo wõt Ej kõmõn men in bwilõñ ko. Im emõnõnõ etan e aibujuij ñõn in drio; im aolepen lõl in en obrõk kin an wuj. Amen, im Amen.” (Sam Ko 72:18-20) Kij bareinwõt kin aolepen buruõd jen kajerammõn Jehovah im nebar etan eaibujuij.

[Pija eo ilo peij 29]

Kwo jelã ke wõn eo “kõra eo nejin kiñ” ej pijaiki?

[Pija eo ilo peij 30, 31]

Jerusalem kar naetan “men e wãppen an wõlio.” Kwo jelã ke etke?