Ñe Juõn eo Ejitenburu Ibbem ej Illok Jen Jehovah

¹ Mark im Louise rej Ri Kennan ro an Jehovah. Kin an Bible eo kaiñi Christian ro jemen im jinen bwe ren katakin ajiri ro nejiir kin Bible eo, rar kõmmane men in ilo yokwe. (Jabõn Kennan Ko 22:6; 2 Timote 3:15) Ekaburomõjmõj bwe jab aolep ajiri ro nejiir rar wõnmanlok im karejar ñan Jehovah ke rar rittolok. “Buruõ elukkun buromõj kin ro nejiõ me rar jebwãbwe,” Louise ej ba. “Ewi wãwen imaroñ emmakit einwõt ñe men in ejjab kõmetak buruõ ran otemjej? Ñe ro jet rej bwebwenato kin ladik ro nejiir, buruõ eiten bon kin aõ buromõj im ij aikwij kate iõ ñan debiji den in kemjalal ko jen an torlok jen meja.”

² Aet, ñe juõn armij ej bebe in illok jen Jehovah im ial in mour eo me Bible eo ej konono kake, ro uan family eo etiljek rej lukkun buromõj. “Elap aõ yokwe ledik eo jeiõ,” Irene ej ba. “Ibojak in kamaat aõ maroñ ñan kõmman jabdewõt men bwe in lo an jeblak ñan Jehovah!” Maria, eo me likao eo jatin ear illok jen Jehovah im kõmman mour etton, ear ba: “Men in ear lap an kõmetak buruõ kinke ilo aolep wãwen ko jet jatiõ elukkun emõn. Ij oñ kake e elaptata ñe family eo aõ rej mõnõnõ ibben don.”

³ Etke Ej Juõn Ien Ebin? Ñe juõn ajiri ak juõn eo ejitenburu ibbeir ej luji mour in jitõb eo an, etke men in ej kaburomõj Ri Christian ro nukiir? Kinke rejelã bwe Bible eo ej kallimur bwe ro rej tiljek wõt ñan Jehovah renaj mour ñan indio ilo paradise ion lal. (Sam 37:29; 2 Piter 3:13; Reveles̃õn 21:3-5) Rej reimanlok ñan ien eo renaj lo jerammõn kein ibben ro beleir, ajiri ro nejiir, jemeir im jineir, ro jeiir im jatiir, im ajiri ro jibwiir. Elap air buromõj ñe rej lemnak bwe ro rejitenburu ibbeir me rar bõjrak jen air karejar ñan Jehovah remaroñ luji jerammõn kein! Ikijen mour eo air kiõ, Ri Christian ro rej kile bwe ewõr tokjen kien ko an Jehovah ñan ir. Kin men in, Ri Christian ro rej buromõj ñe rej lo an ro rej jitenburu ibbeir madmõd leen ko rekaburomõjmõj jen men ko rar jeori.​​—Aiseia 48:17, 18; Dri Galetia 6:7, 8.

⁴ Ro me rejañin bed ilo kain abañ rot in emaroñ bin air melele kin etke armij ro rej buromõj ñe men in ej walok. Emaroñ jelet enañin aolep wãwen air mour. “Ebinlok ñan jijet ilo kwelok ko an Christian im lo an ro jemen im jinen ettõñ im bwebwenato ibben ro nejiir,” Louise ej ba. “Meñe ilo ien ko rekamõnõnõ ij buromõj wõt kinke ro jitenburu ibba rejjab bed ie.” Juõn Christian elder ej kememej kin yiõ ko emen ke ledik eo nejin lio belen ear bukwelok. Ej ba: “Ekkã an walok bwe meñe ilo ien ko remõn kimar buromõj. Elañe iar lelok juõn men in lelok ñan lio ibba ak bõklok e ñan juõn jikin emõn ilo Saturday ak Sunday, enaj kar jañ, kinke ej kememej wõt bwe ledik eo nejimro ejjab bed im mõnõnõ ibbemro.”

⁵ Emol, ñe juõn eo ejitenburu ibbed ej illok jen tõmak eo ej juõn ian melejoñ ko relap rej waloktok ñan ri kabuñ ro remol. (Jerbal 14:22) Jesus ear ba bwe ennan eo an enaj kar kõmman jebel ilo jet family ko. (Matu 10:34-38) Ejjab melelen men in bwe ennan eo an Bible make ej kejebel family eo. Jen men in, ro uan family ko rejjab tõmak ak rejjab tiljek remaroñ kejebel ir ilo air karmijete, illok jene, ak jumae wãwen eo an Christian. Bõtab, jemaroñ kamolol bwe Jehovah ej tiljek ñan ro rej tiljek ñan e im ej lelok juõn wãwen bwe remaroñ kijenmij iumin melejoñ ko rej jelmae. Elañe kwoj buromõj kinke juõn eo ejitenburu ibbam ear illok jen mol eo, ta nan in kaiñi ko an Bible remaroñ jibañ yuk ñan kijenmij ilo ien in ekaburomõjmõj im kainemõn yuk bwe kwomaroñ lo mõnõnõ im juburu?

⁶ Kijenmij Wõt: “Komin mõke kalek kom . . . , im kejbãrok kom ilo yokwe an Anij.” (Jud 20, 21) Ekkar ñan wãwen ko am, bõlen ejelok jabdewõt men kwomaroñ kõmmane kiõ ñan jibañ juõn uan family eo ear bõjrak jen an karejar ñan Jehovah. Mekarta, kwomaroñ, aet, kwoj aikwij kalek kwe make im bwen ro jet uan family eo am. Veronica, eo me ear lo an ladik ro ruo nejin illok jen mol eo, ej ba: “Kimro leo ibba kimij kememej wõt bwe elañe kimij binwõt ilo tõmak, kim maroñ karuwainene ladik ro nejimro ñe rej ukwelok. Likao eo ejerwan, ilo parable eo an Jesus, en kar bed ia elañe jemen ear jab bojak in karuwaineneik e?”

⁷ Ñan kõmman bwe kwon kajur wõt ilo tõmak, kwoj aikwij niknik wõt ilo jerbal ko an kabuñ eo emol. Men in ekoba ad lor juõn lajrak emõn ñan lukkun ture katak ko an Bible im bed ilo kwelok ko an Christian. Kwon bojak in bõk eddo eo ñan jibañ ro jet ilo congregation eo joñan wõt am maroñ. Emol, ilo jinoin kwomaroñ lo bwe ebin am kõmmane men in. Veronica ej ba: “Ilo jinoin iar kõnan kamakelok iaõ jen ro jet einwõt juõn menin mour ejorrãn. Ak leo ibba ear ba bwe kimij aikwij ejmour wõt ilo jitõb. Ear lale bwe kimin keini in bed ilo kwelok ko. Ke ear ien ñan bed ilo juõn kwelok elap, iar aikwij kaberan iõ bwe in wõnmae armij ro. Ak, program eo ear kebake kim ñan Jehovah. Ladik eo nejim eo ear tiljek wõt ear bõk kõketak jen kwelok eo elap.”

⁸ Maria, eo me bwebwenato eo an ear bed ilo tujinoin katak in, ear lo tokjen jen an boub wõt ilo jerbal in kwalok nan im ej jibañ emen armij ro kiõ ñan air jelã kin Bible eo. Ilo ejja wãwen eo wõt, Laura ej ba: “Meñe ij jañ aolep ran, ij kamolol Jehovah bwe meñe ijañin lo tõbrak einwõt jet jemen im jinen ilo wãwen air kakajiririk ro nejiir, ennan eo ewãppen ilo Bible eo ej bed ibba, eo emaroñ jibañ family ko ilo ran kein eliktata.”

⁹ Kwon jab ebwer. Yokwe “ej kejatrikrik e kin men otemjej.” (1 Dri Korint 13:7) Ken ej ba: “Ke ajiri ro nejim rar illok jen mol eo, iar watõk ir einwõt rar dien mij. Ak elikin an mij bo eo jeiõ ak jatiõ, lemnak eo aõ ear oktak. Ij kamolol bwe ajiri ro nejiõ rejañin lukkun mij im bwe Jehovah ej kõmman bwe en bellok wõt ial eo bwe remaroñ bar jeblak ñan e.” Emol, emwij ad lo bwe elõñ ro rar illok jen mol eo rej jeblak tokelik.​​—Luk 15:11-24.

¹⁰ Jab naruõm make. Ro jemen im jinen rekin reiliklok im narueir make kin air jab kamadmõde abañ ko ibben ajiri ro nejiir ilo bar juõn wãwen emõnlok. Bõtab, point eo elap ilo Ezekiel 18:20 ej bwe Jehovah ej naruõn ri jerawiwi eo, jab jemen im jinen, kin bwid eo an. Ekaitoktoklimo bwe meñe book in Jabõn Kennan ej kwalok elõñ kamelele ko kin eddo eo an jemen im jinen ñan kakajiririk ro nejiir ilo jimwe, ewõr emen alen elõñlok in nan in kakabilek ko ñan ajiri ro bwe ren roñjake im bokake jemeir im jineir. Aet, meñe jemeir im jineir rejjab wãppen, ajiri ro rej aikwij inek eddo eo air ñan bokake ir ñe rej katakin ir ekkar ñan katak ko rej bedbed ion Bible eo. Meñe kwar kõmman bwid im kar wõr ruõm, ejjab melelen bwe eñin kar unin an eo ejitenburu ibbam illok jen mol eo. Jekdon ta, enaj ejelok tokjen ilo am ajlok kin men ko kwar kõmmani mokta. Kwon katak jen bwid ko am, jek ilo buruõm bwe kwon jab bar kõmmani, im jar ñan Jehovah im kajitõk bwe en jeorlok bwid eo am. (Sam 103:8-14; Aiseia 55:7) Inem reimanlok ñan ilju im jeklaj, im jab reiliklok.

¹¹ Kautiej karõk eo an Jehovah kin kauwe im katakin. Elañe juõn nukõm ear bõk kaje ilo congregation eo, kememej wõt bwe men in ej mõttan karõk eo an Jehovah im ej ñan emõn eo an aolep, ekoba eo ear kõmman bwid. (Dri Hibru 12:11) Kin men in, jab notaike elder ro me rar bõk kunair ak bebe ko rar kõmmani ñan ekajete nukõm. Kememej wõt bwe tõbrak ko remõntata rej walok ñe jej kõmman men ko ekkar ñan wãwen eo an Jehovah, kinke ñe jej jumae karõk ko an Jehovah enaj bõktok jorrãn.

¹² Elikin an ri Israel ro diojlok jen Egypt, ekkã an kar Moses jerbal einwõt juõn ri ekajet. (Exodus 18:13-16) Kinke ilo ien ekajet eo juõn emaroñ bõk jerammõn im eo juõn enaj bõk kaje, alikar bwe jet ian armij ro rar jab errã ibben bebe ko an Moses. Kin air naruõn Moses kin bebe ko an, bõlen eñin unin an armij ro jumae wãwen tel eo an jet ien. Bõtab, Jehovah ear kajerbal Moses ñan tel armij ro An, im Ear kajeik, jab Moses, ak ri jumae ro im family ko air kin air jab jurake. (Bwinbwin 16:31-35) Jemaroñ katak jen men in ilo ad kate kij ñan kautiej im jurake bebe ko an ro me rej tel dolul eo an Anij rainin.

¹³ Ikijen men in, Delores ej kememej kin ewi joñan an kar bin an debij juõn lemnak ejokkin wõt juõn ke ledik eo nejin ear bõk kaje jen congregation eo. “Men eo ear jibañ iõ,” ear ba, “kar aõ read im bar readi katak ko me rej jerbal kin emõnin karõk ko an Jehovah. Iar kejbãrok juõn notebook im jeje iloan kin katak ko me renaj jibañ iõ bwe in kijenmij im wõnmanlok ilo jerbal eo an Jehovah.” Men in ej tellok ñan bar juõn wãwen eaorõk ñan kijenmij.

¹⁴ Kwalok eñjake ko am. Kwonaj lo tokjen ñe kwoj kabellok buruõm ñan juõn ak ruo armij me kwoj ebake im liki. Ilo am kõmman eindein, kwon kãlet ro me renaj jibañ yuk ñan debij juõn lemnak ejimwe im emõn. Emol bwe men eo ekeie tata ej bwe kwon ‘kwalok buruõm’ ñan Jehovah. (Sam 62:7, 8) Etke? Kinke elukkun melele kin ewi joñan lap in inebata eo am. Ñan wanjoñok, kwomaroñ eñjake bwe ejjab jimwe bwe kwe eo kwoj aikwij eñtan kin buromõj rot in. Bwe, kwar jab illok jen Jehovah. Kwon kwalok eñjake ko am ñan Jehovah, im kajitõk kin jibañ ñan kadiklok am buromõj kin inebata eo.​​—Sam 37:5.

¹⁵ Tokelik, kwonaj maroñ bõk anjo ion eñjake ko am. Mae ien eo, kwon kate yuk ñan kabuñburuen Jemõm ilañ, im jab lemnak bwe ejelok tokjen am kõmman men in. (Dri Galetia 6:9) Kememej, elañe jej illok jen Jehovah, abañ ko renaj bedwõt. Ijo turãjet, ilo ad tiljek ñan e, enaj jibañ kij ñan kijenmij ilo melejoñ kein. Jen liki bwe Jehovah ej jelã kin ewi joñan an lap melejoñ ko jej jelmae im enaj wõnmanlok im kakajur kij ilo ien eo ejejjet.​​—2 Dri Korint 4:7; Dri Pilippai 4:13; Dri Hibru 4:16.

Wãwen Ami Maroñ Kijenmij

◆ “Kalek kom . . . , im kejbãrok kom ilo yokwe an Anij.”​​—Jud 20, 21.

◆ Komin jab ebwer.​​—1 Dri Korint 13:7.

◆ Jab naruõm make.​​—Ezekiel 18:20.

◆ Kautiej karõk eo an Jehovah kin kauwe im katakin.​​—Dri Hibru 12:11.

◆ Kwalok eñjake ko am.​​—Sam 62:7, 8.