Kwon Bedwot ilo Yokwe eo an Anij!
“Ro jitenburu, . . . kejbãrok kom ilo yokwe an Anij, . . . enaj lewõj mour indrio.”—JUD 20, 21.
1, 2. Ewi wãwen kwomaroñ bedwõt ilo yokwe eo an Anij?
JOÑAN an Jehovah yokwe armij ear letok Nejin ej make wõt ear keotak bwe jabdewõt eo ej jerbale tõmak ilo e emaroñ bõk mour indio. (Jon 3:16) Elap an emõn ñan eñjake yokwe rot in! Elañe kwoj juõn ian ro ri karejaran Jehovah, emol kwoj kõnan bõk yokwe rot in ñan indio.
2 Ri kalor eo Jude ear kwalok wãwen eo kwomaroñ bedwõt ilo yokwe eo an Anij. “Komin kalek kom make kin tõmak eo ami eo ekanuij kwojarjar. Komin jar kin kajur eo an Jitõb Kwojarjar,” Jude ear je, “im bed wõt ilo yokwe eo an Anij, ilo ami kõttar ad Iroij Jesus Christ, bwe kin tiriamokake eo an, enaj lewõj mour indrio.” (Jude 20, 21) Katak kin Nan in Anij im kwalok kin news eo emõn rej jibañ ñan kalek yuk ion “tõmak eo . . . ekanuij kwojarjar”—katak ko an Christian. Ñan bedwõt ilo yokwe eo an Anij, kwoj aikwij jar “kin kajur eo an Jitõb Kwojarjar,” ak ilo kilan. Ñan bõk jinekjej eo kin mour indio, kwoj aikwij bareinwõt jerbale tõmak ilo katok in binmour eo an Jesus Christ.—1 Jon 4:10.
3. Etke jet rar bõjrak jen air Ri Kennan ro an Jehovah kiõ?
3 Jet ro rar tõmak mokta rar jab bedwõt ilo yokwe eo an Anij. Kinke rar kãlet ñan air jibadõk juõn ial in jerawiwi, kiõ rejjab Ri Kennan ro an Jehovah. Ewi wãwen kwomaroñ kejbãrok yuk jen am iion wãwen in? Ilo am kalmenlokjen kin point kein emaroñ kejbãrok yuk jen am jerawiwi im jibañ yuk ñan bedwõt ilo yokwe eo an Anij.
Kwalok Am Yokwe Anij
4. Ewi aorõkin bokake Anij?
4 Kwalok am yokwe Anij ilo am bokake e. (Matu 22:37) “Bwe eñin yokwe Anij,” ri jilek John ear je, “bwe jen kejbãrok kien ko An: im kien ko An re jab erro.” (1 Jon 5:3) Elañe ekkã am bokake Anij men in emaroñ kakajur yuk ñan jumae men in kabo ko im kõmman bwe kwon lañliñ. Ri jeje sam ear ba: “Emõnõnõ armij eo e jab etal ilo bebe an ro dri jerawiwi, . . . a ej lõñliñ ilo kien Jeova.”—Sam Ko 1:1, 2.
5. Yokwe Jehovah enaj kamakit yuk ñan kõmman ta?
5 Am yokwe Jehovah enaj kamakit yuk ñan am bõprae am kõmman juõn jerawiwi elap me enaj katton etan. “Kwon jab letok jeramel ak elõñ mweiuk,” Agur ear jar. “Kwon najirik iõ e bwe ñõn ña: Ñe I ab mãt, inem karmijete Yuk, im ba, Wõn Jeova? ak in jab jeramel im kwot, im kajirere kake etan aõ Anij.” (Jabõn Kennan Ko 30:1, 8, 9) Kwon beek ilo buruõm bwe kwon jab ‘kajirere kake etan Anij’ ilo am katton etan. Jen men in, kwon kate yuk ñan kõmman men ko remõn me renaj kaibujuij e.—Sam Ko 86:12.
6. Ta eo emaroñ walok elañe kwoj jerawiwi ilo an buñburuõm kake?
6 Kwon keini am jar ñan Jemõm ilañ im kajitõk kin jibañ ñan bõprae am bo ilo men in kabo eo ñan lũñ. (Matu 6:13; Dri Rom 12:12) Kwon bokake wõt nan in kakabilek eo an Anij bwe en ejelok men in bõprae jar ko am. (1 Piter 3:7) Elañe kwoj jerawiwi ilo an buñburuõm kake, men in emaroñ bõktok jorrãn ko relap. Ej eindein kinke Jehovah, ilo nan in kõkkar, ej bõprae ial eo an ri jumae ro einwõt juõn kõdo emejel bwe jar ko air ren jab maroñ tõbar e. (Liejlol 3:42-44) Inem kwon kwalok ettã buru, im jar bwe jabdewõt men kwoj kõmmane en jab bõprae am kebak Anij ilo jar.—2 Dri Korint 13:7.
Kwalok Am Yokwe Nejin Anij
7, 8. Ewi wãwen bokake nan in kakabilek eo an Jesus enaj jibañ juõn armij ñan an karmijete juõn ial ebwid?
7 Kwon kwalok am yokwe Jesus Christ ilo am bokake kien ko an, bwe men in enaj jibañ yuk ñan karmijete juõn ial ebwid. “Elañe komij kejbãrok kien ko Aõ,” Jesus ear ba, “kom naj ber ilo Aõ yokwe; im einwõt I ar kejbãrok kien ko an Jema, im Ij ber ilo An yokwe.” (Jon 15:10) Ñe kwoj mour ekkar ñan nan kein an Jesus, ewi wãwen an naj jibañ yuk ñan bedwõt ilo yokwe eo an Anij?
8 Bokake nan ko an Jesus emaroñ jibañ yuk ñan kejbãrok am mour erreo. Kien eo Anij ear lelok ñan Ri Israel ro ear ba: “Kwon jab lũñ.” (Exodus 20:14) Bõtab Jesus ear kwalok juõn nan in keañ me ej bed ilikin kien in ilo an ba: “Jabrewõt eo ej kalimjek kõra im mijkaiye emwij an lũñ iben ilo buruen.” (Matu 5:27, 28) Ri jilek Peter ear ba kin jet ilo congregation eo ilo ebeben eo kein kajuõn bwe “mejeir r’obrõk kin lũñ” im ‘rar aujidi ro remõjno.’ (2 Piter 2:14) Bõtab, ilo am einjuõn jen ir, kwomaroñ bõprae jerawiwi ko kin lũñ im manit ko eierlok wõt elañe kwoj yokwe im bokake Anij im Christ im kwoj beek ilo buruõm bwe kwonaj kejbãrok kõtan eo am ibbeir.
Kõtlok Bwe Jitõbõn Jehovah En Tel Yuk
9. Ikijen jitõb kwojarjar eo, ta eo emaroñ walok elañe juõn armij ej wõnmanlok im jerawiwi?
9 Jar kin jitõb kwojarjar eo an Anij, im kõtlok bwe en tel yuk. (Luk 11:13; Dri Galetia 5:19-25) Elañe kwoj wõnmanlok wõt ilo ial in jerawiwi, Anij emaroñ bõk jitõb eo an jen yuk. Elikin an kar David jerawiwi ibben Bath-sheba, ear eowore Anij: “Kwon jab jolok iõ jen iman mejõm; im Kwon jab bõk jen ña Am Jitõb Kwojarjar.” (Sam Ko 51:11) Kinke ear jerawiwi im jab ukwelok, King Saul ear luji jitõb eo an Anij. Saul ear jerawiwi ke ear lelok juõn men in katok kijeek im ilo an kejbãrok im jab mõn bwij in sheep ko, cow ko, im king eo an Ri Amalek ro. Jen ien in manlok Jehovah ear bõk jitõb kwojarjar eo an jen Saul.—1 Samuel 13:1-14; 15:1-35; 16:14-23.
10. Etke kwoj aikwij karmijeteik lemnak eo ñan jerawiwi?
10 Kwon jab lemnak in kõmman jerawiwi ñan jidik. “Elañe jej jerawiwi ke buñburuer kake elikin ar bõk jela mol,” ri jilek Paul ear je, “ejelok bar juõn men in katok kin jerawiwi ej berwõt.” (Dri Hibru 10:26-31) Enaj juõn men in kaburomõj elap im nana elañe kwar jerawiwi ilo an buñburuõm kake!
Kwalok Yokwe eo Emol ñan Ro Jet
11, 12. Ilo wãwen et ko yokwe im kwalok kautiej rej kejbãrok juõn armij jen an kõmman mour in lũñ?
11 Yokwe ro ri turõm enaj kabõjrak yuk jen am lũñ ibbeir. (Matu 22:39) Yokwe rot in enaj kamakit yuk ñan kejbãrok buruõm bwe en jab kabo yuk ñan kwote yokwe eo an belen bar juõn armij. Elañe kwoj kõmmane emaroñ tellok ñan jerawiwi eo kin lũñ. (Jabõn Kennan Ko 4:23; Jeremiah 4:14; 17:9, 10) Kwon einwõt armij eo ewãnik Job, eo ear jab kõtlok bwe en mijkaieik jabdewõt kõrã me ear jab belen.—Job 31:1.
12 Kautiej kin kwojarjarin mour in belele emaroñ jibañ yuk ñan bõprae jerawiwi ko relap. Anij ear karõk bwe neje ej tellokin ro wõt im emwij air belele ilo erreo. (Jenesis 1:26-28) Jej aikwij kememej bwe mõttan ko ilo enbwinid kin belele rej ñan kowõnmanlok mour, eo ekwojarjar. Ro rej lũñ im lejen rejjab kwalok air bokake Anij, rej katton belele, rejjab kwalok kautiej kin kwojarjarin mour in belele, im rej jerawiwi nae enbwiniir make. (1 Dri Korint 6:18) Ak yokwe Anij im ri turin ekoba an bokake Anij enaj kejbãrok armij eo jen an kõmman juõn men me enaj tellok ñan an bukwelok jen congregation in Christian.
13. Juõn ri lũñ ej “draepe mweiuk ko mweien” ilo wãwen et?
13 Jej aikwij jolok lemnak ko rejõkkar bwe jen jab kõmetak buruen ro rejitenburu ibbed.“Eo ej kõmao iben kõra re kijoñ, ej draepe mweiuk ko mweien,” Jabõn Kennan Ko 29:3 ej ba. Juõn ri lũñ eo ejjab ukwelok ej kokkure kõtan eo an ibben Anij im ibben family eo an. Ewõr bedbedin an lio belen jebel jen e. (Matu 19:9) Jekdon elañe kar leo ak lio eo ear jerawiwi, jebel eo enaj lap an kõmetak eo ejelok ruõn, ajiri ro, im ro jet. Alikar bwe ilo ad jelã kin jorrãn ko renaj walok jen lũñ, men in en kar kamakit kij ñan jumae kabo eo ñan kõmmane.
14. Ta eo Jabõn Kennan Ko 6:30-35 ej katakin kin kõmman ko rebwid?
14 Mol eo bwe ejelok jabdewõt men emaroñ kõmmane ñan kajimwe lũñ en kar kamakit armij eo ñan bõprae kõmman in elap an kwalok kibbon. Jabõn Kennan Ko 6:30-35 ej kwalok bwe armij remaroñ tiriamokake juõn ri kwot eo ej kwot kin an kwuli, ak rej kitõtõkake juõn ri lũñ kinke enana buruen. Ej “kõmõn einwõt e kõnan kokkure an [ak, mour eo an].” Iumin Kien Moses, renaj kar mõn e ñan mij. (Livitikõs 20:10) Juõn armij eo ej lũñ ej kõmetak buruen ro jet kin an kõnan wõt kajuburuen mõm eo an, im juõn ri lũñ eo ejjab ukwelok ejjab bedwõt ilo yokwe eo an Anij ak renaj bukwelok e jen congregation eo erreo an Christian.
Kejbãrok juõn Bõklikit Erreo
15. Ta wãwen eo kin juõn bõklikit ebin “einwõt ñe jej itil kin mal ebwil”?
15 Ñan bedwõt ilo yokwe eo an Anij, jejjab kõnan kõtlok bwe bõklikit eo ad en iminene kake jerawiwi. Alikar, jejjab kõnan anõk mwil ko retton an lal, ak jej aikwij kwalok kejbãrok ikijen men ko einwõt wõn ro jej tel ad ibbeir, men ko jej konono, im men in kamõnõnõ ko. Paul ear kakkõl: “Ilo ien ko elik, jet re naj buñ jen tõmak, im eoroñ jitõb ro rej mon ir, im katak ko an dimõn rõn, kin jela mon an armij rej riõp, im bõklikõt ko air rebin im einwõt ñe jej itil kin mal ebwil.” (1 Timote 4:1, 2) Juõn bõklikit ebin “einwõt ñe jej itil kin mal ebwil” ej einwõt juõn kinej in annañ in bwil ilo kilin im ejelok eñjake ie. Kain bõklikit rot in ejamin kakkõl kij ñan ad kejbãrok kij jen ro rar ellok im jumae Anij im jen wãwen ko me remaroñ kõmman bwe jen buñ jen tõmak.
16. Etke eaorõk bwe en wõr ibbed juõn bõklikit erreo?
16 Lomor eo ad ej wawa ion ad bõk juõn bõklikit erreo. (1 Piter 3:21) Ikijen ad tõmak ilo bõtõktõkin Jesus eo emwij katorlok, kar karreoik bõklikit eo ad jen kõmman ko remij, bwe jen maroñ “jerbal ñõn Anij ejmour.” (Dri Hibru 9:13, 14) Elañe jej jerawiwi ilo an buñburuõd kake, bõklikit eo ad enaj jorrãn im jejamin armij ro rerreo im tellokin ad jerbal ñan Anij. (Taitõs 1:15) Ak kin jibañ jen Jehovah, emaroñ wõr ibbed juõn bõklikit erreo.
Wãwen ko Jet ñan Bõprae Mwil Nana
17. Ta tokjen eo jenaj bõke elañe jej ‘lor wõt Jehovah’?
17 Jej aikwij ‘lor wõt Jehovah,’ einwõt an kar Caleb ilo Israel eo etto kõmmane. (Duteronomi 1:34-36) Kõmman men ko Anij ekõnan bwe jen kõmmani, im jab lemnak in bõk jen “tebel in dimon rõn.” (1 Dri Korint 10:21) Karmijeteik ro rar ellok im jumae Anij. Ilo kamolol bõk ekan ko lor jitõb me ewõr wõt ilo table eo an Jehovah, inem ri kaki wan ro im jitõb ro renana rejamin naj maroñ kajebwãbweik yuk. (Dri Epesõs 6:12; Jud 3, 4) Lemnak wõt kin men ko lor jitõb, einwõt katak Bible, bed ilo kwelok ko, im jerbal in kwalok nan. Kwonaj mõnõnõ elañe kwoj lor wõt Jehovah im boub wõt ilo jerbal eo an Iroij.—1 Dri Korint 15:58.
18. Ewi wãwen am mijak Jehovah enaj jelet mwilõm?
18 Kwon beek ilo buruõm bwe kwonaj “jerbal ñõn Anij im kabuñburuen kake kin ujõke ekwojarjar im mijõk.” (Dri Hibru 12:28) Mijak eo ekwojarjar kin Jehovah enaj kamakit yuk ñan karmijete jabdewõt ial ko rebwid. Enaj jibañ yuk ñan jerbal ekkar ñan nan in kakabilek eo an Peter ñan ri kabit ro mõttan: “Im elañe kom jar ñõn Anij einwõt Jememi, Eo ej ekajet armij otemjej ekar ñõn jerbal ko air, im jab kaljiklok armij, komin ber iomin ien ami drua maijet ilo mijõk.”—1 Piter 1:17.
19. Etke kwoj aikwij jerbale men ko kwoj katak kaki jen Nan eo an Anij ien otemjej?
19 Ien otemjej kwon jerbale men ko kwar katak kaki jen Nan eo an Anij. Men in enaj jibañ yuk ñan bõprae jerawiwi ko relap kinke kwonaj bed ibwiljin “ro kin air minene rej maroñ in jela kajen emõn im nana.” (Dri Hibru 5:14) Jen am jabde ilo konono im mwil, kwon kate yuk ñan etetal einwõt juõn armij emeletlet, “im wiaik ien,” ilo ran kein eliktata. “A komin jelalokjen ta eo ankil an Iroij,” im wõnmanlok im kõmmane.—Dri Epesõs 5:15-17; 2 Piter 3:17.
20. Etke jej aikwij kejbãrok kij jen ankwonak?
20 Kwon jab najikin ankwonak—arõk men ko rejjab am. Juõn ian Kien ko Joñoul ej ba: “Kwon jab ankwõnak imõn dri turum, kwon jab ankwõnak lio belen dri turum, jab korijeran man, jab korijeran kõra, jab an kau, jab an ass, jab men eo jabrewõt an dri turum.” (Exodus 20:17) Kien in ear kejbãrok mweo imõn, lio belen, ri karejar ro, im menin mour ko an juõn armij. Ak men eo eaorõktata ej nan ko an Jesus bwe ankwonak ej kananaik juõn armij.—Mark 7:20-23.
21, 22. Ta men ko juõn Ri Christian emaroñ kõmmani ñan kejbãrok e jen an jerawiwi?
21 Kwoj aikwij kejbãrok bwe mõm en jab tellok ñan am kõmman jerawiwi. Ri kalor eo James ear je: “A emwij kabo jabrewõt armij ñe mõm ko an rej karel buruen im kamej e. Inem ñe mõm eo e ar etta, ej keutak jerawiwi: im jerawiwi eo ñe e ridtolok, ej keutak mij.” (Jemes 1:14, 15) Ñan wanjoñok, elañe juõn armij ear juõn ri kadõk mokta, emaroñ bebe bwe en ejelok den ko einwõt wain im bia ko ilo mweo imõn. Ñan bõprae men in kabo eo me ej kitibuj juõn kõrã elañe kwoj juõn emaan, ak juõn emaan elañe kwoj juõn kõrã, juõn Ri Christian emaroñ aikwij jeniji jikin eo ej jerbal ie ak jikin jerbal eo an.—Jabõn Kennan Ko 6:23-28.
22 Kwon jab bõk buñten nee eo moktata ñan jerawiwi. Katoojoj im lemnak kin men ko rejõkkar remaroñ tellok ñan lũñ ak lejen. Ñe juõn armij ej kwalok riap ko redik emaroñ kaberan e ñan an kwalok riap ko relap im tellok ñan an kõmman bwe en juõn manit ibben. Kwoti men ko redik remaroñ kokkure bõklikit eo an juõn armij ñan joñan eo ej jino kwot men ko relap. Meñe jidik wõt an juõn armij roñjake lemnak ko an ro rar buñ jen tõmak im jumae Anij, men in emaroñ bareinwõt tellok e ñan an ellok im jumae Anij.—2 Ri Thessalonica 2:3; Reveles̃õn 21:8.
Ta elañe Kwar Jerawiwi?
23, 24. Ta nan in kainemõn ko jemaroñ bõki jen 2 Kronikel 6:29, 30 im Jabõn Kennan Ko 28:13?
23 Aolep armij rejjab wãppen. (Ekklisiastis 7:20) Ak elañe kwar kõmman juõn jerawiwi elap, kwomaroñ bõk kainemõn jen jar eo an King Solomon ilo ien aje temple eo an Jehovah. Solomon ear jar ñan Anij: “Jabrewõt jar im akwelap jabrewõt armij ej kõmõne, ak ro drom Israel otemjej, ro jabrewõt iair e naj jela iñtan eo an im buromõj eo an, im e naj erlokwe pein ñõn mwin; inem Kwon roñjake jen lõñ ko, jikõm, im Kwon jolok bwir, im lelok ñõn jabrewõt armij ekar ñõn ial otemjej an, im buruen Kwo jela kake; (bwe Kwe, Kwe wõt Kwo jela buru ko buruen ro nejin armij).”—2 Kronikel 6:29, 30.
24 Aet, Anij ejelã buruen armij im ej mõnõnõ in jeorlok bwid. Jabõn Kennan Ko 28:13 ej ba: “Eo ej kalibubu bwir ko an, e jamin jerammõn; a eo ej kwalok im illok jen e, e naj bõk tiriamo.” Juõn armij emaroñ bõk tiriamo jen Anij ilo an kwalok bwid eo an im illok jen jerawiwi eo. Ak, elañe kwoj mõjno ilo jitõb, bar ta emaroñ jibañ yuk ñan bedwõt ilo yokwe eo an Anij?
• Ewi Wãwen Kwonaj Uak?
• Ewi wãwen jemaroñ bedwõt ilo yokwe eo an Anij?
• Ewi wãwen yokwe eo ad kin Anij im Christ enaj jibañ kij ñan karmijete juõn ial in jerawiwi?
• Etke yokwe eo emol kin ro jet enaj kejbãrok kij jen ad lũñ ibbeir?
• Ta jet ian wãwen ko ñan bõprae mwil ko renana?
[Pija eo ilo peij 7]
Jude ej kwalok kijkan ad maroñ bedwõt ilo yokwe eo an Anij
[Pija eo ilo peij 9]
Jebel emaroñ lap an kõmetak belen eo ejelok ruõn im ajiri ro
[Pija eo ilo peij 10]
Einwõt Caleb, emwij ke am beek ilo buruõm ñan am ‘lor wõt Jehovah’?
[Pija eo ilo peij 11]
Kwon ekkeini am jar kin jibañ ñan jumae men in kabo ko