Jibañ Ro Jet Ñan Air Bokake Ta Eo Bible Ej Katakin

“A eo ion brij emõn, rein ro emol im emõn burueir, im ke emwij air roñjake nan, rej drebije, im kijenmij ilo air jebar leen.”​—LUK 8:15.

1, 2. (a) Kar eiki book eo What Does the Bible Really Teach? kin un et eo? (b) Ilo yiõ ko rej kab motlok, ewi wãwen an kar Jehovah kajerammõn jibadbad ko an armij ro an ñan air kõmman ri kalor ro?

“BOOK in ekanuij lap an emõn. Ri katak ro aõ relukkun yokwe. Ña bareinwõt ij yokwe. Book in ej kõmman bwe en bidodo ad ijjino katak kin Bible ko ibben armij iturin wõt kejam ko air.” Eindein an juõn ri kwalok nan full time an Ri Kennan ro an Jehovah ear ba ikijen book eo What Does the Bible Really Teach? (Ta eo Bible Ej Lukkun Katakin?)a Ilo an konono kin ejja book eo wõt, juõn ri kwalok kin Ailiñ eo eritto ear ba: “Iar bõk jerammõn eo ñan jibañ elõñ armij ñan air jelã Jehovah iumin yiõ ko 50 in aõ kar kijejeto in kwalok nan. Ak ij aikwij ba bwe, book in katak in elukkun emõn. Pija ko im wanjoñok ko iloan elap air kamakit buruõ im kalañliñ iõ.” Ej eindein eñjake ko an elõñ ri kwalok ro ibelakin lal kin Bible Teach (Ta eo Bible Ej Lukkun Katakin?) book eo. Kar eiki book in ñan jibañ kij kajejjet nan in kakien eo an Jesus: “Komin ilok, im kõmõn dri ailiñ ko otemjej bwe ren dri kalora, . . . katakin ir bwe ren bokake nan ko otemjej I ar jiroñ kom.”​—Matu 28:19, 20.

² Ejelok bere bwe, ej kalañliñ buruen Jehovah ñe ej lo enañin 6.6 million Ri Kennan ro an rej mõnõnõ in bokake nan in jiroñ eo an Jesus ñan kõmman ri kalor ro. (Jabõn Kennan Ko 27:​11) Alikar bwe Jehovah ej kajerammõn jibadbad ko air. Ñan wanjoñok, ilo 2005, kar kwalok kin news eo emõn ilo 235 ailiñ ko im kar kõmman elõñlok jen 6,061,500 katak kin Bible ko. Tokjen men in, elõñ armij rar ‘roñjake nan in Anij, im bõke, jab einwõt nan in armij, a eindein emol, einwõt nan in Anij.’ (1 Dri Tessalonika 2:​13) Iumin yiõ ko ruo rej kab motlok, elõñlok jen jimettan million ri kalor ro rekãl rar ukõt wãwen air mour bwe en ekkar ñan kien ko an Jehovah im rar wujleplok air mour ñan Anij.

3. Ta kajitõk ko ikijen kajerbal Bible Teach book eo jenaj etali ilo katak in?

³ Kwonañin ke iion lañliñ eo ñan kõmman juõn katak kin Bible ibben juõn armij? Ibelakin lal, ewõr wõt armij ro “emol im emõn burueir” me elikin air roñjake nan in Anij renaj “drebije, im kijenmij ilo air jebar leen.” (Luk 8:​11-15) Jen lale ewi wãwen jemaroñ kajerbal Bible Teach book eo ilo jerbal eo ad ñan kõmman ri kalor ro. Ilo bwebwenato eo ad jenaj etale jilu kajitõk ko: (1) Ewi wãwen kwomaroñ jino juõn katak kin Bible? (2) Ta kõl ko kilen katakin elaptata air keie? (3) Ewi wãwen am maroñ jibañ juõn armij ñan an jab juõn ri katak wõt ak bareinwõt juõn ri katakin Nan in Anij emwij jeje, Bible eo?

Wãwen eo Kwomaroñ Jino juõn Katak kin Bible

4. Etke jet remaroñ makoko in katak Bible eo, im ewi wãwen ad maroñ jibañ ir ñan anjo ion jab kõnan eo air?

⁴ Elañe rar kajitõk ibbam bwe kwon kãjoone juõn river edik ilo juõn wõt alen, bõlen kwonaj makoko in kõmmane. Ak elañe ewõr dekã in jijuur ko kar likiti iolap, emaroñ laplok am kõnan kajeoñ in kijone river eo. Eindein, juõn armij eboub emaroñ makoko in katak Bible eo. Ri mweo emaroñ lemnak bwe enaj bõk elap ien im kate ñan an katak. Ewi wãwen juõn ri kwalok emaroñ jibañ e ñan bõk juõn eñjake in mõnõnõ ñan katak Bible? Ilo an kõmman jet bwebwenato ko rekadu ak ewõr tokjeir, emaroñ kajerbal Bible Teach book eo ñan tel armij eo ñan an keini an katak Nan in Anij. Elañe ej emõn an kebojak, kajjojo ien an jeblak ibben armij eo enaj einwõt dekã in jijuur ko ñan an kaddek juõn jimjera ibben Jehovah.

5. Elañe ewõr Bible Teach book eo ilo juõn kajin kwo melele kake, etke kwoj aikwij bõk ien ñan am konono kake?

⁵ Bõtab, mokta jen an juõn ri kwalok maroñ jibañ bar juõn armij bõk tokjen jen Bible Teach book eo, ej aikwij lukkun jelã kobban. Ruo ri belele ro rar bõk book in ibbeir ke rar kakije im jino readi ke rar bed ion barijet eo. Ke juõn kõrã in bukwon eo me ej wiakake mweiuk ko ñan ri aluij ro ear kebak ir, lio ear lo unin tel in book eo What Does the Bible Really Teach? (Ta eo Bible Ej Lukkun Katakin?) Lio ear ba ñan ri belele ro bwe jejjo awa ko moktalok, ear jar im kajitõk ibben Anij kin uak eo ñan ejja kajitõk in wõt. Ri belele ro rar mõnõnõ in lelok juõn copy in book in ñan kõrã eo. Elañe ewõr book in ilo juõn kajin kwo melele kake, kwar ke ‘wiaik ien’ ñan konono book in? (Dri Epesõs 5:​15, 16) Elañe kwoj kõmmane, kwonaj jelã kin kobban book eo im emaroñ bareinwõt kabellok ien ko remõn ñan am konono ibben ro jet kin katak ko iloan.

6, 7. Ewi wãwen ad maroñ kajerbal Bible Teach book eo ñan ijjino katak ko kin Bible?

⁶ Ñe jej lelok book in ilo jerbal in kwalok nan eo ad, ri kwalok ro remaroñ kortokjen pija ko, eon ko, im kajitõk ko ilo page 4, 5, im 6. Ñan wanjoñok, jemaroñ jino juõn bwebwenato ilo ad kajitõk, “Kinke armij ro rainin rej jelmae elõñ kain abañ ko, ia eo jemaroñ bõk tel eo emõntata im jemaroñ liki?” Elikin ad roñjake uak eo an armij eo, konono 2 Timote 3:​16, 17, im kamelele bwe Bible eo ej letok mejelan eo emol kin abañ ko an armij. Inem, kareilok ri mweo ñan page 4 im 5, im kajitõk: “Jen ian aolep pija ko ilo page kein, ta ian abañ kein relukkun kainebataik yuk?” Ñe ri mweo ej jitõñlok ñan juõn iair, jemaroñ kõtlok an jibwe book eo ñe jej konono eon eo jen Bible eo ad. Jeltokin, jemaroñ konono page 6, im kajitõk ibben ri mweo, “Jen kajitõk kein jiljino rej walok ilo tulal in page in, ta iair kwokõnan bõk uak eo kake?” Ñe armij eo ej kãlet juõn, kwalok chapter eo me enaj uake kajitõk eo, likit book eo ibben, im kõmman karõk ñan bar jeblak im bwebwenato kake kajitõk eo.

⁷ Ennan eo ilo paragraph eo lok iman jemaroñ kwaloke iumin lalem wõt minute ko. Bõtab, iumin jejjo wõt in minute kein, jaar katak kin ta eo ri mweo ej itoklimo kake, konono im jerbale ruo eon ko, im likit bedbed eo ñan bar jeblak. Bwebwenato eo ad ekadu ibben ri mweo emaroñ kar men eo elaptata an kõketak im kainemõn ear iione jen etto. Tokjen men in, meñe juõn armij eboub enaj mõnõnõ in jolok jejjo minute ibbed ñe jej jibañ e bõk buñten nee ko jet ñan an deloñ ilo ‘ial eo ej tellok ñan mour.’ (Matu 7:​14) Tokelik, ñe elaplok itoklimo eo an ri mweo, jemaroñ kaetoklok ien katak eo. Jemaroñ kõmman men in ilo ad ba bwe jej mõnõnõ in jijet ibben im katak iumin juõn ien kar kajejjete im eaetoklok.

Kilen Katakin ko Remõntata

8, 9. (a) Ewi wãwen ad maroñ keboje ri katak Bible ro ad ñan air jutak bin nae abañ ko im melejoñ ko remaroñ iioni? (b) Ia eo jemaroñ lo kõbwebweien ekkal ko ilo jitõb rejjab maroñ bwil ie ñan kalek juõn tõmak ekajur?

⁸ Ñe juõn armij ej jino an bokake ta eo Bible eo ej katakin, ekkã an naj jelmae men ko me remaroñ kabañ an kõmman wõnmanlok. Ri jilek Paul ear ba: “Ro otemjej re kõnan mour im kwojarjar ilo Kraist Jisõs, naj matõrtõre ir.” (2 Timote 3:​12) Paul ear keidi melejoñ kein ñan juõn kijeek me enaj tili juõn em kõmman jen men ko rebidodo ak men ko rebin einwõt gold, silver, im dekã aorõk rejamin jorrãn. (1 Dri Korint 3:​10-13; 1 Piter 1:​6, 7) Ñan jibañ ri katak Bible eo am kaddek kadkad ko ej aikwiji ñan an jutak bin iumin melejoñ ko emaroñ iioni, kwoj aikwij jibañ e ilo am kalek foundation eo an kõmman jen men ko rebin.

⁹ Ri jeje sam ej keidi “nan ko an Jeova” ñan “silver emwij karreo e ilo brij in ubaj, karreo e alen jiljilimjuõn.” (Sam Ko 12:⁠6) Emol, ewõr ilo Bible eo aolep kõbwebweien ko ilo jitõb raorõk me jemaroñ kajerbali ñan kalek juõn tõmak ekajur. (Sam Ko 19:​7-11; Jabõn Kennan Ko 2:​1-6) Im book eo Bible Teach ej kwalok ñan kij kilen kajerbal Bible eo ilo juõn wãwen ekeie.

10. Ewi wãwen ad maroñ kareilok ri katak eo ñan an lale Bible eo?

¹⁰ Ilo ien katak eo, kareilok ri katak eo ñan an lale eon ko rej walok ilo kajjojo chapter ko komij bwebwenato kake. Kajerbal kajitõk ko ñan jibañ ri katak eo ñan an melele eon ko raorõk im wãwen an maroñ jerbale. Jej aikwij kejbãrok bwe jen jab jiroñ e kin ta eo ej aikwij kõmmane. Jen an eindein, jej aikwij anõk joñok eo an Jesus. Ke juõn emaan eo ear jelã Kien eo ear bõkmantak juõn kajitõk ibben, Jesus ear uak: “Ta men eo jeje ilo kien? ekijkan am konono kaki?” Leo ear uak jen Jeje Ko, im Jesus ear jibañ e ñan lo wãwen an maroñ jerbale nan in kaiñi eo ñan emake. Ilo an kajerbal juõn wanjoñok, Jesus ear bareinwõt jibañ leo ñan lo ewi wãwen katak eo en kar jelet e. (Luk 10:​25-37) Bible Teach book eo eobrak kin wanjoñok ko relamwan me jemaroñ kajerbali ñan jibañ juõn ri katak ñan an jelã kilen jerbale nan in kaiñi ko ilo Bible eo ñan emake.

11. Ewi joñan katak eo kwoj aikwij etale ilo kajjojo ien katak?

¹¹ Bible Teach book eo ej kamelele kin Nan in Anij ilo an kajerbal nan ko relamwan im alikar, einwõt an kar Jesus kajerbal nan ko relamwan ñan kwalok kin lemnak ko rekabwokbwok. (Matu 7:​28, 29) Lor joñok eo an. Kwalok melele ko ilo nan ko relamwan, alikar, im jimwe. Jen jab kakaiur ñe jej katak jen book eo. Jen an eindein, kõtlok bwe wãwen ko ibben ri katak eo im joñan maroñ eo an ñan melele katak eo ren beek kin jete paragraph ko kom naj bwebwenato kaki ilo kajjojo ien katak. Jesus ear jelã kin joñan maroñ ko an ri kalor ro an im ear jab lelok ñan ir melele ko e le jen air aikwiji ilo ien eo.​—Jon 16:⁠12.

12. Ewi wãwen jen kajerbal appendix eo?

¹² Bible Teach book eo ewõr juõn appendix (melele ko jet) me ej kamelele kin 14 katak ko. Ilo lemnak kin aikwij ko an ri katak eo, ri katakin eo ej aikwij bebe kin ewi wãwen eo emõntata ñan kajerbal melele kein. Ñan wanjoñok, elañe ebin an juõn ri katak melele kin juõn katak ak ewõr kajitõk ko kinke ear oktak tõmak ko an mokta, jemaroñ baj kareilok e ñan katak ko rekkar ilo appendix eo im kõtlok an make etale. Ijo turãjet, aikwij ko an ri katak eo emaroñ kõmman ad aikwij etale katak kein ibben. Appendix eo ewõr kamelele kin katak ko raorõk ilo Bible, einwõt “ ‘Soul’ and ‘Spirit’​​—What Do These Terms Really Mean?” (‘Aan’ im ‘Jitõb’​—Ta Lukkun Melelen Nan Kein?) im “Identifying ‘Babylon the Great.’ ” (Kile ‘Babylon eo Elap.’) Bõlen kwonaj kõnan etale katak kein ibben ri katak eo. Kinke ejelok kajitõk ko kar keboji kin katak ko ilo appendix eo, jej aikwij jelã melele ko ie bwe jen maroñ kõmman kajitõk ko rekeie.

13. Ilo wãwen et eo jar emaroñ kakajur tõmak?

¹³ “Elañe Jeova e jab kalek mweo, ro rej kaleke re jerbal bata; elañe Jeova e jab kejbãrok imõn kwelok eo, dri ekil ej ekil bata,” Sam Ko 127:1 ej ba. Kin men in, ñe jej kebojak ñan katak Bible ibben juõn armij, jar ñan Jehovah kin jibañ. Kõmman bwe jar ko am ilo jinoin im jemlokin kajjojo ien katak ren kwalok kin kõtan eo am ebak ibben Jehovah. Rejañ ri katak eo ñan an jar ñan Jehovah kin meletlet ñan an maroñ melele kin Nan eo An im kin kajur eo ñan jerbale nan in kakabilek ko iloan. (Jemes 1:⁠5) Elañe ej kõmmane, ri katak eo enaj bõk kakajur ñan an maroñ kijenmij kin melejoñ ko im enaj kajurlok wõt ilo tõmak.

Jibañ Ri Katak Ro ñan Air Erom Ri Katakin

14. Kain wõnmanlok rot ri katak ro rej aikwij kõmmane?

¹⁴ Elañe jekõnan bwe ri katak Bible ro ad ren bokake “nan ko otemjej” Jesus ear kakien ri kalor ro an kaki, rej aikwij wõnmanlok jen air ri katak ro kin Nan in Anij ñan air erom ro rej katakin. (Matu 28:​19, 20; Jerbal 1:​6-8) Ta eo jemaroñ kõmmane ñan jibañ juõn ri katak ñan an kõmman wõnmanlok rot in ilo jitõb?

15. Etke jej aikwij rejañ ri katak ro ñan air bed ilo kwelok ko an Christian?

¹⁵ Jen ien katak eo kein kajuõn, jej aikwij kirtok ri katak eo ñan an itok ibbed ñan kwelok ko an congregation eo. Kameleleik e bwe kwelok ko rej ijo jej bõk kaminene eo ad einwõt ri katakin kin Nan in Anij. Iumin jejjo wõt week ko, jemaroñ bõk jidik ien ilo jemlokin kajjojo ien katak ñan ad kameleleik e kin program in katak kin men ko lor jitõb me jej bõki jen kwelok ko im assembly ko. Konono ilo kijejeto kin tokjen ko jej bõki jen ien kein. (Dri Hibru 10:​24, 25) Ñe ri katak eo ej jino in keini an bed ilo kwelok ko, ekkã an naj erom juõn ri katakin kin Nan in Anij.

16, 17. Ta jet ian mejenkajjik ko me juõn ri katak emaroñ likiti im jibadõki?

¹⁶ Jibañ ri katak eo ñan an kõmman mejenkajjik ko me emaroñ jibadõki. Ñan wanjoñok, rejañ e ñan an konono ibben juõn jeran ak nukin kin ta eo ej katak kake. Bareinwõt, rejañ e bwe en likit mejenkajjik eo ñan an read aolepen Bible eo. Elañe jej jibañ e ñan kajutak im kejbãrok juõn manit ñan read Bible, enaj bõk tokjen im debij wõt manit in meñe elikin emwij an baptais. Bareinwõt, jemaroñ rejañ ri katak eo ñan an kõmman mejenkajjik eo ñan kememej juõn eon ilo Bible me ej uak juõn kajitõk eaorõk ilo kajjojo chapter ilo Bible Teach book eo. Ilo an kõmmane, enaj erom juõn “dri jerbal e jamin jok im ejimewõt an katakin kin nan in mol.”​—2 Timote 2:⁠15.

¹⁷ Jen ad katakin juõn ri katak ñan an baj elij juõn eon nan kin nan ak kwalok lemnak eo wõt kin ta eo ej ba, rejañ e ñan kamelele kin eon ko rekkar im aorõk ñe ej lelok juõn uak ñan ro rej kajitõk ibben kin unin tõmak eo an. Ien kamelmel ko rekadu remaroñ jibañ, ilo am bõk jikin juõn nukin ak ri jerbal eo mõttan eo ej kajitõk ibben ñan kamelele kin tõmak ko an. Ñe ri katak eo ej uak, kwalok ñan e kilen an maroñ uak ilo “inimõn im mijõk.”​—1 Piter 3:⁠15.

18. Ñe juõn ri katak ej tellokin jerbal einwõt juõn ri kwalok ejañin baptais, ta jibañ ko jet jemaroñ lelok ñan e?

¹⁸ Tokelik, ri katak eo emaroñ tellokin bõk kunan ilo jerbal in kwalok nan. Kalikar ñan e bwe ej juõn jerammõn elap ñan an maroñ bõk kunan ilo jerbal in. (2 Dri Korint 4:​1, 7) Ñe elder ro rej bebe bwe ri katak eo emaroñ jerbal einwõt juõn ri kwalok ejañin baptais, jibañ e ñan keboj juõn ennan elamwan inem etal ibben ilo jerbal in kwalok nan. Wõnmanlok im ekkeini am jerbal ibben ilo wãwen ko reoktak jen don ilo jerbal in kwalok nan, im katakin e kilen kebojak im kõmman bar jeblak ko rekeie. Joñok eo am emõn enaj juõn kilan emõn ñan e.​—Luk 6:⁠40.

“Kwo Naj Make Lomoren Yuk Kab Ro Rej Roñjake Yuk”

19, 20. En ta mejenkajjik eo ad, im etke?

¹⁹ Ejelok bere bwe, jej aikwij lukkun kate ñan jibañ juõn armij ñan an “jela mol.” (1 Timote 2:⁠4) Bõtab, eiet men ko rej kalañliñ kij ilo mour remaroñ laplok jen mõnõnõ eo jej bõke ñe jej jibañ juõn armij ñan an bokake ta eo Bible ej katakin. (1 Dri Tessalonika 2:​19, 20) Emol, ej juõn jerammõn elap bwe jen maroñ “dri jerbal iben Anij” ilo jerbal in katakin in ej walok ibelakin lal!​—1 Dri Korint 3:⁠9.

²⁰ Mõttan jidik, ikijen Jesus Christ im enjel ko rekajur, Jehovah enaj kajejjet ekajet eo an ion “ro rejaje Anij kab ro rejjab bokake Nan eo Emmõn kin ad Iroij Jesus.” (2 Ri Thessalonica 1:​6-8) Mour ko an armij rej bed ilo kauwatata. Jemaroñ ke kõmman bwe en mejenkajjik eo ad ñan kõmman, ilo joñan eo ediktata, juõn katak kin Bible ilo book eo What Does the Bible Really Teach? Ñe jej bõk kunad ilo jerbal in, ewõr ibbed ien eo emõn ñan ad “mõke lomoren [kij], kab ro rej roñjake [kij].” (1 Timote 4:​16) Kiõ elaplok jen mokta, eaorõk bwe jen jibañ ro jet ñan air bokake ta eo Bible eo ej katakin.

[Footnotes]

Ta Eo Kwar Katak Kake?

• Bible Teach book eo kar eiki kin un et eo?

• Ewi wãwen ad maroñ jino katak kin Bible ko ilo ad kajerbal Bible Teach book eo?

• Ta kilen katakin ko remõntata?

• Ewi wãwen ad maroñ jibañ juõn ri katak ñan an erom juõn ri katakin Nan in Anij?

[Pija eo ilo peij 13]

Juõn bwebwenato ekadu emaroñ kamakit juõn armij ñan an kõnan bõk jelãlokjen kin Bible eo

[Pija eo ilo peij 14]

Ta eo kwomaroñ kõmmane ñan kareilok ri katak eo ñan Bible eo?

[Pija eo ilo peij 15]

Kwoj kortokjen ke book in?

[Pija eo ilo peij 16]

Jibañ ri katak eo ñan kõmman wõnmanlok