Kwon Kalaplok Wõt Am Kamolol

“Lemnok ko Am re nañin aurõk iba, O Anij! Air koba e kanuij lap!”​—SAM KO 139:⁠17.

1, 2. Etke jej aikwij kamolol kin Nan eo an Anij, im ewi wãwen an kar ri jeje sam kwalok kin kamolol eo an?

JUÕN men ejej uan rar loe. Ke rar kõkãle temple eo an Jehovah ilo Jerusalem, Hilkiah Priest Elap eo ear lo “buk in kien Jeova letok kin Moses,” me ejelok bere kar copy eo moktata kar kõmmane enañin 800 yiõ ko moktalok! Kwomaroñ ke lemnak kin ewi kar eñjake eo an King eo ej mijak Anij Josiah ke rar likit book eo iman? Emol, ear lap an kaorõke im ilo ien eo wõt ear kajitõk bwe Shaphan, ri jeje eo, en konono jen e ilo juõn ainikien emõn roñjake.​—2 Kronikel 34:​14-18.

² Rainin, billion armij ro remaroñ konono Nan in Anij, einwõt juõn Bible eyu ak ilo mõttan ko. Ak men in ej kõmman ke bwe en diklok aorõkin Bible eo? Ilo mol, jaab! Kinke lemnak ko an eo Ekajur Bõtata ebed iloan, eo kar jeje ñan tokjen eo ad. (2 Timote 3:​16) Ilo an kwalok eñjake ko an kin Nan eo an Anij, ri jeje sam David ear je: “Lemnok ko Am re nañin aurõk iba, O Anij! air koba e kanuij lap!”​—Sam Ko 139:⁠17.

3. Ta eo ej kwalok bwe David ear mũlal an kamolol kin kõtan eo an ibben Anij?

³ Kamolol eo an David kin Jehovah, Nan eo an, im karõk eo an kin kabuñ eo emol ear jab diklok. Sam ko relõñ im aibujuij David ear kine rej kwalok kin eñjake ko an. Ñan wanjoñok, ilo Sam Ko 27:​4, ear je: “Juõn aõ kar kajitõk iben Jeova, men in I naj kabukot; bwe in jokwe ilo imõn Jeova ran ko otemjej ñe ij mour; bwe in lo wõleo an Jeova, im bwe in kajitõk ilo tempel eo An.” Ilo kajin Hebrew eo jinoin, nan ko rar ukõti ilo Bible in Majõl einwõt “in kajitõk ilo tempel eo An” ear melelen ñan kalmenlokjen, liñõre, ñan lale ilo mõnõnõ im lañliñ. Alikar, David ear juõn armij emũlal kõtan eo an ibben Anij. Ear lukkun kamolol kin men in letok ko ilo jitõb Jehovah ear litoki im mol ko ear kwalok kaki. Inem jen anõke joñok eo an emõn kin kamolol.​—Sam Ko 19:​7-11.

Kamolol kin Jerammõn eo kin Am Jelã Mol ko ilo Bible

4. Ta eo ear kõmman bwe Jesus en “lõñliñ ilo Jitõb Kwojarjar”?

⁴ Melele eo kin Nan in Anij ejjab wawa ion meletlet ko relap ak jelãlokjen ko an lal in, me ekkã air kõmman bwe juõn en utiej buru. Jen an eindein, men in ej wawa ion joij eo an Jehovah, eo ej kwaloke ñan armij ro ettã im emol burueir im rej kile aikwij ko air ilo jitõb. (Matu 5:3; 1 Jon 5:​20) Ke Jesus ear kalmenlokjen kin mol eo bwe jet armij ro rejjab wãppen naj jeje etair ilo lañ, ear “lõñliñ ilo Jitõb Kwojarjar, im ba, Kom mol, O Jema, Iroij in lõñ im lõl, bwe Kw’ar noj men kein jen dri meletlet im dri jelalokjen, im Kw’ar kwaloki ñõn niñniñ ro.”​—Luk 10:​17-21.

5. Etke ri kalor ro an Jesus ren kar jab kajekdon mol ko an Ailiñ eo kar kwaloki ñan ir?

⁵ Elikin an kwalok nan kein ilo jar eo an jen buruen, Jesus ear oktak ñan ri kalor ro an im ba: “Emõnõnõ mej ko rej lo men ko komij loi: Bwe Ij ba ñõn kom, elõñ dri kanan im kiñ r’ar kõnan lo men ko komij loi, im r’ar jab loi; im roñjake men ko komij roñjaki, im r’ar jab roñ.” Aet, Jesus ear rejañ ri kalor ro an retiljek bwe ren jab kajekdon mol ko raorõk kin Ailiñ eo kar kwaloki ñan ir. Anij ear jab kwalok mol kein ñan ri karejar ro an mokta, im emol kar jab kwaloki ñan “dri meletlet im dri jelalokjen” ro ilo ran ko an Jesus!​—Luk 10:​23, 24.

6, 7. (a) Ta un ko ewõr ibbed ñan ad kamolol kin mol ko jen Anij? (b) Ta oktak eo jej lo rainin ikõtan kabuñ eo emol im eo ewan?

⁶ Ilo ran kein ad, ewõr un ko relaplok ñan ad kamolol kin mol ko jen Anij, bwe Jehovah, ikijen “dri korijer e tiljek im meletlet,” ear lelok ñan armij ro an lolokjen eo emũlallok kin Nan eo an. (Matu 24:​45) Ri kanan Daniel ear je: “Naj likliki im karreoiki elõñ armij. Armij nana reban melele, im renaj wõnmanlok wõt ilo air nana; ro remeletlet wõt renaj melele.” (Daniel 12:​10) Kwojjab errã ke bwe ilo ran kein eliktata jelãlokjen eo an “ro remeletlet” kin Anij ej laplok wõt im ri karejar ro an Jehovah rej mãttõk ilo jitõb?

⁷ Jej lo juõn oktak elap ikõtan mweie eo an armij ro an Anij ilo jitõb im bwok ko ilo kabuñ ko rewan an Babylon Elap! Tokjen men in, ro rej kile im kitõtõkake kabuñ wan rej oktaklok ñan kabuñ eo emol. Rein rej armij ro rej einwõt sheep me rejjab kõnan “bõk mõtõn jerawiwi ko an [Babilõn elap]” ak “bõk jen men in kaiñtan ko an.” Jehovah im ri karejar ro an rej kir aolep rein ñan air itok ñan congregation eo emol an Christian.​—Reveles̃õn 18:​2-4; 22:⁠17.

Ro Ewõr Air Kamolol Rej Ibweptok ñan Anij

8, 9. Ewi wãwen nan ko an Haggai 2:7 rej jejjet kitieir ilo ran kein?

⁸ Ikijen imõn kabuñ eo an ilo jitõb, Jehovah ear kanan: “Inaj [bikbikiri] ailiñ otemjej, im renaj bõktok menin aurõk ko air ñõn ijin im kobrak Temple kaki.” (Haggai 2:⁠7) Kanan in ekabwilõñlõñ ear jejjet kitien ilo ran ko an Haggai ke bwen armij ro an Anij rar jeblak im bar kalek temple eo ilo Jerusalem. Rainin, nan kein an Haggai elaplok air jejjet kitieir ikijen temple eo elap an Jehovah ilo jitõb.

⁹ Elõñ million armij ro ededelok air ibweptok ñan temple in ilo kõkkar ñan air kabuñ ñan Anij “ilo Jitõb im ilo mol,” im kajjojo yiõ elõñ buki thousand ian “menin aurõk” kein jen ailiñ ko otemjej rej ibweptok wõt ñan e. (Jon 4:​23, 24) Ñan wanjoñok, report eo ibelakin lal ñan yiõ in jerbal eo 2006 ej kwalok bwe 248,327 armij rar baptais kakõllan wujleplok eo air ñan Jehovah. Men in ej melelen bwe enañin tarrin oran in 680 ro rekãl rej deloñtok ilo kajjojo ran! Yokwe eo air kin mol eo im air kõnan karejar ñan Jehovah einwõt ri keañ ro kin Ailiñ eo ej kalikar bwe Anij ear ibertok ir.​—Jon 6:​44, 65.

10, 11. Kwalok juõn wanjoñok kin ewi wãwen armij ro rej jino air kaorõk mol eo ilo Bible eo.

¹⁰ Elõñ ian armij rein emol burueir rar reel ñan mol eo kinke rar kile “ta eo enaj walok ñõn ro ri wãnik, ro rej jerbal ñõn iõ, im ta eo enaj walok ñõn ro ri nana, ro rejjab jerbal ñõn iõ.” (Malachi 3:​18) Lemnak kin men eo ear walok ñan Wayne im Virginia, ruo ri belele ro rar bed ilo kabuñ in Protestant, ear lõñ air kajitõk ak rejañin lo uak ko ñani. Rar kitõtõkake tarinae im rar jimor bwok im inebata ke rar lo an ri tel in kabuñ ko kajerammõn ri tarinae ro im kein tarinae ko air. Ke erro ar erom jet ro reritto, rar eñjake bwe ro jet ilo kabuñ eo air rar kajekdon ir, meñe Virginia ear katakin ilo Sunday school ilo kabuñ eo iumin elõñ yiõ ko. “Ejelok juõn ear lotok kim ak kwalok air itoklimo kin wãwen ejmour eo am kin men ko lor jitõb,” rar ba. “Men eo kabuñ eo ear kõnan jen kim kar money ko am. Kimar lukkun bwok.” Ear laplok air buromõj im bwok ke kabuñ eo air ear kamelim an emaan ro belek don ak kõrã ro belek don.

¹¹ Ilo kõtan ien in, ledik eo jibwin Wayne im Virginia im tokelik kõrã eo nejiiro rar erom Ri Kennan ro an Jehovah. Meñe Wayne im Virginia rar inebata ilo jinoin, tokelik ear oktak air lemnak im mõnõnõ in katak Bible. “Iloan wõt jilu alliñ,” Wayne ear ba, “elaplok am kar katak kin Bible eo jen ke kimar katak iumin elõñlok jen 70 yiõ ko moktalok! Kimar jaje bwe ãt eo etan Anij ej Jehovah, im ejelok am jelã kin Ailiñ eo im Paradise eo ion lal.” Ejjab to tokelik, ri belele rein rar jino bed ilo kwelok ko an Christian im bõk kunair ilo jerbal in kwalok nan. “Kim kõnan kwalok kin mol eo ñan aolep armij,” Virginia ear ba. Kiõ rej 80 jima air yiõ, im rar baptais ilo 2005. “Kimar lo juõn kumi in Ri Christian ro remol me kimij eñjake amro bed ebake ir,” rar ba.

Kamolol Kinke “Emwij Kõkõmõnmõn E Ñõn Jerbal Emõn Otemjej”

12. Ta eo Jehovah ej lelok ñan ri karejar ro an ien otemjej, im ta eo jej aikwij kõmmane ñan bõk tokjen?

¹² Ien otemjej Jehovah ej jibañ ri karejar ro an ñan air kõmanman ankil an. Ñan wanjoñok, Noah, ear bõk nan in jiroñ ko ralikar im tibdikin kin wãwen kalek wa eo​—juõn jerbal me kar aikwij kõmmane ilo jejjet! Im ear eindein. Etke? Kinke Noah “e ar kõmõn; einwõt men otemjej Anij ej jiroñ e, ein drein e ar kõmõne.” (Jenesis 6:​14-22) Bareinwõt rainin, Jehovah ej keboj ro ri karejaran ñan air kõmanman ankil an. Emol, jerbal eo ad elaptata ej ñan kwalok kin news eo emõn kin Ailiñ in Anij eo emwij an jutak im ñan jibañ ro rej tellokiir ñan air erom ri kalor ro an Jesus Christ. Einwõt kar Noah, tõbrak eo ad ej wawa ion ad bokake. Jej aikwij tiljek in lor nan in tel ko Jehovah ej litoki ikijen Nan im dolul eo an.​—Matu 24:14; 28:​19, 20.

13. Ikijen ta eo Jehovah ej kamineneik kij?

¹³ Ñan ad kõtõbrak jerbal in, jej aikwij katak bwe en ‘jimewõt’ ad kajerbal kein jerbal eo ad elaptata​—Nan in Anij​—eo “or tokjeir kin katakin, im kowe, im kajime, im kajelaik armij ilo kwojarjar; bwe armij korijeran Anij en wãppen im emwij kõkõmõnmõn e ñõn jerbal emõn otemjej.” (2 Timote 2:15; 3:​16, 17) Einwõt kar ilo ebeben eo kein kajuõn, Jehovah ej letok kaminene eo eaorõk ikijen congregation eo an Christian. Rainin, ilo 99,770 congregation ko ibelakin lal, School in Kwalok Nan eo an Christian im Service Meeting eo rej walok ilo week otemjej ñan jibañ kij ilo jerbal in kwalok nan. Kwoj kwalok ke am kamolol kin kwelok kein raorõk ilo am keini am bed im jerbali men ko kwar katak kaki?​—Dri Hibru 10:​24, 25.

14. Ewi wãwen ri karejar ro an Jehovah rej kwalok air kamolol kin jerammõn eo ñan air karejar ñan Anij? (Kobaik uak ko jen chart eo ilo page 23-26.)

¹⁴ Ilo air kate ir ilo jerbal in kwalok nan, elõñ million ian armij ro an Anij ibelakin lal rej kwalok air kamolol kin kaminene eo rar bõke. Ñan wanjoñok, ilo 2006 yiõ in jerbal eo, 6,741,444 ri kwalok ro kin Ailiñ eo rar kajerbal 1,333,966,199 awa ko ilo aolep wãwen ko kin kwalok nan, ekoba 6,286,618 katak kin Bible ko kar kõmmani. Eñin jet ian point ko relap im rekõketak kar kõlajraki ilo report eo jen belakin lal. Kimij rejañ kom bwe komin lukkun lale report in im bõk kõketak jene, einwõt ro jeid im jatid ilo ebeben eo kein kajuõn rar bõk kõketak jen report ko kin laplok eo ilo jerbal in kwalok nan ilo ien eo air.​—Jerbal 1:15; 2:​5-11, 41, 47; 4:4; 6:⁠7.

15. Etke ejelok juõn en buromõj kin jerbal eo an ñan Jehovah elañe ej kõmmane kin aolepen buruen?

¹⁵ Juõn ainikien elap kin wijtak me ej wanliñlok ñan Anij kajjojo yiõ ej kwalok kin kamolol eo emũlal an ri karejar ro an Jehovah kin jerammõn eo ñan air jelã Jehovah im kwalok kin e. (Aiseia 43:​10) Emol, katok kin wijtak me jet ian ro jeid im jatid maan im kõrã rebwijwõlã, nañinmij, ak mõjno rej liloki jemaroñ keidi ñan jããn eo edik an kõrã eo ejako belen. Ak jen jab meloklok bwe Jehovah im Nejin elap air kamolol kin aolep ro rej karejar ñan Anij kin aolepen burueir, ke rej jerbal joñan wõt air maroñ.​—Luk 21:​1-4; Dri Galetia 6:⁠4.

16. Ta kein jerbal ko ñan katakin Anij ear litoki ilo ran kein?

¹⁶ Ijellokin an kamineneik kij kin jerbal in kwalok nan, Jehovah, ikijen dolul eo an, ej letok ñan kij kein jerbal ko remõn ñan katakin. Ilo yiõ ko kiõ, kein jerbal ko ñan katakin rar koba Mol Eo Ej Tellok ñan Mour In Drio, Kwo Maroñ Mour Indrio ilo Paradise ion Lõl, Jelãlokjen eo Ej Tellok ñan Mour Indio, im, kiõ, What Does the Bible Really Teach? (Ta eo Bible eo Ej Katakin?) Ro emol air kamolol kin men in letok kein rej kortokjeir ilo jerbal in kwalok nan.

Kwon Kortokjen Bible Teach Book Eo

17, 18. Ta eo juõn circuit overseer ear kile kin book eo Bible Teach?

¹⁷ Emol bwe, book eo What Does the Bible Really Teach? (Ta eo Bible eo Ej Katakin?) ej juõn kein jerbal emõn ilo jerbal in kwalok nan, kinke ewõr 19 chapter ko, juõn appendix (melele ko jet) me ej kamelele ilo tibdikin, im ilo juõn kajin ealikar im lamwan. Ñan wanjoñok, chapter 12 ej bwebwenato kin katak eo “Mour ilo juõn Wãwen Anij Ej Buñburuen Kake.” Katak in ej kameleleik ri katak eo kin ewi wãwen emaroñ erom juõn jeran Anij, juõn men me elõñ rar jab lemnak kake ak rar lemnak bwe ebin an walok. (Jemes 2:​23) Ewi wãwen an armij ro emmakit ñan kein jibañ in ñan katak Bible?

¹⁸ Juõn circuit overseer ilo Australia ej report bwe book eo Bible Teach (Ta eo Bible eo Ej Katakin) “emõkaj an kaitoklimoen armij ilo juõn bwebwenato.” Ear ba bwe joñan an bidodo kajerbal book in “elõñ ri kwalok ro kin Ailiñ eo rej bar bõk liki im lañliñ ilo jerbal in kwalok nan. Eñin unin jet rej naetan book in juõn mweiuk eaorõk einwõt gold!”

19-21. Kwalok jet bwebwenato ko me rej kalikar aorõkin Bible Teach book eo.

¹⁹ “Alikar Anij ear jilkintok yuk,” juõn kõrã ilo Guyana ear ba ñan juõn ri kwalok full-time me ear itok ñan kejam in jikin jerbal eo an. Leo jeran kõrã in ear illok jen e im ajiri ro nejiiro ruo redik. Ri kwalok eo ear kabellok Bible Teach book eo ñan chapter 1 im konono paragraph 11, iumin unin tel eo edik “Ewi Lemnak eo an Anij Kin Jab Ekajet Jimwe ko Jej Jelmaiki?” “Kamelele ko rar lukkun jelet e,” ri kwalok eo ear ba. “Ilo mol, kõrã in ear jutak, etal ñan tulik in mõn wia eo an, im lukkun jañ.” Kõrã in ear mõnõnõ in katak Bible ibben juõn kõrã ri kwalok ilo bukwon eo im kiõ emõn an kõmman wõnmanlok.

²⁰ José, eo ej jokwe ilo Spain, ear luji lio belen ilo mij ilo juõn lanwõtwõt. Ear bõk kainemõn ilo an bõk uno ko rekajur einwõt cocaine im marijuana, im ear bareinwõt bõk jibañ jen doctor ro rej kamadmõde nañinmij in kamelij. Bõtab, doctor ro rar jab maroñ uake kajitõk eo me elap an kar kainebataik José: “Etke Anij ear kõtlok bwe en mij lio beliõ?” Juõn ran José ear iion Francesc, eo ear jerbal ilo ejja company eo wõt ej jerbal ie. Francesc ear ba bwe erro en bwebwenato kin chapter 11 ilo Bible Teach book eo, naetan “Etke Anij Ej Kõtlok Eñtan?” Kamelele eo jen Bible im wanjoñok eo kin juõn ri kaki im ri school eo an ear lap an kaitoklimoen José. Ear jino katak Bible, bed ilo juõn circuit assembly, im kiõ ej bed ilo kwelok ko ilo Kingdom Hall eo ilo bukwon eo.

²¹ Roman, juõn ri jerbal 40 yiõ dettan me ej jerbal ilo juõn business ilo Poland, ear lap an kautiej Nan eo an Anij. Ak kin an boub kin jerbal eo an, jidik wõt an kar wõnmanlok ilo katak eo an kin Bible eo. Mekarta, ear bed ilo juõn district convention im bõk copy eo an kin Bible Teach book eo. Jen ien in manlok, ear laplok an kõmman wõnmanlok. “Ilo book in,” ear ba, “aolep katak ko relap ilo Bible rar koba ibben don ñan kõmman juõn pija eyu, einwõt juõn puzzle.” Kiõ Roman ej keini an katak Bible im emõn an wõnmanlok ilo katak eo.

Am Kamolol En Laplok Wõt

22, 23. Ewi wãwen ad maroñ wõnmanlok im kwalok kamolol kin kejatdikdik eo kar likit imad?

²² Einwõt kar kamelele ilo “Lomor eo Ej Ebak!” District Convention ko, Ri Christian ro remol rej kijoror kin “lomor in drio” me Anij ear kallimur kake im ej itok ikijen an kar Jesus Christ katorlok bõtõktõkin. Ejelok bar juõn wãwen emõnlok ñan ad kwalok ad kamolol kin kejatdikdik in eaorõk jen ad wõnmanlok wõt im bõk karreo “jen kõmõn ko remij bwe [jen] jerbal ñõn Anij [eo emour].”​—Dri Hibru 9:​12, 14.

²³ Aet, emol ej juõn men ekabwilõñlõñ bwe elõñlok jen jiljino million ri kwalok ro kin Ailiñ eo rej kijenmij ilo tiljek ilo jerbal eo an Anij, meñe ijjibed eo ñan kwalok jitõb in kibbon ej laplok wõt. Men in ej bareinwõt kamol bwe ri karejar ro an Jehovah elap air kamolol kin jerammõn eo ñan air karejar ñan Anij, ilo air jelã bwe air “jerbal e jab jekron ilo Iroij.” Jej kejatdikdik bwe kamolol rot in en laplok wõt!​—1 Dri Korint 15:58; Sam Ko 110:⁠3.

Ewi Wãwen Kwonaj Uak?

• Ta eo ri jeje sam ej katakin kij kin kamolol Anij im men in letok ko an ilo jitõb?

• Ewi wãwen nan ko ilo Haggai 2:7 rej jejjet kitieir ilo ran kein?

• Ewi wãwen Jehovah ear keboj ri karejar ro an bwe en bolemen air karejar ñan e?

• Ta eo kwomaroñ kõmmane ñan am kwalok kamolol kin emõn eo an Jehovah?

[Jaat ilo peij 23-26]

REPORT IN KWALOK NAN EO AN RI KENNAN RO AN JEHOVAH ILO YIÕ EO 2006

(Lale bok in)

[Pija ko ilo peij 21]

Jehovah ej keboj kij ñan kõmanman ankil an