Anõk Joñok eo an Elap ñan Kõmman Ri Kalor Ro
“Komin lale kijkan ami roñjake.”—LUK 8:18.
1, 2. Etke kwoj aikwij lale ekijkan an kar Jesus jerbal ibben armij ro ilo jerbal in kwalok nan eo an?
JESUS CHRIST ear kajejjet jerbal eo an kin katakin im kõmman ri kalor ro ke ear jiroñ ri kalor ro an: “Komin lale kijkan ami roñjake.” (Luk 8:16-18) Nan in kaiñi in ej jerbal ñan kwalok nan eo am einwõt juõn Ri Christian. Elañe kwoj bokake nan in jiroñ in kin men ko lor jitõb, kwonaj jerbale im erom juõn ri kwalok ebolemen kin Ailiñ eo. Emol, kwojjab maroñ roñ ainikien Jesus rainin, ak kwomaroñ read kin ta eo ear ba im kõmmane, einwõt kar kwalok kake ilo Jeje ko ilo Bible eo. Ta eo rej kwalok kin wãwen eo Jesus ear jerbal ibben armij ilo jerbal in kwalok nan eo an?
2 Jesus ear juõn ri kwalok ekanuij emõn kin news eo emõn im juõn ri kaki elap an emõn kin mol eo ilo Jeje ko ilo Bible. (Luk 8:1; Jon 8:28) Jerbal eo ñan kõmman ri kalor ro ej kitibuj kwalok nan im katakin jimor, bõtab jet Ri Christian ro me emõn air kwalok nan rej lo bwe ebin air katakin armij ro ilo juõn wãwen ebolemen. Ke jerbal in kwalok nan ej kitibuj air kwalok kin juõn ennan, ñan air katakin armij kin Jehovah im karõk eo an, ekkã an men in aikwij bwe juõn ri katakin en kalek juõn kõtan ibbeir. (Matu 28:19, 20) Kwomaroñ kõmman men in ilo am anõk Jesus Christ, eo ej joñok eo emõntata kin katakin im kõmman ri kalor ro.—Jon 13:13.
3. Ñe kwoj anõk Jesus, ilo wãwen et eo men in emaroñ jelet jibadbad ko am ñan kõmman ri kalor ro?
3 Elañe kwoj anõk wãwen an kar Jesus katakin, kwonaj lor nan in kakkõl eo an ri jilek Paul: “Komin etetal im meletlet ñõn ro ilikin, im kejbãrok ien. Ami konono, en ien otemjej ilo joij, im en emwij kejãtok e kin salt, bwe komin jela kijkan emõn ami uak armij otemjej.” (Dri Kolosse 4:5, 6) Kwoj aikwij kate ilo am anõk Jesus ilo jerbal in kõmman ri kalor ro, ak enaj kõmman bwe en bolemen am katakin kinke enaj jibañ yuk ñan “uak armij otemjej” ekkar ñan aikwij ko air kajjojo.
Jesus Ear Rejañ Ro Jet ñan Air Konono
4. Etke jemaroñ ba bwe ear emõn an Jesus roñjake?
4 Jen ien eo ke ear dik mantak, kar juõn manit ibben Jesus ñan roñjake armij ro im rejañ ir ñan kwalok lemnak ko air. Ñan wanjoñok, ke ear 12 yiõ dettan, jemen im jinen rar loe ibwiljin ri kaki ro ilo temple eo, im ej “roñjake ir, im kajitõk ibeir.” (Luk 2:46) Jesus ear jab etal ñan temple eo ñan kemjãje kin joñan jelãlokjen eo ibben. Ear etal ñan roñjake, meñe ear bareinwõt kwalok kajitõk ko. Kinke ear emõn an roñjake, men in ear maroñ juõn kadkad me ear kõmman an bõk buñburu ibben Anij im armij ro.—Luk 2:52.
5, 6. Ewi wãwen jejelã bwe Jesus ear roñjake nan ko an ro ear katakin ir?
5 Elikin an kar baptais im kabit e einwõt Messiah eo, Jesus ear itoklimo wõt ñan roñjake armij ro. Ear jab lukkun madjake kin ta eo ear katakin kake im meloklok kin ro rar itok ñan roñjake e. Ekkã an kar bõjrak jidik, kajitõk kin ewi air lemnak, im roñjake uak ko air. (Matu 16:13-15) Ñan wanjoñok, elikin an kar Lazarus, leo jein Martha mij, Jesus ear ba ñan lio: “Jabrewõt eo ej mour im liki Iõ, e jamin mij in drio.” Inem ear kajitõk ibben: “Kwoj tõmak men in ke?” Im emõn an kar Jesus roñjake ke Martha ear uak: “Aet, Iroij, I ar tõmak bwe Kwe dri Kraist, Nejin Anij.” (Jon 11:26, 27) Elap an kajuburu ñan roñ wãwen an kar Martha kwalok tõmak eo an!
6 Ke elõñ ri kalor ro rar illok jen Jesus, ewõr an kar itoklimo in roñjake lemnak eo an ri jilek ro an. Inem ear kajitõk: “Kom bareinwõt kõnan ilok ke? Saimõn Piter e uak E, Iroij, kim naj ilok ñõn wõn? ibõm nan ko nan in mour in drio. Im kim ar tõmak im jela, bwe Kwe Juõn eo Ekwojarjar an Anij.” (Jon 6:66-69) Nan kein emol ear lap air kamõnõnõik Jesus! Emol bwe wãwen an juõn ri katak Bible eo kwalok tõmak eo an enaj bareinwõt kalañliñ yuk.
Jesus Ear Roñjake Ilo Kautiej
7. Etke elõñ Ri Samaria ro rar tõmak Jesus?
7 Bar juõn un Jesus ear bolemen an kõmman ri kalor ro ej kinke ear kea kake armij ro im roñjake ir ilo kautiej. Ñan wanjoñok, juõn ien, Jesus ear kwalok nan ibben juõn kõrã in Samaria iturin aebõj an Jacob ilo Sychar. Ke rar bwebwenato, Jesus ear jab konono wõt, ak ear bareinwõt roñjake ta eo lio ear ba. Ke ear roñjake, Jesus ear lo an itoklimo kin kabuñ im ear ba ñan e bwe Anij ear bukõt ro rej kabuñ ñan E ilo jitõb im mol. Jesus ear kwalok kautiej im itoklimo ñan kõrã in, inem lio ear jiroñ ro jet kin e, im “elõñ ian ro dri Sameria ilo jikin kwelok eo rej tõmak E kin nan an kõra.”—Jon 4:5-29, 39-42.
8. Kinke armij ro rej mõnõnõ in kwalok lemnak ko air, ewi wãwen men in emaroñ jibañ yuk ñan jino juõn bwebwenato ilo jerbal in kwalok nan?
8 Enañin aolep ien armij ro rej mõnõnõ in kwalok lemnak ko air. Ñan wanjoñok, ro rar jokwe ilo Athens eo etto rar mõnõnõ in kwalok lemnak ko air im roñjake kin men ko rekãl. Men in ear tellok ñan an ri jilek Paul kwalok juõn katak ebolemen ilo Areopagus eo ilo jikin kwelok eo. (Jerbal 17:18-34) Ñe kwoj jino juõn bwebwenato ibben ri mweo ilo jerbal in kwalok nan eo am rainin, kwomaroñ ba, “Ij lotok yuk kinke ij mõnõnõ in roñjake lemnak eo am kin [kwalok juõn katak].” Roñjake lemnak eo an armij eo, im kwalok lemnak eo am kake, ak kõmman juõn kajitõk kin men in. Inem ilo joij kwalok ta eo Bible ej ba kin katak eo.
Jesus Ear Jelã Kilen Jino Juõn Bwebwenato
9. Ta eo Jesus ear kõmmane mokta jen an kar “kemeleleik Jeje ko” ñan Cleopas im eo mõttan?
9 Jesus ear jelã ta eo ekõnan ba. Ijellokin an kar emõn an roñjake, ekkã an kile ta eo armij ro rar lemnak kake, im ear jelã ta eo en ba. (Matu 9:4; 12:22-30; Luk 9:46, 47) Ñan wanjoñok: Ejjabto elikin an kar Jesus jerkakbiji, ruo ian ri kalor ro an rar etetal jen Jerusalem ñan Emmaus. “Ke rej konono im bwebwenato ñõn dron,” Nan in Gospel eo ear kwalok, “Jisõs ej mõke kebak, im etal ibeir. A drebij mejeir bwe ren jab kili E. Im E ba ñõn ir, Ta men ko komro konono ñõn dron, ke kom etal? Im rej bwijrõk im buromõj mejeir. Im juõn iair etan Kliopas, e uak im ba ñõn E, Kwe drua maijet wõt ilo Jerusalem, im Kw’ar jab jela men ko rej walok ijo ilo ran kein ke? Im E ba ñõn ir Men rõt?” Ri Kaki eo Elap ear roñjake ke rar kamelele bwe Jesus Ri Nazareth eo ear katakin armij ro, kõmman men in bwilõñ ko, im rar mõn e. Jet rar ba bwe emwij an kar jerkakbiji jen mij. Jesus ear kõtlok bwe Cleopas im eo mõttan ren kwalok air lemnak. Inem ear kamelele kin ta eo rar aikwij in jelã, im “kemeleleik Jeje ko” ñan ir.—Luk 24:13-27, 32.
10. Ewi wãwen kwomaroñ jelã lemnak eo an juõn armij kin kabuñ ñe kwoj wõnmae ilo jerbal in kwalok nan?
10 Kwomaroñ jaje lemnak eo an juõn ri mweo kin kabuñ. Ñan am jelã, kwomaroñ ba bwe kwoj mõnõnõ in roñjake ta eo armij ro rej lemnak kake kin jar. Inem kwomaroñ kajitõk, “Kwoj ke lemnak bwe ewõr juõn ej lukkun roñjake jar ko?” Uak eo emaroñ lap an kwalok kin lemnak im kabuñ eo an armij eo. Elañe ewõr an tõmak ilo kabuñ, kwomaroñ kalaplok am jelã kake ilo am kajitõk, “Kwoj ke lemnak bwe Anij ej roñjake aolep jar ko, ak ewõr ke jet jar ko ejjab buñburuen kake?” Kajitõk rot kein remaroñ tellok ñan juõn bwebwenato emõn. Ñe ekkar bwe kwon kwalok ñan e ta eo Bible ej ba kin men in, kwon kõmmane ilo juõn wãwen ejoij, im jab jumae tõmak ko an armij eo. Elañe ej mõnõnõ in roñjake kwe, enaj kõnan bwe kwon bar jeblak. Ak ta elañe ej bõkmantak juõn kajitõk me kwojjab maroñ uake? Kwomaroñ etale mokta im ñe kwoj bar jeblak kwonaj bojak ñan lelok “unin kejatrikrik eo ej iloami, a kin inimõn im mijõk.”—1 Piter 3:15.
Jesus Ear Katakin Ro Rej Tellokiir
11. Ta eo enaj jibañ yuk ñan lo ro rej tellokiir ñan katak?
11 Armij eo ewãppen Jesus ear wõr an lolokjen me ear kamaroñ e ñan kile ro rej tellokiir ñan katak. Ebinlok ibbed ñan bukõte “ro jabrewõt ar likit ir bwe ren mour in drio.” (Jerbal 13:48) Ebar bin ibben ri jilek ro me Jesus ear ba: “Ñe komij tõbraklok juõn jikin kwelok ak juõn bukõn, komin dreloñlok im bukõt wõn eo emõnõnõ in karuaineneik kom.” (Matthew 10:11) Einwõt ri jilek ro an Jesus, kwoj aikwij in bukõt armij ro rej mõnõnõ in roñjake im katak kin mol eo jen Bible eo. Kwomaroñ lo ro rej tellokiir ilo am lukkun roñjake aolep ro kwoj konono ibbeir, im lale lemnak eo an kajjojo armij ro.
12. Ewi wãwen kwomaroñ wõnmanlok im jibañ juõn armij ewõr an itoklimo?
12 Elikin am illok jen armij eo ear kwalok an itoklimo kin ennan eo kin Ailiñ eo, enaj wõr tokjen am wõnmanlok im lemnak kin aikwij ko an ilo men ko lor jitõb. Elañe kwoj jeje kin ta eo kwar katak kake ibben armij eo elikin am bwebwenato ibben kin news eo emõn, men in enaj jibañ yuk ñan wõnmanlok im jibañ e kin men ko lor jitõb. Ñe kwoj bar jeblak, kwoj aikwij lukkun roñjake e elañe kwo kõnan kalaplok am jelã kin tõmak, lemnak, im wãwen bed eo an armij eo.
13. Ta eo emaroñ jibañ yuk ñan kile lemnak ko an juõn armij kin Bible eo?
13 Ewi wãwen kwomaroñ rejañ armij ro ñan kwalok ñan yuk kin ewi lemnak eo air kin Nan in Anij? Ilo jet jikin ko, ej ekkar ñan am kajitõk, “Kwoj ke loe bwe ebin ñan melele Bible eo?” Uak eo ñan kajitõk in ekkã an naj kwalok elañe armij eo ewõr an kautiej Bible eo. Bar juõn wãwen ej ñan read juõn eon im kajitõk, “Ewi am lemnak kin men in?” Einwõt Jesus, emaroñ lap tõbrak ilo jerbal in kwalok nan eo am ilo am kajerbale kajitõk ko rekkar. Bõtab, jej aikwij kejbãrok wõt.
Ear Bolemen Wãwen an Kar Jesus Kajerbal Kajitõk Ko
14. Jen am kajitõk ibben armij ele jen joñan, ewi wãwen kwomaroñ kwalok itoklimo eo am kin lemnak eo air?
14 Kwalok am itoklimo kin lemnak eo an ro jet ilo juõn wãwen kwojjab kajook ir. Lor wãwen eo an Jesus. Ear jab juõn eo ele jen joñan an kajitõkin armij ro, ak ear kwalok kajitõk ko me rar kamakit ir ñan lemnak. Jesus ear bareinwõt roñjake ilo joij ke ear kainemõn armij ro remol im kakijeik ir. (Matu 11:28) Aolep armij ro kajo wãweir rar mõnõnõ in kebak e kin inebata ko air. (Mark 1:40; 5:35, 36; 10:13, 17, 46, 47) Elañe kwo kõnan bwe armij ro ren mõnõnõ in jiroñ yuk kin ta eo rej lemnak kake kin Bible eo im katak ko an, kwoj aikwij bõprae am kajitõkin ir ele jen joñan.
15, 16. Ewi wãwen kwomaroñ kareel armij ro ñan bwebwenato kin wãwen kabuñ ko?
15 Ijellokin an bolemen wãwen am kajerbal kajitõk ko, kwomaroñ kowõnmanlok bwebwenato eo ilo am ba juõn men ekaitoktoklimo, inem roñjake uak eo. Ñan wanjoñok, Jesus ear ba ñan Nicodemus: “Elañe armij e jab bar lotak, e jamin lo ailiñ in Anij.” (Jon 3:3) Joñan an nan kein kaitoklimoen Nicodemus, ear jab maroñ kabõjrak e jen an uak im roñjake Jesus. (Jon 3:4-20) Kwomaroñ kareel armij ro ñan bwebwenato ibbam ilo ejja wãwen in.
16 Rainin, kin an walok elõñ kabuñ ko rekãl, ej juõn men elap an armij itoklimo in bwebwenato kake meñe ilo jikin ko retolok einwõt Africa, ailiñ ko ilo turear in Europe, im Latin America. Ilo jikin kein, ekkã am maroñ jino juõn bwebwenato ilo am ba: “Ij inebata kin an lõñ kabuñ ko. Ak ij kejatdikdik bwe ejjab to armij ro jen ailiñ ko otemjej renaj burukuk ilo juõn wõt kabuñ eo emol. Kwo kõnan ke lo bwe men in enaj walok?” Ilo am kwalok kejatdikdik eo am ilo juõn wãwen ekaitoktoklimo, kwomaroñ kõmman bwe armij ro ren kwalok air lemnak. Ebidodolok uak kajitõk ko elañe emaroñ wõr ruo uak ko. (Matu 17:25) Elikin an ri mweo uake kajitõk eo am, kwon make uake kajitõk eo ilo am kajerbal juõn ak ruo eon ko ilo Bible. (Aiseia 11:9; Zephaniah 3:9) Ilo am lukkun roñjake im lale uak eo an armij eo, kwomaroñ kile ta eo kwonaj bwebwenato kake ien eo kwoj bar jeblak.
Jesus Ear Roñjake Ajiri Ro
17. Ta eo ej kwalok bwe ear wõr an Jesus itoklimo kin ajiri ro?
17 Jesus ear jab itoklimo kin ritto ro wõt ak bareinwõt kin ajiri ro. Ear jelã kin ikkure ko an ajiri ro im men ko rej ba kake. Jet ien ear kirtok ajiri ro bwe ren itok ñan ibben. (Luk 7:31, 32; 18:15-17) Elõñ ajiri ro rar bed ibwiljin kumi ro rar roñjake Jesus. Ke ladik ro rar lamõj im kaibujuij Messiah eo, Jesus ear kile im kwalok bwe Jeje ko rar kanan kake men in. (Matu 14:21; 15:38; 21:15, 16) Rainin, elõñ ajiri ro rej erom ri kalor ro an Jesus. Inem ewi wãwen kwomaroñ jibañ ir?
18, 19. Ewi wãwen kwomaroñ jibañ ajiri eo nejõm ilo men ko lor jitõb?
18 Ñan jibañ ajiri eo nejõm bwe ren kajurlok ilo jitõb, kwoj aikwij in roñjake e. Kwoj aikwij melele ta lemnak ko an me ejjab ekkar ñan lemnak eo an Jehovah. Kin men in, jekdon ta eo ajiri eo nejõm ej ba, ej men in meletlet ñan lelok moktata juõn nan in rejañ. Inem kwomaroñ kajerbal eon ko rekkar jen Bible eo ñan jibañ nejõm bwe en bõk lemnak eo an Jehovah.
19 Kajitõk ko rej juõn wãwen ñan ad kile eñjake im lemnak ko an ajiri ro. Ak ajiri ro rejjab mõnõnõ ñe armij rej kajitõkin ir ele jen joñan. Jen am likit ion ajiri eo nejõm eddo eo elap ñan uak elõñ kajitõk ko rebin, etke kwojjab konono kin kwe make? Ekkar ñan aikwij eo, kwomaroñ jiroñ e kin wãwen kar eñjake eo am mokta. Inem kwomaroñ kajitõk, “Ej eindein ke eñjake eo am?” Elikin am roñjake uak eo an, kwomaroñ ejaak juõn bwebwenato ej wawa ion Bible eo ñan rejañ e.
Anõk Wõt Joñok eo An Elap ñan Kõmman Ri Kalor Ro
20, 21. Etke ej aikwij emõn am roñjake ilo jerbal eo am ñan kõmman ri kalor ro?
20 Jekdon elañe kwoj bwebwenato kin juõn katak ibben ajiri eo nejõm ak jabdewõt armij, eaorõk bwe en emõn am roñjake. Emol, ej juõn wãwen kwoj kwalok am yokwe. Ilo am roñjake, kwoj emmakit ilo juõn wãwen ej kwalok ettã buru, im kwoj kwalok am kautiej im joij ñan eo ej konono. Emol, kwoj aikwij lukkun roñjake nan ko an armij eo.
21 Ñe kwoj bõk kunam ilo jerbal in kwalok nan an Ri Christian, kwon lukkun roñjake ri mweo. Elañe kwoj lukkun roñjake ta eo rej ba kake, kwonaj kile ta katak ko renaj kaitoklimoiir kin mol eo ilo Bible. Inem kate yuk im jibañ ir ilo am kajerbal wãwen ko Jesus ear katakin. Ñe kwoj kõmman eindein, kwonaj bõk ãjinkij eo ilo mõnõnõ im juburu kinke kwoj anõk joñok eo elap an Jesus ñan kõmman ri kalor ro.
Ewi Wãwen Kwonaj Uak?
• Ewi wãwen Jesus ear rejañ ro jet ñan kwalok lemnak ko air?
• Etke Jesus ear roñjake ro ear katakin ir?
• Ewi wãwen kwomaroñ kajerbal kajitõk ko ilo jerbal in kwalok nan eo am?
• Ta eo kwomaroñ kõmmane ñan jibañ ajiri ro kin men ko lor jitõb?
[Pija eo ilo peij 9]
Ñe kwoj kwalok nan, kwon lukkun roñjake
[Pija eo ilo peij 10]
Jej anõk Jesus ñe jej jibañ ajiri ro kin men ko lor jitõb