“Kwon Lale Jerbal eo Kw’ar Bõk ilo Iroij”
“Kwon lale jerbal eo kw’ar bõk ilo Iroij, bwe kwon kajejit e.”—KOL. 4:17.
1, 2. Ta eddo eo ewõr ibben Ri Christian ro ñan armij ro?
EWÕR juõn ad eddo elap an aorõk ñan armij ro rej jokwe ibelakid. Bebe ko rej kõmmani kiõ enaj kalikar elañe renaj mour ak mij ilo “iñtan eo elap.” (Rev. 7:14) Ri jeje eo ekakõrmol an book in Jabõn Kennan Ko ear ba: “Kwon lomor ro emwij bõklok ir ñõn mij, im ro re nañin joko, kwon lale bwe kwon drebij ir.” Aet ekabwilõñlõñ nan kein! Elañe jej likjap in kakkõl armij ro kin kãlet eo ewõr ibbeir emaroñ wõr ruõd kin mij eo air. Ilo mol, ejja eon in wõt ej wõnmanlok im ba: “Elañe kwoj ba, Lo, kim ar jab jela kake men in; Eo e jela joñõn buru ko, E jab lemnok kake ke? im Eo ej kejbãrok am, E jab jela ke? im E jamin lelok ñõn jabrewõt armij ekar ñõn kõmõn ko an ke?” Alikar, ri karejar ro an Jehovah rejjab maroñ ba bwe rej ‘jab jela kake’ men in kauwatata eo ej jelmae armij ro.—Ken. 24:11, 12.
2 Jehovah ej kaorõk mour. Ej rejañ ri karejar ro an ñan air kate joñan wõt air maroñ ñan jibañ lomor elõñ armij ro joñan wõt air maroñ. Kajjojo ian ri karejar ro an Anij rej aikwij kwalok kin ennan in lomor eo ej bed ilo Nan eo an Anij. Jerbal eo ad ej einlok wõt eo an juõn ri waj me ej uuki jilel eo an ñan kakkõl ro jet ñe ej lo juõn kauwatata ej bojak in walok. Jejjab kõnan bwe en wõr ruõd kin bõtõktõkin ro renaj jako ilo mij. (Ezek. 33:1-7) Kin menin, elukkun aorõk bwe jen kate kij ñan wõnmanlok wõt im “kwalok nan”!—Read 2 Timote 4:1, 2, 5.
3. Ta ko jenaj etali ilo katak in im katak ko tok ruo?
3 Ilo katak in kwonaj katak kin wãwen eo kwomaroñ anjo ion abañ ko rej kabañ jerbal in kwalok ennan in lomor eo am im wãwen eo kwomaroñ jibañ elõñ oran armij ro. Katak eo tok juõn enaj etale wãwen eo kwomaroñ erom juõn ri katakin ekabel kin mol ko raorõk. Katak eo kein kajilu enaj report kin jet ian tõbrak ko rekõketak ri kwalok ro kin Ailiñ eo ibelakin lal rar bõki. Bõtab, mokta jen ad etale katak kein, emõn elañe jej eliji jet ian un ko unin an lukkun nanalok ien kein ad.
Etke Elõñ Ejelok Air Kejatdikdik
4, 5. Ta eo ej walok ñan armij ro, im ewi wãwen an elõñ armij emmakit?
4 Wãwen ko ilo lal in rej kalikar bwe jej mour ilo “lokõn lõl” im bwe jemlokin elukkun ebak. Armij ro rej iion men ko rej walok im wãwen ko me Jesus im ri kalor ro an rar ba renaj walok ilo “ran ko eliktata.” “Iñtan ko,” ekoba tarinae, ñitta, makitkit lal, im jorrãn ko jet, renaj kaeñtan armij ro. Kõtõrãik kien, kibbon, im lemnak ko renana rej jededlok ijoko otemjej. Meñe ñan armij ro me rej kate ir ñan bokake kien ko ilo Bible eo, ien kein rej “ien ko renana.”—Mat. 24:3, 6-8, 12; 2 Tim. 3:1-5.
5 Juõn joñan elap in armij ro ilo lal in, rejjab kile kin joñan aorõkin men ko rej walok ilo lal in. Tokjen men in, elõñ rej inebata kin jokane eo air make im eo an family ko air. Ro rejitenburu rar jako ilo mij ak jorrãn ko jet rej walok rar kõmetak im kaburomõj elõñ armij. Kin an ejelok jelãlokjen eo ejejjet ibbeir kin etke men kein rej walok im ia eo remaroñ bõk uak eo jene, armij rein ejelok air kejatdikdik.—Ep. 2:12.
6. Etke “Babilõn Elap” ejañin maroñ kar jibañ ro rej lor e?
6 “Babilõn Elap,” dolul in kabuñ ko rewan ibelakin lal, ear bõktok jidik wõt kainemõn ñan armij ro. Ilo oktan, ikijen “wain in lũñ eo an,” ear bwokwoj elõñ armij ro kin ewi wãwen remaroñ ejaak ak bõk juõn kõtan ibben Anij. Bareinwõt, ilo an jerbal einwõt juõn kõrã ekijoñ, kabuñ wan ear mone im iroij ion “kiñ ro an lõl,” ilo an kajerbal katak ko reriap im madmõd ko ñan debij enañin aolep armij bwe ren bin wõt im tiljek ñan kien ko air. Ilo wãwen in kabuñ wan ear bõk an kajur im kilan, bõtab ilo ejja ien eo wõt, ear karmijeteik katak ko remol an kabuñ.—Rev. 17:1, 2, 5; 18:23.
7. Ta kejatdikdik eo ej bed iman enañin aolep armij, ak ewi wãwen ad naj maroñ jibañ jet?
7 Jesus ear katakin bwe enañin aolep armij rej etal ilo ial eo edebakbak ej tellok ñan mij. (Mat. 7:13, 14) Jet rej bed ilo ial in edebakbak kinke rar kõmman juõn jokãlet ñan karmijeteik ta eo Bible ej katakin, bõtab elõñ ro jet rej bed ijo kinke kar mone ir, ak rej bed ilo marok, kinke ri tel in kabuñ ko air rar jab katakin ir kin ta eo Jehovah ekõnan bwe ren kõmmane. Bõlen jet remaroñ ukõt wãwen mour eo air elañe kar lelok un ko ralikar jen Jeje ko kin unin rej aikwij kõmmani. Bõtab ro me rej bedwõt ilo Babylon Elap im rej wõnmanlok wõt im karmijete kien ko ilo Bible naj jamin kejbãrok ir ilo “iñtan eo elap.”—Rev. 7:14.
“Wõnmanlok” Wõt ilo Ami Kwalok Nan
8, 9. Ta eo Ri Christian ro jinoin rar kõmmane ke rar iion jumae, im etke?
8 Jesus ear ba bwe ri kalor ro an renaj kwalok kin news eo emõn kin Ailiñ eo im kõmman ri kalor ro. (Mat. 28:19, 20) Kin menin, Christian ro remol rej aolep ien watõk bwe air bõk kunair ilo jerbal in kwalok nan ej kalikar tiljek eo air ñan Anij im ej juõn menin aikwij eaorõk ñan tõmak eo air. Kin menin, ri kalor ro an Jesus mokta rar wõnmanlok im kwalok nan meñe rar iion jumae. Rar reilok ñan Jehovah bwe en kakajur ir, ilo air jar bwe en kamaroñ ir ñan wõnmanlok im ‘kwalok nan eo An kin elap beran.’ Ilo an uak, Jehovah ear kobrak ir kin jitõb kwojarjar, im rar kwalok ilo beran kin nan eo an Anij.—Jerb. 4:18, 29, 31.
9 Ke jumae ear laplok, ri kalor ro an Jesus rar bõjrak ke jen air kwalok kin news eo emõn? Jaab. Kin air abõnõnõ kin an ri jilek ro kwalok nan, ri tel in kabuñ an Ri Jew ro rar kalbuji ri jilek ro, kamijak ir, im deñõt ir. Bõtab, ear “jab mwij air [ri jilek ro] katakin im kwalok Jisõs bwe E dri Kraist.” Rar melele bwe rar aikwij “bokake Anij elap jen armij.”—Jerb. 5:28, 29, 40-42.
10. Ta melejoñ ko Ri Christian ro rej iioni rainin, bõtab ta tokjen eo emaroñ walok jen mwil emõn eo air?
10 Enañin aolep ri karejar ro an Anij rainin rejañin kar eñtan kin deñdeñ ko ak kalbuj kin makitkit ko kin jerbal in kwalok nan eo air. Bõtab, aolep Ri Christian ro remol rej iion melejoñ ko rekajjo jen don. Ñan wanjoñok, bõklikit eo am emwij an Bible eo katakin emaroñ kõmman bwe kwon lor juõn ial kin mwil emõn ak juõn eo me ej kalikar am oktak jen ro jet. Ri jerbal ro mõttam, ri school ro mõttam, ak ro ri turum remaroñ bwilõñ kin yuk kinke bebe ko kwoj kõmmani rej bedbed ion nan in kaiñi ko ilo Bible. Meñe eindein, lemnak eo air ejjab emõn en jab kabõjrak yuk. Lal in ej bed ilo marok ilo jitõb, ak Ri Christian ro rej aikwij romak einwõt “maram ko.” (Pil. 2:15) Bõlen ewõr jet ro rej lale yuk renaj lo im kamolol kin jerbal ko am remõn, im tokjen men in ir bareinwõt renaj oktak im lelok nebar ñan Jehovah.—Read Matu 5:16.
11. (a) Ewi wãwen an jet maroñ emmakit ñan jerbal in kwalok nan eo? (b) Jumae rot eo ri jilek Paul ear iione, im ewi wãwen ear emmakit ñane?
11 Jej aikwij beran ñan wõnmanlok wõt im kwalok ennan eo kin Ailiñ eo. Jet armij, meñe ro nukõm, remaroñ matõrtõr yuk ak ilo jet wãwen ko kajeoñ in kabwer yuk. (Mat. 10:36) Kar deñloke ri jilek Paul elõñ alen kinke ear tiljek wõt ilo an kõmmane jerbal in kwalok nan eo an. Lale wãwen ear emmakit kin jumae in: “A ke emwij kaiñtan im kokkure kim,” ear jeje, “kim ar beranlok ilo am Anij bwe kimin konono ñõn kom gospel an Anij ilo niknik elap.” (1 Tes. 2:2) Aet Paul ear aikwij beran ñan an maroñ wõnmanlok wõt im kwalok kin news eo emõn elikin wõt air kar jibwe, kekel nuknuk ko an, deñloke, im jolok e iloan kalbuj. (Jerb. 16:19-24) Ta eo ear kaberan e ñan an wõnmanlok? Ear beran kinke ear kõnan kõmmane jerbal in kwalok eo Anij ear lelok ñan e bwe en kõmmane.—1 Kor. 9:16.
12, 13. Ta abañ ko jet rej iioni, im ewi wãwen rar kajeoñ ñan anjo ioir?
12 Emaroñ bareinwõt bin ñan kejbãrok kijejeto eo ad ilo territory ko me ejeja an armij ro bed ilo moko imwiir ak ijo me jejjo wõt rekõnan roñjake ennan eo kin Ailiñ eo. Ta eo jemaroñ kõmmane ñe jej iion wãwen rot kein? Jemaroñ lo bwe ej menin aikwij ñan kalaplok ad kijejeto in konono ibben armij ro ijoko jabdewõt jej iion ir. Jemaroñ bareinwõt aikwij ukõt ien jerbal in kwalok nan eo ad ilo juõn ran ak ilo week eo ak kwalok nan ilo jikin ko me jemaroñ iion elõñ armij ie.—Keidi Jon 4:7-15; Jerb. 16:13; 17:17.
13 Elõñ, kin air bwijwõlã im nana ejmour eo air, ej kõmman bwe en wõr joñan air maroñ bõk kunair ilo jerbal in kwalok nan eo. Elañe kwoj juõn ian rein, kwon jab ebwer. Jehovah ejelã kin joñan maroñ ko am im ej mõnõnõ kin yuk. (Read 2 Dri Korint 8:12.) Jekdon abañ rot kwoj jelmae—jumae, jab kea, ak nañinmij—kõmman joñan wõt am maroñ ilo am kwalok kin news eo emõn ibben ro jet.—Ken. 3:27; Keidi Mark 12:41-44.
‘Lale Jerbal in Kwalok Nan eo Am’
14. Ta joñok eo ri jilek Paul ear likiti ñan Ri Christian ro mõttan, im ta nan in rejañ eo ear letok?
14 Ri jilek Paul ear kõmmane jerbal in kwalok nan eo an ilo kijejeto, im ear rejañ ri tõmak ro mõttan ñan air kõmman einwõt. (Jerb. 20:20, 21; 1 Kor. 11:1) Eo me elaptata an kar Paul rejañ e kar Ri Christian eo etan Archippus ilo kar ebeben eo mokta. Ilo letter eo an ñan Ri Kolosse ro, Paul ear jeje: “Im komin ba ñõn Arkippõs, Kwon lale jerbal eo kw’ar bõk ilo Iroij, bwe kwon kajejit e.” (Kol. 4:17) Jejjab jelã wõn kar Archippus ak ta kar wãwen ko ibben, bõtab ej alikar bwe ear mõnõnõ in bõk jerbal in kwalok nan. Elañe emwij am wujleplok mour eo am ñan Anij, kwe bareinwõt emwij am bõk jerbal in kwalok nan. Kwoj wõnmanlok wõt ke ñan lale jerbal in kwalok nan bwe kwon maroñ kajijet e?
15. Wujleplok eo an Ri Christian ej kitibuj ta, im ej tellok ñan kajitõk et ko?
15 Mokta jen ad baptais, jaar wujleplok mour eo ad ñan Jehovah ilo ad jar jen buruõd. Melelen menin bwe jaar kãlet ñan kõmanman ankilan. Kin menin jej aikwij kajitõk ibbed make, ‘Kõmanman ankilan Anij ej lukkun ke men eo eaorõktata ilo mour eo aõ?’ Emaroñ wõr eddo ko rekajjo jen don me Jehovah ej kõtmene bwe jen lali im kabwe—einwõt kabwe aikwij ko an family eo ad. (1 Tim. 5:8) Bõtab ewi wãwen ad kajerbal bwen ien im kajur ko ad? Ta eo eaorõktata ilo mour eo ad?—Read 2 Dri Korint 5:14, 15.
16, 17. Ta wãwen ko jodikdik ro ak ro me edik eddo ko air rej aikwij lemnak kaki?
16 Kwoj ke juõn Christian jodikdik emwij an wujleplok mour eo an me emwij ak ebak an diojlok jen school? Alikar, ejañin wõr eddo ko an family ibbam. Kin menin, ta eo kwoj bebe in kõmman kin mour eo am? Ta bebe ko enaj emõn air kamaroñ yuk ñan kajejjet kallimur eo am ñan kõmanman ankilan Jehovah? Elõñ emwij air karõk makitkit ko air bwe ren maroñ pioneer, im rar lo mõnõnõ elap im jokane kin tokjen men in.—Sam 110:3; Ekk. 12:1.
17 Bõlen kwoj juõn eo emõn ded. Ewõr juõn am full-time jerbal ilo jikin jerbal eo ak ejjab lukkun lõñ eddo ko am ijellokin wõt kabwe aikwij ko am make. Ejelok bere kwoj lo mõnõnõ ilo am bõk kunam ilo makitkit ko an congregation eo joñan wõt an lajrak eo am kõtlok bwe kwon kõmmane. Emaroñ ke laplok am mõnõnõ? Kwonañin ke kar lemnak kin kalaplok ijo kunam ilo jerbal in kwalok nan? (Sam 34:8; Ken. 10:22) Ilo jet territory ko, ej lõñ wõt jerbal ko jej aikwij kõmmani ñan tõbar armij otemjej kin ennan eo emol kin mour. Kwomaroñ ke kõmman oktak ko ilo mour eo am, bõlen ñan jerbal ilo juõn jikin elaplok aikwij ie kin ri keañ ro kin Ailiñ eo?—Read 1 Timote 6:6-8.
18. Ta oktak ko ri belele ro ruo emõn dettair rar kõmmani, im kin ta tõbrak ko?
18 Lemnak kin wanjoñok eo kin Kevin im Elena, jen United States.a Einwõt ekkã an walok ibben ro emõn dettair me rej kab mare ilo jikin eo rej bed ie, rar lemnak bwe rej aikwij wiaik juõn em. Erro ar jimor jerbal full-time ilo jikin jerbal eo air im rar maroñ mour ilo juõn mour emõn. Bõtab, jerbal ko air ilo jikin jerbal eo im ko ilo mweo rar kõmman bwe en dik air ien ilo jerbal in kwalok nan. Rar kile bwe erro ar kamaatlok ien im kajur ko air ñan men ko mweieir. Bõtab, ke rar lale wãwen mour eo elamwan im mõnõnõ eo an ruo ri belele rej pioneer, Kevin im Elena rar bebe ñan ukõt men eo eaorõktata ilo mour eo air. Elikin airro jar im kajitõk bwe Jehovah en jibañ ir ñan kõmman juõn bebe emeletlet, rar wiakake mweo imwiir im emmakitlok ñan juõn apartment. Elena ear kadiklok awa in jerbal ko an im bõk jerbal in pioneer. Kin an kõketak kin men ko lio belen ear mõnõnõ kaki ilo jerbal in kwalok nan, Kevin ear kamwije jen jerbal eo an im jino pioneer. Jet ien ko tokelik, rar emmakit ñan juõn ailiñ ilo South America ñan jerbal ijo elaplok aikwij kin ri kwalok ro kin Ailiñ eo. “Kim ar aolep ien lo mõnõnõ ilo mour in mare eo am,” Kevin ear ba, “ak ñe kimij kõmman mejenkajjik ko ilo jitõb ñan kalaplok jerbal eo am ñan Anij, mõnõnõ eo am elaplok an kamõnõnõ.”—Read Matu 6:19-22.
19, 20. Etke kwalok kin news eo emõn ej jerbal eo eaorõktata rainin?
19 Jerbal in kwalok kin news eo emõn ej jerbal eo eaorõktata ej kõmman ion lal rainin. (Rev. 14:6, 7) Ej jibañ ñan kokwojarjar ãt eo etan Jehovah. (Mat. 6:9) Ennan eo an Bible ej kõmõnmõnlok mour ko an elõñ thousand ro me rej mõnõnõ in roñjake kajjojo yiõ, im menin emaroñ tel ir ñan bõk lomor. Bõtab, “ekijkan air naj roñ ñe ejelok dri kwalok?” Paul ear kajitõk. (Rom 10:14, 15) Alikar, enaj kar bin elañe ejelok en ej kwalok nan. Etke kwojjab kate yuk ñan kõmman joñan wõt am maroñ ñan kajejjet jerbal in kwalok nan eo am?
20 Bar juõn wãwen me kwomaroñ jibañ armij melele kin aorõkin ien kein renana im wãwen ko renaj waloktok jen bebe ko rej kõmmani ej ikijen am erom juõn ri katakin emõn. Wãwen am maroñ kõmman menin naj etale ilo katak in tok juõn.
[Kamelele Eo Itulal]
a Kar ukõt ãt ko etan armij ro.
Ewi Wãwen Am Naj Uak?
• Ta eddo eo an Ri Christian ro ñan armij ro?
• Ewi wãwen jej aikwij kijenmij kin abañ ko rej jelet jerbal in kwalok nan eo ad?
• Ewi wãwen ad maroñ kajejjet jerbal in kwalok nan eo jaar bõke?
[Pija ilo page 5]
Jej aikwij beran ñan kwalok nan ilo ien jej jelmae jumae
[Pija ilo page 7]
Ta eo kwomaroñ kõmmane elañe kwoj kwalok nan ilo territory ko me ejeja an armij ro bed ilo moko imwiir?