Kwon Lale Kabel eo Am Ñan Katakin
“Kwon kwalok nan, . . . kajime, im enoik, im kowe kin meamwõr otemjej im katakin.”—2 TIM. 4:2.
1. Ta kien eo Jesus ear lelok ñan ri kalor ro an, im joñok et eo ear likiti?
MEÑE Jesus ear kemour armij ilo kabwilõñlõñ ke ear kõmman jerbal in kwalok nan eo an ion lal, elaptata an kar armij ro jelã kajjen, einwõt juõn ri kaki im jab einwõt juõn ri kemour ak juõn eo ear kõmman menin bwilõñ ko. (Mark 12:19; 13:1) Jerbal eo eaorõktata ilo mour eo an Jesus kar bwe en keañ kin news eo emõn kin Ailiñ in Anij, ej eindein bareinwõt ibben ri kalor ro an rainin. Ri Christian ro ewõr ibbeir jerbal eo ñan wõnmanlok wõt ilo jerbal in kõmman ri kalor ro ilo air katakin armij ro bwe ren bokake men ko otemjej Jesus ear kakien kaki.—Mat. 28:19, 20.
2. Ta eo jej aikwij kõmmane ñan kajejjet jerbal in kwalok nan eo ad?
2 Ñan kajejjet jerbal eo ad ñan kõmman ri kalor ro, jej aikwij kate kij ien otemjej ñan kakõmõnmõnlok kabel eo ad ñan katakin. Ri jilek Paul ear kalikar aorõkin kabel in ke ear jejelok ñan Timothy, ri kwalok eo mõttan. Ear ba: “Kwon kejbãrok yuk, im men in katakin ko am. Kwon berwõt ilo men kein; bwe ilo am kõmõn ein drein, kwo naj mõke lomoren yuk, kab ro rej roñjake yuk.” (1 Tim. 4:16) Katakin eo me Paul ear lemnak kake ear jab ñan baj lelok wõt jelãlokjen. Christian ri karejar ro rebolemen ilo jerbal eo air rej kate ir ñan tõbar buruen armij ro im kamakit ir ñan kõmman oktak ko ilo mour ko air. Ej juõn kabel rej aikwij katak ñan air kõmmane. Inem ewi wãwen ad maroñ kaddeklok kabel in ñan katakin armij ñe jej kwalok ñan ro jet kin news eo emõn kin Ailiñ in Anij?—2 Tim. 4:2.
Kaddeklok Kabel eo ñan Katakin
3, 4. (a) Ewi wãwen jemaroñ kaddeklok kabel eo ñan katakin? (b) Ewi wãwen School in Kwalok Nan eo an Christian emaroñ jibañ kij ñan erom ri katakin ro rebolemen?
3 Bwe en emõn ad katakin ro jet kin mol ko an Anij, jej aikwij katak, kamelmel, im lale wãwen an ro jet katakin. Jej aikwij lor aolep wãwen kein jilu ñan erom ri katakin ro rebolemen kin news eo emõn. Wãwen eo wõt jemaroñ bõk juõn melele ejimwe kin katak eo ad ej ilo ad jar im lukkun etale. (Read Sam 119:27, 34.) Ilo ad lale ri kwalok ro rekabel ñe rej katakin ro jet, men in ej jibañ kij ñan katak kin kõl ko rej kajerbali im ñan kajeoñe ir. Im ilo ad kate kij ñan keini ad kamelmel men ko jej katak kake enaj jibañ kij ñan kakõmõnmõnlok kabel ko ad.—Luk 6:40; 1 Tim. 4:13-15.
4 Jehovah ej Ri Katakin eo ad Elap. Ej tel ri karejar ro an ion lal ikijen mõttan in dolul eo an jemaroñ loe kin ewi wãwen rej aikwij kajejjet jerbal in kwalok nan eo air. (Ais. 30:20, 21) Kin un in, kajjojo week ilo aolep congregation ko rej kõmmane School in Kwalok Nan eo an Christian, eo kar eiki ñan jibañ aolep ro kar kadeloñ etair ilo school eo ñan katakin ir erom ri keañ ro rebolemen kin Ailiñ in Anij. Book eo elaptata rej kajerbale ilo school eo ej Bible eo. Nan in kakõrmol eo an Jehovah ej jiroñ kij kin ta eo jej aikwij katakin kake. Bareinwõt, ej kalikar kin kõl rot ko kilen katakin rebolemen im ekkar. School in Kwalok Nan eo an Christian ekkã an kakememej kij bwe enaj laplok ad kabel in katakin elañe katak ko ad rej bedbed ion Bible, jej kajerbal kajitõk ko ilo juõn wãwen ekeie, jej katakin ilo juõn wãwen elamwan, im jej kwalok ad itoklimo kin ro jet. Jen etale ilo tibdikin kajjojo point kein. Inem jenaj bwebwenato kin ewi wãwen jemaroñ tõbar buruen ri katak eo.
Katak ko Ren Bedbed ion Nan in Anij
5. Ta eo en bedbedin katakin eo ad, im etke?
5 Jesus, eo kar ri katakin eo elaptata ion lal, ear kõmman bwe katak ko an ren bedbed ion Jeje ko ilo Bible eo. (Mat. 21:13; Jon 6:45; 8:17) Ear konono, jab ikijen maroñ eo an make, ak ilo etan Eo ear jilkintok e. (Jon 7:16-18) Eñin joñok eo jej lore. Inem, men eo jej ba ñe jej kwalok nan jen em ñan em ak ñe jej katak Bible ibben armij en wawa ion Nan in Anij. (2 Tim. 3:16, 17) Maroñ in kõmmanwa eo ad make ejamin joñan an keie im kajur in wõt Jeje ko rekakõrmol ilo Bible. Bible eo ewõr an kajur im maroñ. Kõl eo emõntata jemaroñ kajerbale ñan jibañ juõn ri katak ñan an melele kake jabdewõt point, ej ikijen ad kõmman bwe en readi ta eo Bible ej ba kake.—Read Dri Hibru 4:12.
6. Ewi wãwen juõn ri katakin emaroñ kõmman bwe ri katak eo en melele kin katak eo rej etale?
6 Men in ejjab melelen bwe juõn Ri Christian ejjab aikwij kebojak ñan juõn Bible study. Ilo oktan, ej aikwij lukkun lemnak kin eon ta ko e ak ri katak eo enaj readi jen Bible eo ilo ien katak eo airro. Ekkã an emõn ñan readi eon ko me rej letok bedbedin tõmak ko ad. Ej bareinwõt juõn menin aikwij ñan jibañ ri katak eo ñan melele kin kajjojo eon ej readi.—1 Kor. 14:8, 9.
Kajerbal Kajitõk ko Rekeie
7. Etke kajerbal kajitõk ko ej juõn kõl emõn ñan katakin?
7 Kajerbal kajitõk ko ilo juõn wãwen ekeie ej kamakit lemnak im jibañ ri katakin eo ñan tõbar buruen ri katak eo. Inem jen am kamelele kin melelen eon ko ñan ri katak eo, kajitõk ibben ñan an kameleleik yuk kake. Jet ien kwomaroñ aikwij kwalok bar juõn ak elõñlok kajitõk ko ñan jibañ ri katak eo ñan bõk melele eo ejimwe. Ñe kwoj kajerbal kajitõk ko ñan katakin ri katak eo, ilo wãwen in, kwoj jibañ e jab ñan melele wõt kin unin jabdewõt jemlok eo ej tõbare ak bareinwõt ñan an make tõmake.—Mat. 17:24-26; Luk 10:36, 37.
8. Ewi wãwen jemaroñ jelã ta eo ej bed ilo buruen ri katak eo?
8 Kilen katak eo rej kajerbale ilo book ko ad ej ikijen kajitõk im uak ko. Ejelok bere, enañin aolep armij ro kwoj katak Bible ibbeir enaj mõkaj air maroñ uake kajitõk ko, ilo air kajerbal melele ko ilo paragraph ko jet. Ak, ri katakin eo me ekõnan tõbar buruen ri katak eo ejamin juburu wõt kin uak ko rejimwe wõt. Ñan wanjoñok, juõn ri katak emaroñ kamelele ilo jimwe kin ta eo Bible ej ba kin lũñ. (1 Kor. 6:18) Bõtab, kajitõk ko me rej kajitõk kin lemnak eo an ri katak eo remaroñ kwalok kin ta eo ej lukkun lemnak kin men eo ej katak kake. Eo ej katakin emaroñ kajitõk: “Etke Bible eo ej kananaik an ro rejañin mare babu ibben don? Ta lemnak eo am kin kien in Anij ear letoke? Kwoj lemnak ke bwe ewõr tokjen am mour ekkar ñan kien mour erreo an Anij?” Uak eo ñan kajitõk rot kein remaroñ kwalok ta eo ej bed ilo buruen ri katak eo.—Read Matu 16:13-17.
Kõmman bwe En Lamwan
9. Ta eo jej aikwij lemnak kake ñe jej kwalok melele ko kin juõn eon?
9 Enañin aolep mol ko ilo Nan in Anij relamwan. Ak, ro me jej katak Bible ibbeir remaroñ bwok kin katak ko an kabuñ ko rewan. Jerbal eo ad einwõt ri katakin ej ñan kõmman bwe en bidodo air melele Bible eo. Ri katakin ro remõn renaj kwalok melele ko ilo juõn wãwen elamwan ak bidodo melele kake, alikar im jimwe. Elañe jej lor wãwen in, jejamin kõmman bwe en bin air melele mol eo. Bõprae am kwalok tibdik in melele ko rejjab menin aikwij. Jejjab aikwij kamelele kin aolep mõttan ko kin eon eo jej readi. Kwalok wõt ta eo eaorõk ñan kalikar point eo komij etale. Jidik kin jidik ri katak eo enaj melele kin mol ko remũlallok ilo Bible ke ej wõnmanlok ilo melele eo an.—Hib. 5:13, 14.
10. Ta men ko rej beek kin ewi joñan jej etale ilo juõn ien katak?
10 Ewi joñan katak eo jej aikwij etale ilo kajjojo ien katak? Ikijen men in, jej aikwij kwalok lolokjen. Maroñ ko im wãwen ko an ri katak eo im eo ej katakin jimor renaj oktak jen don, ak jej aikwij kememej bwe mejenkajjik eo ad einwõt ri katakin ro ej ñan jibañ ri katak eo ñan kalek juõn tõmak ebin. Inem jej kõtlok ien ñan an maroñ read, melele, im bõk ñan buruen mol ko me Nan in Anij ej katakin. Jejjab katak elaplok jen an maroñ melele. Ak ilo ejja ien eo wõt, jekõnan kõmman bwe katak eo en wõnmanlok wõt. Ñe ri katak eo emwij an melele kin juõn point, jej wõnmanlok ñan bar juõn.—Kol. 2:6, 7.
11. Ikijen katakin, ta eo jemaroñ katak jen ri jilek Paul?
11 Ri jilek Paul ear kõmman bwe ennan in news eo emõn en lamwan ke ear konono ibben ro rekãl. Meñe elap an kar meletlet, ear bõprae an kajerbal kajin ko rebin. (Read 1 Dri Korint 2:1, 2.) Kin an lamwan mol ko ilo Bible, ej kareel im kajuburu ro emol burueir. Ejelok juõn ej aikwij lukkun meletlet ñan an melele kake.—Mat. 11:25; Jerb. 4:13; 1 Kor. 1:26, 27.
Jibañ Ri Katak Ro ñan Kaorõk Men eo Rej Katak Kake
12, 13. Ta eo emaroñ kamakit juõn ri katak ñan an jerbale men ko ej katak kaki? Kwalok juõn wanjoñok.
12 Bwe en bolemen wãwen ad katakin ri katak eo, ej aikwij jelet buruen. Ri katak eo ej aikwij melele kin ewi wãwen katak eo ej jerbal ñan e, ewi wãwen ej bõk tokjen jene, im ewi wãwen enaj kakõmõnmõnlok mour eo an elañe ej lor nan in tel eo jen Bible.—Ais. 48:17, 18.
13 Ñan wanjoñok, bõlen jej etale Dri Hibru 10:24, 25, ijo ej rejañ Ri Christian ro ñan kwelok ibben ri tõmak ro mõttair ñan bõk kõketak jen Jeje ko ilo Bible im kamao ko remãnãn. Elañe ri katak eo ejañin jino bed ilo kwelok ko an congregation eo, ilo tukadu jemaroñ kwalok kilen air kõmmani im ta eo jenaj bwebwenato kake. Jemaroñ ba bwe kwelok ko an congregation eo rej mõttan kabuñ eo ad im kwalok bwe jej bõk tokjen jeni. Inem jemaroñ kir ri katak eo ñan kwelok ibbed. Men eo me ej aikwij kamakit e ñan uak ilo emõn ñan kien ko ilo Bible en kõnan eo an ñan bokake Jehovah, im jab ñan an kõnan kamõnõnõik armij eo ej katak Bible ibben.—Gal. 6:4, 5.
14, 15. (a) Ta eo juõn ri katak Bible emaroñ katak kin Jehovah? (b) Ewi wãwen juõn ri katak Bible emaroñ bõk tokjen jen jelãlokjen eo kin kadkad ko kadkadin Anij?
14 Juõn tokjen ri katak ro rej bõke jen air katak Bible im jerbale nan in kakabilek ko iloan ej bwe enaj laplok air jelã kajjen im yokwe Jehovah einwõt juõn eo emour. (Ais. 42:8) Ejjab juõn Jemen eo ej yokwe im Ri Kõmanman eo kin ijoko ilañ im ilal wõt ak ej bareinwõt kwalok kadkad ko kadkadin im maroñ ko an ñan ro rej yokwe im karejar ñan e. (Read Exodus 34:6, 7.) Ke Moses ear bojak in tel ailiñ in Israel jen air kamakoko ilo Egypt, Jehovah ear kwalok kajjen e make ilo nan kein: “Ña Eo, Ña E.” (Ex. 3:13-15) Men in ej kalikar bwe Jehovah enaj erom jabdewõt men eo ej aikwiji ñan kajejjet kitien karõk eo an ikijen armij ro an ear kãlete. Tokjen men in, Ri Israel ro rar jelã kajjen Jehovah einwõt juõn Ri Lomor, Ri Tarinae, juõn eo ear kabwe menin aikwij ko air, eo ear kajejjet kitien kallimur ko an, im eo ear jibañ ir ilo wãwen ko jet.—Ex. 15:2, 3; 16:2-5; Josh. 23:14.
15 Ri katak ro ad remaroñ jab bõk jibañ ak tel jen Jehovah ilo mour ko air ilo juõn wãwen ekabwilõñlõñ einwõt kar Moses. Mekarta, ñe air tõmak im kamolol kin men ko rej katak kaki rej eddeklok im rej jino jerbali ilo air mour, ejelok bere bwe renaj lo aikwij eo ñan air atartar ion Jehovah ñan bõk beran, meletlet, im tel. Ñe rej kõmman eindein, ir bareinwõt renaj jelã kajjen Jehovah einwõt juõn Ri Kakabilek emeletlet im eo remaroñ liki, juõn Ri Kejbãrok, im juõn eo ej kabwe aolep menin aikwij ko air.—Sam 55:22; 63:7; Ken. 3:5, 6.
Kwalok Itoklimo ilo Yokwe
16. Etke kabel eo jaad jolete ejjab men eo eaorõktata ñan ad jerbal einwõt juõn ri katakin ebolemen?
16 Elañe kwoj eñjake bwe kwojjab kabel ñan katakin ilo joñan eo kwokõnan, kwon jab ebwer. Jehovah im Jesus rej tel kij ilo jerbal in katakin eo me ej walok ibelakin lal rainin. (Jerb. 1:7, 8; Rev. 14:6) Remaroñ kajerammõn jibadbad ko ad bwe nan ko ad ren maroñ jelet armij ro emol burueir ilo wãwen eo emõn. (Jon 6:44) Yokwe eo emol an juõn ri katakin ñan ri katak eo an emaroñ kabwe jabdewõt likjap in kabel ko ewõr ibben. Ri jilek Paul ear kwalok bwe ear melele kin aorõkin kwalok yokwe ñan ro jej katakin ir.—Read 1 Dri Tessalonika 2:7, 8.
17. Ewi wãwen jemaroñ kwalok itoklimo eo emol kin kajjojo ri katak Bible?
17 Eindein, jemaroñ kwalok itoklimo eo emol kin kajjojo ri katak Bible ilo ad bõk ien ñan jelã kajjen. Ñe jej katak kin nan in kakabilek ko ilo Bible ibben, ekkã ad naj jelã kin wãwen ko ibben. Jemaroñ lo bwe ededelok an mour ekkar ñan jet ian point ko ear katak jen Bible eo. Ikijen wãwen ko jet, emaroñ aikwij kõmman oktak ko. Ilo ad jibañ ri katak eo ñan lo ewi wãwen melele eo ej katak kake ej jerbal ñan e, jemaroñ jibañ e ñan erom juõn ri karejar emol an Christ.
18. Etke eaorõk ñan ad jar ibben ri katak ro ad im jar kin ir?
18 Men eo eaorõktata, jemaroñ jar ibben ri katak eo im kobaik etan ilo jar eo. En alikar ñan e bwe mejenkajjik eo ad ej ñan jibañ e ñan jelã kajjen Ri Kõmanman eo an, ruaklok ñan E, im bõk tokjen jen tel eo An. (Read Sam 25:4, 5.) Ñe jej jar bwe Jehovah en kajerammõn jibadbad ko an ri katak eo ñan an jerbale men eo ej katak kake, ri katak eo enaj lo aorõkin an erom juõn “dri kõmõnmõn nan eo.” (Jem. 1:22) Ñe ri katak eo ej roñjake jar ko ad remol, e bareinwõt naj katak kilen jar. Elap an kamõnõnõik kij ñe jej jibañ ri katak Bible ro ñan kaddeklok kõtan eo air make ibben Jehovah!
19. Ta eo jenaj etale ilo katak in tok juõn?
19 Ej kõketak kij ñan jelã bwe elõñlok jen jiljino im jimettan million Ri Kennan ro ibelakin lal reboub in kaddeklok kabel eo air ñan katakin, kin mejenkajjik eo ñan jibañ ro emol burueir ñan bokake aolep men ko Jesus ear kakien kaki. Ta tokjen ko rej walok jen jerbal in kwalok nan eo ad? Jenaj etale uak eo ñan kajitõk in ilo katak in tok juõn.
Kwoj Kememej Ke?
• Etke Ri Christian ro rej aikwij kaddeklok kabel eo ñan katakin?
• Ta kõl ko remaroñ kõmman bwe en laplok ad bolemen ñan katakin?
• Ta eo emaroñ kabwe jabdewõt likjap ko ewõr ibbed ikijen maroñ eo ad ñan katakin?
[Pija eo ilo peij 9]
Emwij ke kadeloñ etõm ilo School in Kwalok Nan eo an Christian?
[Pija eo ilo peij 10]
Etke eaorõk ñan rejañ ri katak eo am ñan an read jen Bible eo?
[Pija eo ilo peij 12]
Jar ibben im jar kin ri katak eo am