Rar Kakõmõnmõnlok Mour eo Air Kwomaroñ ke Kõmman Eindein?

MARC, juõn jeid im jatid maan ilo Canada, ear jerbal ilo juõn company eo ej kõmman robot ko rekabwokbwok me dolul ko im rej jilkinlok balun ko ñan ijoko aliñ im iju ko rej bed ie rej kajerbali. Ear jerbal in part-time ie im bareinwõt jerbal einwõt juõn regular pioneer. Inem, juõn ri utiej ilo jikin jerbal eo an ear kõnan lelok ñan e juõn jerbal eutiejlok​​—juõn jerbal in full time im elap wõnãn. Ta eo Marc ear kõmmane?

Amy, juõn jeid im jatid kõrã ilo Philippine, ear jerbal einwõt juõn regular pioneer ke ear school. Elikin an kar kadiojlok, kar lelok ñan e juõn jerbal in full time me elap wõnãn ak enaj kar bõk aolep ien ko an. Kar ta jokãlet eo an Amy?

Bebe ko an Marc im Amy reoktak jen don, im jemlokin jokãlet ko air rej kwalok meletlet eo an nan in kakabilek eo kar lelok ñan Ri Christian ro ilo Corinth eo etto. Ri jilek Paul ear jeje: “Ro rej jerbale lõl in ren einwõt re jab kanuij jerbale.”​​—1 Kor. 7:​29-​31.

Jerbale Lal in ak Jab Le Jen Joñan

Mokta jen ad katak kin ta eo ear walok ñan Marc im Amy, jen lemnak kin tukaduin melele eo an nan in “lõl in” (ak, koʹsmos ilo kajin Greek) me Paul ear kajerbale ilo letter eo an ñan Ri Corinth. Ilo eon in ilo Bible, koʹsmos ej jitõñlok ñan aolep wãwen ko an jukjuk im bed in armij im ej koba aikwij ko ilo mour jen ran ñan ran, einwõt jikin jokwe, mõñã ko, im nuknuk ko. Ñan kabwe aikwij kein ilo kajjojo ran, enañin kij aolep ej aikwij wõr ad jerbal. Emol, jej aikwij kajerbal lal in ñan kajejjet eddo eo ad ekkar ñan Bible ñan kabwe aikwij ko ad make im family ko ad. (1 Tim. 5:8) Bõtab, ilo ejja ien eo wõt, jej kile bwe “lõl e jokolok.” (1 Jon 2:​17) Kin men in, jej kajerbale lal in joñan wõt ad aikwiji, ak jab “kanuij jerbale.”​​—1 Kor. 7:​31.

Kinke nan in kakabilek eo jen Bible eo ear kamakit elõñ ro jeid im jatid ñan jab kajerbal lal in le jen joñan, rar bar etale bed eo air, kadiklok awa in air jerbal, im kõmman bwe en lamwan wãwen mour eo air. Elikin air kõmman men in, emõkaj air kile bwe rar kakõmõnmõnlok mour eo air kinke elaplok ien air kamao ibben family ko air im ilo jerbal eo air ñan Jehovah. Bareinwõt, wãwen mour eo air elamwan ear kamakit ir ñan kadiklok air atartar ion lal in im kalaplok air atartar ion Jehovah. Ak kwe​​—kwomaroñ ke kõmman bwe en lamwan wãwen mour eo am bwe kwon maroñ kowõnmanlok men ko an Ailiñ in Anij?​​—Mat. 6:​19-​24, 33.

“Elaplok Amro Ebake Jehovah Kiõ Jen Mokta”

Marc, eo kar konono kake ilo jinoin, ear lor nan in kakabilek eo ilo Bible ñan jab kajerbal lal in le jen joñan. Ear jab bõk jerbal eo eutiej kar lelok ñan e. Jet ran ko tokelik, ri utiej eo ilo jikin jerbal eo an Marc ear kõnan lelok ñan e juõn wõnãn elaplok bwe en kareel e ñan bõk jerbal eo ekãl. “Ear juõn melejoñ,” Marc ej ba, “ak iar jab bar bõke.” Ej kamelele kin un eo unin: “Kimro lio beleiõ Paula ar kõnan jerbal ñan Jehovah joñan wõt amro maroñ. Kin men in, kimro kar beek ñan kõmman bwe en lamwan mour eo amro. Kimar jar ñan Jehovah kin meletlet ñan tõbar mejenkajjik eo amro im kãlet ran eo me kimij kõnan kalaplok ien eo ñan am jerbal ñan Jehovah.”

Paula ear ba: “Iar jerbal jilu ran ko ilo kajjojo week einwõt juõn secretary ilo juõn hospital im ear emõn wõnãn eo iar bõke. Iar bareinwõt jerbal einwõt juõn regular pioneer. Bõtab, einwõt Marc, iar kõnan jerbal ñan Jehovah ilo jabdewõt jikin eo me elaplok an aikwiji ri keañ ro kin Ailiñ eo ie. Ak, ke iar lelok juõn letter ñan kejelãik e bwe inaj kabõjrak aõ jerbal, ri utiej eo ilo jikin jerbal eo ear ba bwe ej kab bellok jerbal eo einwõt secretary eo eutiejtata me ear tellokin aõ bõke. Kar jerbal in secretary eo elaptata wõnãn ilo hospital eo, ak iar bin wõt ilo bebe eo aõ ñan jolok jerbal eo aõ. Ke iar kwalok unin iar jab kõnan bõk jerbal eo, ear nebar iõ kin tõmak eo aõ.”

Ejjab to tokelik, Marc im Paula rar bõk jerbal eo einwõt special pioneer ro ilo juõn congregation edik im ilo juõn jikin etolok ilo Canada. Ta tokjen eo ear walok jen emmakit eo air? Marc ej ba: “Elikin aõ etal jen juõn jerbal elap wõnãn me iar kõmmane iumin jimettan in mour eo aõ, iar inebata kin ilju im jeklaj, ak Jehovah ear kajerammõn jerbal in kwalok nan eo amro. Elap amro lañliñ kin jibañ eo kimro maroñ lelok ñan ro jet bwe ren karejaran Anij. Jerbal in full-time kwalok nan ear bareinwõt kakõmõnmõnlok mour in belele eo amro. Bwebwenato eo amro ej bedbed ion men ko relukkun aorõk​​—kin men ko lor jitõb. Elaplok amro ebake Jehovah kiõ jen mokta.” (Jerb. 20:​35) Paula ej kakobaba: “Ñe kwoj etal jen jikin jerbal eo am im men ko remõn ilo mweo imõm, kwoj aikwij in likit aolepen liki eo am ion Jehovah. Kimar kõmmane men in, im Jehovah ear kajerammõn kim. Ro jeim im jatim rejitenburu ilo congregation eo ekãl rar kõmman bwe kimro en eñjake bwe rej yokwe im aikwiji kimro. Ij kiõ kajerbal kajur eo iar kajerbale ilo jikin jerbal eo aõ kar mokta ñan jibañ armij ro ñan jelã kajjen Anij. Elap aõ mõnõnõ ñan jerbal ilo jikin in kar karõke ñan aõ jerbal ie.”

‘Iar Mweie ak Jab Mõnõnõ’

Amy, eo kar konono kake mokta, ear kãlet juõn ial eoktak. Ear bõk jerbal in full-time eo elap wõnãn rar lelok ñan e. Amy ej ba: “Ilo yiõ eo moktata, iar kijejeto wõt ilo jerbal in kwalok nan, ak jidik kin jidik men eo eaorõktata ilo mour eo aõ ear ukõt jen men ko an Ailiñ eo ñan kowõnmanlok jerbal eo aõ. Rar kareel iõ ilo air letok ñan iõ jerbal ko reutiejlok im laplok wõnãir, im iar jino kate iõ ñan bõk jerbal kein. Ke ear laplok eddo ko aõ ilo jikin jerbal eo, jidik kin jidik ear diklok ien iar maroñ kajerbale ilo jerbal in kwalok nan. Eliktata, iar bõjrak jen aõ kwalok nan.”

Ke ij kememejlok kin ien eo, Amy ej ba: “Iar mweie. Iar etal ñan elõñ jikin ko im iar buñbuñ kin jerbal eo aõ eutiej. Bõtab, iar jab mõnõnõ. Meñe ear wõr aõ jããn, ear lap abañ ko aõ. Iar lemnak kin ta eo ear bwid. Inem iar kile bwe ilo aõ jibadõk juõn jerbal eutiej ilo lal in, mõttan jidik iar ‘jebwãbwe jen tõmak.’ Tokjen men in, einwõt Nan eo an Anij ej ba, iar eñtan kin ‘elõñ men in kaburomõj.’ ”​​—1 Tim. 6:​10.

Ta eo Amy ear kõmmane? Ej ba: “Iar kajitõk ibben elder ro ñan jibañ iõ kakajurlok ejmour eo aõ ilo jitõb im iar jino bed ilo kwelok ko. Ilo juõn ien al, iar jino jañ. Iar kememej ewi joñan aõ kar mõnõnõ iumin lalem yiõ ko ke iar bõk kunaõ ilo jerbal in kwalok nan einwõt juõn pioneer, meñe iar jeramel ilo tõre eo. Iar jelã bwe iar aikwij in bõjrak aõ jolok ien ñan korlok jããn im likit men ko an Ailiñ eo moktata. Iar bõk juõn jerbal ediklok an aorõk, meñe ear melelen bwe enaj diklok wõnãõ ñan joñan in 50 percent, im iar jino bar bõk kunaõ ilo jerbal in kwalok nan.” Ilo mõnõnõ Amy ej ba: “Iar lañliñ bwe iar maroñ bõk kunaõ ilo jerbal in pioneer iumin jet yiõ ko. Ij eñjake aõ juburu kiõ me iar jab iione ke iar jolok elap aõ ien ñan jerbal ilo lal in.”

Kwomaroñ ke ukõt wãwen ko ibbam im kõmman bwe en lamwan wãwen mour eo am? Elañe kwoj kajerbal ien eo me enaj wõr ibbam ñan kowõnmanlok men ko an Ailiñ eo, kwe bareinwõt kwonaj kõmman bwe en emõnlok mour eo am.​​—Ken. 10:22.

[Kareelel ilo page 19]

Kwomaroñ ke ukõt wãwen ko ibbam im kõmman bwe en lamwan wãwen am mour?

[Box/​Pija ilo page 19]

“Ij Lañliñ kake Men in Kiõ!”

David, juõn Ri Christian elder ilo America , ear kõnan koba ibben lio belen im ajiri ro nejin ilo jerbal in kwalok nan full-time. Ear maroñ bõk jerbal in part-time ilo jikin jerbal eo an, im ear jino bõk kunan im jerbal einwõt juõn regular pioneer. Oktak in ear ke kõmman bwe en emõnlok mour eo an? Jejjo alliñ ko tokelik, David ear jeje ñan juõn mõttan: “Ejelok jabdewõt men elaplok an kajuburu jen aõ bõk kunaõ joñan wõt aõ maroñ ilo aõ jerbal ñan Jehovah ibben family eo aõ. Iar lemnak bwe enaj to aõ iminene kin jerbal in pioneer, ak ij lañliñ kake men in kiõ! Elap an kaemololo jerbal in.”

[Pija ilo page 18]

Marc im Paula ilo jerbal in kwalok nan