En Tellokin Air Tel Yuk Ñan Unin Den Ko Den In Mour
“Lam eo . . . E naj air S̃eperd, im E naj tel ir ñõn unin dren ko dren in mour.”—REV. 7:17.
1. Ewi wãwen Nan in Anij ej kalikar wõn Christian ri kabit ro, im ta eddo eo Jesus ear lelok ñan ir?
NAN IN ANIJ ej kalikar bwe “dri korijer e tiljek im meletlet” ej Christian ri kabit ro me rej kejbãrok men ko an Christ ion lal. Ke Christ ear etale “dri korijer” in ilo 1918, ear lo bwe ri kabit rein rar tiljek wõt ilo air jerbal ñan ‘najirik ilo ien emõn’ armij ro kin ekan ko lor jitõb. Kin men in, Iroij eo, Jesus, ear mõnõnõ in kairoij ir “ion men ko otemjelok an.” (Read Matu 24:45-47.) Ilo wãwen in, mokta jen air bõk menin jolet eo air ilañ, ri kabit rein rej karejar ñan ri kabuñ ro jet an Jehovah ijin ion lal.
2. Kamelele kin men ko an Jesus.
2 Juõn iroij ewõr an maroñ ion men ko ak mweiuk ko an, im ej kajerbali ekkar ñan kõnan eo an. Men ko an Jesus Christ, eo me Jehovah ear kairoije einwõt King, ekoba aolep men ko an Ailiñ eo ion lal. Ekoba juõn “jar elap” me ri jilek John ear lo ilo vision eo. John ear kamelele kin jar in elap: “Elikin men kein I ar lale, im lo, jar elap, eo ejelok armij ej maroñ in bwinir, jen ailiñ otemjej, im ian bwij otemjej, im driloabjen otemjej, im konono otemjej, rej jutõk iman tron eo im iman mejen Lam, kõnõki kin nuknuk ko remouj, im pam ko ilo peir.”—Rev. 7:9.
3, 4. Ewi wãwen jar eo elap elukkun jerammõn?
3 Ro uan jar eo elap rej mõttan ro me Jesus ear naetair “bar jet Aõ s̃ip.” (Jon 10:16) Kejatdikdik eo air ej ñan mour indio ilo paradise eo ion lal. Rej liki bwe Jesus enaj “tel ir ñõn unin dren ko dren in mour” im bwe “Anij e naj kõmõraik dren in kemjãlãl otemjej jen mejeir.” Kin men in, “r’ar kwoli im kamouj nuknuk ko air ilo bõtõktõkin Lam.” (Rev. 7:14, 17) Rej jerbale tõmak ilo men in katok eo an Jesus, inem iman mejen Anij rej kõnak ‘nuknuk ko remouj.’ Anij ej kowãnik im naetair ro jeran, einwõt kar Abraham.
4 Bareinwõt, kinke Anij ej watõk jar in elap me rej mõttan sheep ro jet einwõt ro rewãnik, remaroñ kejatdikdik in ellã im mour jen jeebeplok eo an jukjuk im bed in ilo ien eñtan eo elap. (Jem. 2:23-26) Remaroñ kebake Jehovah, im einwõt juõn dolul, bõk juõn kejatdikdik ekabwilõñlõñ ñan ellã im mour jen Armageddon. (Jem. 4:8; Rev. 7:15) Rejjab kamakelok iair ak rej mõnõnõ in jerbal iumin King eo ilañ im ri kabit ro jatin ion lal.
5. Ewi wãwen jar eo elap ej jurake ri kabit ro jatin Christ?
5 Christian ri kabit ro rar jelmae im naj wõnmanlok im jelmae jumae ko relap jen lal eo an Satan. Mekarta, remaroñ atartar wõt ion ri jerbal ro mõttair me rej mõttan jar eo elap. Meñe eiet Christian ri kabit ro kiõ, oran jar eo elap ej orlok wõt ilo kajjojo yiõ. Ri kabit ro rejjab maroñ make lale kajjojo ian 100,000 congregation ko an Christian ibelakin lal. Inem, juõn ian wãwen ko ri kabit ro rej bõk jibañ jen kumi in sheep ro jet ej bwe maan ro jen jar eo elap rej jerbal einwõt elder ro ilo congregation ko. Kiõ “dri korijer e tiljek” ear jitõñ ir bwe ren jibañ im kejbãrok elõñ million Ri Christian ro.
6. Ewi wãwen kar kanan kin jibañ eo Christian ri kabit ro rej bõke jen sheep ro jet?
6 Ri kanan Isaiah ear kanan kin wãwen an Christian ri kabit ro naj kar bõk jibañ jen ri jerbal rein mõttair. Ear je: “Ein drein Jeova ej ba, Jerbal an Ijipt, im mweiuk ko mweien Itiopia, im ro dri Sebia, armij re utiej, re naj itok ñõn kwe, im re naj am: re naj lor yuk; ilo tomere ko re naj itok; im re naj buñbero ñõn kwe, im re naj akwelap ñõn yuk, im ba, Emol Anij ej ilo kwe; im ejelok bar juõn, ejelok Anij.” (Ais. 45:14) Ilo juõn wãwen ilo kõkkar, Ri Christian ro rainin me kejatdikdik eo air ej ñan mour ion lal rej etetal ilikin kumi in ri kabit ri karejar ro im Governing Body eo ak kumi eo ej tel dolul eo ad, im lor ir. Einwõt ro rej jerbal kin ejelok wõnãn, ro rej naetair sheep ro jet rej jerbal ilo mõnõnõ im kin aolepen burueir kamaat air maroñ im men ko mweieir ñan jurake jerbal in kwalok nan ibelakin lal me Christ ear lelok ñan ri kabit ri karejar ro an ion lal.—Jerb. 1:8; Rev. 12:17.
7. Jar eo elap ej katak kiõ ñan kõmman ta?
7 Ñe rej rejetak ri kabit ro jeiir im jatiir, ro uan jar eo elap rej katak bwe ren einwõt bedbedin jukjuk im bed eo ekãl me enaj bedwõt elikin Armageddon. Bedbed in ej aikwij bin, im ro uan rej aikwij jerbal ilo mõnõnõ ñan kajejjet nan in tel eo an Iroij eo. Ewõr ien kiõ ibben Ri Christian ro kajjojo ñan kwalok bwe King eo, Jesus Christ, en kajerbal ir. Ilo an Ri Christian ro kajjojo jerbale tõmak im kwalok tiljek kiõ, ej kwalok bwe enaj bojak in bokake ñe King eo ej lelok nan in tel ko ñan e ilo lal eo ekãl.
Jar eo Elap Ej Kamole Tõmak eo Air
8, 9. Ewi wãwen ro rej mõttan jar eo elap rej kamole tõmak eo air?
8 Kumi in sheep ro jet me rej ri jerbal ro mõttan Christian ri kabit ro rej kamole tõmak eo air ilo elõñ wãwen ko. Mokta, rej jurake ri kabit ro ilo jerbal in kwalok nan kin news eo emõn kin Ailiñ in Anij. (Mat. 24:14; 28:19, 20) Kein karuo, ilo mõnõnõ rej kõttãik ir im lor tel eo an Governing Body eo ak Kumi Eo Ej Tel dolul in.—Hib. 13:17; read Zechariah 8:23.
9 Kein kajilu, ro uan jar eo elap rej jurake ri kabit ro jeiir im jatiir ilo air mour ekkar ñan kien ko rewãnik an Jehovah. Rej kate wõt ir ñan kaddeklok “yokwe, lõñliñ, ainemõn, meanwõr, joij, lejokmen, tiljek, inemõn, jadõr.” (Gal. 5:22, 23) Rainin, ñe jej kwalok kadkad kein jen ad jebar “jerbal in kõniek ko,” ejjab juõn men emõn im buñbuñ iman mejen armij ro an lal. Ak, ro uan jar eo elap rej jek ilo burueir ñan kejbãrok ir jen “lũñ, etton, ejej, kabuñ ñõn ekjõp, marmir, kijirãt ko, akwail ko, ban ko, illu ko, wãlok ko, limõjnonu ko, kiõjaljal ko, junmar ko, karek, airwaro ko, im men ko eirwõt.”—Gal. 5:19-21.
10. Ta bebe eo ro uan jar eo elap rar jek ilo burueir?
10 Kinke jejjab wãppen, ebwe an bin ñan ad jebar kadkad ko kadkadin Christian, bõprae jerbal in kanniek ko, im jumae ijjibed ko rej itok jen lal eo an Satan. Mekarta, emwij ad jek ilo buruõd bwe jejamin kõtlok bwe buromõj eo ej itok jen mõjno ko ad make, likjap ilo jibadbad ko ad ñan anõk Jesus, ak nañinmij ko ad ren jelet kajurin tõmak eo ad ak kadiklok yokwe eo ad ñan Jehovah. Jejelã bwe Jehovah enaj kajejjet kitien kallimur ko an—ñan lomoren jar eo elap jen eñtan eo elap.
11. Ta wãwen ko Satan ear kajerbali ñan kamõjnoik tõmak eo an Ri Christian ro?
11 Mekarta, jej ekkõl wõt ien otemjej kinke jejelã bwe lukkun ri kijirãt eo ad ej Devil eo, im ejjab mõkaj an ebwer. (Read 1 Piter 5:8.) Ear kajeoñ in kajerbal Ri Christian ro rej ellok im jumae Anij im ro jet ñan air mone kij ñan ad bõk lemnak eo bwe katak ko jej tõmak kaki ak lori rejjab mol. Ak kõl in ekkã an likjap in wõr tõbrakin. Eindeinlok wõt, meñe matõrtõr jet ien ej kadiklok jerbal in kwalok nan, ilo mol ekkã an kakajurlok tõmak eo an ro rar bõk matõrtõr. Kin men in, Satan ej kalaplok an kajerbal juõn kõl ej lemnak enaj bolemen ñan kamõjnoik tõmak eo ad. Ej kajerbal eñjake in buromõj ko ad. Ilo ebeben eo kein kajuõn Ri Christian ro rar bõk nan in kakkõl ko kin men in ke kar jiroñ ir: “Bwe komin kalõmõnlokjen kin [Christ] Eo e ar kijenmij ilo an ro dri jerawiwi matõrtõr E.” Etke? “Bwe komin jab mõk im kijelok ilo buruemi.”—Hib. 12:3.
12. Ewi wãwen nan in kakabilek ko ilo Bible eo rej kakajur ro rej ebwer?
12 Kwonañin ke lemnak in bõjrak jen am jerbal ñan Jehovah? Jet ien kwoj lemnak ke bwe kwar likjap? Elañe aet, kwon jab kõtlok bwe Satan en bõpraik yuk jen am karejar ñan Jehovah. Ñe kwoj ture katak ko ñe kwoj katak kin Bible, jar jen buruõm, im ekkeini am bed ilo kwelok ko im kamao ibben ri tõmak ro mõttam, wãwen kein renaj kakajur yuk im kejbãrok yuk jen ‘am mõk’ im bõjrak. Jehovah ear kallimur bwe ebojak in kakajur ro rej karejar ñan e, im jemaroñ liki kallimur ko an. (Read Aiseia 40:30, 31.) Kwon boub wõt ilo jerbal eo an Ailiñ eo. Kejbãrok yuk jen am madjake men ko ejelok tokjeir, ak kwon boub wõt in jibañ ro jet. Inem kwonaj bõk kakajur ñan kijenmij meñe kwoj jelmae men in kabwerer ko.—Gal. 6:1, 2.
Rõlok jen Eñtan eo im Deloñ Ilo juõn Lal Ekãl
13. Ta jerbal ko rej bed iman ro renaj ellã im mour jen Armageddon?
13 Elikin Armageddon, elõñ ro rejjab wãnik renaj jerkakbiji. Renaj aikwij katak kin kien ko an Jehovah. (Jerb. 24:15) Renaj aikwij katak kin katok in binmour eo an Jesus. Elaplok jen men in, renaj aikwij katak ñan jerbale tõmak ilo katok eo an Jesus im bõk tokjen ko remõn jene. Rej aikwij karmijeteik katak ko jen kabuñ wan im illok jen mour eo air mokta. Rej aikwij kõnak armij eo ekãl me ej kamol bwe rej Christian ro remol. (Ep. 4:22-24; Kol. 3:9, 10) Sheep ro jet me rej ellã im mour jen Armageddon enaj lap air jerbal ilo ien eo. Enaj juõn ien ekalañliñ ñan jerbal ñan Jehovah, bwe enaj ejelok ijjibed ko im men ko jet jen jukjuk im bed in enana ñan kamade kij!
14, 15. Kamelele kin ta eo enaj walok ikõtan ro rej ellã im mour jen eñtan eo elap im ro rewãnik elikin air jerkakbiji.
14 Ri karejar ro retiljek an Jehovah me rar mij mokta jen an kar Jesus jerbal ion lal renaj aikwij katak kin elõñ men ko bareinwõt. Renaj aikwij in jelã kin wõn Messiah eo, me rar kijerjer in loe ak rar jab kinke rar mij. Ke rar mour, rar kalikar air mõnõnõ in jerbal ñan Jehovah. Baj lemnak kin ewi joñan ad naj lañliñ ñe jej jibañ ir—ñan wanjoñok, ñan kameleleik Daniel kin jejjet in kitien kanan ko ear jeiki ak ear jab melele kaki!—Dan. 12:8, 9.
15 Emol, meñe enaj lõñ men ko ro me renaj jerkakbiji renaj katak kaki jen kij, kij bareinwõt enaj lõñ men ko jenaj kõnan kajitõk ibbeir kaki. Remaroñ kameleleiklok ilo tibdikin men ko me Bible eo ejjab lukkun bwebwenato kake. Baj lemnak kin joñan ad naj mõnõnõ in roñjake ilo tibdikin bwebwenato ko kin Jesus jen John Ri Baptais! Ejelok bere bwe men ko jenaj katak kaki jen ri kennan rein retiljek renaj kalaplok ad kamolol kin Nan in Anij elaplok jen an wõr ibbed kiõ. Ri karejar ro retiljek an Jehovah me rar mij—ekoba ro uan jar eo elap me rar mij ilo tujemlokin jukjuk im bed in—renaj bõk “jerkakbiji eo emõnlok.” Rar ijjino air jerbal ñan Jehovah ilo juõn lal me Satan ej kajur iion. Enaj juõn ien emõn ñan wõnmanlok ilo air jerbal ilo ien ko remõn ilo juõn lal ekãl!—Hib. 11:35; 1 Jon 5:19.
16. Ekkar ñan kanan eo, ewi wãwen Ran in Ekajet eo enaj walok?
16 Ilo juõn ien rej naetan Ran in Ekajet eo, renaj kabellok book lemlem ko. Bible eo im book lemlem kein renaj bedbed eo ñan ekajete aolep ro rej mour ilo ien eo im lale elañe rej tellokin air bõk mour indio. (Read Reveles̃õn 20:12, 13.) Ilo tujemlokin Ran in Ekajet eo, armij ro kajjojo renaj aikwij kamole tu ia rej jutak ie kin aitwerõk eo kin wõn eo ej iroij bõtata ijoko otemjej ilañ im ion lal. Enaj kiblie ke ñan Ailiñ eo im kõtlok bwe Lamb eo en tel e ñan bõk “unin dren ko dren in mour”? Ak enaj ke jumae, im makoko in kõttãik e ñan Ailiñ in Anij? (Rev. 7:17; Ais. 65:20) Ilo ien eo, jerawiwi eo jaar jolete jen Adam ak ijjibed ko jen juõn lal enana, rejamin bõpraik armij otemjej ion lal jen air kalikar ta bebe eo air make. Ejelok jabdewõt emaroñ bere kin jimwe eo an Jehovah ilo ien ekajet eo eliktata. Ri nana ro wõt renaj jako ñan indio.—Rev. 20:14, 15.
17, 18. Ilo lañliñ Christian ri kabit ro im sheep ro jet rej kijoror kin ta eo ilo Ran in Ekajet eo?
17 Christian ri kabit ro rainin, me rej tellokiir jolet Ailiñ eo, ilo kijerjer rej reimanlok ñan ien eo renaj iroij ilo Ran in Ekajet eo. Enaj juõn jerammõn elap ibbeir! Kejatdikdik in rej kijoror kake ej kamakit ir bwe ren lor nan in kakabilek eo me Peter ear lelok ñan ro jeiir im jatiir ilo jitõb ilo ebeben eo kein kajuõn: “Kin men eo, ro jãtiõ, en laplok ami kate kom im kamol an kir im kãlet kom: bwe elañe komij kõmõn men kein kom jamin tibñil: Bwe ein drein naj wujlepwoj ñõn kom dreloñ eo iloan ailiñ in drio an ar Iroij im Dri Lomorer Jisõs Kraist.”—2 Pit. 1:10, 11.
18 Sheep ro jet rej lañliñ ibben ri kabit ro jeiir im jatiir. Emwij beek ilo burueir bwe renaj rejetake ir. Einwõt ro jeran Anij rainin, rej bõk kõketak ñan kõmman joñan wõt air maroñ ilo jerbal eo an Anij. Ilo Ran in Ekajet eo, renaj mõnõnõ in rejetake karõk ko an Anij kin aolepen burueir ke Jesus ej tel ir ñan unin den ko den in mour. Inem enaj tellokin air bõk jerammõn eo bwe ren ri karejar ro an Jehovah ñan indio!—Rom 8:20, 21; Rev. 21:1-7.
Kwoj Kememej Ke?
• Men ko an Jesus rekoba ta?
• Ewi wãwen an jar eo elap rejetake Christian ri kabit ro?
• Ta jerammõn im kejatdikdik ko ro uan jar eo elap rej lañliñ kaki?
• Ewi wãwen am lemnak kin Ran in Ekajet eo?
[Pija eo ilo peij 25]
Ro uan jar eo elap emwij air kwale nuknuk ko air im kemouji ilo bõtõktõkin Lamb
[Pija eo ilo peij 27]
Ta eo kwokõnan katak kake jen ro retiljek ñe renaj jerkakbiji?