Katak Jen Bwid ko an Ri Israel Ro
RI ISRAEL ro rar jelã kin ta eo Jehovah ear kõtmene jen ir ke rar deloñ ilo Enen Kallimur eo. Ikijen Moses, Jehovah ear kakien: “Komin ubakelok dri ene otemjej imami, im kokkure dreka air otemjej men in e, im kokkure men in e ko air re unlok, im kokkure jikin ko air reutiej.”—Bwin. 33:52.
Kar kakien armij in Israel bwe ren jab kõmman jabdewõt kain kwon ak bujen ainemõn ibben armij ro rej jokwe ilo eneo, im bareinwõt jab mareik ir. (Dut. 7:2, 3) Ilo mol, Anij ear kakkõl armij ro An: “Kwon lale mõk, im jab kõmõn bujen iben dri eneo kwoj ilok ñõn e, ñe ab juõn jen ilo bwiljõm.” (Ex. 34:12) Ak, Ri Israel ro rar jab bokake Anij im rar bo ilo aujid. Ta eo ear kõmman bwe ren lorak ilo aujid? Ta nan in kakkõl ko jemaroñ katak jen men ko rar kõmmani im jen tokjen ko rar walok ñan ir?—1 Kor. 10:11.
Kamao Ej Tellok ñan Kabuñ ñan Ekjap
Ñan air kar bõk Enen Kallimur eo, Ri Israel ro rar anjo ion armij ro rar jokwe ilo eneo ilo tarinae ko moktalok. Bõtab, ro nejin Israel rar likjap in bokake aolep nan in jiroñ ko an Anij. Rar jab mõn ri kijirãt ro. (Ekaj. 1:1–2:10) Jen an eindein, ke Ri Israel ro rar jokwe ibwiljin “jiljilimjuõn ailiñ ko” me rar jokwe ilo eneo, rar keini air kamao ibben ri ailiñ kein im men in ear tellok ñan air ejaake jimjera ko ibbeir. (Dut. 7:1) Ewi wãwen men in ear jelet Ri Israel ro? Bible eo ej ba: “Rar bõk ro nejir kõra bwe ren beleir, im rar lelok ro nejir kõra ñõn man ro nejin dri Kenean, im rar jerbal ñõn anij ro air. Im ro nejin Israel rar kõmõn men ko re nana iman mejen Jeova, im meloklok Jeova air Anij, im korijer ñõn Beal im Ashterot.” (Ekaj. 3:5-7) Kin an Ri Israel ro kar jolok ien ñan kamao ibben armij ro ilo eneo, rar jino mareiki jet iair im kabuñ ñan anij ko air. Kejatdikdik eo an Israel ñan jolok ri pagan ro jen eneo ear diklok elikin wõt air kar ejaake bujen ko ñan mareik ir. Kabuñ eo emol ear jorrãn, im Ri Israel ro rar jerbal ñan anij wan ko.
Ke armij ro ilo Enen Kallimur eo rar ri kijirãt ro an Ri Israel ro, rar lukkun kauwatata ñan Ri Israel ro kinke rar maroñ tarinaik ir. Ak kiõ ke Ri Israel ro rar kobalok ibbeir, ear laplok an kauwatata jen mokta kinke ri ailiñ ko rar maroñ kajorrãn lemnak ko air im kõtan eo air ibben Jehovah. Lemnak kin bar juõn wãwen me jorrãn eo kin kabuñ eo emol ear maroñ walok jene.
Jen Jerbal in Kallip ñan Kabuñ ñan Baal
Ke rar deloñe Enen Kallimur eo, ro nejin Israel rar bõjrak jen air ri itoitak im rar erom ri kallip ro. Wãwen ko kin kilen kallip me rar kajerbali bõlen kar einlok wõt ko me armij ro rar kaddek eneo mokta jen ir rar kajerbali. Alikar, Ri Israel ro rar jab baj anõke wõt kilen an Ri Canaan ro kallip. Air kobalok ibben armij in eneo ear bareinwõt kabo ir ñan tõmak ilo kabuñ eo air me ear ekkejellok ibben jerbal in kallip.
Ri Canaan ro rar kabuñ ñan elõñ Baal ko—anij ro me rar tõmak bwe rej kõmman an bũdej korlok elõñ ekan ko. Ijellokin an kar Ri Israel ro baj kaddek eneo im madmõd jen leen jikin kallip ko, ilo jemlokin rar kobalok ilo air kabuñ ñan anij ko an Ri Canaan ro einwõt ro ri letok jerammõn ko. Inem elõñ armij in Israel rar kõmmane wãwen in einwõt ñe rej kabuñ ñan Jehovah, ak ilo mol rar bõk kunair ilo jumae eo eyu nae kien ko an Anij.
Juõn Nan in Kakkõl Elap ñan Kij Rainin
Ej alikar bwe ekar ejelok lemnak in ibben Ri Israel ro ñan air kobalok ilo kabuñ eo an Baal im kõmman ko an renana ke rar jino jelã kajjen armij ro ilo Enen Kallimur eo. Ak, kin air kamao wõt ibben armij rein men in ear tellok ir ñan kabuñ ñan Baal. Jej aikwij kõtmene bwe jorrãn rot kein renaj walok elañe jej kamao ibben ro me remaroñ joij ñan kij ak rejjab kabuñ ñan Jehovah im eoktak mwiliir. Emol, jet ien emaroñ menin aikwij ñan kamao ibben ro ri jab tõmak ilo jikin jerbal ko ad, ilo school, ak bõlen ilo mweo. Bõtab, men eo ear walok ñan Ri Israel ro ej juõn menin kakkõl ñan kij bwe kobalok ilo kamao rot in ej kaal jorrãn. Bible eo ej ba kin mol in ejelok emaroñ jer jene: “Komin jab bwir: kõmao ko renana rej kakõt mõnit ko remõn.”—1 Kor. 15:33.
Rainin, jej jelmae elõñ melejoñ ko me Ri Israel ro rar bareinwõt jelmaiki. Ilo lal in rainin, elõñ men ko ak armij ro kajjojo me armij rej watõk ir einwõt anij. Rej kitibuj money, ri kõmman pija im ri al ro rebuñbuñ, ri ikkure ro re emakade, ri kien ro, jet ri tel ro an kabuñ, im bareinwõt ro uan family eo. Jabdewõt ian men kein remaroñ erom men ko elaptata ad itoklimo kaki ilo mour in. Ad kaddeklok jimjera ko rebak ibben ro rejjab yokwe Jehovah emaroñ kokkure kõtan eo ad ibben Anij.
Mour in lũñ ear mõttan eo eaorõktata ilo kabuñ ñan Baal me ear kareel im kabo elõñ ian Ri Israel ro. Ejja aujid in wõt ej kabo jet ibwiljin armij ro an Anij rainin. Ñan wanjoñok, aluiji pija in kelwan ko ilo Internet ikijen juõn computer ilo ijo ejelok armij ie emaroñ tel juõn eo ekõnan jelã men ko ak juõn armij ejjab kejbãrok jen an aluiji men ko me renaj katton bõklikit eo an erreo. Ekaburomõjmõj wõt elañe juõn Ri Christian enaj bo ikijen an aluiji pija in kelwan ko ilo Internet!
“Emõnõnõ Ro Rej Kejbãrok Nan in Kennan ko An”
Bebe eo ñan bokake Jehovah ak jab bokake e ilo ad kãlet ro jej kamao ibbeir, ej an juõn make kãlet. (Dut. 30:19, 20) Inem, jej aikwij kajitõkin kij make: ‘Ibben wõn ro ij kamao ibbeir ilo ien kamõnõnõ ko? Ewi wãwen rej watõk kien ko an Anij im emõn ke mwiliir? Rej ke kabuñ ñan Jehovah? Aõ kamao ibbeir enaj ke rejañ iõ bwe in juõn Ri Christian emõn?
Ri jeje Sam ear al: “Emõnõnõ ro re wãppen ilo ial eo; ro rej etal ilo kien Jeova. Emõnõnõ ro rej kejbãrok nan in kennan ko An, ro rej kabukot E kin aolepen burueir.” (Sam 119:1, 2) Aet, “emõnõnõ jabrewõt eo ej mijõk Jeova, eo ej etal ilo ial ko An.” (Sam 128:1) Ikijen jokãlet eo ad kin ro jej kamao ibbeir, jen katak jen bwid ko an Ri Israel ro im bokake Jehovah ilo eyu.—Ken. 13:20.
[Pija eo ilo peij 26]
Kamao ibben ro rejjab yokwe Jehovah emaroñ tel kij ñan kabuñ ñan ekjap