Watchtower ONLINE L̦ÃIBRÃRE
Watchtower
ONLINE L̦ÃIBRÃRE
Kajin M̦ajel̦
O̦
  • N̦
  • n̦
  • M̦
  • m̦
  • L̦
  • l̦
  • O̦
  • o̦
  • BAIBÕL̦
  • BOK IM KEIN KATAK
  • KWEILO̦K KO
  • w08 4/15 p. 30-p. 32 pãr. 11
  • Katak ko Relap Jen Book in Jon

Ejjañin wõr pija in ilo tõre in.

Jol̦o̦k bõd, ewõr juon problem ej kõm̦m̦an an jab jo̦ pija in.

  • Katak ko Relap Jen Book in Jon
  • Imõniaroñroñ Ej Kwalok kin Ailiñ eo an Jeova—2008
  • Unin Tõl Jidikdik Ko
  • Katak ko Jet
  • “LO, LAM AN ANIJ”
  • (Jon 1:1–​11:​54)
  • ‘LOR E WÕT’
  • (Jon 11:55–​21:​25)
  • Tokjen Katak ko ñan Kij:
  • “Auõ E Mottok!”
    Imõniaroñroñ Ej Kwalok kin Ailiñ eo an Jeova—2001
  • “Auõ An E Jañin Mottok”
    Imõniaroñroñ Ej Kwalok kin Ailiñ eo an Jeova—2001
  • Wõn Jesus Christ?
    Imõniaroñroñ Ej Kwalok kin Ailiñ eo an Jeova—2006
Imõniaroñroñ Ej Kwalok kin Ailiñ eo an Jeova—2008
w08 4/15 p. 30-p. 32 pãr. 11

Nan eo an Jehovah Ej Mour Wõt

Katak ko Relap Jen Book in Jon

JOHN​​—“dri kalor eo Jisõs ej yokwe”​​—ej ri jeje eo eliktata ear je juõn bwebwenato ekakõrmol kin mour im jerbal eo an Christ. (Jon 21:​20) Kar je book in ebake 98 C.E., im jidik wõt an Gospel in Jon elij kin ta eo ej ba ilo Gospel ko jet jilu.

Ri jilek John ear jeje Gospel eo an ilo an lemnak kin juõn mejenkajjik. Ikijen men ko ear jeje kaki, ear ba: “A emwij jeje men kein bwe komin tõmak bwe Jisõs e dri Kraist, Nejin Anij; im bwe kin ami liki, komin bõk mour ilo etan.” (Jon 20:​31) Emol bwe ennan in elap tokjen ñan kij.​​—Hib. 4:​12.

“LO, LAM AN ANIJ”

(Jon 1:1–​11:​54)

Ke ear lo Jesus, John Ri Baptais ear keañ ilo liki: “Lo, Lam an Anij, Eo ej bõklok an lõl jerawiwi!” (Jon 1:​29) Ke Jesus ear itoitak ibelakin Samaria, Galilee, Judea, im ene eo iturear in River Jordan​​—ñan kwalok nan, katakin, im kõmanman men in bwilõñ ko​​—“elõñ rej tõmak E ijo.”​​—Jon 10:​41, 42.

Juõn ian menin bwilõñ ko relap Jesus ear kõmmane kar jerkakbiji eo an Lazarus. Elõñ rar tõmak ilo Jesus ke rar lo an juõn emaan jerkakbiji elikin an kar mij iumin emen ran. Bõtab, priest ro reutiej im Pharisee ro rar beek in mõn Jesus. Kin men in, Jesus ear illok im etal ñan “juõn ene ebak ene jemaren, ilo juõn jikin kwelok etan Ipreim.”​​—Jon 11:​53, 54.

Emwij Uaki Kajitõk ko Rej Bedbed ion Bible:

1:​35, 40​​—Ijellokin Andrew bar wõn ri kalor eo ear jutak iturin John Ri Baptais? Ke ri bwebwenato eo an book in ear konono kin “Jon” ear jitõñlok ñan John Ri Baptais im jab ñan e make ilo Gospel in an. Kin men in, ri kalor eo me ear jeje Gospel in kar Jon.

2:​20​​—Ta temple eo kar kaleke iumin “eñoul im jiljino yiõ” ko? Ri Jew ro rar jitõñlok ñan temple eo an Zerubabbel me King in Judea eo Herod ear bar kaleke. Ekkar ñan ri jeje bwebwenato eo Josephus, jerbal in ekkal eo ear ijjino ilo yiõ eo kein ka 18 in an Herod iroij, ak ilo 18/17 B.C.E. Jikin kwojarjar eo ilo temple eo im jikin ko jet relap rar kaleki iumin 8 yiõ ko. Bõtab, jerbal eo ñan kalek aolepen temple eo ear wõnmanlok im ellã jen Ran in Kijone eo ilo 30 C.E., ke Ri Jew ro rar ba bwe ekar bõk 46 yiõ ko ñan kaleke.

5:​14​​—Nañinmij ej itok ke jen ad jerawiwi? Jab aolep ien. Jesus ear kejmoure juõn emaan ear nañinmij iumin 38 yiõ ko kin an kar jolet jab wãppen. (Jon 5:​1-9) Melelen nan kein an Jesus kar eñin bwe kinke emaan eo ear bõk tiriamokake, kiõ ear aikwij lor ial in lomor eo im jab bar jerawiwi im bõk juõn jorrãn elaplok jen nañinmij eo. Emaan eo emaroñ kar kõmman juõn bwid elap me ej tellokin mij ñan indio.​​—Mat. 12:​31, 32; Luk 12:10; Hib. 10:​26, 27.

5:​24, 25​​—Wõn ro rej ‘ellã jen mij ñõn mour’? Jesus ear konono kin ro rar mij ilo jitõb ak ke rar roñjake nan ko an rar tõmak ilo e im bõjrak jen air kõmman nana. Rar ‘ellã jen mij ñõn mour’ kinke ekajet ñan mij ejjab bed ioir, im rar bõk kejatdikdik eo ñan bõk mour indio kinke rar tõmak ilo Anij.​​—1 Pit. 4:​3-6.

5:​26; 6:​53​​—Ta melelen ‘mour ilo e’? Ñan Jesus Christ, ej melelen bwe en bõk ruo maroñ ko jen Anij​​—maroñ eo ñan jibañ armij ro ñan bed ilo juõn kõtan emõn ibben Jehovah im maroñ eo ñan an kajerkakbijeik armij eo jen mij. Ñan ri kalor ro an Jesus, ‘mour ilo ir’ ej melelen air bõk mour indio. Christian ri kabit ro rej bõk mour indio ilo e ñe rej jerkakbiji im mour ilañ. Ro retiljek me kejatdikdik eo air ej ñan mour ion lal, renaj bõk mour indio elikin air ellã jen melejoñ eo eliktata me enaj walok elikin jemlokin Iroij eo an Christ iumin juõn thousand yiõ ko.​​—1 Kor. 15:​52, 53; Rev. 20:​5, 7-​10.

6:​64​​—Jen ien eo Jesus ear kãlet Judas Iscariot, ear jelã ke bwe Judas enaj kar ketak e? Alikar bwe ear jab. Bõtab, juõn ien ilo 32 C.E., Jesus ear jiroñ ri jilek ro an: “juõn iami ej juõn devil [ak ri ruruwe]!” Bõlen, ilo ien eo Jesus ear kile bwe eñin kar “jinoin” ien an Judas Iscariot etetal ilo ial eo ebwid.​​—Jon 6:​66-​71.

Tokjen Katak ko ñan Kij:

2:4. Jesus ear kalikar ñan Mary bwe einwõt Nejin Anij emwij baptaisi im kar kabiti, ear aikwij lor nan in tel eo an Jemen ilañ. Meñe Jesus ej kab jino jerbal in kwalok nan eo an, ear jelã kin awa eo, ak ien eo, kin ta eo ear aikwij kõmmane ilo jerbal eo an, ekoba lelok mour eo an ilo mij. Ejelok juõn uan family eo an ebak einwõt Mary emaroñ kar kabõjrak e jen an kõmanman ankilan Anij. Jej aikwij bõk ejja lemnak rot in ñe jej karejar ñan Jehovah Anij.

3:​1-9. Wanjoñok eo kin Nicodemus, juõn iroij an Ri Jew ro, ej katakin kij kin ruo katak ko. Mokta, Nicodemus ear kwalok ettã buru, lolokjen, im ear kile aikwij eo an ñan bõk ekan ko lor jitõb. Bareinwõt ear kile bwe Anij ear jilkintok juõn nejin ri carpenter ettã buruen einwõt juõn ri katakin armij. Ri Christian ro remol ilo ran kein rej aikwij kwalok ettã buru. Kein karuo, Nicodemus ear jenliklik jen an erom juõn ri kaloran Christ ke Jesus ear bed ion lal. Bõlen ear eindein men in kinke ear mijake armij, ear kaorõk jikin eo an eutiej ilo Sanhedrin eo, ak ear yokwe mweiuk ko an. Jen katak in jemaroñ bõk juõn nan in kakkõl eaorõk: Jen jab kõtlok bwe kain kõnan rot kein ren kabõjrak kij jen ad ‘kwotõk alal in eñtan eo ad im lor Jesus.’​​—Luk 9:​23.

4:​23, 24. Elañe jekõnan bwe Anij en buñburuen kin kabuñ eo ad, jej aikwij mour ekkar ñan mol eo ilo Bible im kõtlok bwe jitõb kwojarjar eo en tel kij.

6:​27. Ñan bõk “mõñã eo ej ñõn mour indrio” jej aikwij kate kij ñan kabwe aikwij ko ad ilo jitõb. Ñe jej kõmman men in jenaj mõnõnõ.​​—Mat. 5:3.

6:​44. Jehovah make ej kejbãrok kij. Ej karuaklok kij kajjojo ñan Nejin ikijen jerbal in kwalok nan im ilo an jibañ kij ñan melele im jerbale katak ko remol kin men ko lor jitõb ikijen jitõb kwojarjar eo An.

11:​33-​36. Kwalok eñjake ko ad ejjab melelen jej mõjno.

‘LOR E WÕT’

(Jon 11:55–​21:​25)

Ke ej ebak ñan ran in Kijone eo ilo33 C.E., Jesus ej jeblak ñan Bethany. Ilo Nisan 9, ear uwe ion juõn kon in ass ke ear itok ñan Jerusalem. Ilo Nisan 10, Jesus ear bar itok ñan temple eo. Ñan uake jar eo an bwe ãt eo etan Jemen en aibujuij, juõn ainikien jen lañ ej ba: “I ar kaibujuij e, im I naj bar kaibujuij e.”​​—Jon 12:28.

Ke rej mõñã mõñã in Kijone eo, Jesus ear lelok jet nan in kakabilek ko raorõk ñan ri kalor ro an kinke ear bojak in illok jen ir. Elikin kar jibwe, ekajet e, im mõn e, Jesus ear jerkakbiji.

Emwij Uaki Kajitõk ko Rej Bedbed ion Bible:

14:2​​—Ewi wãwen Jesus enaj kar ‘keboje juõn jikin’ ilañ ñan ri kalor ro an retiljek? Men in enaj kar kitibuj an Jesus kowãppen bujen eo ekãl ilo an walok iman Anij im lelok ñan E aorõkin bõtõktõkin. Keboje jikiir ear bareinwõt koba an Christ jijet ion throne eo einwõt king, im elikin men in jerkakbiji eo an ri kabit ri kalor ro an ñan mour ilañ enaj kar jinoe.​​—1 Tes. 4:​14-​17; Hib. 9:​12, 24-​28; 1 Pit. 1:​19; Rev. 11:15.

19:11​​—Jesus ear konono ke kin Judas Iscariot ke ear konono ibben Pilate kin juõn emaan me ear ketak E? Jen an jitõñlok ñan Judas ak jabdewõt armij, alikar bwe Jesus ear lemnak kin aolep ro rar bõk kunair ñan ketak e. Ear koba Judas, “pris ro relap im dri bebe ro relap otemjej,” im “jar” in armij ro me rar kajitõk bwe ren kõtlok Barabbas.​​—Mat. 26:​59-​65; 27:​1, 2, 20-​22.

20:17​​—Etke Jesus ear jiroñ Mary Magdalene bwe en jab uñure? Nan in Greek eo rej ukõte “uñure,” ej bareinwõt melelen “debij, toto ibben, jibwe.” Inem, Jesus ear jab dike ke Mary Magdalene ear baj uñure wõt e, kinke ear kõtlok bwe limaro jet ren “drebij neen.” (Matu 28:9) Mary ear eddeb ak jibwe Jesus kinke ear lemnak bwe enaj kar wanliñlok ñan lañ im ejamin bar lo e. Ñan kamol bwe ejañin tok ien eo bwe en etal jen e, Jesus ear jiroñ kõrã eo bwe en jab debij e ak emõnlok an etal ñan ri kalor ro an im kwalok news eo emõn bwe ear jerkakbiji.

Tokjen Katak ko ñan Kij:

12:36. Ñan erom “nejin maram,” ak ro rej bõklok meram, jej aikwij bõk jelãlokjen eo ejimwe jen Nan in Anij, Bible eo. Inem jej aikwij kajerbal jelãlokjen in ñan kadiojtok armij ro jen marok ilo jitõb ñan meram in Anij.

14:6. Ejelok bar juõn ial ijellokin Jesus Christ bwe jen bõk buñburu eo an Anij. Ilo ad jerbale tõmak eo ad wõt ilo Jesus im lor joñok eo an jenaj maroñ ruaklok ñan Jehovah.​​—1 Pit. 2:​21.

14:​15, 21, 23, 24; 15:10. Kiblie ñan kõmanman ankilan Anij enaj jibañ kij ñan bedwõt ilo yokwe eo an Anij im yokwe eo an Nejin.​​—1 Jon 5:3.

14:26; 16:13. Jitõb kwojarjar eo an Jehovah ej jerbal einwõt juõn ri katakin armij im kein kakememej eo. Ej bareinwõt kwalok katak ko remol. Kin men in, emaroñ jibañ kij ñan kalaplok jelãlokjen, meletlet, lolokjen, ekajet jimwe, im lemnak eo ad. Inem jej aikwij niknik ilo jar, im kajitõk kin jitõb kwojarjar in.​​—Luk 11:​5-​13.

21:​15, 19. Kar kajitõk ibben Peter elañe ear yokwe Jesus elaplok jen “men kein,” melelen, ek ko rar bed imair. Jesus ear kalikar aikwij eo bwe Peter en beek in lor e ien otemjej im jab jibarõk jerbal in eñwõd ek. Elikin ad etale Gospel ko, jemaroñ beran in jek ilo buruõd ñan yokwe Jesus elaplok jen ad yokwe men ko jet. Aet, jen beek in lor e kin aolepen buruõd.

[Pija ilo page 31]

Ta eo jemaroñ katak jen joñok eo an Nicodemus?

    Bok im Kein Katak ilo Kajin M̦ajel̦ (1983-2026)
    Log Out
    Log In
    • Kajin M̦ajel̦
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Kilen Kõjerbale
    • Privacy Policy
    • Privacy Settings
    • JW.ORG
    • Log In
    Share