Kaddek Ilo Kõmmanwa Men ko Kwoj Kõtmene kaki, im Lañliñ Wõt

“IAR bar likjap!” Jete alen kwar ba juõn men einwõt in kinke kwar jab maroñ kõtõbrak juõn men kwar karõke? Juõn jinen emõn dettan emaroñ kwalok eñjake rot in kinke emõk kin an ikutkut an niñniñ eo nejin ej kab lotak aikwiji ñan lale im ej ebwer kin an dik an ien ñan lali men ko lor jitõb. Bar juõn Ri Christian emaroñ eñjake bwe ewõr joñan an maroñ kõmmani men ko kin wõt wãwen air kar kõmman ñan e ke ear juõn ajiri im ej lemnak bwe edik ijo kunan ilo congregation eo. Juõn Ri Kennan eo eritto emaroñ buromõj kinke ejjab maroñ kalaplok ijo kunan ilo makitkit ko an Christian me ear lañliñ kaki ilo ien eo ear kajur wõt im maroñ makitkit. “Jet ien juõn katak me ej rejañ ro jet ñan air pioneer ej kõmman bwe in jañ,” Christiane ej ba, eo me wãwen ko ilo family eo an rej bõprae an kõmman joñan wõt an kõnan ilo jerbal eo an Jehovah.

Ewi wãwen jemaroñ kamadmõde kain eñjake rot in? Ewi wãwen jet Ri Christian rar maroñ kaddek juõn lemnak ejimwe kin wãwen ko ibbeir? Ta tokjen ko rej walok ñe ej wõr kõtmene ko rejokkin wõt juõn?

Kwon Kõmmanwa

Ri jilek Paul ej letok juõn key ñan debij lañliñ eo ad ke ear ba: “Komin lõñliñ ilo Iroij ien otemjej: im ij bar ba, komin lõñliñ. Ami kamanwa en walok ñõn armij otemjej.” (Pil. 4:​4, 5) Ñan lo lañliñ im juburu ilo ad karejar ñan Anij, jej aikwij kaddek ilo kõmmanwa men ko jej kõtmene kaki ekkar ñan maroñ im wãwen ko ibbed. Elañe jej kamaat ad maroñ ñan tõbar mejenkajjik ko ejelok kõmmanwa ie jekdon ewi joñan an bin, jej bõktok buromõj im inebata iod make. Ijo turãjet, jej aikwij kejbãrok bwe jen jab tiriamokake kij make, im kajerbal men ko jej lemnak jej mõjno kaki einwõt kein jekben kin unin jej kadiklok ijo kunad ilo jerbal eo an Christian.

Jekdon ta wãwen ko ibbed, Jehovah ej watõk bwe jen lelok ñan e men ko ad remõntata​​—aolepen aad im jerbal kin aolepen buruõd. (Kol. 3:​23, 24) Elañe jaar jab lelok ñan Jehovah men eo emõntata, jejamin kar mour ekkar ñan wujleplok eo ad ñan e. (Rom. 12:1) Bareinwõt, jenaj kar bõprae kij make jen ad bõk juburu eo emũlal, lañliñ eo emol, im jerammõn ko jet rej itok jen jerbal ko jen aolepen buruõd.​​—Ken. 10:22.

Nan eo kar ukõte “kõmmanwa” ilo Bible eo ej bed melele eo kin jelã lemnak. Ej lukkun melelen ‘jelã ukoktak.’ (Jem. 3:​17) Nan eo ej bareinwõt kalikar maroñ eo ñan kile ad aikwij jab le jen joñan ad kijñeñe. Inem, elañe jej kõmmanwa, jenaj maroñ bõk juõn lemnak ejokkin wõt juõn kin wãwen ko ibbed. Ebin ke ñan kõmmane men in? Ñan jet ebin, meñe rej maroñ kwalok air buromõj kake ro jet. Ñan wanjoñok, elañe juõn jeram ebak ear kwalok an mõk kin an lap an jerbal, jen kar jab kajeoñ jibañ e ke ñan lo meletlet in ñan an kõmman oktak ko ilo mour eo an? Ilo ejja wãwen in wõt, jej aikwij katak ñan kile wãwen ko rej kwalok ñan kij bwe jej kõmman ellã jen joñan maroñ ko ad.​​—Ken. 11:17.

Ñan bõk juõn lemnak ekõmmanwa kin joñan maroñ ko ibbed emaroñ bin elañe ear lap an jemed im jined jibed kij ke jaar dik. Jet rej eñjake bwe ilo ien eo ke rar ajiri rar aikwij aolep ien kalaplok ak kakõmõnmõnlok air jerbal ñan air maroñ lo yokwe jen jemeir im jineir. Elañe kar eñin wãwen eo ibbed, jemaroñ bõk juõn lemnak ebwid kin wãwen an Jehovah lemnak kin kij. Jehovah ej yokwe kij kin wãwen eo jej karejar ñan e kin aolepen buruõd. Nan eo an Anij ej kamol ñan kij bwe Jehovah ‘E jelã wãwen kõmõnmõn kij; E kememej bwe kij bõñõlñõl.’ (Sam 103:​14) Ejelã joñan maroñ ko ad im meñe eindein ej yokwe kij elañe jej karejar ñan e ilo kijejeto. Ad kememej bwe Anij eo ad ejjab juõn eo ej watõk men ko relap jen kij enaj jibañ kij ñan kwalok ettã buru ikijen men ko jej kõtmeni jen kij make, ilo ad kile joñan maroñ ko ad.​​—Mic. 6:8.

Meñe eindein, jet renaj lo bwe ebin ñan kaddek lemnak rot in ejokkin wõt juõn. Elañe ej mol men in ibbam, etke kwojjab bukõt jibañ eo an juõn Ri Christian me emõn an jelã kajjem? (Ken. 27:9) Ñan wanjoñok, kwoj kõnan ke jerbal einwõt juõn regular pioneer? Ej juõn mejenkajjik emõn! Ebin ke ñan am tõbare? Bõlen kwoj aikwij jibañ ñan kõmman bwe mour eo am en lamwan. Ak eo jeram me kwoj liki emaroñ konono ibbam elañe mejenkajjik eo ñan erom juõn regular pioneer ej menin meletlet ilo ien in me elõñ eddo ko am ilo family eo. Emaroñ jibañ yuk ñan lo elañe kwomaroñ kõtõbrak jerbal ko jet rej kitibuj ilo jerbal in pioneer ak ta oktak ko kwonaj aikwij kõmmani ñan kamaroñ yuk ñan kalaplok ijo kunam. Leo ri belele emaroñ bareinwõt jibañ lio belen lo wãwen eo emõn me ej ekkar ñan maroñ ko an. Ñan wanjoñok, leo emaroñ rejañ lio bwe en kakije mokta jen an jino juõn alliñ ekãl me enaj lap an boub. Men in emaroñ kalaplok kajur eo an im jibañ e ñan debij lañliñ eo an ilo jerbal in kwalok nan.

Bukõt Men ko Kwo Maroñ Kõmmani

Rittolok ak nanalok ejmour emaroñ kadiklok ijo jemaroñe ilo jerbal eo an Jehovah. Elañe kwoj juõn jemen ak jinen, kwomaroñ bõk lemnak in bwe jidik wõt am bõk tokjen jen am katak ibbam make ak jen kwelok ko an Ri Christian kinke aolepen ien im kajur ko am remaat ibben ajiri ro. Bõtab, jet ien kin am mad kin joñan maroñ ko am, men in emaroñ bõprae yuk jen am kile bwe ej wõr wõt men ko jet kwomaroñ kõmmani.

Elõñ thousand yiõ remotlok, juõn Ri Levi ear kwalok juõn kõnan me ear jab maroñ kõtõbrake. Ear bõk jerammõn eo ñan an jerbal ilo temple eo iumin ruo week ilo kajjojo yiõ. Bõtab, ear kwalok juõn kõnan emõn ñan an bedwõt iturin lokatok eo. (Sam 84:​1-3) Ta eo ear jibañ lein etiljek ñan an juburu? Ear kile bwe juõn wõt ran iloan worwor in temple eo ear juõn jerammõn ejej uan. (Sam 84:​4, 5, 10) Eindein, jen ad lemnak kin joñan maroñ ko ad, jej aikwij kile im kamolol kin men ko jemaroñ kõmmani.

Einwõt juõn wanjoñok, lemnak kin Nerlande, juõn Christian sister ilo Canada. Liin ej kajerbal juõn wheelchair im ear eñjake bwe ear dik men ko ear maroñ kõmmani ilo jerbal in kwalok nan. Bõtab, ear ukõt lemnak eo an ilo an watõk bwe juõn jikin kaikujkuj ebak en einwõt territory eo an make. Ear kamelele: “Ij jijet ilo wheelchair eo iturin juõn jikin jijet ilo jikin kaikujkuj eo. Ij lo lañliñ ilo aõ kwalok ñan armij ro rej itok im jijet ñan kakije jidik.” Ilo an bõk kunan ilo wãwen kwalok nan rot in, ear bõktok elap lañliñ ñan Nerlande.

Kõmman Oktak ko elañe Ej Menin Aikwij

Juõn waan ejerakrõk emaroñ jerak ilo juõn joñan emõkaj kin kõto eo ej uuki wõjlã eo an. Bõtab, ñe eo ej kajebebe wa eo ej iion juõn kõto elap, ej aikwij diake wa eo. Ejelok an maroñ ion kõto eo, ak ilo an kõmman oktak ko, ewõr wõt an maroñ kajebebeik wa eo. Ilo juõn wãwen einwõt in, ekkã an ejelok ad maroñ ion wãwen ko renana rej walok me rej einwõt lañ ko jej iioni ilo mour ko ad. Ak jemaroñ kajebebeik mour eo ad joñan wõt ad maroñ ilo ad ukõt wãwen ad kajerbal enbwinid, lemnak, im eñjake ko ad. Ñe jej lemnak kin wãwen ko rekãl rej walok ñan kij, enaj jibañ kij ñan kejbãrok juburu im lañliñ eo ad ilo jerbal eo an Anij.​​—Ken. 11:2.

Lemnak kin jet wanjoñok ko. Elañe edik joñan kajur eo ad, jenaj lo bwe ej ekkar bwe jen bõprae jabdewõt makitkit ko rej kamõkmõk ilo jinoin ran eo bwe jen maroñ kajur wõt ñan bed ilo kwelok eo an Christian ilo joten eo. Men in enaj kamaroñ kij ñan bõk tokjen kamao ko an Christian ro jeid im jatid. Ak elañe juõn jinen ejjab maroñ bõk kunan ilo jerbal in kwalok nan jen em ñan kinke ajiri eo nejin ejjab emõn an mour, emaroñ lo bwe ej menin meletlet ñan kirtok juõn Christian sister ñan mweo imõn bwe en maroñ bõk kunan ñan kwalok nan ilo telephone ke niñniñ eo ej kiki.

Ta elañe wãwen ko ibbam rejjab kõtlok bwe en let am keboj katak ko renaj walok ilo kwelok ko an congregation eo? Kwomaroñ bebe kin joñan eo kwonaj maroñ keboje im kajeoñ kõmmane ilo emõn. Ilo ad ukõt mejenkajjik ko ad kiõ, jenaj maroñ boub wõt im mõnõnõ.

Ñan ukõt mejenkajjik ko ad ej aikwij wõr bebe im kate. Serge im Agnès, ruo ri belele ilo France, rar aikwij kõmman juõn oktak elap ilo bebe ko air. “Ke kimar jelã bwe Agnès ear bõroro, kõnan eo amro ñan deloñ ilo jerbal in missionary ear jako,” Serge ej ba. Kiõ ej juõn jemen ewõr ruo nejin ledik, im Serge ej kamelele kin ewi wãwen rej kõmman juõn mejenkajjik ekãl einwõt ri belele ro. Serge ej ba: “Kinke kimar jab maroñ jerbal ilo ailiñ ko jet, kimar bebe bwe kimin ‘missionary ro’ ilo ailiñ eo amro. Kimar kobalok ibben juõn kumi ej konono bar juõn kajin.” Rar ke bõk tokjen jen mejenkajjik in ekãl? Serge ej ba: “Kimij eñjake an lap tokjemro ilo congregation eo.”

Odile, juõn Ri Christian sister ilo France eo ej 70 jima an yiõ ear eñtan kin an kũrro bukwien, im ejjab maroñ jutak aetok. Ear ebwer kinke mõjno ko ilo enbwinin rar bõprae e jen an bõk kunan ilo jerbal in kwalok nan jen em ñan em. Bõtab, ear jab bõjrak. Ear ukõt wãwen an kwalok nan ikijen an kajerbal telephone. Ear ba: “Ebidodolok im kamõnõnõlok jen aõ kar lemnak kake!” Kilen kwalok nan in eoktak ear kajeblak kõnan eo an ñan kwalok nan.

Kõmmanwa kin Men ko Jej Kõtmene kaki Rej Bõktok Jerammõn

Kaddek juõn lemnak ekõmmanwa kin joñan eo jemaroñ kõmmane enaj kejbãrok kij jen elõñ inebata ko. Ilo ad kõmman mejenkajjik ko rejokkin wõt juõn, jenaj eñjake ad lo tõbrak meñe ewõr joñan maroñ ko ibbed. Kin men in jej lañliñ kin men eo jaar kõtõbraki, meñe edik.​​—Gal. 6:4.

Ilo ad kaddek juõn lemnak ejokkin wõt juõn kin kij make, enaj laplok ad joij im lemnak kin ro jet. Kin ad jelã joñan maroñ ko ibbeir, jenaj aolep ien kamolol kin men eo rej kõmmane ñan kij. Ilo ad kwalok kamolol kin jabdewõt jibañ kar letok ñan kij, jenaj jibañ kowõnmanlok juõn jitõb in burukuk im jerbal ibben don. (1 Pit. 3:8) Kememej, einwõt juõn jemen ej yokwe, Jehovah ejamin kajitõk elaplok jen joñan maroñ ko ad. Im elañe ejokkin wõt juõn kõtmene ko ad im jej kõmman mejenkajjik ko rebidodo tõbari, makitkit ko ad ilo jitõb renaj bõktok elap juburu im lañliñ!

[Naan ko ilo peij 29]

Ñan bõk lañliñ im juburu ilo ad karejar ñan Anij, jej aikwij kaddek ilo kõmmanwa men ko jej kõtmene kaki ekkar ñan maroñ ko ad im wãwen ko rej walok ibbed

[Pija eo ilo peij 30]

Nerlande ej lo lañliñ ilo an kõmman joñan eo emaroñe ilo jerbal in kwalok nan

[Pija eo ilo peij 31]

Katak ñan “diake wa eo”

[Etan eo ej kõmman ilo peij 31]

© Wave Royalty Free/age fotostock

[Pija eo ilo peij 32]

Serge im Agnès rar bõk tokjen jen air kar kõmman mejenkajjik ko rekãl