Bõk Lemnok eo Ekkar ñõn Baibel kin Ejmour
“Kwon yokwe Iroij am Anij . . . kin aolepen am lolãtãt, im kin aolepen am kajur.”—MARK 12:30.
1. Kar ta karõk eo an Anij ñõn armij ro?
NAÑINMIJ im mij rar jab karõk eo an Jeova Anij ñõn armij ro. Kar likit Adam im Iv ilo jikin kallip in Iden, ak paredais eo ekamõnõnõ, ñõn “jerbal e im kejbãrok e,” jab ñõn 70 ak 80 yiõ ko wõt, ak ñõn indrio. (Jen. 2:8, 15; Sam 90:10) Elañe armij ro ruo moktata rar tiljek wõt ñõn Jeova im rar kwalok air yokwe ikijen air kõtãik ir ñõn iroij potata eo an, rejamin naj kar nañinmij, mõjinolok im mij.
2, 3. (a) Ewi wãwen buk in Ekklisiastis ej kwalok kin bwijwõlã? (b) Wõn eo ej bõke erron mij eo jaar jolit jen Adam, im ewi wãwen men in enaj joko?
2 Ekklisiastis japter 12 ear pijaiki ilo alikar “ran ko re nana” me ej mõtõn ridtolok kin jab wãppen eo an armij. (Riit Ekklisiastis 12:1-7.) Kar keiri uõn ñõn “wijki in almond,” im ne ko remõjno im bin air etetal einwõt “armij re kajur.” Im ro rej reilok jen windo ko ñõn kabuk maram rej lo wõt marok, men in ej kõkkar kin mej ko retab. Kinke jet ñi ko rejoko, “ro dri irir re naj bwijrõk bwe reit.”
3 Ne ko rewurirrir, mej ko retab, im ñi ko rejoko rar jab karõk eo an Anij ñõn armij ro. Bareinwõt, mij eo jaar jolit jen Adam ej juõn ian “jerbal ko an devil” me Nejin Anij enaj joloke ikijen Ailiñ in Messaia eo. Dri jilik Jon ear je: “Nejin Anij e ar walok kin men in, bwe En kokkure jerbal ko an devil.”—1 Jon 3:8.
Itoklimo kin Ejmour Ej Biktokin Armij
4. Etke dri korijer ro an Jeova rej itoklimo kin ejmour, bõtab ta eo rej kile?
4 Ilo ran kein, jet ian dri korijer ro an Jeova rej jelmae abañ ko kin nañinmij im ridtolok me ej walok ñõn aolep armij ro rejerawiwi. Ar itoklimo kin ejmour eo ar ilo ien rot kein ej biktoker im eor tokjen. Unin ej kinke jekõnan korijer ñõn Jeova kin ‘aolepen ar kajur.’ (Mark 12:30) Bõtab, ilo ar kajeoñ in kejbãrok bwe jen ejmour jej aikwij kile bwe eor jidrik wõt ar maroñ ñõn bõprae nañinmij im ridtolok.
5. Ta eo jemaroñ katak jen wãwen an kar dri korijer ro retiljek an Anij kijenmij kin nañinmij ko air?
5 Elõñ dri korijer ro retiljek an Jeova rar aikwij in kijenmij iomin abañ ko kin nañinmij. Epaprodaitõs ear juõn iair. (Pil. 2:25-27) Timote, leo etiljek mõtõn dri jilik Paul ear makijkij an nañinmij kin an or an nañinmij ilo lojen, eñin unin Paul ear rejañ e bwe en irak “jirik wain.” (1 Tim. 5:23) Paul mõke ear aikwij kijenmij kin ‘juõn kãliklik ilo kõniekin,’ bwelen kin an jorran mejen ak kin bar juõn kain nañinmij me ejelok unokan ilo tõre eo. (2 Kor. 12:7; Gal. 4:15; 6:11) Paul ear jar im akwelap ñõn Jeova kin ‘kãliklik eo ilo kõniekin.’ (Riit 2 Dri Korint 12:8-10.) Anij ear jab jolok ‘kãliklik eo ilo kõniekin’ ilo kabwilõñlõñ. Jen an eindrein, Anij ear kakajur e bwe en kijenmij. Kin men in, kajur eo an Jeova ear alikar ilo mõjino eo an Paul. Jemaroñ katak jen wãwen in.
Bõprae Le Jen Joñõn Inebata Kin Ejmour
6, 7. Etke jej aikwij bõprae an le jen joñõn ar inebata kin ejmour eo ar?
6 Einwõt am jela, dri Kennan ro an Jeova rej bõk jibõñ jen taktõ ro im wãwen ko jet kin kilen kamarmir nañinmij ko. Ekkã an or katak ko kin ejmour ilo buk eo ar naetan Ruj! (Awake!) Im meñe jejjab kwalok ar jurake jabrewõt kain kilen kamarmir ko, jej kamolol kin jibõñ eo an ro rej kejbãrok ro renañinmij einwõt taktõ im nõj ro. Emol, jejela bwe jejañin tõbar ejmour eo ewãppen. Inem, ej menin meletlet ñõn jab kõtlok bwe en le jen joñõn ar inebata kin ejmour eo ar. Lemnok eo ar ej aikwij oktõk jen ro ‘ejelok air kejatrikrik,’ im rej lemnok wõt kin mour in im renaj kajerbal jabrewõt kain kilen kamarmir ko bwe ren mour jen nañinmij ko air. (Ep. 2:2, 12) Jen beek ilo buruer bwe jen jab luji buñburu eo an Jeova ilo ar kajeoñ lomoren mour eo ar kiõ. Jej liki bwe elañe jej drebij ar tiljek ñõn Anij, jenaj “bõk mour eo emol,” mour indrio ilo jukjuk im ber eo ekãl emwij an kalimur kake.—1 Tim. 6:12, 19; 2 Pit. 3:13.
7 Un eo juõn unin ar bõprae le jen joñõn ar inebata kin ejmour eo ar ej kinke emaroñ kõmõn bwe jen oktõk im lemnok kin kij mõke. Paul ear kakkõl kin wãwen in ekauwatata ke ear rejañ dri Pilippai ro bwe ren “jab lale men ko [air] wõt, a bareinwõt men ko an ro jet.” (Pil. 2:4) Ekkar bwe jen kejbãrok ejmour eo ar, bõtab itoklimo eo emũlõl kin ro jeer im jãter im armij ro me jej bõklok “gospel in an ailiñ in lõñ” ñõn ir enaj bõprae an le jen joñõn ar lemnok kin ejmour eo ar.—Mat. 24:14.
8. Ta eo le jen joñõn inebata kin ejmour emaroñ tel kij ñõn kõmõne?
8 Enaj juõn men ekauwatata ñe juõn dri Kristian ej kõtlok bwe inebata kin ejmour en bõk jikin men ko an Ailiñ eo. Le jen joñõn inebata kin ejmour emaroñ bareinwõt tel kij ñõn kajeoñ iun ro jet ñõn bõk lemnok eo ar kin tokjen jet kain mõña ko, im kilen kamarmir ko. Ikijen men in, lemnok kin nan in kaiñi eo ilo nan ko an Paul: “Komin melejoñ men ko relijiklok [ak raurõklok]; bwe komin erreo im ejelok notami ñõn ran eo an Kraist.”—Pil. 1:10.
Ta Eo Eaurõklok?
9. Ta juõn ian men ko raurõklok jejjab aikwij kejekrone, im etke?
9 Elañe jej kejbãrok men ko raurõklok, jenaj kijejeto ilo ar bõk kunar ilo jerbal in kejmour eo ilo jitõb. Jej kõmõne men in ikijen ar kwalok nan im katakin ro jet kin Nan in Anij. Jerbal in ekalõñliñ ej or tokjen ñõn kij im ro jej katak ibeir. (Ken. 17:22; 1 Tim. 4:15, 16) Ekkã an or katak ko ilo Imõniaroñroñ im Ruj! (Awake!) kin ro jeer im jãter me rar bõk nañinmij ko relap. Jet ien bwebwenato kein rej kemelele kin wãwen rar kijenmij kin abañ ko air ak kamad ir mõke ikijen air kajeoñ jibõñ ro jet ñõn jela kin Jeova im kalimur ko an raibujuij.
10. Etke jokãlet eo ar kin kilen kamarmir eaurõk?
10 Ñe jej jelmae juõn nañinmij, kajjojo dri Kristian eridto ej aikwij “mõke inek kwonan” kin jokãlet eo an ikijen kilen kamarmir ko kin ejmour. (Gal. 6:5) Ak jej aikwij kememej bwe jokãlet eo ar kin kilen kamarmir ko ej jelet Jeova. Ar koutiej nan in kaiñi ko ilo Baibel ej kamakit kij ñõn “kejbãrok . . . jen bõtõktõk.” Eindrein ar koutiej Nan in Anij ej aikwij kamakit kij ñõn bõprae kilen kamarmir ko me remaroñ kokkure mour in jitõb eo ar ak jelet kõtan eo ar iben Jeova. (Jerb. 15:20) Jet wãwen ko ñõn bukot nañinmij ko ak kilen kamarmir ko rej ekkejellok ñõn jerbal in anijnij. Jeova ear jab buñburuen kin dri Israel ro me rar illok im jumae e im kajerbal menin anijnij ko. Ear ba: “Komin jab bar bõktok jurtak wan ko; kaijurjur ej men in jõjõik iba; aliñ ko rekãl im ran in Sabat, ami nan in jiroñ ñõn kwelok ko, I ban kaberber Iõ [kin jerbal in anijnij, NW]; bwe e nana jar eo e kwojarjar.” (Ais. 1:13) Ñe jej nañinmij ejjab juõn ien ñõn kõmõni men ko me remaroñ bõprae jar ko ar im kokkure kõtan eo ar iben Anij.—Liej. 3:44.
Eaurõk Lolokjen
11, 12. Ewi wãwen jej kwalok lolokjen ñe jej kãlet kilen kamarmir ko kin ejmour?
11 Ñe jej nañinmij, jejjab maroñ kõtmene bwe Jeova en kemour kij ilo kabwilõñlõñ, ak jemaroñ jar kin meletlet ilo ar kõmõni jokãlet ko kin kilen kamarmir ko. Jej aikwij bukot nan in tel ko kin jokãlet ko jej kõmõni jen nan in kaiñi ko ilo Baibel im kin lolokjen. Ñe ej juõn nañinmij elap, emaroñ menin meletlet ñõn konono iben elõñlok jen juõn taktõ. Men in ej errã iben lemnok eo ilo Jabõn Kennan Ko 15:22 me ej ba: “Ijo ejelok bebe, emwij kajitokjen lemnok ko mokta; a ijo elõñ dri bebe, emwij kabin lemnok ko.” Dri jilik Paul ear rejañ dri tõmak ro mõtõn bwe ren “mour [ilo lolokjen, NW] im jimewõt, im kwojarjar ilo lõl in.”—Tait. 2:12.
12 Elõñ armij rej iion wãwen eo einlok wõt eo an kõra eo enañinmij ilo ran ko an Jisõs. Jej riit ilo Mark 5:25, 26: “Im juõn kõra, bõtõktõkin etorlok iomin joñoul im ruo yiõ, Im elap an iñtan kin elõñ dru uno, im e ar aji mweien otemjej, im e jab mourlok, a ej drorlõllok.” Jisõs ear kemour lio im ear jerbal iben ilo yokwe. (Mark 5:27-34) Jet dri Kristian rar bo ilo air kãlet ñõn kajerbal kein kamarmir ko me rej nae nan in kaiñi ko kin kabuñ eo erreo kin air bukot kilen bwe ren ejmour.
13, 14. (a) Ewi wãwen Setan emaroñ kajerbal jokãlet eo ar ikijen kilen kamarmir ko kin ejmour ñõn kokkure tiljek eo ar? (b) Etke jej aikwij in illok jen jabrewõt men me ej ekkejellok iben anijnij?
13 Setan enaj kajerbal jabrewõt men ñõn kamad kij jen kabuñ eo emol. Einwõt an kajerbal mour etton im arõk mweiuk ñõn kõmõn bwe jet ren buñ, ej kajeoñ ñõn kokkure tiljek eo an ro jet ikijen an kajerbal kilen kamarmir ko me eor anijnij im kajitõbtõb ie. Jej jar ñõn Jeova bwe en lomoren kij jen “eo enana” im jen “jerawiwi otemjej.” Inem jejjab kõnan likit kij mõke iomin kajur eo an Setan ilo ar kajerbal jabrewõt men me ej ekkejellok iben anijnij im kajitõbtõb.—Mat. 6:13; Tait. 2:14.
14 Jeova ear kamo an dri Israel ro kajerbal anijnij im marmir. (Dut. 18:10-12) Paul ear kobaik “marmir,” iben “jerbal in kõniek ko.” (Gal. 5:19, 20) Bareinwõt, “ro dri marmir” rejamin ber ilo jukjuk im ber eo ekãl an Jeova. (Rev. 21:8) Inem ealikar bwe jabrewõt men eo eor jidrik jerbal in kajitõbtõb ie ej men in jõjõik iben Jeova.
“Ami Kamanwa en Walok”
15, 16. (a)Etke jej aikwij meletlet ilo ar kãlet kilen kamarmir ko kin ejmour? (b)Ta nan in kakabilek eo kumi eo ej tel ilo ien ko an dri jilik ro ear letok?
15 Einwõt jaar etale moktalok, elañe jej lemnok bwe eor anijnij ilo kilen kamarmir eo, enaj menin meletlet ñõn kejekrone. Emol, meñe jejjab melele kin wãwen kilen kamarmir eo ej jerbal, ejjab melelen bwe eor anijnij ie. Bõk lemnok eo ejime ilo Baibel kin ejmour ej kitibuj meletlet jen Nan in Anij im ar kajerbal lolokjen. Ilo Jabõn Kennan Ko Japter 3, jej lo nan in kakkõl in: “Kwon liki Jeova kin aolepen buruõm, im kwon jab atartar ion jelalokjen eo am: Kwon kwalok E ilo ial ko am otemjelok, inem E naj bakajen ial ko am. . . . Kwon drebij lemnok emõn im lemnok jimwe: Ein drein re naj men in mour ñõn am.”—Ken. 3:5, 6, 21, 22.
16 Ke jej kate wõt kij joñõn wõt ar maroñ ñõn kejbãrok ejmour eo ar, jej aikwij in kejbãrok bwe jen jab luji buñburu eo an Anij ñe jej bukot kilen kamarmir eo ilo ien eo jej nañinmij ak bwijwõlã lok. Ikijen kejbãrok ejmour im bar men ko jet jej kõmõni, jej aikwij kõtlok bwe ar “kamanwa en walok ñõn armij otemjej” ikijen ar mour ekkar ñõn nan in kaiñi ko jen Baibel. (Pil. 4:5) Ilo juõn letter ekanuij aurõk, kumi eo ej tel ilo ien eo an dri jilik ro ear kakien dri Kristian ro ñõn kejbãrok jen kabuñ ñõn ekjõp, bõtõktõk im lũñ. Letter in ej kobaik nan in kalimur eo: “Elañe komij kejbãrok kom jen men kein, e naj emõn ibemi.” (Jerb. 15:28, 29) Ilo wãwen it?
Jokkin wõt juõn kin Ejmour im Reimanlok ñõn Ejmour Ewãppen
17. Ewi wãwen jej bõk tokjen ikijen ar edrep ñõn nan in kaiñi ko ilo Baibel?
17 Kajjojo iar ej aikwij kajitõk iben mõke, ‘Ij kile ke tokjen eo ij bõk kin aõ bokake nan in kaiñi ko ilo Baibel ikijen bõtõktõk im lũñ?’ Bareinwõt, lemnok kin tokjen ko jej bõki ilo ar kate ñõn “karreoik kij jen etton otemjej in kõniek kab ar.” (2 Kor. 7:1) Ikijen ar edrep ñõn kien ko ilo Baibel kin erreo ilo enbwin, jej kejbãrok kij jen ar bõk elõñ nañinmij ko. Jej jerammõn kinke jej kejekron kõbatat im uno ko rekajur me rej katton enbwiner im kokkure kõtan eo ar iben Anij. Bareinwõt lemnok kin tokjen ko renaj walok ñõn ejmour eo ar kin ar kejbãrok ar mõña im irak. (Riit Jabõn Kennan Ko 23:20; Taitõs 2:2, 3.) Meñe men kein einwõt kakije im kamakitkit enbwiner remaroñ jibõñ ar ejmour, elaplok ar bõk jerammõn ilo enbwin im jitõb kinke jaar lor nan in tel ko jen Baibel.
18. Ta eo en kar laplok ar itoklimo kake, im ta kanan eo enaj jejit kitien kin ejmour jej reimanlok ñõne?
18 Ilõñin men otemjej, jej aikwij in kejbãrok ejmour eo ar ilo jitõb im kakajur kõtan eo ar eaurõk iben Jemeir ilõñ, eo ej Unjen “mour in, kab mour eo e naj itok” ilo lõl eo ekãl ear kalimur kake. (1 Tim. 4:8; Sam 36:9) Ilo an jeorlok jerawiwi ko ar ikijen berber in katok in binmour eo an Jisõs, Anij enaj kejmour kij ilo jitõb im ilo kõniek ilo lõl eo an ekãl. Lam eo, Jisõs Kraist, enaj tel kij ñõn “unin dren ko dren in mour,” im Anij enaj kõmõraik jen mejer dren in kemjãlãl otemjej. (Rev. 7:14-17; 22:1, 2) Bareinwõt jenaj lo an jejit kitien kanan in: “Dri jokwe ie e jamin ba, I nañinmij: naj jolok bwir an ro dri jokwe iloan.”—Ais. 33:24.
19. Ilo ar jokkin wõt juõn ikijen kejbãrok ejmour, ta eo jemaroñ liki?
19 Elap ar liki bwe ebaktok ien lomor eo ar, im jej kijorur ñõn lo ran eo ñe Jeova enaj jolok nañinmij im mij. Mae ien eo ej itok, jej liki bwe Jemer eo elap yokwe iben enaj jibõñ kij ñõn kijenmij kin iñtan ko kin nañinmij kinke ‘Ej ierki kij.’ (1 Pit. 5:7) Kin men in, jen kejbãrok ejmour eo ar ak ien otemjej en ekkar ñõn nan in tel ko rej alikar ilo Nan in Anij!
Ilo Elij
• Wõn eo ej bõk erron nañinmij, im wõn eo enaj jolok men ko jerawiwi ej bõktok iod?
• Meñe ej biktoker ñõn itoklimo kin ejmour eo ar, ta eo jej aikwij bõprae?
• Etke jokãlet ko ar kin kilen kejmour rej aurõk iben Jeova?
• Ikijen ejmour eo ar, ewi wãwen jemaroñ bõk tokjen jen ar edrep ñõn nan in kaiñi ko ilo Baibel eo?
[Pija eo ilo peij 23]
Kar jab kõmõnmõn armij ro bwe ren nañinmij im ridtolok
[Pija eo ilo peij 25]
Armij ro an Jeova rej lo lõñliñ ilo jerbal in kwalok nan meñe eor air renañinmij