“Jen Kõttõbar Men ko Rej Letok Ainemmõn”

JUÕN ial ekãl me ej kab mwij piji emaroñ bin an jorran. Bõtab, lokin jet ien emaroñ jino kõk im or roñ ko ie. Enaj menin aikwij ñõn kõkãle bwe en jab kauwatata im ñõn kejbãrok wõt ial eo.

Ilo ejja wãwen in, jet ien kõtan eo ar iben ro jet emaroñ jorran im kõk. Dri jilik Paul ear kile bwe eor men ko dri Kristian ro ilo Rom rar jab errã iben dron kaki. Kin menin, ear kakabilek dri Kristian ro mõtõn: “Ien otemjej jen kõttõbar men ko rej letok ainemmõn, im rej jibañ ad kakajur dron.” (Rom 14:​13, 19, UBS) Etke eaurõk ñõn “kõttõbar men ko rej letok ainemmõn”? Ewi wãwen jemaroñ bukot ainemõn ilo beran im ilo wãwen eo ebolemen?

Etke Jej Aikwij Bukot Ainemõn?

Elañe rejjab piji kõk ko redrik, men in emaroñ kõmõn bwe ren laplok im erom roñ ko rekauwatata. Eindrein, emaroñ kauwatata elañe jejjab kamarmir inebata ko ar iben ro jet. Dri jilik Jon ear je: “Elañe armij ej ba, Ña ij yokwe Anij, im ej kijirãte jein im jãtin, e dri riõp: bwe eo e jab yokwe jein im jãtin eo e ar lo e, ej ban yokwe Anij eo e ar jab loe.” (1 Jon 4:​20) Elañe juõn dri Kristian ejjab kamarmir inebata ko an iben ro jet, men in enaj kõmõn bwe en drike eo jein im jãtin.

Jisõs Kraist ear kwalok bwe elañe jejjab kõmõn ainemõn iben ro jet, Jeova ejamin buñburuen kin wãwen ar kabuñ. Jisõs ear katakin dri kalor ro an: “Inem elañe kwoj katok kin am jurtak i lokatok, im ijo kwoj kememej bwe eor am nana ñõn jeõm im jãtõm, Kwon likit am jurtak na iman lokatok, im ilok; kwon kainemõn jeõm im jãtõm mokta, inem item katok.” (Mat. 5:​23, 24) Aet, un eo elaptata unin ar bukot ainemõn ej kinke jekõnan kabuñburuen Jeova Anij.a

Men eo ear walok ilo congregation eo ilo Pilippai ej kwalok bar juõn un ñõn bukot ainemõn. Abañ eo ejjab alikar me ear walok ikõtan ruo kõra ro me rej dri Kristian etair Euodia im Sintike, ear jelet ainemõn eo ilo aolepen congregation eo. (Pil. 4:​2, 3) Abañ ko ejañin mwij kamarmiri ikõtan armij ro emaroñ mõkõj air jededlok ñõn ro jet. Kõnan eo ar ñõn kejbãrok yokwe im burukuk eo ilo congregation eo enaj kamakit kij ñõn kõmõn ainemõn iben dri tõmak ro mõtar.

Jisõs ear ba: “Emõnõnõ ro rej kõmmõn ainemmõn.” (Mat. 5:​9, UBS) Ar bukot ainemõn ej bõktok lõñliñ im juburu. Bareinwõt, ainemõn ej kõmõn bwe jen ejmour, kinke juõn “buru e ainemõn, ej mour ñõn kõniekin.” (Ken. 14:​30) Ijo turãjet, elañe jej drebij ar illu emaroñ kalaplok ar nañinmij.

Meñe enañin aolep dri Kristian ro rej errã bwe rej aikwij bukot ainemõn, kwomaroñ lemnok kin ewi wãwen jemaroñ kamarmir juõn inebata. Jen etale nan in kaiñi ko jen Baibel eo me remaroñ tel kij.

Konono ilo Mera ej Kajeblak Ainemõn

Kõk ko redrik ilo ial eo ekkã air maroñ kakõmõnmõnlok ikijen air kalibubu ijo ko rej jorran. Jemaroñ ke jolok an ro jeer im jãter bwir im kalibubu likjõp ko air redrik? Wãwen in emaroñ jerbal kin enañin aolep inebata ko, kinke dri jilik Piter ear jeje bwe “yokwe ej kalibubu elõñ jerawiwi.”​​—1 Pit. 4:8.

Bõtab, jet ien joñõn an lap abañ eo, jejjab maroñ in baj kejekrone. Lemnok kin men eo ear walok iben dri Israel ro elikin wõt air kar bõk Enen Kalimur eo. Mokta jen an “ro nejin Ruben im nejin Gad im jibilkwon bwijin Menassa” kar tuak ilo River in Jordan, rar kalek juõn “lokatok e kanuij lap.” Bwij ko jet rar lemnok bwe kar kajerbal lokatok eo ñõn kabuñ ñõn ekjõp ko im rar jab baj maroñ kejekrone abañ eo. Rar kapojõk ñõn tõrinae.​​—Josh. 22:​9-​12.

Dri Israel ro jet remaroñ kar lemnok ebwe an lõñ kein kamol ko kin bwir ko air im elañe rar ankõmãjur ir enaj kar eiet ro renaj mij. Bõtab, ijellokin air kaju in kõmõn men in, bwij ko turilik in Jordan rar jilkinlok juõn kumi ñõn konono iben ro jeir im jãtir kin abañ eo. Rar kajitõk: “Ta bwir in kom ar kõmõne nae Anij in Israel, in oktõk ranin jen ami lor Jeova?” Ilo mol, bwij ko me rar kalek lokatok eo rar jab bwir. Ak ewi wãwen renaj emmakit ñõn nan in kinaak eo nae ir? Renaj kar buroñe ro rar kinaklok ir ke ak makoko in kennan ibeir? Bwij ko kar narueir rar uak ilo eta buru, im lukkun kalikar bwe men eo rar kõmõne ear berber ion kõnan eo air ñõn korijer ñõn Jeova. Wãwen air uak ear kejbãrok kõtan eo air iben Anij im kar lomoren ir. Konono ilo mera ear kamarmir abañ eo im bar kajeblak ainemõn ikõtair.​​—Josh. 22:​13-​34.

Mokta jen an kar dri Israel ro jet emmakit nae ro nejin Ruben im nejin Gad im jibilkwon bwijin Menassa, ilo meletlet rar konono ibeir kin abañ eo. Nan in Anij ej ba: “Kwon jab mõkõj in illu ilo buruõm; bwe illu ej berwõt ilo buruen ro dri bwebwe.” (Ekk. 7:9) Konono ilo mera im ilo alikar ej wãwen eo ñõn kamarmir inebata ko ekkar ñõn Baibel eo. Jemaroñ ke kõtmene an Jeova kejerammõn kij elañe jej drebij ar illu im makoko in kebake armij eo me ear bwir nae kij?

Ilo ijo turãjet, ta elañe juõn dri Kristian mõtar ear jelmae kij kin juõn abañ, im bwelen ear naruer ilo jab jime? Baibel eo ej ba: “Nan in uak e joij, ej kajeorlok illu.” (Ken. 15:1) Bwij ko bwijin Israel me rar kaillu bwij ko jet rar kemelele unin kõmõn eo air ilo etta im alikar. Ilo wãwen in rar kamarmir abañ eo me ear lukkun kainebataik ro jeir im jãtir. Jekron ñe jej mõke kebak eo jeer im jãter ak ej konono iber kin juõn abañ, jej aikwij in kajitõk iber mõke, ‘Kain nan rot ko, im wãwen konono im kõmõn renaj kowõnmanlok ainemõn?

Kajerbal Lo eo ilo Meletlet

Jeova ej melele bwe jej aikwij in kwalok inebata ko ar. Bõtab, elañe jejjab kamarmire inebata eo, jenaj jujen wõt kennan kake ñõn ro jet. Drebij ar illu emaroñ tel kij ñõn kananaik ro jet. Ikijen kajerbal lo eo ilo jakkar, Jabõn Kennan Ko 11:11 ej ba: “A kejebeplok [jikin kwelok eo], kin loñin ro dri nana.” Ilo ejja wãwen in lok wõt, elañe jejjab kejbãrok nan ko jej ba nae juõn dri Kristian mõtar, men in emaroñ kokkure ainemõn eo ilo congregation me ej einwõt jikin kwelok eo.

Bõtab, bukot ainemõn ejjab melelen bwe jenaj bõprae ar konono kin ro jeer im jãter. Dri jilik Paul ear kakabilek dri tõmak ro mõtõn: “Ejelok nan etton en waloktok jen loñimi, a jabrewõt eo emõn im nan in kalek ekar ñõn aikwij. . . . Komin joij ñõn dron, en emõn buruemi, jolok nana jen dron.” (Ep. 4:​29-​32) Elañe juõn brother me ear lõkatip kin nan ko am ak mwilim ear kebake yuk, enaj ke birurulok ñõn kajitõk jolok bwir im kõmõn ainemõn elañe ear konono kin men ko remõn kin yuk ñõn ro jet moktalok? Eindrein elañe jej ekkeini ar konono kin men ko rekõketak kin dri Kristian ro mõtar, men in enaj kõmõn bwe en birurulok ar kajeblak ainemõn ñe ewalok inebata ko.​​—Luk 6:31.

Korijer ñõn Anij “Aiera ñõn Aiera”

Kin ar dri jerawiwi ej mijloker ñõn etal jen ro rar kalõkatip kij im kamõkelok iar. Bõtab ejjab juõn men in meletlet ñõn bõk ial rot in. (Ken. 18:1) Einwõt juõn kumi in armij eburukuk im rej kir etan Jeova, jen beek ilo buruer ñõn “korijer ñõn e aiera ñõn aiera.”​​—Zeph. 3:9, NW.

Nan ko im mwil ko rejõkkar an ro jet rejjab aikwij kõmõn bwe en driklok ar kijejeto kin kabuñ eo erreo. Jejjo ran ko mokta jen an kar katok eo an Jisõs bõk jikin men in jurtak ko ilo tempel eo im elikin an Jisõs kananaik skraib ro, ear lo an juõn kõra ejeramel im ejoko belen likit “an mour otemjej” na iloan dipdip in mõnni. Jisõs ear ke kajeoñ in kabwijrõk e? Jen an eindrein, Jisõs ear kwalok an nebar e kin an tiljek im rejetak congregation eo an Jeova ilo tõre eo. (Luk 21:​1-4) Kõmõn ko renana an ro jet rar jab melelen bwe liin ejjab aikwij lelok ijo kunan ñõn rejetak kabuñ eo an Jeova.

Meñe jemaroñ lemnok bwe juõn jeer im jãter kõra ak man ear kõmõn men ko renana im rejjab jime ñõn kij, ewi wãwen jenaj emmakit? Jenaj ke kõtlok bwe men in en jelet ar korijer ñõn Jeova kin aolepen ar? Ak jenaj ke emmakit ilo beran ñõn kamarmir inebata ko bwe jen kejbãrok ainemõn eo ekanuij aurõk ilo congregation eo an Anij rainin?

Baibel eo ej kakabilek kij: “Elañe e maroñwe, einwõt ej ber ibemi, komin ainemõn iben armij otemjej.” (Rom 12:​18) Jen kate kij ñõn kõmõn eindrein bwe jen berwõt ilo ial eo ej tellok ñõn mour.

[Kamelele Eo Itulal]

[Pija eo ilo peij 17]

Euodia im Sintike rar aikwij bukot ainemõn

[Pija eo ilo peij 18]

Kain nan rot ko, im wãwen konono im kõmõn renaj kowõnmanlok ainemõn?