Konono Kin Lo Ko Ej Jen Anij Ke?

DEVON ear ba, “Ijjab melele. Kajjojo wik ilo imõn jar eo aõ, kajur eo an Anij ej itok ion elõñ armij ro im ilo kabwilõñlõñ rej konono kin lo ko. Jet iair rej kõmmani manit ko retton. Ñe baj ña eo, ij kate iõ ñan mour ekkar ñan kien ko ilo Baibel, im meñe elõñ alen ij jar kin kajur eo an Anij ak ijañin bõk menin letok in. Etke ej eindrein?”

Ilo imõn jar eo an Gabriel, kajur eo an Anij ej itok ion armij ro im kamaroñ ir ñan air konono kin lo ko. Ear kemelele, “Men eo elap aõ abnõnõ kake ej ñe ro jet rej kokkure ien aõ jar ilo air konono kin lo ko ilo juõn ainiken elaj me kim jimor jab melele. Ejelok juõn ej bõk tokjen jen air konono kin lo ko. Juõn menin letok me kajur eo an Anij ej kamaroñ kij ñan ad kõmmane, ejjab ke wor tokjen?”

Nan kein an Devon im Gabriel rej bõkmantak juõn kajitõk ekaitoktoklimo, Konono kin lo ko einwõt an walok ilo jet kabuñ ko rainin, ej jen Anij ke? Ñan jibañ kij uake kajitõk in, jen etale menin letok in ekabwilõñlõñ im ear walok ibwiljin dri Kristian ro jinoin.

Rar “Jino Air Kennan ilo Elõñ Kain Kajin” Ko

Baibel eo ej kwalok kin jet man im kõrã ro im kar kamaroñ ir ñan air konono kin kajin ko rar jab katak in konono kaki. Men in ear walok jejjo wik ko elikin mij eo an Jisõs Kraist, ilo ran in Pentekost eo ilo yiõ eo 33. Ilo ejja ran in wõt ilo Jerusalem, enañin 120 dri kalor ro an Jisõs ‘rar obrak kin kajur eo an Anij, im jino air kennan ilo elõñ kain kajin’ ko. Dri lotok ro jen ailiñ ko jet rar ‘lokjenair kinke kajjojo iair ej roñ air kennan kin kajin eo an make.’—Jerb. 1:15; 2:1-6, UBS.

Baibel eo ej kwalok kin bar jet dri kalor ro an Jisõs ilo ien ko etto me rar bõk menin letok in ekabwilõñlõñ. Ñan wanjoñok, kajur eo an Anij ear kamaroñ dri jilik Paul ñan an konono ilo elõñ kain kajin ko. (Jerb. 19:6; 1 Kor. 12:10, 28; 14:18) Bõtab, ewor juõn un emmõn unin kajur eo an Anij ej kamaroñ armij ro ñan air kõmmane juõn men ilo kabwilõñlõñ. Inem, ilo ien ko etto, ta unin an kar dri Kristian ro konono elõñ kain kajin ko ilo kabwilõñlõñ?

Kakõlõn an Anij Rejetake Ir

Ke dri jilik Paul ear jeje ñan dri Kristian ro ilo Korint me jet iair rar konono ilo elõñ kain kajin ko, ear kemelele bwe “lo ko rej juõn kakõle . . . ñõn ro re jab tõmak.” (1 Dri Korint 14:22) Kin men in, menin letok eo ñan konono ilo elõñ kain kajin ko, ekoba menin letok ko jet rekabwilõñlõñ, ear kalikar ñan armij ro bwe Anij ear rejetake im buñburuen kin congregation in Kristian eo ej kab ejaak. Menin letok ko rekabwilõñlõñ rar einwõt kakõle ko iturin ial ko me rej kwalok ñan ro rej kabukot mol eo ia eo remaroñ lo armij ro Anij ear kãlet ir.

Baibel eo ejjab kwalok bwe Jisõs ak jabrewõt ian dri kanan ro me rar mour mokta jen Jisõs, rar konono elõñ kain kajin ko me rar jab katak. Inem alikar bwe ewor bar un ko jet unin an kar dri jilik ro an Jisõs bõk menin letok eo ñan konono elõñ kain kajin ko.

Kein Jibañ ñan Kajededlok Ennan eo Emmõn

Ilo jinoin jerbal in kwalok nan eo an, Jisõs ear jiroñ dri jilik ro an bwe ren kwalok kin ennan eo emmõn kin Ailiñ eo an Anij ñan dri Ju ro wõt. (Matu 10:6; 15:24) Tokjen men in, ear jeja an kar dri jilik ro kwalok nan ilo jikin ko me dri Ju ro rejjab jokwe ie. Bõtab ejjabto men in enaj kar oktak.

Ejjabto elikin kar mij eo an ilo yiõ eo 33, Jisõs, eo ear jerkakbiji, ear kakien dri kalor ro an bwe ren ‘kõmõn dri ailiñ ko otemjej bwe ren dri kaloran.’ Ear bareinwõt jiroñ ir bwe renaj kwalok nan kin e “ñõn eneo etolok tata i lõl.” (Matu 28:19; Jerbal 1:8) Ñan air kajededlok ennan eo emmõn ñan ijoko retolok, men in ear kitibuj air kajerbal elõñ kajin ko ijellokin kajin Hibru.

Bõtab, elõñ ian dri kalor rein rar “ro rettã im rar jab katak ilo jikul.” (Jerbal 4:13, UBS) Inem, ewi wãwen an naj rein maroñ kwalok nan ilo ene ko retolok, ijo armij ro rej konono kajin ko me rejañin kar roñ ak katak im konono kaki? Kajur eo an Anij ear kamaroñ jet ian dri kwalok rein rekijejeto ñan air bõk menin letok eo ekabwilõñlõñ ñan kwalok nan ilo kajin ko rar jab katak im konono kaki mokta.

Kin men in, ewor ruo un ko raurõk unin air kar konono elõñ kain kajin ko. Kein kajuõn, ear jerbal einwõt juõn kakõle ñan kamol bwe Anij ej rejetake ir. Kein karuo, ear juõn wãwen ekeie ñan jibañ dri Kristian ro jinoin ñan air kajejjet jerbal eo air ñan kwalok nan ñan armij ro jen ailiñ ko jet. Inem konono kin lo ko me ej walok ilo elõñ kabuñ ko rainin, ej ke kõtõbrõke men kein ruo?

Konono kin Lo ko Rainin, Ej Ke Juõn Kakõle bwe Anij ej Rejetake Ir?

Ia eo kwonaj kar likit juõn kakõle ie bwe armij ro ren maroñ bõk tokjen jene ilo bukwon eo am? Iloan juõn em edrik ke? Alikar kwoban! Bwebwenato eo kin ran in Pentekost eo ej jiroñ kij bwe “jar” in armij ro rar lo bwe Anij ear rejetake dri jilik ro ikijen air kar konono elõñ kajin ko ilo kabwilõñlõñ. Tokjen men in, ‘e nañin jilu tausan armij rar kobalok’ ibben congregation in Kristian eo ilo ran eo! (Jerbal 2:5, 6, 41) Elañe armij ro rainin rej ba bwe rej konono kin lo ko ak rej kõmmane men in iloan wõt imõn jar eo air, ewi wãwen men in ej jerbal einwõt juõn kakõle ñan ro dri jab tõmak?

Baibel eo ej kwalok bwe lũñ im “jerbal in kõniek ko” jet rej jumae wãwen an kajur eo an Anij jerbal, im ej wõnmanlok wõt im ba bwe “ro rej kõmõn men rõt kein re jamin bõk air jolit ailiñ in Anij.” (Dri Galetia 5:17-21) Elañe kwoj lo bwe ro rej konono kin lo ko rej kõmmani manit ko retton, inem kwomaroñ lemnak, ‘An kajur eo an Anij bed ion armij ro im rejjab bõjrak jen air kõmmani manit ko rej nae Baibel eo, ejjab ke idaptõk ibben ta eo Baibel ej katakin kake? Men in ej ke kejebwãbweik armij ro?’ Ej einwõt ñe rej kajutak juõn kakõle iturin ial eo me ej tel wa ko ñan juõn ial ebwid.

Konono kin Lo ko Rainin, Ej Ke Juõn Kein Jibañ ñan Kajededlok Ennan eo Emmõn?

Ta kin un eo juõn unin an kar dri Kristian ro jinoin konono ilo elõñ kajin ko? Konono kin lo ko ilo imõn jar ko, ej ke jerbal einwõt juõn kein jibañ ñan kwalok nan kin ennan eo emmõn ñan armij ro eoktak kajin ko air? Kememej bwe armij ro ilo Jerusalem ilo ran in Pentekost eo ilo yiõ eo 33, rar itok jen ailiñ ko jet ak rar melele ke dri kalor ro rar konono elõñ kain kajin ko ilo kabwilõñlõñ. Ilo okõtõn men in, ro rej konono kin lo ko ilo ran kein ekkã air kennan ilo juõn wãwen me ejelok juõn emelele kake.

Alikar bwe konono kin lo ko ilo ran kein elukkun oktak jen menin letok eo kajur eo an Anij ear kamaroñ dri kalor ro an Jisõs ñan air kõmmane. Ilo mol, ejelok kein kamol im ej kalikar bwe jabrewõt armij ear bõk ejja menin letok in ekabwilõñlõñ elikin an kar dri jilik ro mij. Ro rej riiti Baibel eo rejjab bwilõñ kin men in. Ikijen menin letok ko rekabwilõñlõñ, ekoba menin letok eo ñan konono kin lo ko, dri jilik Paul ear kanan bwe “re naj jemlok.” (1 Dri Korint 13:8) Inem, ewi wãwen jemaroñ jelã elañe kajur eo an Anij ej jerbal ibben armij ro?

Wõn ro Rej Kalikar bwe Kajur eo an Anij ej Bed Ibbeir?

Jisõs ear jelã bwe menin letok eo ñan konono kin lo ko enaj kar jemlok ejjabto elikin an ejaak congregation in Kristian eo ekãl. Moktalok jidrik jen an kar Jisõs mij, ear kwalok kin juõn kakõle ejelok jemlokõn im enaj kalikar kin wõn ro rej dri kalor ro an remol. Ear ba, “Ilo men in armij otemjej re naj jela bwe komij dri kalora, elañe komij yokwe dron.” (Jon 13:35) Ilo mol, ilo ejja eon eo wõt im ej kanan bwe menin letok ko rekabwilõñlõñ renaj jemlok, ej ba: “Yokwe e jamin joko.”—1 Dri Korint 13:8.

Yokwe ej kadkad eo moktata kar kõlajrake ian kadkad ko druatimjuõn me rej ejaakin leen jerbal ko an kajur eo an Anij. (Dri Galetia 5:22, 23) Inem, ro im Anij ej rejetake ir im kajur eo an ej bed ibbeir, renaj kwalok yokwe eo emol ñan dron. Bareinwõt, kadkad eo kein kajilu ian kadkad ko me rej ejaakin leen jerbal ko an kajur eo an Anij ej ainemõn. Kin men in, ro im kajur eo an Anij ej bed ibbeir renaj kwalok ainemõn ilo air kate ir ñan jumae kadkad ko karkarin lal in einwõt kaljiklok im lej.

Bareinwõt, kememej nan ko ilo Jerbal 1:8 ijo Jisõs ear kanan bwe naj kamaroñ dri kalor ro an ñan air kennan kin e “ñõn eneo etolok tata i lõl.” Jisõs ear bareinwõt kanan bwe jerbal in enaj wõnmanlok wõt “ñõn jemlokõn lõl.” (Matu 28:20) Kin men in, jerbal in kwalok nan eo me ej walok ibelakin lal enaj wõnmanlok wõt einwõt juõn kakõle me ej kalikar kin wõn ro kajur eo an Anij ej bed ibbeir.

Ewi wãwen am lemnak kin men in? Wõn ro kwoj lo bwe kajur eo an Anij ej bed ibbeir rainin? Wõn ro rej kwalok kadkad ko rej ejaakin leen jerbal ko an kajur eo an Anij, elaptata yokwe im ainemõn, meñe rej bõk matõrtõr jen kien ko an lal kin air makoko in bõk kwonair ilo tõrinae? (Aiseia 2:4) Wõn ro rej kate im kejbãrok ir jen jerbal ko an kanniek, einwõt lũñ, im rej jolok jen ibwiljiir ro rejjab ukwelok jen air kõmmane manit rõt kein? (1 Dri Korint 5:11-13) Wõn ro rej kwalok nan ibelakin lal in kin ennan eo emmõn im ba bwe Ailiñ eo an Anij wõt ej kejatrikrik eo emol an armij ro?—Matu 24:14.

Ro rej kõmmane magazine in rejjab ãliklik in ba bwe Dri Kennan ro an Jeova rej jerbali aolep melele ko ilo Baibel kin wõn ro kajur eo an Anij ej bed ibbeir. Etke kwojjab kalaplok am jelã kajeir im lale elañe emol bwe Anij ej rejetake ir?