Meñe Ejjab Kanooj L̦ap Kwõmaroñ Mour im M̦õn̦õn̦õ Wõt kõn Men ko Ewõr Ippam̦—Ewi Wãween?
EWÕR juon am̦ kaajliiñ im jerbal eo am̦ ej ñan lale bwe en bool̦ wõt kobban. Ta eo kwõnaaj kõm̦m̦ane? Eokwe, kwõnaaj kar teiñil̦o̦k kõn dãn joñan wõt dãn eo kwõj kajerbale. El̦aññe kwõj teiñil̦o̦k kõn ejja joñan eo wõt kar kajerbale, enaaj bool̦ wõt kaajliiñ eo.
Ta mel̦el̦ein waanjoñak in? Eokwe, kõl̦l̦ã eo am̦ ej ãinwõt dãn eo kwõj teiñil̦o̦k ñan loan kaajliiñ eo. Jããn ko kwõj jol̦o̦k rej ãinwõt dãn eo kwõj kajerbale. Men eo wõt, kwõj aikuj kõjparok bwe kwõn jab kajerbal el̦e jãn joñan kõl̦l̦ã eo am̦.
Jemaroñ l̦õmn̦ak bwe epidodo ñan l̦oore naan in kakapilõk in. Bõtab, ilo m̦ool epen ñan kõm̦m̦ane im bõk tokjãn jãne. Armej ro remaroñ kõjparok er jãn apañ ko kõn jããn el̦aññe rej l̦oor naan in kakapilõk in. Ewi wãween? Ia eo jemaroñ bõk jipañ jãne? Baibõl̦ eo ej letok mel̦el̦e ko rem̦m̦an kõn men in. Jen lale ta eo ej ba.
Naan in Kakapilõk ko jãn Baibõl̦
Baibõl̦ eo ej letok naan in kakapilõk ko me remaroñ jipañ eok ñan jel̦ã kõjparok jããn. Jenaaj etale jet iaaer im kwõn lale el̦aññe remaroñ jipañ eok ñan mour im m̦õn̦õn̦õ wõt kõn men ko ewõr ippam̦ meñe ejjab kanooj l̦ap.
Bajete jããn ko am̦. Ñan jel̦ã kõjparok jããn, kwõj aikuj jel̦ã joñan kõl̦l̦ã eo am̦ im joñan eo kwõj kajerbale. Baibõl̦ eo ej ba: “L̦õmn̦ak ko an ri owan, re men in jeraam̦m̦an; a jabdewõt eo e iur ilo pepe, ej jarõbl̦o̦k ñan aikuj.” (Jabõn Kõnnaan 21:5) Jet rej kõjenolo̦k jããn ko ñan on̦ean “M̦õñã,” “Jarom,” ak “Nuknuk.” Meñe kwõj l̦õmn̦ak in kajerbal wãween in ak wãween ko jet, men eo eaorõk kwõj aikuj keememeje, ej ñan likũt aikuj ko am̦ m̦okta jãn kõn̦aan ko am̦.
Jab kõn̦aan men ko an ro jet. Elõñ armej ro ilo aelõñ ko jet ekkã aer kõn̦aan men ko ewõr ippãn ri aelõñ ko jet. Ekkã an armej ro kõn̦aan men ko ejjel̦o̦k ippãer bõtab ewõr ippãn ro jet. Men in emaroñ juon aujiid ñan kwe. Bõlen armej eo ej bar eñtaan kõn on̦ean men ko ear wiaki. Em̦m̦anl̦o̦k ñe kwõjjab l̦oore kõnke kwõmaroñ oktak im jerata. Baibõl̦ eo ej kakkõl kõj: “Jabdewõt eo earõk money, kin an lemnak wõt in bukõt an mweie ejaje ke jeramõl emaroñ buñ ion.”—Jabõn Kõnnaan 28:22, UBS.
Jab arõk m̦weiuk. Jeova ear rõjañ Baruk bwe en jab “pukot men ko rel̦ap.” (Jeremaia 45:5) Ewõr juon jabõn kõnnaan ilo kajin M̦ajel̦ ej ba “dik wõt jej.” Mel̦el̦ein bwe kwõn m̦õn̦õn̦õ kõn men ko ewõr ippam̦ im jab kõn̦aan men ko kwõjjab maroñi. Ekkar ñan juon ripoot jãn Asian Development Bank, 33 bõjjããn in armej ro ilo Philippines im elõñl̦o̦k jãn 50 bõjjããn in armej ro ilo India rej mour kõn enañin $1.35 jããn kajjojo raan. Ñe ej ãindein kõl̦l̦ã ko an armej ro, em̦m̦anl̦o̦k ñe rej l̦õmn̦ak kõn aikuj ko aer m̦oktata. Bõtab naan in kakapilõk in emaroñ bar jipañ armej ro ilo jikin ko em̦m̦anl̦o̦k mour ie.
El̦aññe ebwe aikuj ko am̦, eokwe ebwe. Men in ej errã ippãn naan in kakapilõk eo jãn Baibõl̦ eo bwe jen jab arõk m̦weiuk. Bok in 1 Timote 6:8, UBS ej ba: “Kin men in, elañe eor kijed im ballid, eokwe ebwe.” Jet iaan ro el̦ap aer m̦õn̦õn̦õ ilo lal̦ in ej armej ro me rejjab m̦weiie. Armej rein rej mour im m̦õn̦õn̦õ kõn men ko ewõr ippãer meñe ejjab l̦ap. Rej lo yokwe im m̦õn̦õn̦õ ilo baam̦le ko aer im ippãn ro m̦õttaer.—Jabõn Kõnnaan 15:17.
Jab m̦uritak wõt. Baibõl̦ eo ej ba: “Ri jeramõl ro rej ri kamakoko an ri mweie. Elañe kwoj muri ibben juõn armij, kwonaj an ri kamakoko.” (Jabõn Kõnnaan 22:7, UBS) Em̦ool, jet iien jej aikuj m̦uri bwe jen maroñ kabwe aikuj ko ad. Bõtab armej ro me rej m̦uritak wõt meñe rejjab aikuj, renaaj iion jerata im enaaj pen wãween aer mour tokãlik. Eñin unin jej aikuj kõjparok bwe jen jab jerata tokãlik kõn wõt an l̦ap ad m̦uri!—2 Kiiñ 4:1; Matu 18:25.
Kakon̦ am̦ jããn m̦okta jãn am̦ wia. Bõlen kwõmaroñ jab kõn̦aan kõm̦m̦ane men in, bõtab ej juon iaan wãween ko im remaroñ jipañ eok bwe kwõn jab tubar kõn jããn ko am̦. Elõñ armej ro me rar kõm̦m̦ane men in ear pidodol̦o̦k aer maroñ kabwe aikuj ko aer. Baibõl̦ eo ej ba bwe l̦oñ ko ‘remãlõtlõt.’ Etke? Kõnke menin mour jiddik kein rej “aini men ko kijeir ilo ien rak im bojak ñõn ien añeneañ.”—Jabõn Kõnnaan 6:6-8; 30:24, 25, UBS.
Katak jãn Ro Jet
Naan in kakapilõk kein jãn Baibõl̦ relukkuun em̦m̦an. Bõtab, rej ke lukkuun jipañ armej ro? Eokwe, ñan uwaake kajjitõk in, jen lale jet waanjoñak ko an jet armej im rar lo tõprak ke rar l̦oor naan in kakapilõk kein.
Juon em̦m̦aan ewõr emãn nejin etan Diosdado, ej ba bwe epen an kabwe aikuj ko an kõrã eo im ajri ro kõn an lukkuun penl̦o̦k mour. Ej ba: “Iar bajete aolep jããn ko rej itok jãn jerbal eo aõ. Iar je juon laajrak kõn aolep men ko iar kõjerbale jããn kein ñani ilo juon peba.” Juon em̦m̦aan etan Danilo ear bar kõm̦m̦ane men in. Ke ear jab em̦m̦an an peejnej eo an jerbal, ear pen aerro kõrã eo mour. Bõtab, kõn aerro kar lukkuun kõjparok aerro kajerbal jããn, rar jab lukkuun pãd ilo aikuj. Danilo ej ba: “Kõmro jel̦ã jete jããn ko rej itok jãn peejnej eo, im kõmro jel̦ã joñan eo ekkã am̦ro kõjerbale. Kõn men in, kõmro ar maroñ pepe ippãn doon kõn joñan jããn ko kõmij aikuj kõjerbali.”
Jet rej pepe bwe ren jab kõjerbale el̦ap jãn joñan eo rar karõke. Bwe ren maroñ l̦oore karõk in aer, rar aikuj bõjrak jãn aer wiaik men ko me ejjel̦o̦k tokjãer. Myrna, juon kõrã im emej l̦eo pãleen, ej ba: “Kõmij jab taxi ak uwe ilo wa ko ñan Im̦õn Kweilo̦k eo, ak kõmij etetal l̦o̦k.” Ilo wãween in, Myrna ear jipañ ajri ro nejin bwe ren jokwane ak m̦õn̦õn̦õ kõn men ko ewõr ippãer. Ej bar ba: “Iar kajjioñ likũt juon joñak em̦m̦an ilo aõ l̦oore naan in jiroñ ko ilo 1 Timote 6:8-10. Eoon in ej kalikkar bwe jen m̦õn̦õn̦õ wõt ñe ebwe men ko ippãd.”
Juon em̦m̦aan etan Gerald im ewõr ruo nejin ear bar kõm̦m̦ane men in. Ej ba: “Ñe kõmij katak ippãn doon, kõmij bwebwenato kõn joñak ko an Kũrjin ro jet me rar likũti jerbal ko an Jeova m̦oktata ilo mour ko aer. Men in ear jipañ ajri ro nejõm̦ro kõnke kiiõ rejjab kõn̦aan men ko me rejjab lukkuun aorõk.”
Janet, eo ej pãd ilo Philippines im ejjel̦o̦k pãleen, ej jol̦o̦k enañin aolep iien ko an ñan kwal̦o̦k naan. Ear luuji jerbal eo an, bõtab ear maroñ wõt kabwe aikuj ko an. Ewi wãween? Ej ba: “Iar jab ilo̦k ñan im̦õn wia ko el̦ap on̦aer bõtab iar ilo̦k ñan m̦oko jet. Iar bareinwõt lukkuun l̦õmn̦ak m̦okta jãn aõ wiaik juon men. Ñe ej wõr jidik aõ jããn, ij kakon̦e bwe in kõjerbale ñe ej wõr aõ aikuj ilo jidimkij.”
Kwõmaroñ Mour im M̦õn̦õn̦õ Wõt kõn Men ko Ewõr Ippam̦
Aet, elõñ rej kile bwe Baibõl̦ eo ej juon bok im ej jipañ kõj bwe jen epaakel̦o̦k Jeova. Bõtab, rej bar kile bwe bok in emaroñ jipañ er bwe ren jel̦ã kõjerbali jããn ko aer ilo mãlõtlõt. (Jabõn Kõnnaan 2:6; Matu 6:25-34) Ilo am̦ naaj l̦oori aolep naan in kakapilõk kein ilo Baibõl̦ me em̦õj ad kar etali ilo katak in im katak jãn waanjoñak ko an ro jet, kwõnaaj maroñ mour im m̦õn̦õn̦õ wõt kõn men ko ewõr ippam̦ meñe ejjab kanooj l̦ap. Wãween in enaaj jipañ eok bwe kwõn jab iion apañ ko armej ro rainin rej jelm̦ae.
[Pija ilo peij 24]
‘Kõmij kõnono ippãn doon kõn joñan eo kõm naaj kõjerbale’
[Pija ilo peij 25]
‘Kõmij kiiõ etetal l̦o̦k ñan Im̦õn Kweilo̦k eo’
[Pija ilo peij 25]
‘Ij lukkuun l̦õmn̦ak m̦okta jãn aõ wiaik juon men’