Ta Men ko Ajri ro Rej Aikuj Katak?
“Jeje ko otemjej em̦õj letok kõn kakõrm̦ool an Anij, ej bareinwõt wõr tokjãer kõn katakin, im kauwe, im kajim̦we, im kõjjel̦ãik armej ilo kwõjarjar.”—2 TIMOTE 3:16.
AJRI ro rej aikuj katak m̦ool eo kõn Anij. Ia eo renaaj katak kõn m̦ool in? Remaroñ katak jãn Baibõl̦ eo.
Baibõl̦ eo ej ãinwõt juon lõta jãn Anij. Ilo lõta in, Anij ej kwal̦o̦k kajjien make im ej letok naan in tõl ko rejim̦we ñan aolep ajri ro nejin meñe redik ak rerũtto. Jen lale jet iaan katak ko jãn Baibõl̦ eo im katak ko jet me ajri ro remaroñ katak jãni.
Ta eo Anij ekõn̦aan bwe jen katak kake?
◼ Baibõl̦ eo ej ba: “Bwe ren jel̦ã bwe Kwe wõt, im etam̦ Jeova, Kwe eo e utiejtata ioon aolepen lal̦ in.”—Sam 83:18.
Ta Mel̦el̦ein?: Anij em̦ool an pãd im ewõr etan.
◼ Baibõl̦ eo ej ba: “Jeova ej tuur bõro otemjej, im E jel̦ã kõn pepe im l̦õmn̦ak otemjej. El̦aññe kwõj pukot E, kwõnaaj lo E.” —1 Kronikel 28:9.
Ta Mel̦el̦ein?: Jeova el̦ap an yokwe im kaorõk kõj aolep, ekoba ajri ro redik. (Sam 10:14; 146:9) Ekõn̦aan bwe jen katak kõn E.
◼ Baibõl̦ eo ej ba: “Komin jab kõmmõn nana ñõn . . . ajiri ro ratajinimjin. Bwe elañe kom naj, innem ña, Iroij, inaj eoroñ ir elañe renaj kir ñõn iõ bwe in jibañ ir.”—Exodus 22:22-24, UBS.
Ta Mel̦el̦ein?: Jeova ej eo̦roñ jar ko meñe jar ko an ajri ro redik. Jemaroñ kõnono iien otemjej ippãn Anij im kwal̦o̦k kõn l̦õmn̦ak ko im eñjake ko remulõl jãn bũruod.
◼ Baibõl̦ eo ej ba: ‘Im rar bar oktak im mãlejjoñ Anij im kõmetak Eo e kwõjarjar an Israel.’—Sam 78:41.
Ta Mel̦el̦ein?: Wãween ad kõnono im m̦wilid rej jelõte eñjake ko an Jeova. Kõn men in, jej aikuj l̦õmn̦ak m̦okta jãn ad kõnono im kõm̦m̦ane juon men.
En kar ewi wãween ad kõm̦m̦an ñan armej ro reoktak jãn kõj?
◼ Baibõl̦ eo ej ba: “Anij ej kõmmõn ñõn armij otemjej ilo ejjelok kalijiklok. Jabdrewõt eo ej kautieje im kõmmõn jimwe, ej kabuñburuen, jekdron ri ailiñ et.”—Jerbal 10:34, 35, UBS.
Ta Mel̦el̦ein?: Anij ejjab kalijekl̦o̦k ñan armej ro jekdo̦o̦n ia eo rej itok jãn e. Kõj bareinwõt jejjab aikuj kalijekl̦o̦k ñan armej ro meñe eoktak kilier ak baotokier jãn kõj.
◼ Baibõl̦ eo ej ba: “Komin bojak ien otemjej in uak jabdrewõt eo ej kajjitõk bwe komin kemeleleik kejatdrikdrik in ilo kom. Ak komin kõmmõne kin inemmõn im kautiej.”—1 Piter 3:15, 16, UBS.
Ta Mel̦el̦ein?: Jen kõmel̦el̦eik ro jet kõn tõmak eo ad jãn bũruod im ilo jouj. Bareinwõt, jej aikuj kwal̦o̦k kautiej ñan ro im eoktak tõmak ko aer jãn kõj.
En kar ewi wãween ad kõm̦m̦an ñan ro jined im jemed im ro jeid im jatid?
◼ Baibõl̦ eo ej ba: ‘Ajri ro kom̦win pokake jememi im jinemi iien otemjej, bwe men in ej kabuñbũruon Anij.’—Kolosse 3:20, UBS.
Ta Mel̦el̦ein?: Ajri ro rejel̦ã pokake rej yokwe ro jemãer im jineer. Rej bareinwõt kwal̦o̦k bwe rekõn̦aan kabuñbũruon im kam̦õn̦õn̦õik Jeova.
◼ Baibõl̦ eo ej ba: ‘Im kom̦win meanwõd ñan doon, im jeorl̦o̦k nana jãn doon, el̦aññe ippãn jabdewõt iaami ewõr ruõn ippãn bar juon; im ãinwõt Kũraij ear jeorl̦o̦k ami nana, en ãindein bareinwõt ami kõm̦m̦an ñan doon.’—Kolosse 3:13.
Ta Mel̦el̦ein?: Armej ro, ekoba ro jeid im jatid ak jined im jemed, remaroñ kaillu kõj elõñ iien. Bõtab el̦aññe jekõn̦aan bwe Anij en jeorl̦o̦k bõd ko ad, jej aikuj bar jeorl̦o̦k bõd ko an armej rein.—Matu 6:14, 15.
Etke jej aikuj kwal̦o̦k wõt m̦ool im jouj?
◼ Baibõl̦ eo ej ba: “Kõn men in, ke em̦õj ami jol̦o̦k riab, kom̦win kõnono m̦ool, kom̦ otemjej, ñan ri turumi.”—Epesõs 4:25.
Ta Mel̦el̦ein?: Ñe jej kwal̦o̦k m̦ool, jej l̦oor joñak eo an Jeova im ej m̦õn̦õn̦õ ippãd. El̦aññe jej imminene in riab, jenaaj ãinwõt Setan, eo ej ri kõjdat an Anij im “jemãn riab.”—Jon 8:44; Taitõs 1:2.
◼ Baibõl̦ eo ej ba: ‘Kom̦win kõm̦m̦an ñan ro jet men ko kom̦ kõn̦aan bwe ren bareinwõt kõm̦m̦an ñan kom̦.’—Matu 7:12, UBS.
Ta Mel̦el̦ein?: Jej aikuj l̦õmn̦ak kõn eñjake im aikuj ko an ro uwaan baam̦le eo ad im ro jet. Ñe jej kõm̦m̦ane men in, innem renaaj bar kõm̦m̦ane ejja wãween in wõt ñan kõj.—1 Piter 3:8; Luk 6:38.
Ãinwõt an waanjoñak kein kwal̦o̦k, katak ko ilo Baibõl̦ eo remaroñ jipañ ajri ro bwe ren jel̦ã kwal̦o̦k kam̦m̦oolol, kautiej im tũriam̦o. Bõtab, an wõn eddo eo ñan katakin ajri ro kõn men kein?