Anij Ej Ke Kaje Kõj?

Ilo kar M̦aaj 2011 ilo aelõñ in Jepaan, ear wal̦o̦k juon m̦akũtkũt lal̦ joñan kajoor in ej 9.0, bareinwõt ear wal̦o̦k juon n̦o el̦ap ak tsunami. Im ke ear wal̦o̦k men kein, juon ri tõl in kien ilo Jepaan ear ba: “Meñe ibũrom̦õj kõn armej ro rar jorrããn ak ij l̦õmn̦ak bwe unin an ãindein ej kõnke Anij ej kaje armej ro.”

Ke juon m̦akũtkũt lal̦ ear m̦an elõñl̦o̦k jãn 220,000 armej ro ilo Haiti ilo kar Jãnwõde 2010, juon ri kaki in kabuñ ear ba ilo TV bwe unin an wal̦o̦k men in ej “kõn an armej ro kobal̦o̦k ippãn tepil̦ eo im kõm̦m̦ani men ko renana” im rej aikuj in “oktak ñan anij.”

Ilo jikin kweilo̦k eo el̦ap ilo Philippine etan Manila, juon men ear wal̦o̦k im ear kõm̦m̦an an armej ro wiwijet im jãprijrij. Kõn men in, elõñ armej ro rar okjak im rar ettõr iioon armej ro im juuri er ñan lal̦. Men in ear kõm̦m̦an an mej 79 armej. Ke ear wal̦o̦k men in, juon ri kaki in kabuñ in Katlik ear ba: “Kõn ad bõt im pen awiia, anij ekõn̦aan bwe jen kile im jel̦ã bwe enana kõm̦m̦an ko ad.” Juon nuujpeba ilo aelõñ in ear ba bwe “21 bõjjããn in rũtto ro rej tõmak bwe Anij ej kwal̦o̦k an illu ñe ej wal̦o̦k taibuun ko, im l̦añ ko rej kõm̦m̦an bwe tol̦ ko ren m̦õram̦rõm̦ im ko̦kkure m̦oko im jorrããn ko jet” me ekutkut aer ko̦kkure Philippine.

JÃN etto in an armej ro tõmak bwe Anij ej kajeik armej ro renana ilo an bõktok jorrããn ko. Ilo iiõ eo 1755, juon m̦akũtkũt lal̦, juon kijeek im juon n̦o el̦ap ear ko̦kkure Lisbon ilo aelõñ in Portugal im kõm̦m̦an an mej 60,000 armej. Ãlikin an kar wal̦o̦k men kein, juon ri mãlõtlõt ebuñbuñ etan Voltaire, ear ba: “Tuteen̦ wõt Lisbon ewal̦o̦k jorrããn kein ie ke el̦apl̦o̦k an armej in Paris tarjen joñan aer kõm̦m̦ani men ko renana?” Em̦ool bwe elõñ milien armej ro rej l̦õmn̦ak el̦aññe Anij ej kõm̦m̦ani jorrããn kein ñan kaje armej. Ilo elõñ aelõñ ko armej rej ba bwe jorrããn kein rej kõm̦m̦an ko an Anij ak jerbal ko an.

Ñan ad jel̦ã kõn men in, jej aikuj kajjitõkin kõj make: Anij ej ke kaje armej ro kõn jorrããn kein rej wal̦o̦k? Aolep jorrããn ko rej kab wal̦o̦k ilo raan kein rej ke menin kaje jãn Anij?

Jet armej rej m̦õkaj im n̦aruon Anij im jitõñl̦o̦k ñan bwebwenato ko ilo Baibõl̦ me rej kwal̦o̦k kõn an kar Anij ko̦kkure armej ro kõn ibwijleplep, kijeek, im men ko jet. (Jenesis 7:17-22; 18:20; 19:24, 25; Bõnbõn 16:31-35) Bõtab, ñe jej etale bwebwenato kein ilo Baibõl̦, ej kwal̦o̦k jilu men ko reoktak kõn jorrããn kein kajjojo. Kein kajuon, ke Anij ear bũktok kajjojo iaan jorrããn kein, ear kõjjel̦ãik armej ro kaki m̦oktal̦o̦k. Kein karuo, jorrããn ko kiiõ im rej wal̦o̦k rej ko̦kkure armej ro rem̦m̦an im armej ro renana jim̦or. Bõtab, jorrããn kein me rar wal̦o̦k ilo Baibõl̦ ekar jab ñan aolep ak ñan jet wõt armej. Armej ro wõt renana me rar ankeke im bõt im ro rar jab kõn̦aan roñjake naan in kakkõl ko rar mej. Im kein kajilu, ke Anij ear bũktok jorrããn kein ear kõm̦m̦an ial̦an an armej ro rem̦m̦an el̦l̦ã im mour.​—Jenesis 7:1, 23; 19:15-17; Bõnbõn 16:23-27.

Ikijjeen aolep jorrããn kein me rar ko̦kkure mour ko an elõñ milien armej ro rainin, ejjel̦o̦k kein kam̦ool bwe Anij ear bõktok men kein. Enaaj ke wõr juon iien me jorrããn kein rejamin bar wal̦o̦k? Ta eo jemaroñ kõm̦m̦ane ñe ej wal̦o̦k jorrããn kein? Eokwe, kwõnaaj lo uwaak in kajjitõk kein ilo katak kein tok jet.