Ro Jet Remaroñ Mour Indeeo kõn Wõt Jerkakpeje eo an Jijej!
MEÑE jerkakpeje eo an Jijej ear wal̦o̦k ilo iien ko etto, ak el̦ap tokjãn ñan kõj rainin. Rijjelõk Paul ear kwal̦o̦k aorõkin jerkakpeje eo an Jijej ñan kõj ke ear ba: “Kiiõ em̦õj an Kũraij jerkakpeje jãn ro remej, leen m̦oktata iaan ro rej kiki. Bwe ãinwõt mej ear itok kõn armej, bareinwõt kõn armej ej itok jerkakpeje an ro remej. Bwe ãinwõt ilo Adam ro otemjej rej mej, ãindein bareinwõt ilo Kũraij ro otemjej renaaj mour.”—1 Korint 15:20-22.
Jijej ear jerkakpeje ilo Nisan 16 ilo iiõ eo 33. Eñin ej raan eo ilo kajjojo iiõ me Ri Ju ro rekõn bõkl̦o̦k jom̦õkaj in leen jikin kallib ko aer ñan Jeova Anij ilo tampel̦ eo ilo Jerusalem. Ilo an kar Paul ba bwe Jijej ej leen eo m̦oktata, mel̦el̦ein men in bwe enaaj bar wõr ro jet me renaaj jerkakpeje ãlikin Jijej.
Naan ko jet an Paul rar bar kam̦ool bwe armej remaroñ bar mour kõn wõt jerkakpeje eo an Jijej. Ear ba, “Ãinwõt mej ear itok kõn armej, bareinwõt kõn armej ej itok jerkakpeje an ro remej.” Kõnke jej bõdañe Adam ilo ad jerawiwi im jab weeppãn, jej aolep mej. Bõtab, ke Jijej ear mej im katok kõn mour eo an eweeppãn, ear kamaroñ kõj bwe juon iien jen bar jerkak im mour ñe jemej. Ilo wãween in, jemaroñ rõl̦o̦k jãn jerawiwi im mej. Paul ear kwal̦o̦k mel̦el̦ein aolep naan ko an ke ear ba ilo Rom 6:23: “Bwe on̦ean jerawiwi, mej; a menin jouj an Anij, mour indeeo ilo Kũraij Jijej ad Irooj.”
Jijej ear make kõmel̦el̦eik kõj kõn aorõkin mej eo an im jerkakpeje eo an. Ear ba: “Raikuj in lelõñl̦o̦k Nejin Armej, bwe ro otemjej rej tõmak e ren mour indeeo. Bwe joñan an Anij yokwe lal̦, ear letok Nejin eo ej make wõt, bwe jabdewõt eo ej tõmak ilo e en jab jako, ak en mour indeeo.”—Jon 3:14-16, UBS.
Baj l̦õmn̦akel̦o̦k m̦õk am̦ mour ñan indeeo im ejako am̦ metak, eñtaan, im bũrom̦õj! (Revelesõn 21:3, 4) Ej juon jeraam̦m̦an el̦ap! Juon ri mãlõtlõt ear ba: “Ñe jej loi lõb ko, men in ej kakeememej kõj kõn joñan an kadu mour, ak jerkakpeje eo ej kakeememej kõj kõn joñan an kadu mej.” Aet, jemaroñ mour indeeo kõn wõt kar jerkakpeje eo an Jijej!