Kõjparok bwe “En Jab M̦õkaj an Pok Ami L̦õmn̦ak”!
“Ro jeim im jatim, en jab m̦õkaj an pok ami l̦õmn̦ak.”—2 TESSALONIKA 2:1, 2, UBS.
1, 2. (1) Etke el̦ap an armej riab im m̦on̦e ro jet? (2) Ta juon iaan men ko me armej rej riab im m̦on̦e ro jet kake? (Lale pija eo itulõñ.)
ILO lal̦ in rainin, el̦ap an armej riab im m̦on̦e ro jet. Bõtab, jejjab aikuj bwilõñ kõn an men in wal̦o̦k. Baibõl̦ ej kaalikkar bwe Setan Tepil̦ eo elukkuun jel̦ã m̦on̦e armej im e eo ej irooj in lal̦ in. (1 Timote 2:14; 1 Jon 5:19) Kõnke jej epaakel̦o̦k jem̦l̦o̦kin jukjukun pãd in enana, ej l̦apl̦o̦k an Setan illu kõnke ejel̦ã bwe “jidik wõt iien ippãn.” (Revelesõn 12:12) Kõn men in, jejel̦ã bwe ro rej pãd ium̦win tõl eo an Tepil̦ eo renaaj l̦apl̦o̦k wõt aer riab. Bareinwõt, enaaj l̦aptata aer kajjioñ in m̦on̦e ri karejar ro an Jeova.
2 Elõñ alen an armej ro ilo nuuj riab im m̦on̦e ro jet kõn kõj ri karejar ro an Jeova im tõmak ko ad. Im jet iien rejjab lukkuun kwal̦o̦k m̦ool im remaroñ ba naan ko reriab kõn kõj. Bareinwõt, rej kajeeded mel̦el̦e ko rejjab m̦ool kõn kõj ilo nuujpeba ko, ilo tipi, im Web site ko ilo Internet. Jet armej rej inepata im illu kõnke rej tõmak men kein reriab, bõtab rejjab bõk mel̦el̦e m̦okta im lale el̦aññe rem̦ool.
3. Ta eo emaroñ jipañ kõj ñan kõjparok bwe jen jab tõmak ilo naan ko reriab?
3 El̦ap ad kam̦m̦oolol bwe ewõr ad maroñ ñan kõjparok bwe Setan en jab m̦on̦e kõj. Ta eo emaroñ jipañ kõj? Eokwe, epãd Baibõl̦ eo ippãd, im ‘ewõr tokjãn ñan kajim̦we’ im jipañ kõj ñan kile m̦ool eo. (2 Timote 3:16) Ilo Tessalonika, jet iaan Kũrjin ro rar tõmaki naan ko reriab. Jemaroñ kile men in ilo naan ko rijjilõk Paul ear je im ba ñan rein. Ear ba: “En jab m̦õkaj an pok ami l̦õmn̦ak.” (2 Tessalonika 2:1, 2, UBS) Ta ko jemaroñ ekkatak jãn naan in kakkõl in an Paul? Im ewi wãween jemaroñ l̦oori ilo mour ko ad?
NAAN IN KAKKÕL KO REJEJJET
4. (1) Ewi wãween kar kakkõl Kũrjin ro ilo Tessalonika kõn raan eo an Jeova? (2) Ewi wãween ad bõk naan in kakkõl ko ilo raan kein?
4 Ilo lõta eo kein kajuon an Paul ñan Kũrjin ro ilo Tessalonika, ear kakkõl er kõn itok eo an raan eo an Jeova. Paul ear jab kõn̦aan bwe ro jein im jatin ilo tõmak ren pok im japojak ñan iien in. Kõn men in, ear ba ñan er bwe rej “armej in meram.” Innem ear ba: “Jen emmej im ekkõl.” (Riit 1 Tessalonika 5:1-6, UBS.) Ilo raan kein, jej kõttar iien eo naaj ko̦kkure Babil̦on El̦ap me ej jutak kõn aolep kabuñ ko reriab. Iien in me naaj ko̦kkure Babil̦on El̦ap ej jinoin raan eo el̦ap an Jeova. El̦ap ad kam̦m̦oolol bwe jemel̦el̦e kõn wãween an naaj Jeova kajejjete ankilaan. Im em̦m̦an bwe ilo eklejia eo, aolep iien jej bõk naan in kakeememej ko me renaaj jipañ kõj pojak ñan raan eo an Jeova. El̦aññe jej kanooj roñjake naan in kakkõl kein me rej kwal̦o̦ki jãn iien ñan iien, enaaj l̦apl̦o̦k ad kõn̦aan kate kõj ñan karejar ñan Anij kõn ‘aolepen ad l̦õmn̦ak.’—Matu 22:37.
5, 6. (1) Ta eo Paul ear jeje kake ilo lõta eo an kein karuo ñan ro ilo Tessalonika? (2) Ta eo m̦õttan jidik Jijej enaaj kõm̦m̦ane, im ta kajjitõk ko jej aikuj kajitũkin kõj make kaki?
5 Paul ear je bar juon lõta ñan ro ilo Tessalonika. Ilo lõta in an kein karuo, ear je im kwal̦o̦k kõn iien eo Jijej enaaj itok im ko̦kkure “ro rejaje Anij kab ro rejjab pokake Naan eo Em̦m̦an.” (2 Tessalonika 1:6-8, UBS) Ilo jebta 2 ilo lõta in, Paul ear je bwe jet ilo kar eklejia eo rar “inepata” im mijak ke rar roñ bwe m̦õttan jidik enaaj itok raan eo an Jeova. (Riit 2 Tessalonika 2:1, 2, UBS.) Kũrjin ro ilo tõre ko rar jab lukkuun mel̦el̦e kõn ewi wãween Jeova enaaj kajejjet ankilaan. Paul ear bar kile bwe ear jab mel̦el̦e kõn aolep kanaan ko an Jeova. Ej alikkar men in ilo naan kein an ke ear ba: “Jejel̦ã jimattan, im jej rũkaanij ilo jimattan; A ñe men eo eiio ej itok, men eo jimattan enaaj l̦otl̦o̦k.” (1 Korint 13:9, 10) Meñe ãindein, Kũrjin ro ilo tõre ko renaaj kar maroñ tiljek wõt el̦aññe rar roñjake naan in kakkõl ko me Jeova ear kõm̦akũt Paul, rijjilõk Piter im jet ri kapit ro ñan jei.
6 Ñan kajim̦we l̦õmn̦ak eo an Kũrjin ro, Anij ear kõm̦akũt Paul ñan kõmel̦el̦e bwe m̦okta jãn an itok raan eo An, enaaj lõñ ri jum̦ae im ri kanaan riab im “Ri Nana eo” enaaj wal̦o̦k.a (Lale kõmel̦el̦e eo itulal̦.) Ãlikin an wal̦o̦k men kein, Jijej enaaj “ko̦kkure” Ri Nana eo im aolep ro rar po ippãn, ilo iien eo em̦õj an Anij karõke. Paul ear ba bwe unin naaj ko̦kkure er ej kõnke rein “rar jab bõk im yokwe m̦ool” eo. (2 Tessalonika 2:3, 8-10, UBS) Jej aikuj kajjitõk ippãd make: ‘Ewi joñan aõ yokwe m̦ool eo? Ij ke katak kõn bok in kab bok ko jet em̦õj litok ñan aolep ro doon Anij ipel̦aakin lal̦, bwe in jel̦ã mel̦el̦e ko rekããl kõn katak ko ilo Baibõl̦?’
KÃÃLÕT ILO JIM̦WE RO KWÕJ KÕM̦M̦AO IPPÃER
7, 8. (1) Ta jet iaan men ko me rar kauwõtata ñan Kũrjin ro ilo iien ko etto? (2) Ta eo me el̦ap an kauwõtata ñan Kũrjin ro ilo raan kein?
7 Elõñ bar men ko renaaj kar kauwõtata ñan Kũrjin ro ijello̦kun wõt katak ko reriab an ri jum̦ae ro. Paul ear je im ba ñan Timote bwe “arõk m̦ani ej okran nana otemjej.” Ear bareinwõt ba bwe ro im “rar arõk rar jebwãbwe jãn tõmak im make wie er kõn elõñ menin kabũrom̦õj.” (1 Timote 6:10) Bar juon men me enaaj baj kauwõtata wõt ñan er ej kõm̦m̦an ak “jerbal ko renana.”—Galetia 5:19-21, UBS.
8 El̦ap an kar Paul kakkõl Kũrjin ro ilo Tessalonika kõn ro me ear n̦aetaer ‘rijjilõk ro reriab.’ Jet iaaer rar “kõnono men ko rankeke, bwe ren kareel ro rũkal̦oor ilo̦kaer.” (2 Korint 11:4, 13; Jerbal 20:30) Jijej ear nõbar Kũrjin ro ilo Epesõs kõn aer kar jab kõtl̦o̦k bwe ro “renana” ren pãd ilo eklejia eo. Kũrjin rein rar mãlejjoñe armej rein im lo bwe rar rijjilõk ro reriab. (Revelesõn 2:2) Ilo lõta eo kein karuo an Paul ñan ro ilo Tessalonika, ear kakapilõk rein ilo an ba: “Ro jeim im jatim, kõmij kaiñ kom̦ ilo etan Irooj Jijej Kũraij: kõjparok kom̦ jãn jemjein jemjatin ro rejowan.” (2 Tessalonika 3:6, 10, UBS) Innem, el̦aññe rein rar aikuj kõjparok er jãn juon eo me ejowan im ejjab kõn̦aan jerbal, alikkar bwe el̦apl̦o̦k an aorõk bwe ren kõjparok er jãn juon eo im ej jino alikkar an jum̦ae m̦ool eo. Armej rot rein rar lukkuun kauwõtata ñan an Kũrjin ro ilo tõre ko etto kõm̦m̦ao ippãer im ear menin aikuj bwe ren kõjparok jãn armej rein. El̦ap an bar men in kauwõtata ñan Kũrjin ro ilo raan kein.—Jabõn Kõnnaan 13:20.
9. Etke jej aikuj lukkuun kõjparok ñe juon ej kõm̦m̦an ad kajjidede kõn men ko Baibõl̦ ejjab kõmel̦el̦eiki im ñe ej kananaik ro ilo doulul eo an Jeova?
9 Jej epaakel̦o̦k iien eñtaan eo el̦ap im jem̦l̦o̦kin jukjukun pãd in enana. Naan in kakkõl ko an Jeova ñan Kũrjin ro ilo iien ko an rijjilõk ro el̦apl̦o̦k aer aorõk kiiõ ilo raan kein ad. Alikkar kõj aolep jejjab kõn̦aan ‘jerwaane jouj eo Anij ear letok ñan kõj.’ El̦aññe jej jerwaane men in, jenaaj luuji jeraam̦m̦an eo ñan mour indeeo. (2 Korint 6:1, UBS) Jej aikuj lukkuun kõjparok ñe juon armej ej itok im kweilo̦k im ej kajjioñ in kõm̦m̦an bwe jen kajjidede kõn men ko Baibõl̦ ejjab kõmel̦el̦eiki. Jej aikuj bar lukkuun kõjparok ñe juon ej kananaik ro rej lale eklejia im ri karejar ro jet an Anij.—2 Tessalonika 3:13-15.
“KÕJPAROK MEN KO EM̦ÕJ KATAKIN KOM̦ KAKI”
10. Ta katak ko Paul ear rõjañ Kũrjin ro ilo Tessalonika ñan kõjparoki?
10 Paul ear kakapilõk ri tõmak ro jein im jatin ilo Tessalonika bwe ren ‘jutak pen’ im kõjparok katak ko em̦õj katakin er kaki. (Riit 2 Tessalonika 2:15.) Ta katak ko Paul ear kõnono kaki? Alikkar ejjab katak ko an kabuñ ko reriab. Im ejjab kõnono kõn katak ko me armej rej tõmaki im ãinwõt ñe rej jãn Baibõl̦. Paul ej kõnono kõn katak ko me e im ro jet rar ekkatak jãn Jijej ekoba katak ko Anij ear kõm̦akũt er ñan jei. Paul ear nõbar ro jein im jatin ilo eklejia eo ilo Korint kõnke ear ba bwe rein rar ‘keememej e ilo men otemjej im dãpij katak ko ear katakin er.’ (1 Korint 11:2) Innem, kõnke katak ko ear katakin er rar itok jãn Jeova im Nejin, remaroñ lõke im tõmaki.
11. Ta ko remaroñ wal̦o̦k ñan jet Kũrjin ñe rej kõtl̦o̦k bwe ro jet ren m̦õn̦e er?
11 Ke Paul ear jeje ñan Ri Hibru ro, ear kwal̦o̦k kõn ruo wãween ko me emaroñ jorrããn tõmak eo an juon Kũrjin im jako an tiljek ñan Jeova. (Riit Hibru 2:1, UBS; 3:12, UBS.) Ear kwal̦o̦k kõn an juon maroñ “jebwãbwe” ak “oktakl̦o̦k” jãn Jeova. Ñan waanjoñak, ãinwõt an juon waan ejjerakrõk jidik kõn jidik jebwãbwe jãn kooj eo ej kaiokl̦o̦k ãindein juon eo ‘ejebwãbwe’ ej jidik kõn jidik m̦õjn̦o̦l̦o̦k tõmak eo an im ejjab kile men in m̦ae iien eo epãd ilo kauwõtata. Ak eo ej “oktakl̦o̦k” ak make pepe bwe en ilo̦k jãn Jeova ej ãinwõt juon ri jerakrõk me ej make kajeere wa eo im oktakl̦o̦k jãn kooj in ial̦ eo an. Eokwe, men kein ruo remaroñ wal̦o̦k ñan juon Kũrjin ñe ej kõtl̦o̦k bwe ro jet ren m̦on̦e im bwe en dikl̦o̦k an tõmak ilo Jeova im katak ko rem̦ool.
12. Ta eo emaroñ ko̦kkure kõtaan eo ad ippãn Jeova?
12 Jet iaan Kũrjin ro ilo Tessalonika remaroñ kar make kõtl̦o̦k bwe ro jet ren m̦on̦e er im bwe en m̦õjn̦o̦l̦o̦k tõmak eo aer. Men in emaroñ ke bar wal̦o̦k ñan kõj? Eokwe, elõñ men ko remaroñ ko̦kkure iien ko ad. L̦õmn̦ak m̦õk kõn joñan awa ko juon ej julo̦k ñan kõm̦m̦ani men ko relimo, im etal ñan Web site ko me emaroñ bwebwenato ippãn ro jet im illik an pija ie. Im bareinwõt ilo an riit im jeje email ak text, im alwõj ak riit nuuj in iukkure ko ãinwõt basket. Jabdewõt iaan men kein emaroñ kõm̦ad juon Kũrjin im kadikl̦o̦k an kijejeto in jerbal ñan Jeova. Innem, ta eo emaroñ wal̦o̦k ñane? Eokwe, emaroñ jako an armej in jar jãn bũruon. Bareinwõt, emaroñ dikl̦o̦k an katak Baibõl̦, im jejal̦o̦k an kweilo̦k im kwal̦o̦k naan kõn nuuj eo em̦m̦an. Ta eo jemaroñ kõm̦m̦ane bwe en jab m̦õkaj an m̦õjn̦o̦l̦o̦k tõmak eo ad?
KÕJPAROK TÕMAK EO AM̦
13. (1) Ta l̦õmn̦ak eo an elõñ armej kõn raan ko ãliktata im ej jejjet ekkar ñan kanaan eo ilo Baibõl̦? (2) Im ta eo emaroñ jipañ kõj kõjparok tõmak eo ad?
13 Jej aikuj keememej bwe jem̦l̦o̦kin jukjukun pãd in an Setan ej epaaktok im bwe emaroñ kauwõtata ñe jej aetõl armej ro me rejjab l̦õmn̦ak bwe jej mour ilo “raan ko ãliktata.” Rijjilõk Piter ear kanaan kõn raan kein ad: “Ewõr ri kajjirere renaaj itok im kajjirere, im etetal ilo m̦õm̦ ko aer, im ba, ‘Ej pãd ia kallim̦ur eo kõn An itok? Bwe, jãn raan eo ke ro jim̦m̦aad rar kiki, men ko otemjej rar pãd wõt ãinwõt aer pãd jãn jinoin iien kõm̦anm̦an lal̦ in.’” (2 Piter 3:3, 4) Innem ta eo emaroñ jipañ kõj ñan kõjparok wõt? Eokwe, ad riit Baibõl̦ aolep raan im keini ad katak kake enaaj jipañ kõj ñan keememej bwe jej mour ilo ‘raan kein ãliktata.’ Kanaan eo ilo Baibõl̦ kõn an naaj lõñ ri jum̦ae im ri kanaan riab em̦õj an kar jino wal̦o̦k jãn iien ko etto im ej wõnm̦aanl̦o̦k wõt im wal̦o̦k rainin. “Ri Nana eo” ej pãd ñan kiiõ im ej jum̦ae ri karejar ro an Anij. Aolep men kein rej kwal̦o̦k bwe m̦õttan jidik enaaj itok raan eo an Jeova im jejjab aikuj mel̦o̦kl̦o̦k men in.—Zepanaia 1:7.
14. El̦aññe jej kijejeto wõt ilo jerbal eo an Anij, ewi wãween men in ej ãinwõt juon kein kõjparok kõj?
14 Bar juon wãween jemaroñ kõjparok bwe en jab m̦õkaj an m̦õjn̦o̦l̦o̦k tõmak eo ad ej ilo ad niknik in kwal̦o̦k naan kõn nuuj eo em̦m̦an. Kũraij Jijej ear jiroñ rũkal̦oor ro an ñan kõm̦m̦an rũkal̦oor jãn aolep aelõñ im katakin er ñan pokake men ko ear katakin er kaki. Men in me ear jiroñ er ñan kõm̦m̦ane enaaj kar kõjparok rũkal̦oor ro an. (Matu 28:19, 20) Jej pokake naan in jiroñ in an Jijej ñe jej kijejeto ilo jerbal in kwal̦o̦k naan. Baj l̦õmn̦ak m̦õk kõn joñan an kar Kũrjin ro ilo Tessalonika kijejeto ilo jerbal in kwal̦o̦k naan im aer katakin ro jet. Rein rar jab kõm̦m̦ane men in kõnke ear juon kien ak rar kõm̦m̦ane kõnke rar kõn̦aan. Eñin unin Paul ear ba ñan er: “Jab kune Jetõb Kwõjarjar eo [kajoor eo an Anij, NW] ilo kom̦. Kom̦win jab kajettokjãn naan in katak ko jãn Anij.” (1 Tessalonika 5:19, 20, UBS) “Naan in katak ko jãn Anij” ak kanaan ko me jej katak kaki im kwal̦o̦ki ñan ro jet el̦ap aer kãitoktoklimo!
15. Ta jet iaan men ko jemaroñ kõm̦m̦ani ilo iien kabuñ an baam̦le eo ad?
15 Kõj aolep jekõn̦aan jipañ ro uwaan baam̦le eo ad bwe ren pol̦õmãnl̦o̦k ilo aer kwal̦o̦k naan kõn nuuj eo em̦m̦an. Elõñ ro jeid im jatid rej kõmmãlmel jidik ilo iien kabuñ an baam̦le eo aer kõn kilen aer naaj kwal̦o̦k naan. Bõlen kwõmaroñ jipañ baam̦le eo am̦ kõpojakl̦o̦k im̦aan ñan jepl̦aak ippãn armej ro. Ta ko kom̦ij l̦õmn̦ak in bwebwenato kaki ippãn armej ro? Ta ko kom̦ maroñ ba ñan kõm̦m̦an bwe armej ro ren itoklimo in katak? Ñããt enaaj iien eo em̦m̦antata ñan jepl̦aak ippãn armej ro? Elõñ ro jet rej bar kõppojak ñan iien kweilo̦k ko ilo iien kabuñ an baam̦le eo aer. Baam̦le eo am̦ emaroñ ke kõm̦m̦ane men in? El̦aññe kom̦ij bõk kun̦aami ilo iien kweilo̦k ko, kom̦ naaj kakajoor tõmak eo ami. Bareinwõt enaaj jipañ kom̦ bwe en jab m̦õkaj an m̦õjn̦o̦l̦o̦k tõmak eo ami. (Sam 35:18) Iien kabuñ an baam̦le enaaj jipañ kõj ñan jab kajjidede kõn men ko Baibõl̦ ejjab kõmel̦el̦eiki im bwe en ejjel̦o̦k ad pere bwe jej pãd ilo raan ko ãliktata.
16. Ta eo ej jipañ kõjparok ri kapit ro bwe en jab m̦õkaj an m̦õjn̦o̦l̦o̦k tõmak eo aer?
16 Ium̦win elõñ iiõ ko, Jeova ear kajeraam̦m̦an armej ro doon im jipañ er ñan mel̦el̦el̦o̦k kõn kanaan ko ilo Baibõl̦. Ñe jej kõl̦mãnl̦o̦kjen̦ kõn jejjetin kanaan ko ilo Baibõl̦, men in ej kõm̦m̦an ad lõke bwe enaaj bar jejjet kallim̦ur ko an Anij ñan kõj kõn ilju im jekl̦aj. Ri kapit ro rej reim̦aanl̦o̦k ñan iien eo renaaj pãd ippãn Kũraij ilañ. Ejjel̦o̦k pere bwe kõjatdikdik in aer ej jipañ kõjparok er bwe en jab m̦õkaj an m̦õjn̦o̦l̦o̦k tõmak eo aer. Men eo Paul ear je im ba ñan ro ilo Tessalonika ej bar jejjet ñan ri kapit ro rainin. Ear ba: “Kõmij aikuj kam̦m̦oolol Anij iien otemjej kõn kom̦. Bwe Anij ar kããlõt kom̦ bwe kom̦ eo kom̦win . . . erom armej ro an rekwõjarjar, kõn kajoor an Jetõb Kwõjarjar [kajoor eo an Anij, NW] im kõn ami tõmak m̦ool eo.”—2 Tessalonika 2:13, UBS.
17. Naan ko ilo 2 Tessalonika 3:1-5 rej rõjañ eok ñan ta?
17 Ro rej reim̦aanl̦o̦k ñan iien eo renaaj mour indeeo ioon lal̦ rej aikuj ãinwõt ri kapit ro ilo aer bar kate er ñan kõjparok bwe en jab m̦õkaj an m̦õjn̦o̦l̦o̦k tõmak eo aer. El̦aññe kokõn̦aan mour indeeo ioon lal̦, eokwe kate eok iien otemjej ñan pokake naan in rõjañ ko an Paul ñan ri kapit ro ilo kar Tessalonika. (Riit 2 Tessalonika 3:1-5.) En kar l̦ap ad kam̦m̦oolol kõn naan in rõjañ kein. Lõta ko ñan ro ilo Tessalonika rej kakkõl kõj ñan jab kajjidede kõn men ko Baibõl̦ ejjab kõmel̦el̦eiki im ñan jab tõmak ilo mel̦el̦e ko me rejjab m̦ool. El̦ap ad lukkuun kam̦m̦oolol kõn naan in kakkõl kein kõnke jej mour ilo raan kein me epaake jem̦l̦o̦kin jukjukun pãd in an Setan.
a Ilo Jerbal 20:29, 30, ej kwal̦o̦k naan in kakkõl eo an Paul ñan eklejia ko. Ear ba: “Jet iaami renaaj jutak, im kõnono men ko rankeke, bwe ren kareel ro rũkal̦oor ilo̦kaer.” Tokãlik, ear jino alikkar oktak eo ikõtaan ro rej tõl im ro jet uwaan eklejia eo. Ãlikin kar iiõ eo 200, ear lukkuun alikkar bwe “Ri Nana eo” ej jitõñl̦o̦k ñan ri tõl ro an kabuñ ko me rej riab im ba rej Kũrjin.—Jouj im lale Imõniaroñroñ eo an Juun 15, 2008, peij 8, pãrokõrããp 6-7.