Jeova Ej Eo Jerad me Jepaaketata

1. Kõnke Anij ear kõm̦anm̦an kõj ilo wãween wõt e, ta ko ewõr ad maroñ ñan kõm̦m̦ani?

ÑE ARMEJ rej lo an juon ajri lukkuun em̦m̦an im ãinl̦o̦k wõt rũtto ro jemãn im jinen, ekkã aer ba, “Elukkuun aolepen jemãn im jinen.” Em̦ool men in kõnke ñe ajri ro rej l̦otaktok, rej bõdañe rũtto ro jemãer im jineer. Jeova, Jemãdwõj ilañ, ear letok mour ñan kõj. (Sam 36:9, UBS) Kõn men in, jej ãinwõt ro nejin im elõñ wãween ko ippãd me rej kaalikkar bwe jej ãinl̦o̦k wõt e. Kõnke ear kõm̦anm̦an kõj ilo ‘wãween’ wõt e, ewõr ad maroñ ñan l̦õmn̦ak, kõm̦m̦an pepe ko, im ejaak jem̦jerã ko ippãn ro jet.​—Jenesis 1:26.

2. Etke Jeova emaroñ juon Jerad me jepaaketata?

² Jeova emaroñ erom juon Jerad me jepaaketata. Etke jemaroñ jem̦jerãiki? Ej kõnke Anij ej yokwe kõj im jej tõmak ilo e im Nejin. Jijej ear ba: “Joñan an Anij yokwe lal̦, ear letok Nejin eo ej make wõt, bwe jabdewõt eo ej tõmak ilo e en jab jako, ak en mour indeeo.” (Jon 3:16, UBS) Elõñ ro me rar lukkuun epaake Jeova. Ak jen katak im bwebwenato kõn ruo iaan armej rein.

‘JERA EBREAM’

3, 4. Ta oktak eo ikõtaan jem̦jerã eo an Ebream ippãn Jeova im kõtaan eo an Ri Israel ro ippãn Jeova?

³ Ke Jeova ear kwal̦o̦k kõn Ebream, jim̦m̦aan Ri Israel ro, ear ba, ‘Jera Ebream.’ (Aiseia 41:8) Bareinwõt, ilo 2 Kronikel 20:7 ej ba bwe Ebream ej jeran Anij. Etke Ebream ear maroñ lukkuun epaake Ri Kõm̦anm̦an eo an? Ej kõnke ear kajoor tõmak eo an.​—Jenesis 15:6; riit Jemes 2:21-23.

⁴ Jeova ear ãinwõt bar juon Jemãn im juon Jeran epaak ñan ro bwijjin Ebream me tokãlik rar erom aelõñ in Israel. Bõtab, ekabũrom̦õjm̦õj bwe tokãlik ear jako jem̦jerã eo aer ippãn Anij. Etke? Ej kõnke ear jako an rein tõmak ilo kallim̦ur ko an Jeova.

5, 6. (1) Ewi wãween kwaar maroñ jino jem̦jerãiki Jeova? (2) Ta kajjitõk ko jen kajitũkin kõj make kaki?

⁵ Ñe enaaj l̦apl̦o̦k am̦ jel̦ã kajjien Jeova, enaaj kajoorl̦o̦k tõmak eo am̦ im l̦apl̦o̦k am̦ yokwe e. Baj l̦õmn̦ak m̦õk kõn iien eo kwaar jino katak im lukkuun tõmak bwe ewõr Anij im bwe kwõmaroñ jem̦jerãiki. Kwaar katak bwe kõj aolep jaar jolõt jerawiwi jãn Adam kõn an kar jab pokake. Im kõn men in, ear jab em̦m̦an kõtaan eo an aolep armej ippãn Anij. (Kolosse 1:21, UBS) Bõtab, kwaar lo im kile bwe Jemãdwõj ilañ ejjab ettol̦o̦k jãn kõj im bwe el̦ap an l̦õmn̦ak im kea kake kõj armej. Ke jaar ekkatak im jel̦ã bwe Jeova ear letok Nejin bwe en mej kõn kõj, jaar jino tõmak ilo katok in mour eo an Jijej. Innem, jaar maroñ ejaak juon jem̦jerã epaak ippãn Anij.

⁶ Ilo ad l̦õmn̦ak kõn wãween ad kar jino jel̦ã kajjien Jeova, em̦m̦an bwe jen kajjitõk ippãd make: ‘Kõtaan eo aõ ippãn Anij ej ke epaakl̦o̦k wõt? Ej ke l̦apl̦o̦k wõt aõ lõke im yokwe Jeova kajjojo raan?’ Ewõr bar juon me ear epaak jem̦jerã eo an ippãn Anij, armej in ej em̦m̦aan eo etan Gideon. Jen kiiõ katak kõn e bwe jen maroñ anõke joñak eo an.

“JEOVA EJ AENÕM̦M̦AN”

7-9. (1) Ta men eo ekabwilõñlõñ Gideon ear iioone, im ta eo ear wal̦o̦k jãn men in? (Lale pija eo ilo jinoin katak in.) (2) Ta eo jemaroñ kõm̦m̦ane bwe en epaakl̦o̦k wõt jem̦jerã eo ad ippãn Anij?

⁷ Ri Ekajet eo Gideon ear karejar ñan Jeova ilo juon iien me ear lukkuun pen ãlikin an kar Ri Israel ro del̦o̦ñe Ãnen Kallim̦ur eo. Ri Midian ro rar kaamijak im kalõl̦ño̦ñ Ri Israel ro im elõñ alen rar etal im ko̦kkure ãne eo ãneer im bũki men ko m̦weier. Eñin unin Gideon ear jab deñdeñ wit ilo mel̦aaj eo. Ak ear deñdeñ wit ilo juon jikin joniak ak kõm̦m̦an wain bwe en m̦õkaj an n̦ooji wit ko. Ilo bok in Ekajet jebta 6 ej ba bwe enjel̦ eo an Jeova ear lol̦o̦k Gideon ilo juon jikin etan Opra. Gideon ear bwilõñ ke enjel̦ eo ear jãdel̦o̦k im ba ñane bwe ej juon “em̦m̦aan eperan im kajoor.” Meñe Jeova ear lo̦mo̦o̦ren Ri Israel ro jãn Ijipt, ak Gideon ear jab tõmak bwe Enaaj bar jipañ er. Bõtab, enjel̦ eo ear kõnono ikijjeen Jeova im kallim̦ur bwe Anij enaaj jipañe.

⁸ Gideon ear kajjitõk kõn ewi wãween an naaj maroñ ‘lo̦mo̦o̦ren Ri Israel ro jãn Ri Midian ro.’ Kõn men in, Jeova ear kaalikkar im ba: “Inaaj pãd ippam̦ im kwõnaaj maroñe men in. Kwõnaaj ko̦kkure Ri Midian ãinwõt ñe kar juon wõt em̦m̦aan.” (Ri Ekajet 6:11-16, UBS) Bõlen kõn an kar lukkuun kõn̦aan jel̦ã ewi wãween men in enaaj tõprak, Gideon ear kajjitõk bwe Anij en kwal̦o̦k ñane juon kein kam̦ool. Ñe kwõnaaj riiti naan ko an Gideon im Anij, kwõnaaj kile im lo bwe Gideon ear lukkuun tõmak bwe Jeova ej juon Anij emour.

⁹ Tokãlik, ekar wal̦o̦k juon men me ear kakajoor tõmak eo an Gideon im kõm̦m̦an an epaakel̦o̦k Anij. Gideon ear kõpooje jet m̦õñã im bõkl̦o̦k ñan enjel̦ eo. Innem ilo kabwilõñlõñ, enjel̦ eo ear tile m̦õñã ko ke ear uñũri kõn bõran jokon̦ eo an. Ke Gideon ej kab kile bwe Anij ear lukkuun jilkinl̦o̦k enjel̦ eo, ear jino mijak. Gideon ear ba: “O Irooj Anij! Iar jelm̦ae enjel̦ eo am̦ kõn meja!” (Ri Ekajet 6:17-22, UBS) Bõtab, meñe Gideon ear mijak, men in ear ke kabbeere im kõm̦m̦an an ettol̦o̦k kõtaan eo an ippãn Jeova? Ear jab. Jejel̦ã men in kõnke lokatok eo Gideon ear kalõke ijo, ear n̦aetan “Jeovashalom,” mel̦el̦ein “Jeova ej Aenõm̦m̦an.” (Riit Ri Ekajet 6:23, 24; lale kõmel̦el̦e eo itulal̦in eoon kein.) El̦aññe jej kõl̦mãnl̦o̦kjen̦ kõn men ko Jeova ej kõm̦m̦ani ñan kõj kajjojo raan, jenaaj kile bwe ej juon Jerad em̦ool. Ñe jenaaj ekkeini ad kõnnaan ippãn Jeova ilo ad jar, enaaj l̦apl̦o̦k ad aenõm̦m̦an im enaaj lukkuun epaakl̦o̦k wõt jem̦jerã eo ad ippãn.

WÕN ENAAJ PÃD ILO M̦ÕN KÕPPÃD EO AN JEOVA?

10. Ekkar ñan Sam 15:3, 5, ta ko juon ej aikuj kõm̦m̦ani bwe en maroñ jem̦jerã ippãn Jeova?

¹⁰ Ñan an juon maroñ jem̦jerã ippãn Jeova, ewõr men ko ej aikuj kõm̦m̦ani. Ilo bok in Sam jebta 15, Devid ear kine juon al me ej kwal̦o̦k kõn men ko jej aikuj kõm̦m̦ani bwe jen maroñ pãd ilo im̦õn kõppãd eo an Jeova ak erom ro jeran Anij. (Sam 15:1) Jen kiiõ etale ruo iaan men ko jej aikuj kõm̦m̦ani: (1) jab ruruwe ro jet, im (2) en jim̦we im m̦ool ad jerbal. Devid ear ba bwe Jeova ej m̦õn̦õn̦õ in jem̦jerã ippãn armej eo me “ejjab ruruwe ro jet” im “armej rejjab maroñ wiaik bũruon bwe en riab n̦ae ro ejjel̦o̦k rueer.”​—Sam 15:3, 5, UBS.

11. Etke jej aikuj kõjparok bwe jen jab ruruwe ro jet?

¹¹ Ilo bar juon iaan jebta ko ilo bok in Sam, Devid ear kakkõl im ba: “Kom̦win kõjparok bwe kom̦win jab kõnono nana, im bwe kom̦win jab riab.” (Sam 34:13, UBS) El̦aññe jej kõjekdo̦o̦n naan in kakkõl in, eban em̦m̦an kõtaan eo ad ippãn Jemãdwõj ilañ. Ilo m̦ool, ruruwe ej men eo el̦aptata ippãn ri kõjdat eo el̦ap an Jeova, Setan Tepil̦ eo. Naan in “Tepil̦” ej itok jãn juon naan ilo kajin Grik me ej mel̦el̦ein “ri ruruwe.” Innem, ñe jej kõjparok wãween ad kõnnaan kõn ro jet, men in enaaj kõm̦m̦an bwe jen epaake wõt Jeova. El̦aptata, jej aikuj kõjparok wãween ad kõnnaan im watõk em̦m̦aan ro Anij ear jitõñ er ñan lale eklejia eo.​—Riit Hibru 13:17; Jud 8, UBS.

12, 13. (1) Etke ej aikuj jim̦we im m̦ool ad jerbal ilo men otemjej? (2) Ta eo enaaj wal̦o̦k ñe ej m̦ool im jim̦we ad jerbal?

¹² Armej rejel̦ã kajjien Ri Kõnnaan ro an Jeova kõn an jim̦we im m̦ool aer jerbal. Rijjilõk Paul ear je: “Kom̦win jar wõt kake kõm. Kõm lukkuun jel̦ã bwe am bõklõkõt em̦m̦an, kõnke kõm kõn̦aan kõm̦m̦ani men ko rejim̦we iien otemjej.” (Hibru 13:18, UBS) Kõnke jekõn̦aan “kõm̦m̦ani men ko rejim̦we iien otemjej,” jej bareinwõt kõjparok bwe en bar jim̦we im m̦ool ad jerbal ñan ro jeid im jatid ilo tõmak. Ñan waanjoñak, el̦aññe ewõr ad peejnej im ewõr ro ilo eklejia eo rej jerbal ñan kõj, eokwe jen kõjparok bwe en jim̦we ad kõm̦m̦an ñan er im jen kõl̦l̦ã on̦ean aer jerbal ekkar ñan joñan eo jaar ba jenaaj lel̦o̦k. Kõnke jej Kũrjin, ej aikuj jim̦we im m̦ool ad kõm̦m̦an ñan ri jerbal ro ekoba aolep ro jet. Im el̦aññe jej jerbal ñan juon ilo eklejia eo ilo peejnej eo an, eokwe jen jab watõk bwe enaaj l̦apl̦o̦k an em̦m̦an ñan kõj jãn ri jerbal ro jet.

¹³ Ekkã an armej nõbar im kam̦m̦oolol Ri Kõnnaan ro an Jeova kõn aer jerbal ilo jim̦we im m̦ool. Ñan waanjoñak, juon bo̦o̦j ilo juon kom̦bani ekilep ear kile bwe Ri Kõnnaan ro an Jeova rej kajejjeti naan ko aer im ear nõbar er. Ear ba: “Aolep iien kom̦ij kajejjeti men ko kom̦ij kallim̦ur ñan kõm̦m̦ani.” (Sam 15:4, UBS) Ad m̦ool ilo ad jerbal ej kõm̦m̦an bwe jen jem̦jerã wõt ippãn Jeova im men in ej bar bõktok nõbar ñan Jemãdwõj ilañ.

JIPAÑ RO JET BWE REN MAROÑ JEM̦JERÃ IPPÃN JEOVA

14, 15. Ñe jej kwal̦o̦k naan, ta eo jemaroñ kõm̦m̦ane ñan jipañ ro jet bwe ren maroñ jem̦jerã ippãn Jeova?

¹⁴ Ñe jej kwal̦o̦k naan, jemaroñ iioon armej ro me rej tõmak bwe ewõr Anij. Bõtab, elõñ armej rejjab l̦õmn̦ak kõn Anij ãinwõt juon eo remaroñ epaake im jem̦jerã ippãn. Ta eo jemaroñ kõm̦m̦ane ñan jipañ armej rein? Eokwe, lale m̦õk ta eo Jijej ear jiroñ rũkal̦oor ro an 70 ke ear jilkinl̦o̦k er bwe ren ilo̦k im kwal̦o̦k naan. Ear ba: “Jabdewõt iien ñe kom̦ij del̦o̦ñ ilowaan juon em̦, kom̦win ba m̦okta, ‘Aenõm̦m̦an ñan m̦wiin.’ El̦aññe juon armej in aenõm̦m̦an ej pãd ijo, ami naan in kaenõm̦m̦an enaaj pãd ippãn; el̦aññe ejjel̦o̦k, enaaj bar jepl̦aak ñan kom̦.” (Luk 10:5, 6, UBS) El̦aññe jej kwal̦o̦k jouj im yokwe ñan armej ro, men in enaaj bõlen kõm̦m̦an bwe ren kõn̦aan kal̦apl̦o̦k aer jel̦ã kõn m̦ool eo. Im el̦aññe jej kwal̦o̦k wõt jouj ñan ro rej jum̦ae kõj, men in emaroñ kadikl̦o̦k aer illu. Innem, renaaj bõlen kõn̦aan roñjake ñe juon enaaj kwal̦o̦k naan ñan er ilo bar juon iien.

¹⁵ Ñe jej iioon ro me el̦ap aer tõmak ilo kabuñ ko aer ak ro rej l̦oor m̦anit ko an kabuñ ko reriab, eokwe jen wõnm̦aanl̦o̦k wõt im kwal̦o̦k jouj im kõm̦m̦an aenõm̦m̦an ippãer. Im jen kũrtok im karwainene aolep armej ñan iien kweilo̦k ko ad, el̦aptata ro me rej inepata im illu kõn men ko renana rej wal̦o̦k rainin im rekõn̦aan kal̦apl̦o̦k aer jel̦ã kõn Anij eo jej kabuñ ñane. Elõñ bwebwenato ko kõn armej rot rein im ekkã aer wal̦o̦k ilo bok eo Naan in Keeañ ilo katak eo etan “Baibõl̦ eo Ej Ukot Mour Ko.”

JEJ RI JERBAL IPPÃN JEOVA, EO JERAD ME JEPAAKETATA

16. Kõj ri karejar ro an Jeova jejjab baj jem̦jerã wõt ippãn ak jej bar ri jerbal ro m̦õttan. Ewi wãween?

¹⁶ Ekkã an armej epaake doon ñe rej jerbal ippãn doon. Ilo ad kwal̦o̦k naan im kõm̦m̦an rũkal̦oor ro, el̦apl̦o̦k ad katak kõn men ko rekanooj em̦m̦an kõn Jemãdwõj ilañ. Jej lo wãween an kajoor eo an jipañ kõj bwe en em̦m̦an im jejjet ad kwal̦o̦k naan kõn nuuj eo em̦m̦an. Kõn men in, aolep ro me em̦õj aer ajel̦o̦k mour ko aer ñan Jeova, rejjab baj jem̦jerã wõt ippãn, ak rej bar ‘ri jerbal ro m̦õttan.’​—Riit 1 Korint 3:9.

17. Elemen an Jeova kwal̦o̦k bwe ej Jerad ikijjeen kweilo̦k ko rel̦l̦ap?

¹⁷ El̦ak l̦apl̦o̦k ad kõjerbal iien ko ad ñan kwal̦o̦k naan, el̦apl̦o̦k ad epaake Jeova. Jej lo an Jeova bõbrae ri jum̦ae ro jãn aer kabõjrak jerbal in kwal̦o̦k naan. Elukkuun alikkar bwe e eo ej tõl kõj, im el̦ap ad bwilõñ kõn wãween an wõnm̦aanl̦o̦k wõt im katakin kõj ikijjeen kweilo̦k ko im bok ko an doulul in. Ilo iien kweilo̦k ko rel̦l̦ap, jej kile an Jeova lukkuun jel̦ã im mel̦el̦e kõn apañ ko im aikuj ko ad. Ãlikin kar juon kweilo̦k el̦ap, juon baam̦le ear je im ba: “Katak ko rar lukkuun tõpar bũruem. Kõmar maroñ kile joñan an Jeova yokwe im kaorõk kõj kajjojo im an kõn̦aan bwe jen m̦õn̦õn̦õ im lo jeraam̦m̦an.” Bareinwõt, ãlikin an ruo ri pãlele jãn Jãmne kar etal ñan kweilo̦k el̦ap eo ilo aelõñ in Ireland, erro ar kwal̦o̦k aer kam̦m̦oolol ro jeid im jatid ijin kõn aer kar karwaineneik er im em̦m̦an aer lale er. Erro ar bareinwõt ba: “El̦aptata am̦ro kam̦m̦oolol Jeova im Kiiñ eo an, Jijej Kũraij. Erro ar kũrtok kõj bwe jen uwaan juon doulul me aolep rej bõrokuk ippãn doon. Jejjab baj katakin wõt aolep bwe ren bõrokuk ippãn doon ak jej bar kõm̦m̦ane men in kajjojo raan. Men ko rem̦m̦an kõmro ar iiooni ilo kar kweilo̦k el̦ap eo ilo Dublin ilo Ireland, renaaj aolep iien kakeememej kõmro kõn jeraam̦m̦an eo ñan karejar ñan Anij eo ad el̦ap ippemi aolep.”

RO REJ M̦ÕTTAIK DOON REJ KWAL̦O̦K BŨRUEER ÑAN DOON

18. Ta kajjitõk eo jen kajjitõk ippãd make kõn kõtaan eo ad ippãn Jeova?

¹⁸ Ñe ro rej m̦õttaik doon rej kwal̦o̦k bũrueer ñan doon, men in enaaj kõm̦m̦an bwe kõtaan eo aer en epaakl̦o̦k wõt. Rainin, eokkutkut an armej text im kõjerbal Internet ñe rej bwebwenato ippãn ro m̦õttaer. Ak ta kõn kõj im Jeova, Jerad eo me jepaaketata? Eokwe, Jeova ej “roñjake jar” ko. (Sam 65:2) Ewi ikkutkut in ad kepaake Jeova im kõnono ippãn ilo ad jar?

19. El̦aññe epen ñan ad kwal̦o̦k bũruod im eñjake ko ad ñan Jeova, ta eo emaroñ jipañ kõj?

¹⁹ Ippãn jet iaan ri karejar ro an Anij, ejjab pidodo ñan aer kwal̦o̦k bũrueer im eñjake ko aer. Bõtab, Jeova ekõn̦aan bwe jen kwal̦o̦k bũruod ñe jej jar ñane. (Sam 119:145; Liaajlo̦l̦ 3:41) El̦aññe epen ñan ad kwal̦o̦k im kõmel̦el̦e kõn eñjake ko ad, eokwe ewõr juon men emaroñ jipañ kõj. Ta in? Ej kajoor eo an Anij. Paul ear jejel̦o̦k ñan Kũrjin ro ilo Rom im ba: “Jejaje ekõjkan em̦m̦an jen jar, a Jetõb [kajoor an Anij, NW] ej akwel̦ap kõn kõj ilo iññũr ko jeban kõnono kaki. Im Eo ej pukot bõro ko Ejel̦ã l̦õmn̦ak an Jetõb [kajoor an Anij, NW], bwe Ej akwel̦ap kõn ro rem̦m̦an ekkar ñan ankilaan Anij.” (Rom 8:26, 27) Ñe jej riiti bok ko ilo Baibõl̦ ãinwõt bok in Job, Sam, im Jabõn Kõnnaan, men in emaroñ jipañ kõj jel̦ã ta ko jen ba ñan kwal̦o̦k bũruod ak eñjake ko ad ñan Jeova.

20, 21. Elemen an naan ko an Paul ilo Pilippai 4:6, 7 kaenõm̦m̦an kõj?

²⁰ El̦aññe jej iioon apañ ko rel̦l̦ap, em̦m̦an bwe jen keememej naan ko an kar Paul ñan Ri Pilippai ro. Ear ba: “Kom̦win jab inepata kõn jabdewõt, a ilo men otemjej kõn jar im akwel̦ap kab kam̦m̦oolol, kajjitõk ko ami ren wal̦o̦k ñan Anij.” Ñe jej jar ñan Jeova ilo wãween in, men in ej lukkuun kaenõm̦m̦an bũruod. Paul ear je im ba: “Im aenõm̦m̦an jãn Anij, eo ej el̦l̦ã jãn jel̦ã otemjej, enaaj kõjparok bũruomi im l̦õmn̦ak ko ami ilo Kũraij Jijej.” (Pilippai 4:6, 7) Jen kwal̦o̦k ad kam̦m̦oolol iien otemjej kõn ‘aenõm̦m̦an eo jãn Anij’ me ej lukkuun kõjparok bũruod im l̦õmn̦ak ko ad.

²¹ Ad jar ej kõm̦m̦an bwe en l̦apl̦o̦k wõt ad epaake Jeova. Kõn men in, jen “jar iien otemjej.” (1 Tessalonika 5:17, UBS) Jej aikuj wõnm̦aanl̦o̦k wõt im kõm̦m̦an bwe en epaakl̦o̦k wõt kõtaan eo ad ippãn Jeova. Im jen kõm̦m̦ani men ko ekõn̦aan bwe jen kõm̦m̦ani. Bareinwõt, jen kõm̦m̦an iien ñan ad kõl̦mãnl̦o̦kjen̦ kõn jeraam̦m̦an ko ewõr ippãd kõn an Jeova Jemãd, Anij eo ad, im eo Jerad.