KATAK KO KÕN TAITÕL̦IN BOK IN | KWÕMAROÑ EPAAKE ANIJ
Kwepaake Ke Anij?
“Ñe kwepaake Anij, men in ej kõm̦m̦an bwe kwõn juon eo eineem̦m̦an, em̦õn̦õn̦õ, im ejjab inepata. Kwõj make kile bwe Anij ekõn̦aan jipañ eok ilo men ko kwõj kõm̦m̦ani.”—CHRISTOPHER, JUON LIKAO ILO GHANA.
“Anij ej lo ñe kwõj bũrom̦õj im inepata, im ej lukkuun yokwe eok im jipañ eok el̦ap jãn joñan eo kwõj kõtmãne kake.”—HANNAH, JUON LEDDIK 13 AN IIÕ ILO ALASKA, U.S.A.
“Ejjel̦o̦k juon eñjake em̦m̦anl̦o̦k im ekaenõm̦m̦anl̦o̦k jãn ñe kwõj kile bwe kwepaake Anij!”—GINA, JUON KÕRÃ IN JAMAICA ME 40 JIM̦A AN IIÕ.
Ejjab Christopher, Hannah, im Gina wõt rej bõk eñjake rot kein. Elõñ armej ipel̦aakin lal̦ in rej tõmak bwe Anij ej watõk er ãinwõt ro jeran. Ak ta kõn kwe? Kwepaake ke Anij? Kokõn̦aan ke epaake ak kal̦apl̦o̦k am̦ epaake E? Bõlen kwõj l̦õmn̦ak im ba, ‘M̦ool ke bwe armej remaroñ epaake Anij, eo me Eutiej Bõtata? Ñe aet, ewi wãween?’
ARMEJ REMAROÑ EPAAKE ANIJ
Ekkar ñan Baibõl̦, armej remaroñ epaake Anij. Baibõl̦ ej ba bwe Anij ear n̦aetan RiHibru eo Ebream bwe ej ‘jeran.’ (Aiseia 41:8) Bareinwõt, bokin Jemes 4:8 ej ba: “Kom̦win ruwaakl̦o̦k ñan Anij, im Enaaj ruwaakwaj ñan kom̦.” Innem, ealikkar bwe armej remaroñ epaake Anij im erom ro jeran. Bõtab, ewi wãween bwe kwõn maroñ “ruwaakl̦o̦k ñan Anij” im epaake E ke jejjab maroñ loe?
Ñan uwaake kajjitõk in, jen l̦õmn̦ak kõn ta ko ruo armej rej kõm̦m̦ani m̦oktata bwe ren maroñ jino jel̦ã kajjien doon im epaake doon. Ñan waanjoñak, m̦okta jãn an ruo armej jel̦ã kajjien doon, rej aikuj jel̦ã etan doon. Innem, el̦ak ikkutkutl̦o̦k aerro bwebwenato ippãn doon im kwal̦o̦k l̦õmn̦ak im bũrueerro ñan doon, erro jino epaakel̦o̦k doon. Im ñe erro ej kate erro ñan kõm̦m̦ani men ko rem̦m̦an ñan doon, el̦apl̦o̦k wõt aerro epaake doon. Emaroñ bar ãindein jem̦jerã eo ad ippãn Anij. Jen lale etke jejaam̦ ba men in.