KAJJITÕK KO BAIBÕL̦ EJ UWAAKI

Etke jej aikuj keememej mej eo an Jijej?

Raanin mej eo an Jijej ej raan eo ej make wõt aorõktata. Etke? Kõnke ear mej ñan kõjepl̦aaktok mour eo m̦okta me jaar luuji. Kar jab kõm̦anm̦an armej bwe ren kõm̦m̦ani men ko renana, nañinmej, ak mej. (Jenesis 1:31) Bõtab, aolep armej rej rijjerawiwi kõn an kar em̦m̦aan eo m̦oktata, Adam, jerawiwi. Kõn men in, Jijej ear ajel̦o̦k mour eo an bwe en lo̦mo̦o̦ren kõj jãn jerawiwi im mej.​—Riit Matu 20:28, UBS; Rom 6:23.

Anij ear kwal̦o̦k an yokwe kõj ilo an kar jilkintok Nejin bwe en mej kõn kõj. (1 Jon 4:9, 10, UBS) Jijej ear jiroñ rũkal̦oor ro an bwe ren keememej mej eo an ilo aer kõm̦m̦ane juon kwõjkwõj me rej kõjerbal bũreet im wain. Ilo ad kõm̦m̦ane men in kajjojo iiõ, jej kwal̦o̦k ad kam̦m̦oolol Anij im Jijej kõn aerro kwal̦o̦k aerro yokwe kõj.​—Riit Luk 22:19, 20, UBS.

Wõn ro rej m̦õñã bũreet im idaak wain?

Ke Jijej ear jiroñ rũkal̦oor ro an bwe ren keememej mej eo an, ear kõnnaan kõn juon bujen ak kallim̦ur. (Matu 26:26-28, UBS) Bujen in ear kõpel̦l̦o̦k juon jeraam̦m̦an ñan rũkal̦oor ro an im bar jet me ewõr joñan oraer, bwe ren kiiñ im bũrij ippãn ilañ. Meñe elõñ milien armej rej kobatok im keememej mej eo an Jijej, ak ro wõt me rej pãd ilo bujen in rej m̦õñã bũreet im idaak wain ilo iien in.​—Riit Revelesõn 5:10.

Enañin 2,000 iiõ in an Jeova kããlõt wõn ro me renaaj kiiñ. (Luk 12:32) Ewõr jejjo wõt uwaan rein ñe jej keidi ippãn uwaan ro me renaaj mour indeeo ilo lal̦ in.​—Riit Revelesõn 7:4, 9, 17.