Kidia ko Emãn im Ro Rej Uwe Ioer im Mel̦el̦eir ñan Kwe

Ro rej uwe ioon kidia ko emãn rej kaiim̦ im rejjab kadikdik aer ettõr im jemaroñ roñ ainikien an neen kidia ko ettõrtok! Joñan an alikkar an Baibõl̦ kwal̦o̦k kõn kidia kein emãn im ro rej uwe ioer, ñe jej riiti ej ãinwõt ñe m̦õttan jidik rekãnabõjtak jãn lowaan Baibõl̦ eo! Kidia eo kein kajuon, emouj kilin im eo ej uwe ioon ej juon kiiñ eutiej im ej kab m̦õj kõpãlpele kõn juon crown. Kidia eo kein karuo me ej itok ilikin tok, ebũrõrõ kilin ãinwõt kijeek im eo ej uwe ioon ej kõm̦m̦an tarin̦ae im bõkl̦o̦k aenõm̦m̦an jãn ioon lal̦ in. Kidia eo tok juon me kein kajilu, ekilmeej kilin ãinwõt marok jilõñlõñ im eo ej uwe ioon ej jibwe juon kein bo̦un ñan kõjjel̦ã bwe emaat m̦õñã. Im kidia eo kein kãmen, eu kilin ãinwõt rinañinmej im etan eo ej iuwe ioon ej Mej. Ej bõktok nañinmej im men ko jet rekauwõtata me rej kõm̦m̦an an armej mej. Im Jikin Mej, eo ej kõkkar kõn lõb eo libõn armej, ej l̦oore im aini aolep ro remej!​—Revelesõn 6:1-8, UBS.

“Ilo jinoin ke iar riit kõn kidia ko emãn im ro rej uwe ioer, iar lukkuun kor im mijak. Iar l̦õmn̦ak emoottok Raanin Ekajet eo im bwe iban mour kõnke ijjañin ukot mour eo aõ.”​—Crystal.

“Elukkuun kar kãitoktoklimo an Baibõl̦ kwal̦o̦k kõn ro rej uwe ioon kidia ko emãn me eoktak color in kilier jãn doon. Ak ke iar katak im jel̦ã mel̦el̦ein pijen in, ear lukkuun jejjet im em̦m̦an aõ mel̦el̦e.”​—Ed.

Kwaar ke bar kor im mijak ãinwõt kar Crystal ke ear riit kõn kidia ko emãn im ro rej uwe ioer ilo bokin Revelesõn? Ke ta, kwõj ke errã ilo ejja l̦õmn̦ak eo wõt an kar Ed? Eokwe, eñin pijen eo ilo bokin Revelesõn me el̦ap an buñbuñ ippãn armej ro. Ak kwaar jel̦ã ke bwe pijen in emaroñ lukkuun jipañ eok? Ewi wãween an naaj jipañ eok ñe kwõnaaj mel̦el̦e kake? Anij ej kallim̦ur bwe kwõnaaj lo m̦õn̦õn̦õ ñe kwõj riiti im l̦oore men ko kar jei ilo bok in me ej juon bokin kanaan.​—Revelesõn 1:1-3, UBS.

Meñe elõñ armej rej mijak pijen eo kõn kidia ko emãn im ro rej uwe ioer, ak Anij ear jab likũt pijen in ilo Baibõl̦ ñan kaamijak kõj. Ilo m̦ool, elõñ milien armej ro rar katak im lo bwe pijen in ear kõkajoorl̦o̦k tõmak eo aer im kõm̦m̦an bwe ren reim̦aanl̦o̦k ñan juon ilju im jekl̦aj em̦m̦an. Men in emaroñ bar wal̦o̦k ñan kwe. Jouj im wõnm̦aanl̦o̦k wõt im riiti katak eo tok juon.