“Menin Letok eo Aõ Em̦m̦antata”

Juon leddik 13 an iiõ ear ba naan kein ke kar lel̦o̦k juon nejin kidu ãinwõt juon menin lel̦o̦k. Juon kõrã ewõr an peejnej ej ba bwe kampiutõr eo nejin me ej juon menin lel̦o̦k jãn jemãn ñane ke ear high school, ear lukkuun l̦ap tokjãn ñan mour eo an. Bareinwõt, juon em̦m̦aan rippãlele ej ba bwe menin lel̦o̦k eo em̦m̦antata kar lel̦o̦k ñane, ej kaat eo lio pãleen ear make kõm̦m̦ane im lel̦o̦k ñane ilo raanin anniversary eo aerro kein kajuon.

Ilo iien ko raorõk kajjojo iiõ, elõñ armej rej jol̦o̦k el̦ap iien im kate er kappok menin lel̦o̦k ko rem̦m̦antata ñan ro m̦õttaer ak ro ilo baam̦le ko aer. Im enañin aolep rej m̦õn̦õn̦õ ñe rej roñ bwe menin lel̦o̦k ko aer rej kam̦õn̦õn̦õik bũruon armej ro, ãinwõt ro kar kwal̦o̦k kake er ilo jinoin katak in. Ak ta kõn kwe? Kokõn̦aan ke lel̦o̦k ak bõk juon menin letok eo ej make wõt em̦m̦an?

Men in emaroñ l̦ap an kãitoktoklimoõd kõnke menin lel̦o̦k ko ad rejjab kam̦õn̦õn̦õik wõt ro jaar lel̦o̦k ñan er, ak rej bareinwõt kam̦õn̦õn̦õik kõj. Eñin unin Baibõl̦ ej ba: ‘‘M̦õn̦õn̦õ in lel̦o̦k el̦ap jãn bõk.” (Jerbal 20:35) Em̦ool bwe el̦apl̦o̦k ad m̦õn̦õn̦õ ñe armej ro rej lukkuun kaorõk menin lel̦o̦k ko ad ñan er.

Innem, ewi wãween am̦ maroñ kõm̦m̦an bwe menin lel̦o̦k eo am̦ en juon men enaaj kam̦õn̦õn̦õik kwe im ro jet? Im el̦aññe kwõjjab maroñ lel̦o̦k menin lel̦o̦k eo kwõj loe bwe enaaj make wõt em̦m̦an, ta ko kwõmaroñ kõm̦m̦ani bwe ro jet ren kaorõk menin lel̦o̦k eo am̦ ñan er?