Naaj Anjo̦ Ioon ri-Kõjdat eo Mej​—Ewi Wãween?

MEÑE ro jibwid im jim̦m̦aad, Adam im Iv rar jab pokake im rar bõktok jerawiwi im mej ñan aolep armej, ak men in ear jab ukot karõk eo an Anij ñan armej ro. Aolepen Naan ko an Anij ilo Baibõl̦ eo, rej ãliji im kam̦ool bwe ejjañin de oktak karõk eo an.

• “Ro rem̦m̦an renaaj jolõt ãneo, im jokwe ilowaan ñan indeeo.”​—Sam 37:29.

• “Ear orañl̦o̦k mej ñan indeeo, im Irooj Jeova enaaj kõm̦õrãik dãnnin kõmjaal̦al̦ jãn mejãer otemjej.”​—Aiseia 25:8.

• “Naaj kajeepepl̦o̦ke ri-kõjdat eo ãliktata, eñin ej mej.”​—1 Korint 15:26.

• “Enaaj ejjel̦o̦k bar mej, bũrom̦õj, lim̦õ im eñtaan.”​—Revelesõn 21:4.

Ewi wãween an Anij naaj “orañl̦o̦k mej” ak jol̦o̦k ri-kõjdat eo mej ñan indeeo? Ãinwõt ad kar loe, Baibõl̦ ej kaalikkar im ba bwe “ro rem̦m̦an renaaj . . . [mour] ñan indeeo.” Bõtab ej bar ba bwe “ejjel̦o̦k juon armej ilo lal̦ in ej kõm̦m̦an jim̦we iien otemjej.” (Ekklisiastis 7:20, UBS) Mel̦el̦ein ke bwe Anij enaaj kõjekdo̦o̦n kien ko an bwe ro rejjab weeppãn me rejerawiwi remaroñ mour ñan indeeo? Alikkar bwe eban ãindein! Eban kõm̦m̦ane men in kõnke “Anij . . . eban riab.” (Taitõs 1:2) Innem ta eo Anij enaaj kõm̦m̦ane ñan kajejjet karõk eo an elukkuun em̦m̦an ñan armej ro ear kõm̦anm̦an er?

NAAJ ANJO̦ IOON MEJ IKIJJEEN KATOK IN MOUR EO AN JESUS

Kõn an Jeova yokwe kõj ear letok juon menin letok ñan lo̦mo̦o̦ren aolep armej jãn mej ikijjeen an kar kõl̦l̦ã kõn mour eo an Nejin. Naan in kõl̦l̦ã ej jitõñl̦o̦k ñan on̦ããn eo jej lel̦o̦k ñan kõm̦adm̦õde juon jorrããn, ijoke kõl̦l̦ã eo ej aikuj joñan wõt juon ippãn joñan on̦ããn jorrããn eo ak joñan eo ejejjet im jim̦we. Kõnke aolep armej rej rijjerawiwi im em̦õj liaakel̦o̦k er ñan mej, Baibõl̦ ej ba: “Juon armej ejjab maroñ lo̦mo̦o̦ren e make; Ejjab maroñ kõl̦l̦ã ñan Anij on̦ããn mour eo an, (kõnke on̦ããn mour an armej ekanooj l̦ap. Joñan eo emaroñ kõl̦l̦ãiki ejãmin bwe).”​—Sam 49:7, 8, UBS.

Ñe juon armej ejjab weeppãn ej mej, emaroñ kõl̦l̦ãik wõt on̦ããn jerawiwi ko an; ejjab maroñ lo̦mo̦o̦ren e make, ak kõl̦l̦ãiki on̦ããn jerawiwi ko an bar juon armej. (Rom 6:7) Jaar aikuji juon eo eweeppãn im ejjab jerawiwi ñan aje mour eo an, ejjab kõn jerawiwi ko an, ak kõn jerawiwi ko ad.​—Hibru 10:1-4.

Eñin ej men eo Anij ear karõk bwe en wal̦o̦k. Ear jilkintok Nejin, Jesus, jãn lañ bwe en l̦otak ilo lal̦ in ãinwõt juon armej eweeppãn im ejjab rijjerawiwi. (1 Piter 2:22) Jesus ear ba bwe ear itok “bwe en kõl̦l̦ã kõn mour eo an ñan lo̦mo̦o̦ren elõñ armej.” (Mark 10:45) Ear mej bwe en maroñ anjo̦ ioon ri-kõjdat eo mej bwe jen maroñ mour.​—Jon 3:16.

ÑÃÃT NAAJ ANJO̦ IOON MEJ?

Ilo raan kein, jej loe an jejjet kanaan eo ilo Baibõl̦ bwe “iien ko rekanooj in nana im reppen renaaj wal̦o̦k.” Men in ej kam̦ool bwe jej mour ilo “raan ko ãliktata” an jukjukun pãd in enana. (2 Timote 3:1) Raan ko ãliktata renaaj jem̦l̦o̦k ilo “raanin ekajet eo im iien eo naaj ko̦kkure ro rej jum̦ae Anij.” (2 Piter 3:3, 7) Ak armej ro rej yokwe Anij renaaj el̦l̦ã im mour jãn jorrããn in im renaaj bõk jeraam̦m̦an eo “mour ñan indeeo.”​—Matu 25:46.

Elõñ milien ro jet renaaj jerkakpeje im enaaj pel̦l̦o̦k iien ñan aer bõk mour indeeo. Jesus ear kõjerkakpejeik juon armej ke ear lol̦o̦k jikin eo etan Nein. Ear mej l̦adik eo ej make wõt nejin juon kõrã ejako pãleen im Jesus ear ‘kanooj bũrom̦õj kake’ im ear kõjerkakpejeiki. (Luk 7:11-15) Bareinwõt, rijjilõk Paul ear ba: “Ewõr aõ kõjatdikdik ilo Anij . . . bwe enaaj wõr juon iien jerkakpeje ñan ro rewãnõk im ro rejjab wãnõk jim̦or.” Kõjatdikdik in ej juon wãween elukkuun em̦m̦an ej kwal̦o̦k kõn yokwe eo an Anij ñan aolep armej.​—Jerbal 24:15.

Elõñ pilien armej ro remaroñ reim̦aanl̦o̦k ñan mour indeeo. Baibõl̦ ej ba: “Ro rem̦m̦an renaaj jolõt ãne eo, im jokwe ilowaan ñan indeeo.” (Sam 37:29) Ilo iien en̦, renaaj lukkuun loe an jejjet naan ko rekaenõm̦m̦an me rijjilõk Paul ear jei enañin 2,000 iiõ ko remootl̦o̦k ke ear ba: “Mej, epãd ia am̦ anjo̦? Mej, epãd ia kajoor eo am̦ ñan kaeñtaan?” (1 Korint 15:55) Ilo naaj tõre en̦, naaj bõk anjo̦ ioon ri-kõjdat eo el̦ap an armej, mej!