Ilo Am̦ Katak Ippam̦ Make, Kwõj Kakajoor Tõmak eo Am̦
1 Ñe ej ũne ekkan ko kijed im jej kakajoor ãnbwinid, men kein renaaj kõm̦m̦an bwe en em̦m̦an ad ãjmour. Ãindeinl̦o̦k wõt, ñe jej katak ippãd make kõn Baibõl̦ eo, men in enaaj kakajoor tõmak im kõtaan eo ad ippãn Jeova. Eban pen tõmak eo ad el̦aññe jejjab keini ad katak Baibõl̦ eo. Bareinwõt, ñe jej keini ad katak men in enaaj kakajoore wõt tõmak eo ad innem jemaroñ jum̦ae matõrtõr ko jãn Setan, jum̦ae kõn̦aan ko renana im kõn̦aan ko kõn arõk m̦weiuk.—Ep. 6:16.
2 Tokjãn Ad Katak Ippãd Make: Mel̦el̦e eo ad kõn eoon ko ilo Baibõl̦ eo enaaj m̦wilal̦l̦o̦k ñe jej make katak. Ej jipañ ejaake juon tõmak eo ekajoor im jipañ bwe jen mel̦el̦e ta depakpakin, im aitokõn, im utiejen, im m̦wilal̦ in yokwe eo an Kũraij. (Rom 11:33; Ep. 3:16-19) Tõmak ej juon kajoor eo ej kõm̦akũt kõj ãinwõt ke ej m̦õttan leen kajoor eo an Anij. Ej jipañ kõj kõn̦ak armej eo ekããl im mour ãinwõt ro doon Anij. (Gal. 5:22, 23, NW; Ep. 4:24) Jenaaj pojak in namejelan apañ ko ilo mour ko ad. Im jeban kanooj kallimjek wõt bõd ko an ro jet ak jenaaj kõm̦m̦an wõt aenõm̦m̦an ilowaan eklejia eo. (Kol. 3:10, 13, 14) Aolepen wãween kein renaaj kanooj kõketak kõj im ro jet.
3 Ad make katak ej bar kõpooj kõj bwe jen maroñ jipañ ro rej kwal̦o̦k aer itoklimo me jej iioon er ñe jej kwal̦o̦k naan. Jenaaj peran in ‘uwaak jabdewõt eo ej kajjitõk kõn unin kõjatdikdik eo’ ilo kõj. (1 Pi. 3:15) Im ãinwõt Kũraij Jijej, jemaroñ katakin armej ro ilo alikkar im jim̦we kõn katak ko jãn Baibõl̦ eo. Im kõmel̦el̦eik er ta eo Jeova ej kõn̦aan ãinwõt ro ewõr maroñ ippãer.—Matu 7:28, 29.
4 Kilen im Ñããt eo Kwõn Katak: Mejãnkajjik eo ad ej bwe en l̦apl̦o̦k jãn ad baj riiti katak eo. Ebõk iien ñan kõl̦mãnl̦o̦kjen̦ kõn men ko jaar riiti. Kajjitõk ippam̦ make: Ewi wãween an katak in maroñ jerbal ñan ña? Ta men ko ej kwal̦o̦k kake kõn Jeova, kadkad ko an, im kõn ial̦ ko an? Ewi wãween imaroñ kõjerbale mel̦el̦e ko ñan jipañ ro jet? Ewi wãween an katak in ekkejell̦o̦k ippãn mel̦el̦e ko ijel̦ã kadede? Ilo ad kappok mel̦el̦e ko ñan kajjitõk ko, enaaj l̦apl̦o̦k mel̦el̦e eo ad kõn katak eo im jemaroñ lo wãween an errã ippãn m̦ool eo. Eñin wãween ad kal̦apl̦o̦k mel̦el̦e eo ad.—JK. 4:5.
5 El̦aññe jekõn̦aan bwe jen imminene in katak ippãd make, jej aikuj kõjenolo̦k iien ko em̦õj ad karõki ñan katak. (Lale Pilippai 3:16.) Jet remaroñ kile bwe epen ñan kõm̦m̦ane men in ilo jinoin, ak enaaj pidodol̦o̦k ãlikin jet iien ñe kwõj kate wõt eok. Ekanooj naaj l̦ap jeraam̦m̦an ko kwõnaaj loi! Bõlen kwõmaroñ katak m̦oktal̦o̦k jãn am̦ kiki in boñ. Ro jet rej katak m̦okta jãn raantak ke ejjel̦o̦k ekeroro. Jemaroñ bar katak ilo iien kakkije in raelep. Jabdewõt iien, kajjioñ pukot juon jikin eo ejjel̦o̦k keroro ie im em̦m̦an ñan katak. Men in enaaj jipañ eok ñan kõl̦mãnl̦o̦kjen̦ im kõm̦m̦an bwe kwõn keememej wõt katak eo. Innem men ko kwõj katak renaaj kõm̦akũt bũruom̦ ilo ial̦ eo ewãnõk.—JK. 15:28.
6 Ta eo Kwõn Katak Kake: Men eo m̦oktata ilo iien ad katak ej bwe jen kõpooj katak ko ñan kweilo̦k ko l̦alem ilo wiik otemjej. Ijello̦kun wõt am̦ kõpooj katak ko ilo bok eo Naan in Keeañ im Katak Baibõl̦ an Eklejia eo, kwõj ke kortokjãn katak ko em̦õj laajraki ilo Jikuul̦ in Kwal̦o̦k Naan eo? Bareinwõt jab mel̦o̦kl̦o̦k in l̦oor laajrak in riit Baibõl̦ eo im kappok mel̦el̦e ko jet ilo bok ko an doulul in. El̦aññe kwõnaaj etale m̦oktal̦o̦k mel̦el̦e ko an katak 1, 3, im 4 enaaj l̦apl̦o̦k am̦ itoklimo kõn katak ko ilo jikuul̦ eo. Enaaj pidodol̦o̦k am̦ keememej naan in tõl ko reaorõk jãn Baibõl̦ eo.
7 Jejjab aikuj bõk el̦ap iien im kõpooje kweilo̦k eo kõn Ad Jerbal ñan Aelõñ eo, bõtab jej aikuj kobaik men in ilo laajrak in iien katak eo ad. El̦aññe kwõnaaj bõk jejjo minit ko kajjojo wiik ñan etale katak ko ilo Ad Jerbal ñan Aelõñ eo, men in enaaj jipañ bwe en kajoor wõt tõmak eo am̦ im jipañ eok kwal̦o̦k kõn tõmak eo am̦ ñan ro jet ilo jerbal in kwal̦o̦k naan.
8 Ñe em̦m̦an im jejjet wõt am̦ l̦oor laajrak in am̦ katak ippam̦ make, wãween in emaroñ jipañ eok bwe en kajoorl̦o̦k tõmak eo am̦. (Ep. 3:16) Aet, tõmak eo ekajoor, yokwe eo em̦wilal̦ ñan Jeova im Kũraij Jijej, mel̦el̦e eo el̦apl̦o̦k, im an keiel̦o̦k am̦ kwal̦o̦k naan, aolep jeraam̦m̦an kein im ko jet rej kõm̦m̦an bwe am̦ katak ippam̦ make en wõr tokjãn. Ewõr ke juon am̦ laajrak in am̦ katak ippam̦ make?