Jibañ Ro Ejelok Air Iminene ñõn Melele
1 Ikijen jerbal in kõmmõn ri kalor ro, jej katakin ro jet kin ta eo Anij ekõnan bwe ren kõmmõne. (Mat. 28:19, 20) Elõñlok jen lalim million Ri Kennan ro rej kõmmõn juõn jibadbad elap ñõn kõmmõn men in ibelakin lõl. Tõbrak ko rejjab joñwe ikijen joñan awa ko rar kajerbali, book im magazine ko rar leloki, ak katak kin Bible ko rar kajutaki. Jej kõtõbrak mejenkajjik eo ad ñe armij rej melele im jerbale ta eo rar katak kake.
2 Jibañ ro jet ilo jitõb ej kitibuj “lelok jelalokjen ñõn ro re jab kanuij meletlet.” (Sam 119:130) Ej jelet burueir im armij rej emmakit wõt ñe rej “melele kake.” (Mat. 15:10) Ñe jerbal eo ad ej laplok, elaplok ad kamolol aikwij eo ñõn konono im katakin ilo lamwan. Eñin unin Society ear je brochure eo Ta Eo Anij Ekõnan Bwe Jen Kõmmõne? Ewor juõn katak ebolemen kin irinekatak ko ilo Bible. Katak ko rekadu, nan ko rejjab ekabwokbwok, im nan in jiroñ ko rebidodo ñõn melele, ej kõmmõn bwe brochure eo en emejaja.
3 Brochure in jenaj kwaloke ibben magazine ko ilo alliñ in May im June. Kimij rejañ bwe ñe kwoj kõmmõn karõk kin jerbal in kwalok nan eo am, kwon karõk ñõn lelok magazine ko ilo Saturday ak kwalok brochure eo ilo ran ko jet ilo week eo. Bõklok brochure eo ñõn armij ro me rar mõnõnõ in bõk book im magazine ko mokta. Kememej bwe elap an maroñ keie ñõn kajerbale ñõn katakin ajiri ro, armij ro me rej konono bar juõn kajin, im ro me ewor joñan air maroñ read.
4 Kajerbal juõn Wãwen Kebak Armij Elamwan: Ñe kwoj kwalok brochure eo Jen Kõmmõne, jitõñlok ñõn peij 2, ijo ej kamelele bwe “kar kõmmõne brochure in bwe jen katak Bible ibben armij ro.” Jitõñlok ñõn paragraph 3 ilo peij 3 ñõn kwalok kin etke armij eo ej aikwij katak Bible eo. Kaitoklimoen kin jet unin tel in katak ko me rej kalikar mol ko relamwan ilo Bible. Kwalok kin ewi wãwen brochure in ej kõmmõn bwe katak ej juõn men ekalõñliñ, im ba bwe kwoj mõnõnõ in jibañ e.
5 Kõmmõn juõn Katak Ej Wõnmanlok: Mejenkajjik eo ad ejjab ñõn kõmmõn katak ko kin Bible wõt—jekõnan kõmmõn ri kalor ro me renaj erom ri jurak ro rebin kin kabuñ eo emol. Brochure eo kwomaroñ kadedeloke iumin jet wõt week ko im en tellok ñõn juõn katak ilo book eo Mour Indrio. Jen jinoin, jibañ ri katak eo ñõn kile dolul eo an Jehovah. (Lale book eo Reasoning (Kammanwa), peij 283-4) Kalikar aorõkin kwelok ko an congregation eo, im kamelele bwe bed ilo kwelok ko rej letok juõn melele eyu kin ewi wawen jemaroñ jerbale kabuñ eo emol.—Hib. 10:24, 25.
6 Bõk kwunam joñan wõt am maroñ ilo jerbal in ejej uan ilo alliñ in May im June enaj bõktok mõnõnõ eo ej itok jen am jibañ ro emol burueir ñõn “bõk jelalokjen” me ej tellok ñõn mour.—Jabõn Kennan 4:5.