Lañliñ kin Jerbal in Kwalok nan Full-Time
1 Einwõt juõn jodikdik, ejelok bere kwar lemnak kin ilju im jeklaj eo am. Jabõn Kennan Ko 21:5 ej jiroñ kij bwe “lemnok ko an dri owõn, re men in jerammõn.” Kwonaj jerammõn elañe kwoj lemnak kin mejenkajjik ko am ilo mour. Ñe kwoj kõmman karõk ko am kin ilju im jeklaj, lemnak kin am bõk jerbal in kwalok nan full-time. Etke?
2 Kajitõk ibben jet ritto ro me rar pioneer ke rar jodikdik kin ta lemnak ko air kake im ekkã air naj ba ejja men in wõt: “Kar yiõ ko remõntata ilo aõ mour!” Juõn brother eo ear lañliñ kin jerbal in kwalok nan full-time jen ien ear likao mantak ear ba ilo yiõ ko tokelik ke ear ritto: “Elap an kaju buru ñan reiliklok ñan ien jodikdik im maroñ ba bwe juõn ear bokake kakabilek eo emeletlet: ‘Kwon bareinwõt kememej Eo Dri Kõmõnmõn yuk ilo ran ko ñe emõn ridtõm.’ ” (Ekkl. 12:1) Ej aikwiji karõk ko remõn, am im an jemõm im jinõm jimor, ñan bukõt juõn wãwen kwomaroñ iion lañliñ rot in ilo ien am likao ak jiroñ.
3 Ro Jemen im Jinen, Rejañ kin Jerbal in Kwalok Nan Full-Time: Jehovah, einwõt juõn Jemen eyokwe, ej kwalok ñan yuk ial eo kwon etal ie. (Ais. 30:21) Ilo an letok nan in tel rot in eyokwe, ej likit juõn joñok emõn ñan kom Christian jemen im jinen ro. Jen ami kõtlok bwe ro nejimi ren make kãlet ial ta eo emõntata ñan ir, ilo meletlet kamineneik ir ilo wãwen eo ren etal ie bwe ren maroñ bõk kajerammõn an Jehovah. Inem, ñe rej ritto lok, kaminene eo am naj jibañ ir ñan “jela kajen emõn im nana.” (Hib. 5:14) Jen iminene ko air, ritto ro rej jelã bwe rejjab maroñ liki lemnak ko air make; rej aikwij atartar ion Jehovah ñan kajimwe ial ko air. (Ken. 3:5, 6) Aikwij in ej laplok ibben jodikdik ro, ro ediklok iminene ko ibbeir kin mour.
4 Ro jemen im jinen, ñe ro nejimi rej kebak yiõ ko in air jodikdik, ak meñe mokta jen ien eo, konono ibbeir kin mejenkajjik ko air. Ri kakabilek ro, ri kaki ro, im ri school ro mõttair renaj kajeoñ in kareel ir ñan kãlet jibadbad ko an lal me rej kwalok jitõb in arõk mweiuk. Jibañ ro nejimi ñan kãlet katak ko me renaj lelok ñan ir kaminene ko rekeie, im kamaroñ ir ñan kabwe aikwij ko air ilo kanniek ilo air jab likit men ko an Ailiñ elik. (1 Tim. 6:6-11) Ilo elõñ case ko, jelãlokjen eo rej bõke ilo high school ekoba vocational im/ak kaminene eo rej bõke jen job eo emaroñ men eo wõt rej aikwiji ñan kabwe aikwij ko air ñe rej jino jerbal in regular pioneer.
5 Rejañ jodikdik ro ñan jibadõk men in letok eo kin make iair. Elañe rej bebe ñan mare tokelik, enaj laplok air bojak ñan bõk eddo ko relaplok kin mour in belele. (Lale paragraph 19 ilo June 2001 Ad Jerbal Ñan Ailiñ Eo peij eo iloa, “Kwomaroñ ke Lelok Yuk Make?”) Ilo am konono ilo juõn wãwen emõn kin jerbal in pioneer, jerbal ijo elaplok air aikwij jibañ ie, jerbal ilo Bethel, im jerbal in missionary, kwomaroñ kaddeklok ilo buruen jodikdik ro meñe rej dik wõt juõn kõnan ñan kajerbal mour ko air ilo juõn wãwen Jehovah ej buñburuen kake, ej bõktok tokjen ko ñan ro jet, im ej kalañliñ ir make.
6 Jodikdik ro, Likit bwe Jerbal in Kwalok Nan En Moktata: Jodikdik ro, komij jab aikwij ebbururu kin wãwen jerbal in pioneer. Kwomaroñ kajeoñ in kõmmane part-time ilo am auxiliary pioneer ñe kwomaron ilo yiõ in school eo im ilo ien kakije. Inem kwonaj jelã kin ewi lapin an kaju buru jerbal in pioneer! Kwomaroñ ke karõk ñan auxiliary pioneer ikõtan ien eo jen kiõ im jemlokin ien summer?
7 Elañe kwoj juõn brother ilo dolul eo an Anij, lemnak bareinwõt ñan jibadõk am tellokin bõk jerbal in ministerial servant. (1 Tim. 3:8-10, 12) Bareinwõt, bebe elañe kwo kõnan kadeloñ juõn application ñan jerbal ilo Bethel ak ñan bed ilo Ministerial Training School eo, ñe kwoj tõbar dettan yiõ ko remõn ñan bed ilo school eo. Experience eo am ilo jerbal in pioneer naj katakin yuk kin men ko raorõk, einwõt ewi wãwen mour ekkar ñan juõn schedule, ewi wãwen kwomaroñ kakõmõnmõnlok karõk ko am, ewi wãwen an maroñ emõn kõtan eo am ibben ro jet, im ewi wãwen am maroñ kaddeklok jelã eo am ñan bõk eddo ko. Men kein aolep naj keboj yuk kin jerammõn in jerbal ko relaplok tokelik.
8 Juõn men eaorõk ñan lo tõbrak ilo jerbal in kwalok nan full-time ej ikijen am bõk juõn jitõb in kijejeto kin men ko ewõr kõtair ñan jerbal eo an Anij. Ri jilek Paul ear rejañ armij ñan bõk kain lemnak rot in, im ear jitõñlok ñan tokjen ko renaj walok: “Jabrewõt men eo komij kõmõne, komin kõmõne kin buru, einwõt ñõn Iroij [Jehovah], . . . kom jela bwe kom naj bõk jen Iroij jenekjij in jolit eo.” (Kol. 3:23, 24) Kimij kejatdikdik bwe Jehovah enaj kajerammõn yuk kin elõñ men in kalañliñ ko ilo jerbal in kwalok nan full-time!