Kwoj “Kõnan” ke Jibañ Ro Jet?
1 Ear mol an Jesus kea kake armij. Ke juõn ri leper ear akwelap ibben ñan an jibañ e, Jesus ear erlokwe pein, uñuri emaan eo, im ba: “I kõnan: kwon erreo.” (Mark 1:40-42) Ilo wãwen et ko jemaroñ anõk lemnak eo an Jesus ikijen jibañ ro jet?
2 Armij ro Rej Itoklimo: Kajjojo ro uan congregation eo ewõr kunair ñan jibañ juõn armij ej itoklimo ñan erom juõn ian ri kabuñ ro an Jehovah. Ñe ro rekãl rej itok ñan kwelok ko, karuwaineneik ir im kõmman ñan am jelã kajjiir. Bukõt wãwen ko kwomaroñ rejañ ir. Nebar ir kin uak ko air. Kwalok nan in nebar ko kin jibadbad ko air ñan jerbale nan in kakabilek ko ilo Bible ilo mour ko air. Jibañ ir ñan lo maroñ ko ewõr ibbeir ñan kõmman jerair ro remol iloan congregation eo.
3 Ri Tõmak Ro Mõttad: “Ro rej ber ilo nukin tõmak” elaptata air tellokiir bõk jibañ jen kij ilo elõñ wãwen ko. (Gal. 6:10) Elõñ rej kijenmij kin abañ ko kin ejmour. Ilo am lolok ir, kwomaroñ lelok kamao ko rej aikwiji ñan kõketak ir im bareinwõt jibañ ir ilo wãwen ko jet ewõr tokjeir. Jet remaroñ aikwij jelmae abañ ko jet ilo air mour. Kwalok am itoklimo ilo am bõk ien ñan roñjake ir im kõketak ir. (1 Tess. 5:14) Elder ro bareinwõt rej aikwiji ad jerbal ibbeir ke rej kajejjet eddo ko air. (Hib. 13:17) Ilo ad kwalok juõn jitõb in mõnõnõ im jibañ, jemaroñ “kainemõn” ri tõmak ro mõttad.—Kol. 4:11.
4 Ro Uan Family eo: Jej aikwij bareinwõt kate kij ñan kajeoñe itoklimo eo an Jesus kin armij ro iloan family eo ad make. Itoklimo eo emũlal ej kamakit ro jemen im jinen ñan ‘kakajiririik ro nejiir ilo kaje im kauwe an Jehovah.’ (Ep. 6:4) Ajiri ro remaroñ kõmman ijo kunair ilo air mõkaj im kebojak kin katak eo an family eo, kwelok ko an congregation eo, ak jerbal in kwalok nan. Ajiri ro reritto remaroñ kwalok tiriamokake einwõt Jesus ilo air joij im jibañ jemeir im jineir ñan kijenmij ilo abañ ko rej itok kin air rittolok. Ilo wãwen kein im ilo wãwen ko jet, kij aolep jemaroñ “katak mokta kin lale ro nuki[d].”—1 Tim. 5:4.
5 Ñe jej kajeoñe Jesus ilo ad jibañ ro jet, jenaj maroñ kadiklok abañ ko air im ñan karuaklok family eo ad im congregation eo ñan air ebake don. Eaorõktata ian men otemjej, jenaj bõktok nebar ñan Jehovah, “Jemen tiriamokake.”—2 Kor. 1:3.