Nan in Nebar ko Rej Kakajur
1 “Iar jab juõn ledik emõn rainin ke?” ledik eo ear jañ im kajitõk ilo ien kar kakiki e. Kajitõk eo ear kailbõk jinen. Meñe ear lo joñan an nejin kate e bwe en jab bõt, jinen ear jab kwalok juõn nan ñan jidik ñan nebar im kamolol e. Den in kemjalal eo an ledik eo en jerbal einwõt juõn kein kakememej bwe kij aolep—dik im ritto—jej aikwiji nan in nebar ko. Jej kakajur ke ro ibelakid ilo ad kwalok nan in kamolol kin men ko remõn rej kõmmani?—Ken. 25:11.
2 Ri Christian ro mõttad rej letok ñan kij elõñ un ko remõn ñan nebar ir. Elder ro, ministerial servant ro, im pioneer ro elap air kate ñan kajejjet eddo ko air. (1 Tim. 4:10; 5:17) Ro jemen im jinen rej mijak Anij rej kõmmane joñan wõt air maroñ ñan kakajiririk ro nejiir ilo wãwen ko an Jehovah. (Ep. 6:4) Christian jodikdik ro rej kate wõt ir ñan jumae “jitõb õn lõl.” (1 Kor. 2:12; Ep. 2:1-3) Ro jet rej karejar ñan Jehovah ilo tiljek meñe reritto, ewõr abañ ko kin ejmour, ak melejoñ ko jet. (2 Kor. 12:7) Aolep armij rein rej tellokiir bõk nebar. Jej kwalok ke ad kamolol kin jibadbad ko air rej tellokiir bõk nebar?
3 Ñan Armij eo Make im Ejejjet: Emol ad mõnõnõ in roñjake nan in nebar ko ñan congregation eo. Bõtab, nan in nebar ko elaplok air kakajur ñe rejejjet ñan kij make. Ñan wanjoñok, ilo katak 16 ilo letter eo an ñan Dri Rom, Paul ear kwalok nan in nebar ko rejejjet ñan Phoebe, Prisca im Aquila, Tryphaena im Tryphosa, im Persis, ian ro jet. (Rom 16:1-4, 12) Elap an kar nan ko an kakajur rein retiljek! Nebar rot in ej kamol ñan ro jeid im jatid maan im kõrã bwe jej aikwiji ir im ej karuaklok kij ñan don. Kwar lelok ke nan in nebar ñan juõn ilo ran ko rej kab jemlok?—Ep. 4:29.
4 Jen Buruõd: Bwe en kakajur, nan in nebar eo ej aikwij mol. Armij remaroñ jelã elañe jej konono jen mol in buruõd ak jej baj ‘etaoik kin loõd.’ (Ken. 28:23) Ke jej kamineneik kij make ñan kile kadkad ko remõn ilo ro jet, buruõd enaj kamakit kij ñan kwalok nan in nebar. En lap ad kwalok nan in nebar ko remol, ilo jelã bwe “juõn nan ilo ien ekar, e nañin emõn wõt!”—Ken. 15:23.