“Komin Yokwe Jeova, Komeo Dri’mõn Otemjej”
Mij eo an Jesus naj Kememe ilo April 4
1 Elõñ yiõ ko remotlok, ke ailiñ in Ukraine ear bed iumin iroij eo an Communist, ri utiej ro rar lukkun waje ro jeid im jatid—elaptata ke ear ebakelok ran in Kwojkwoj in Kejota eo an Iroij—kinke rar kejatdikdik in jelã tu-ia renaj kwelok ie. Men in ear juõn abañ ien otemjej, kinke ri utiej ro rar jelã ñããt renaj kar kememe ran eo. Ta eo brother ro rar maroñ kõmmane? Mweo imõn juõn sister ear wõr juõn room itulaltata in mweo me ear ibwij. Kinke ri utiej ro rar jab kõtmene bwe armij renaj kwelok ijo, brother ro rar kalek juõn bedbed kõmman jen alal ilõñin den eo me joñan mũlal in ear tõbar bukien juõn armij. Meñe rar aikwij in kumwil ion bedbed eo iumin juõn tõrak ettã, ejelok juõn ear kabañ ir ke congregation eo ear kõmmane Kwojkwoj in Kememej eo ilo lañliñ.
2 Bebe eo an ro jeid im jatid ilo Ukraine ñan bokake kien eo ñan kememe mij eo an Jesus ear juõn wãwen ekabwilõñlõñ ñan kwalok air yokwe ñan Anij. (Luk 22:19; 1 Jon 5:3) Jabdewõt ien ñe jej jelmae abañ ko ilo ad mour, jen bõk kõketak jen wanjoñok rot kein im bebe ñan bed ñe jej kememej Kejota eo an Iroij ilo April 4. Ilo wãwen in, jej kwalok bwe jej errã ibben ri jeje psalm eo ear al: “O komin yokwe Jeova, komeo dri’mõn otemjej An.”—Sam 31:23.
3 Jibañ Ro Jet ñan Eddeklok ilo Air Yokwe Anij: Yokwe Anij ej bareinwõt kamakit kij ñan kirtok ro jet ñan kememej mij eo an Jesus ibbed. February Ad Jerbal Ñan Ailiñ Eo peij eo iloa ear rejañ kij kajjojo ñan kõmman juõn lajrak in etan armij ro jaar karõk in kir ir ñan Kwojkwoj in Kememej eo. Kwoj tiljek ke in kir kajjojo armij ro ilo lajrak eo am? Bõk ien ñan kameleleik ir kin aorõkin ien eo. Juõn nan in kakememej ejoij kin ran eo im awa eo kin Kwojkwoj eo im, elañe ekkar, jiroñ ir bwe kwonaj mõnõnõ in ilok ibbeir, men in emaroñ rejañ ir ñan kwelok.
4 Ilo kwelok eo, kõmman juõn jibadbad ejej uan ñan yokyokwe ro rar bõk nan in kir eo ad, im karuwaineneik ir. Ewi wãwen kwomaroñ jibañ ir ñan kaddeklok air yokwe Jehovah? Kwon bojak in uake kajitõk ko air. Kwon tilmake juõn katak kin Bible elañe ekkar. Kir ir ñan bed ilo kwelok ko ad kajjojo week. Elder ro elaptata air naj kõnan kwalok air itoklimo kin ri Christian ro rej inactive (eto air jab kwalok nan) me rej bed. Remaroñ kõmman karõk ñan lolok rein im rejañ ir ñan bar jino air jerbal ibben congregation eo, bõlen ilo air kalaplok air kamelele kin point ko kar kwaloki ilo katak in Kwojkwoj in Kememej eo.—Rom. 5:6-8.
5 Kamũlallok Yokwe eo Ad Make ñan Jehovah: Ilo ad kalmenlokjen kake men in letok eo kin binmour eo emaroñ kamũlallok yokwe eo ad ñan Jehovah im Nejin. (2 Kor. 5:14, 15) Juõn Ri Kennan me elõñ yiõ ko in an itok ñan Kwojkwoj im Kememej eo ear ba: “Kimij kijororetok Kwojkwoj in Kememej eo. Kajjojo yiõ ej laplok an aorõk ñan kim. Ij kememej ien eo iar jutak ilo mõn ilomij eo enañin 20 yiõ ko remotlok, ke iar kalimjeke enbwin eo emij an jema ej kab ien eo iar bõk juõn kamolol emol kin binmour eo. Mokta ear juõn men iar baj katak kake. O, iar jelã kin aolep eon ko kin binmour eo im ewi wãwen iar maroñ kamelele kaki! Ak ilo ien eo ke iar jelmae mij buruõ ear lukkun lañliñ kin ta eo binmour eo enaj kõtõbrake ñan kij.”—Jon 5:28, 29.
6 Ke ien kememe Kwojkwoj eo ilo yiõ in ej ebaktok, bõk ien ñan keboj buruõm kin ien in eaorõk. (2 Kron. 19:3) Kalmenlokjen kin karõk eo ejej uan ñan read Bible ilo ien Kwojkwoj eo, me rej kõlajrake ilo Examining the Scriptures Daily—2004 im ion 2004 Calendar eo. Jet rej mõnõnõ in eliji katak 112-16 ilo Greatest Man (Armij eo Elaptata) book eo ilo ien eo rej katak Bible einwõt juõn family. Ro jet rej kõmman research ilo air kajerbal book in katak ko jet letok in class in ri karejar eo etiljek im meletlet. (Mat. 24:45-47) Kij aolep jemaroñ kõmman bwe jen konono kake men in letok in kin binmour eo ilo jar ko ad. (Sam 50:14, 23) Aet, ilo ien Kwojkwoj in Kememej in, jen wõnmanlok im kalmenlokjen kin yokwe eo an Jehovah ñan kij im bukõt wãwen ko ñan kwalok ad yokwe ñan e.—Mark 12:30; 1 Jon 4:10.