Program eo Ekãl kin Ran in Special Assembly eo
Elañe jej lo ak roñ juõn kakkõl kin juõn jorrãn ej itok ak jejjab bokake, emaroñ walok ilo juõn jorrãn elap. Elaplok an aorõk ñan ad lor nan in tel ko Jehovah ej litoki kin men ko lor jitõb. Men in renaj kalikar kake ilo program in ran in special assembly eo ilo yiõ in jerbal in tok. Unin tel eo ej “Komin Lale Kijkan Ami Roñjake.”—Luk 8:18.
Ilo katak eo an moktata, ri lotok eo enaj etale ekijkan nan in kakabilek eo ilo katak ko jinoin ilo letter eo an Paul kakõrmolin Anij ñan Ri Hebrew ro ej jerbal ñan kij rainin. Ilo katak eo an eliktata, “Kwon Kejbãrok Am Eoroñ Nan in Jiroñ ko Rekwojarjar,” enaj jibañ aolep ñan etale elañe emol air eoroñ Jehovah, Nejin, im “dri korijer e tiljek im meletlet.”—Mat. 24:45.
Jet mõttan ko ilo program eo elaptata an kar eiki ñan tokjen eo an family ko. “Family ko Me Rej Roñjake Nan in Anij ilo Ejelok Jabdewõt Men Ej Kamad Ir” enaj jibañ kij ñan kejbãrok bwe men ko an lal in ren jab kautameik mour in jitõb eo ad. Enaj koba interview ko an ro rar kõmman oktak ko ñan likit bwe men ko lor jitõb en moktata ilo air mour. “Ewi Wãwen Eoroñ Nan in Anij Ej Kakajur Jodikdik Ro Nejid” enaj koba interview ko an jodikdik ro me rar jutak bin kin mol eo ilo school, ibben ro mõttair, ak ilo jerbal in kwalok nan. “Ajiri Ro Redik Me Rej Bokake Anij im Katak” enaj jibañ kij ñan jab kajettokjen maroñ eo an ro redik ñan katak. Interview ko ibben ro redik im jemeir im jineir renaj jibañ kij ñan lo tokjen ko rej walok jen air katakin ajiri ro jen ien rej niñniñ ilo ial ko an Jehovah.
Ke Satan “ej moni aolepen lõl,” Jehovah ej bakajen ial eo me ri karejar ro an retiljek ren etetal ie. (Rev. 12:9; Ais. 30:21) Ilo ad eoroñ nan in kakabilek ko an im tiljek in jerbale ilo ad mour enaj kõmman bwe jen meletlet, enaj kamõnõnõik kij, im tel kij ñan mour indio.—Ken. 8:32-35.