Kwalok Nan ñan Ro Nukid—Ewi Wãwen?
1 Lañliñ eo ad elaptata ej ñan deloñ ilo lal eo ekãl ibben ro rejitenburu ibbed, im ilo ad burukuk ibben don ilo ad kabuñ ñan Jehovah! Ilo ad kwalok nan ñan ro nukid, kejatdikdik in ekalañliñ emaroñ mol an walok. Bõtab, ñan kõmmane ilo juõn wãwen ekaemololo ej aikwij ad kwalok lolokjen. Juõn circuit overseer ear lo: “Tokjen ko remõntata rej walok ñan ro rej kwalok nan jen ien ñan ien ñan ro nukiir kin men ko rej kaitoklimoiir.” Ewi wãwen jemaroñ kõmmane men in?
2 Kaitoklimoiir: Kwoj aikwij lukkun lemnak kin ewi wãwen kwomaroñ kaitoklimoen ro nukõm. (Ken. 15:28) Ta men ko rej inebata kaki? Ta abañ ko rej iioni? Bõlen kwomaroñ kwalok juõn katak ak juõn eon kin men eo rej itoklimo kake. Elañe ro nukõm rej jokwe ilo juõn jikin etolok, bõlen kwomaroñ kõmmane men in ilo am je juõn letter ak telephone lok ñan ir. Ilo an jab lap am kõmmane, kalbwini ine ko in mol eo, im reilok ñan Jehovah ñan kõmman bwe ine kein ren eddeklok.—1 Kor. 3:6.
3 Jesus ear jiroñ juõn emaan eo ear kajutaklok elõñ demon ro jen e: “Kwon ilok ñõn mweo imõm iben ro nukum, im kennanek ir men ko relap an Iroij kõmõni ñõn yuk.” (Mark 5:19) Lemnak kin ewi wãwen men in enaj kar kabwilõñ ro nukin! Meñe kwar jab iion juõn men in kabwilõñlõñ einwõt in, ekkã an ro nukõm itoklimo kin makitkit ko am im ko an ro nejõm. Ilo am konono kin juõn katak kwar kwaloke ilo Theocratic Ministry School, am kar bed ilo juõn convention, lolok eo am ñan Bethel, ak juõn men eaorõk ear walok ilo mour eo am men in emaroñ kabellok juõn ial bwe kwon maroñ kwalok kin Jehovah im dolul eo an.
4 Kwon Kwalok Lolokjen: Ñe kwoj kwalok nan ñan ro nukõm, en jab lap am kwalok ñan ir. Ilo an kememej ien eo ke ear jino katak Bible, juõn brother ear kamol: “Iumin elõñ awa iar kameleleik jinõ kin aolep men ko iar katak ilo Bible, im ekkã an tellok ñan akwel ko, elaptata ibben jema.” Meñe juõn nukõm ej kwalok an itoklimo kin ennan eo ilo Bible, uak ilo juõn wãwen me enaj kõnan kalaplok wõt an jelã. (Ken. 25:7) Ien otemjej kwon kwalok am kautiej, joij, im meanwõd, einwõt kwonaj kar kõmmane ñe kwar konono ibben ro kwo jaje kajjiir ilo jerbal in kwalok nan.—Kol. 4:6.
5 Juõn ien, ro nukin Jesus rar lemnak bwe ear wudiekek. (Mark 3:21) Bõtab, tokelik, jet rar erom ri tõmak ro. (Jerbal 1:14) Elañe ro nukõm rejjab mõnõnõ kin jibadbad ko am ilo jinoin ñan kwalok mol eo ibbeir, kwon jab ebwer. Wãwen ko im lemnak ko air remaroñ oktak. Wõnmanlok im bukõt bar juõn ien emõn ñan kwalok juõn point me enaj kaitoklimoiir. Kwomaroñ lo lañliñ eo ñan jibañ ir ñan jino air etetal ilo ial eo ej tellok ñan mour indio.—Mat. 7:13, 14.
[Kajjitõk ko]
1. Etke jej aikwij kwalok lolokjen ñe jej kwalok nan ñan ro nukid?
2. Ewi wãwen itoklimo eo ad emol kin ro nukid emaroñ jibañ kij kaitoklimoiir kin mol eo?
3. Ewi wãwen itoklimo eo an ro nukid kin kij emaroñ kabellok juõn ial ñan ad kwalok nan ñan ir?
4. Ta aujid ko jej aikwij bõprae ñe jej kwalok nan ñan ro nukid?
5. Ta eo jen kõmmane elañe ro nukid rejjab mõnõnõ in roñjake ñe jej kwalok nan ñan ir?