Schedule in Family eo—Kwelok ko an Congregation eo
1 Elañe kwoj juõn Christian jemen ak jinen, kwokõnan bwe ro nejõm ren rittolok im yokwe im karejar ñan Jehovah im, eliktata, bõk mour indio ilo lal eo ekãl Anij ear kallimur kake. Ewi wãwen kwomaroñ likit bwe kabuñ ñan Jehovah en moktata ilo air mour? Juõn wãwen elap ej ikijen joñok eo am. (Ken. 20:7) Ilo an kememej kin joñok eo an jinen eo ej juõn Ri Kennan, juõn sister ear ba: “Ear ejelok kajitõk elañe kim naj kar etal ñan kwelok eo ke ak jab.” Men in ear lukkun jelet buruen.
2 Family eo am e melele ke kin unin kwelok ko an congregation eo? Nan in katak ko jej bõki ilo kwelok kein rej kakajur kij ñan wõnmanlok im kõmanman ankil an Anij, im kamao eo jej lañliñ kake ibben ro jeid im jatid elap an kõketak kij. (Ais. 54:13; Rom 1:11, 12) Bõtab, un eo elaptata unin kwelok kein ej ñan nebar Jehovah “ilo jar ko.” (Sam 26:12) Kwelok ko an Christian rej letok ñan kij ien ko remõn ñan kwalok yokwe eo ad ñan Jehovah im ñan kabuñ ñan e.
3 “Komin Kanuij Lale”: Kamolol kin un eo ekwojarjar unin kwelok ko ad enaj kamakit kij ñan “kanuij lale” bwe jen jab kõmman bwe en juõn manit ibbed ñan jako jen kwelok ko ñan lale men ko ediklok tokjeir. (Ep. 5:15, 16; Hib. 10:24, 25) Ñe kwoj kõmmane schedule in family eo am, kwomaroñ jino ilo am kakõlleik ien kwelok ko an congregation eo. Inem lale bwe kwon jab kõtlok bwe makitkit ko jet ren kautameiki. Kõmman bwe bed ilo kwelok ko en aorõktata ibben family eo am.
4 Ejjab jelet ke buruõd ñe jej konono kin wãwen an ro jeid im jatid anjo ion abañ ko ñan bed ilo kwelok ko im assembly ko? Meñe wãwen ko ibbam rejjab lap, kwe bareinwõt kwoj jelmae abañ ko. Satan ej kõmman bwe en binlok an armij ro an Anij kabuñ ñan Jehovah. Ak, kwomaroñ liki bwe ro nejõm renaj lo jibadbad ko rebin an family eo ñan bed ilo kwelok ko an congregation eo. Emol, ilo am kõmmane, kwomaroñ lelok ñan ir juõn men in lelok ilo jitõb me rejamin meloklok.