Schedule in Family eo—Kwalok Nan Einwõt juõn Family
1 Emõnõnõ Jehovah ñe ej lo an ro redik nebar etan. (Sam 148:12, 13) Ilo ran ko an Jesus bar ‘niñniñ ro rej nebar’ Anij. (Mat. 21:15, 16) Ejja men in wõt ej walok rainin. Ro jemen im jinen, ewi wãwen kom maroñ jibañ ro nejimi bwe ren erom ro rekijejeto rej kaibujuij Jehovah ilo jerbal in kwalok nan eo an Christian? Bar juõn alen, einwõt kar kalikare ilo katak eo ilõñ kin kwelok ko an congregation eo, men eo eaorõktata ej joñok eo ami. Juõn jemen ear kwalok lemnak eo an enañin aolep ro jemen im jinen ke ear ba: “Ajiri ro rejjab kõmmane men eo kwoj ba; rej kõmmane men eo kwoj kõmmane!”
2 Juõn sister me jemen im jinen rej ro remijak Anij ear kememej: “Kimar jab ruj ilo jibboñ in Saturday im kajitõk elañe kimnaj kwalok nan. Kimar jelã kimnaj etal.” Eindeinlok wõt, kwomaroñ kaddek ilo buruen ro nejõm juõn kamolol kin aorõkin jerbal in kwalok nan ilo am kamineneik ir ñan kwalok nan einwõt juõn family kajjojo week. Men in ejamin kõtlok bwe ro nejõm ren katak wõt jen air lale joñok eo am ak ej bareinwõt kamaroñ yuk ñan lale lemnak ko air, mwiliir, im kabel ko air.
3 Katakin Ir Jidik kin Jidik: Bwe ajiri ro ren lañliñ ñan kwalok nan, rej aikwij bojak in bõk kunair. Sister eo me kar eliji nan ko an mokta ear bareinwõt ba: “Kimar jab baj lor wõt jemem im jinem ilo jerbal eo air. Kimar jelã bwe enaj wõr kunam, meñe ear baj ñan kallallal wõt im likit juõn peba in kir. Ilo am kebojak mokta jen kajjojo ien kwalok nan, kimar jelã ta eo kim naj ba.” Kwomaroñ lelok kaminene rot in ñan ro nejõm ilo am bõk jidik ien kajjojo week ñan keboj ir ñan jerbal in kwalok nan, ilo ien katak in family eo ak ilo bar juõn ien.
4 Kwalok nan ibben don einwõt juõn family ej lewõj bar juõn ien emõn ñan kadeloñ mol eo ilo buruen ro nejõm. Juõn Christian jemen ear bõk ledik eo nejin ke ear etetal jiljino mile ñan leto-letak tract ko ñan ro rej jokwe ilo bar juõn bukwon. “Kar ilo ien etetal kein,” lio ej kememej, “jema ear kadeloñ mol eo ilo buruõ.” (Dut. 6:7) Jehovah en kajerammõn yuk kin am kõmman bwe jerbal in kwalok nan en mõttan schedule in family eo am kajjojo week.