Jibadõk Elõñ Armij Ro Joñan Wõt Ad Maroñ
1. Ta eo Ri Christian ro jinoin rar kõmmane ñan air tõbar elõñ armij joñan wõt air maroñ kin news eo emõn?
1 Ri kalor ro an Jesus jinoin rar kate ir kajededlok ennan in Ailiñ eo. Rar kajerbal wãwen ko rekeie ñan kõmman bwe news eo emõn en bellok ñan elõñ armij. Christian ri jeje Bible ro rar je book ko air rekakõrmol an Anij ilo kajin Greek, kajin eo me jarlepju in armij ro rar kajerbale, kajin eo an aolepen jukjuk im bed eo an Ri Rome. Bareinwõt, ri kwalok ro rekijejeto ilo ebeben eo kein karuo im jilu C.E. rar jino kajerbal codex (book eo rar je ion bwilik ko) eo, me ear bidodolok kajerbale jen booklemlem eo ñan bukõte eon ko rar jitõñlok ñani.
2, 3. (a) Ewi wãwen Aiseia 60:16 ej jejjet kitien ilo ran kein? (b) Ewi wãwen rej kajerbal men in ellolo ko ilo ran kein ñan kowõnmanlok kabuñ eo erreo?
2 Kajerbal Men in Ellolo ko ilo Ran Kein: Ikijen ri kanan Isaiah, Jehovah ear kanan: “Kwo naj ninnin milk an ro dri ailiñ ko.” (Ais. 60:16) Ilo an jejjet kitien kanan in ilo ran kein, ro ri karejaran Jehovah rej kortokjen kein jerbal ko raorõk jen ailiñ ko ñan kowõnmanlok jerbal in kwalok nan. Ñan wanjoñok, ilo 1914, elõñ yiõ ko mokta jen an walok movie ko elõñ ainikeir, Ri Katak Bible ro rar jino kwalok “Photo-Drama of Creation.” Pija makitkit in ralitõk awa aetokin, me e color im ewõr ainikien, ear juõn kein kennan ekajur ñan elõñ million armij.
3 Rainin, armij ro an Anij rej kortokjen kein jeje ko remõkaj im kein jerbal ko rej kajerbal computer ko ñan jeje Bible ko im book in Bible ko ilo elõñ buki kajin ko. Kein bõkto-bõktak mweiuk ko remõkaj rej jilkinlok book in Bible ko ñan mõttan ko retolok tata ilo lal in, im tõbar armij ro ilo 235 ailiñ ko. Ikijen jitõb eo an, Jehovah ear kamakit ri karejar ro an ñan air kortokjen ilo keie men in ellolo kein, im kõmman bwe mol ko ilo Bible ren bellok ñan elõñlok armij ro jen jabdewõt ien mokta ilo bwebwenato ko an lal.
4. Ta oktak ko jet rar kõmmani ilo mour ko air bwe ren maroñ jibadõk elõñlok armij kin news eo emõn?
4 Oktak ko Air Make: Ri kabuñ ro remol rar bareinwõt kõmman oktak ko ilo mour eo air make ñan jibadõk elõñlok armij kin news eo emõn. Elõñ rar kõmman bwe en lamwan wãwen mour ko air bwe ren maroñ kalaplok ijo kunair ilo jerbal in kwalok nan. Jet rar emmakit ñan air jerbal ilo jikin ko elaplok air aikwij ri keañ ro kin Ailiñ eo. Ro jet rar kalaplok jerbal in kwalok nan eo air ilo air katak bar juõn kajin.
5, 6. Ta eo jemaroñ kõmmane ñan tõbar elõñ armij joñan wõt ad maroñ ilo territory eo ilo bukwon eo?
5 Bareinwõt, jemaroñ tõbar elõñlok armij kin news eo emõn ilo ad kwalok nan ñe armij ro rej bed ilo moko imwiir im ijo jemaroñ lo armij ro ie. Elañe ekkã an armij ro jako ilo ran jen moko imwiir ilo territory eo am, kwomaroñ ke ukõt schedule eo am ñan am kwalok nan ilo jota? Ewõr ke jikin ko ilobwilij kwomaroñ kwalok nan ie? Kwonañin ke kar kajeoñ kwalok nan ikijen kajerbal telephone im jerbal ilo jikin business ko? Kwoj bukõt ke ien ko remõn ñan am kwalok nan ilo jabdewõt ien emõn tok?
6 Elap ad jerammõn bwe ewõr kunad ilo kennan eo elap kin etan Jehovah im Ailiñ eo an! Jen wõnmanlok im bõkto-bõktak mol eo ej letok mour jen Nan eo an Anij ñan elõñ armij ro joñan wõt ad maroñ.—Mat. 28:19, 20.