Kaddek Manit ko Remõn Ilo Jitõb, Madmõd Elõñ Jerammõn Ko
1. Etke eaorõk ñan am etale manit eo am ilo jitõb?
1 Ke kwar jino erom juõn Christian, kwar kate yuk ñan am kaddek juõn manit emõn kin makitkit ko ilo jitõb me ekoba katak Bible, kwelok ko an Christian, jerbal in kwalok nan, im jar. Im ikijen kajerammõn eo jen Jehovah kin kate eo am, kõtan eo am ibben Jehovah ear ebaklok. Bõlen kiõ emwij an motlok elõñ yiõ ko jen ien eo kwar baptaise. Kwoj kejbãrok wõt ke juõn manit emõn kin men ko lor jitõb me kwar kaddeki ke kwar erom juõn Christian?
2. Ewi wãwen jej bõk tokjen jen ad konono Bible kajjojo ran?
2 Etale Manit eo Am: Ej ke am manit ñan read juõn mõttan in Nan eo an Anij kajjojo ran? Jej bõk elap jerammõn ñe jej kõmman eindein! (Josh. 1:8; Sam. 1:2, 3) Ilo Israel eo etto, kajjojo king ear aikwij konono jen copy eo an make in Kien eo “ran otemjej in mour eo an.” Kin ta tokjen ko? Enaj kaddek juõn buru ettã im katak ñan mijak Jehovah bwe en jab ellok jen kien ko An. (Dut. 17:18-20) Eindein ilo rainin, read Bible kajjojo ran ej jibañ kij ñan an ejelok notad im ruõd iolapen jukjuk im bed in enana im bõt. Ej bareinwõt jibañ kij ñan ad bojak in kõmman jerbal in kwalok nan eo ad.—Pil. 2:15; 2 Tim. 3:17.
3. Ta jerammõn ko jej bõki jen ad bed ilo kwelok ko kajjojo?
3 Kar juõn an Jesus manit ñan an etal ñan imõn kwelok eo, ijo rej konono kin Jeje ko. (Luk 4:16) Ejelok bere bwe menin ear jibañ e ñan an jelmae abañ ko ear bojak in eñtan kaki. Kij bareinwõt jej bõk kakajur jen nan in jiroñ ko ilo jitõb me rej walok ilo kwelok ko an congregation eo im ibben don ko rej “jibañ dron.” (Rom. 1:12) Koba ibben ro jeid im jatid ej jibañ kij ñan ad kijenmij wõt iumin “melejoñ ko” rebin ilo ran kein eliktata. (Hib. 10:24, 25) Ej manit eo am in wõt ke ñan am bed ilo kwelok ko?
4. Ewi wãwen jej bõk tokjen jen ad bõk kunad ilo jerbal in kwalok nan ilo kajjojo week?
4 Bwebwenato ko ilo Bible rej jiroñ kij bwe ri jilek ro rar bõk kunair ilo air kennan kin news eo emõn “ran otemjej iloan temple kab ilo moko imõn armij.” (Jerb. 5:42) Meñe jejjab maroñ kwalok aolep ran, jemaroñ ke kõmman bwe en ad manit ñan ad bõk kunad ilo wãwen ko jet ilo jerbal in kwalok nan kajjojo week? Ilo ad kõmmane menin, emol enaj laplok kabel eo ad ñan kajerbal Nan in Anij, im emol jenaj lo elõñ bwebwenato ko remõn ilo ad kwalok kin mol eo ilo Bible ibben ro jet.
5. Etke elap an aorõk ñan ad jar ñan Jehovah ien otemjej?
5 Ri kanan eo Daniel ear bõk elap jerammõn ilo an karejar ñan Jehovah ilo “tiljek” ilo aolepen mour eo an. Menin ear kitibuj manit eo ñan an jar ñan Jehovah ien otemjej. (Dan. 6:10, 16, 20) Eindein bareinwõt, ilo ad ekkeini ad oktaklok ñan Jehovah ilo jar kin buru eyu, enaj letok ñan kij jitõb kwojarjar eo an. (Luk 11:9-13) Elaplok jen menin, Jehovah enaj uak ilo an karuaklok kij ñan e, kõtlok bwe jen mõnõnõ kin juõn kõtan elukkun ebake. (Sam. 25:14; Jem. 4:8) Juõn wõnãn elap! Kin menin, jen niknik ilo ad kejbãrok manit ko remõn ilo jitõb im madmõd elõñ jerammõn ko jen Jehovah.