Aolep Remaroñ Bõk Kunair ñan Kõmman Ri Kalor Ro Rekãl
1 Juõn ri kalor ekãl ejjab walok jen jerbal an juõn wot armij. Jehovah emaroñ kajerbal aolep “dri jerbal” ro mõttan ñan jibañ ro rej katak Bible ñan air rittolok ilo jitõb. (1 Kor. 3:6-9) Kij kajjojo jejjab jibañ ro rekãl wõt ilo kwelok ko an congregation ñe jej kwalok uak ko jen buruõd ak bareinwõt ikijen mwil eo emõn mwilid, me rej kwalok bwe jitõb eo an Anij ej jelet mour eo ad. (Jon. 13:35; Gal. 5:22, 23; Ep. 4:22, 23) Bar ta men ko jemaroñ kõmmani ñan jibañ ro rekãl?
2 Einwõt juõn Congregation: Kij aolep jemaroñ kwalok ad itoklimo kin ro rej jino kwelok ikijen ad bok eddo eo mokta im karuwaineneik ir ilo mãnãn im bwebwenato ibbeir mokta im elikin kwelok eo. Ilo an kalmenlokjen kin ien eo moktata ear ion ro uan congregation eo, juõn emaan ear ba: “Ilo juõn wõt ran iar iion elõñlok armij ro remol im rejoij jen ro ilo kabuñ eo aõ mokta. Ear lukkun alikar ibba bwe iar lo mol eo.” Elikin jiljilimjuõn alliñ ko jen ien an jino kwelok ear baptaise.
3 Lelok nan in nebar ñe juõn ri katak Bible ej wõnmanlok ilo jitõb. Ej kijenmij ke iumin matõrtõr? Ej ekkeini ke an bed ilo kwelok ko? Ear ke kate kaberan e make ñan uak? Emwij ke an kadeloñ etan ilo Theocratic Ministry School eo ak jino bok kunan ilo jerbal in kwalok nan? Jen nebar e kin an wõnmanlok. Men in enaj kaemololo im kakajur e.—Ken. 25:11.
4 Einwõt juõn Ri Katakin Bible: Jet ri kwalok ro rar maroñ lo tõbrak ilo air jibañ ri katak Bible ro air ñan jelã kajjen ro ilo congregation eo ikijen air kirtok ri kwalok ro jet ñan air bed ilo ien katak eo. Rejañ ri katak eo ñan an bed ilo kwelok ko an congregation eo ilo mõkaj. Ñe ej jino bed ilo kwelok ko, kwon ãñinlok e ñan ro jet bwe ren jelã kajjen. Ej kate ke ñan bok anjo ion juõn manit etton, einwõt kõbatat? Juõn ian ri mweo imõn ej ke jumae an katak? Emaroñ bõk tokjen ilo an bwebwenato ibben juõn ri kwalok me ear jelmae ejja kain manit rot eo wõt im anjo ion.—1 Pit. 5:9.
5 Ro rekãl rej aikwij bõk rejetak ilo jitõb jen congregation eo. Kij aolep jemaroñ jibañ ir ñan wõnmanlok ilo ad kwalok itoklimo eo emol kin kajjojo iair.