Kõmman Bwe En Am Mejenkajjik ñan Jino juõn Bible Study
1 “Komin reilok im lale jikin kallib ko; rekalo kiõ, tõren madmid.” (John 4:35) Nan kein an Jesus Christ relukkun ekkar ñan wãwen ko Ri Christian ro rej jelmae rainin.
2 Ej wõr wõt armij ro emol burueir me rej kõnan katak kin ial ko an Jehovah. Menin ej alikar kin oran ri kalor ro rej baptais kajjojo yiõ. Elañe kwolukkun itoklimoõm in kõmman juõn Bible study, ta eo kwomaroñ kõmmane?
3 Likit juõn Mejenkajjik: Mokta, likit juõn mejenkajjik ñan jino im kõmman juõn Bible study. Ilo ien jerbal in kwalok nan kwon lemnak kin mejenkajjik eo am. Kinke jerbal eo emwij letok ñan kij einwõt Ri Christian ro ej kitibuj katakin, im bareinwõt kwalok, kij aolep jej aikwij kabukõt kilen ñan kalaplok ijo kunad ilo jerbal in kõmman Bible study.—Matu 24:14; 28:19, 20.
4 Lemnak kin Point ko Jet: Jar jen buru ej juõn aikwij ñan ri kwalok ro kin Ailiñ eo. Jet ien jej lo bwe armij ro rar jar kin jibañ ñan air jelã Anij ak melele kin Bible eo. Ej juõn jerammõn elap bwe Jehovah ej kajerbal kij ñan kabukõt im katakin rein!—Hag. 2:7; Jerb. 10:1, 2.
5 Juõn sister ear jar kin juõn Bible study inem lak mwij ear likiti ilo jikin jerbal eo an copy ko kin tract eo Kwokõnan Ke Kalaplok Am Melele Kin Bible Eo? Ke juõn kõrã ear bõk juõn ian tract ko im readi aolepen, im jino an kanne kobban coupon eo (Box in kajitõk kin book ko ilo tulikin book eo), sister eo ear kennan ibben im ear maroñ jino juõn Bible study.
6 Ri kwalok ro mõttam me rekeie ilo ijjino im kõmman Bible study ko remaroñ jibañ yuk ñan tõbar mejenkajjik eo am ñan kõmman juõn Bible study. Jar ñan Anij kin jibadbad ko am ñan lo juõn Bible study, im kortokjen aolep kein jibañ ko rebellok ñan am tõbar mejenkajjik in. Bõlen ejjab to jen kiõ kwonaj lo lañliñ eo kin kõmman juõn Bible study.