Family eo Am ej Kebojak ke ñan an Ellã im Mour?
1 Kanan ko rar jejjet kitieir ilo Bible rej letok kein kamol eo bwe mõttan jidik lal in enana enaj jako. Jej kiõ mour ilo ien ko renana me elukkun einlok wõt ien ko mokta jen Ibwijleplep eo. (Mat. 24:37-39)Noah ear ellã jen kokkure eo an lal eo mokta kinke ear “etetal iben Anij.” (Jen. 6:9) Noah ear katakin family eo an kin kien ko an Jehovah kinke ir bareinwõt rar bõk lomor. Ilo wãwen et eo jemaroñ anõk Noah im kebojak einwõt juõn family ñan ellã im mour jen jukjuk im bed in enana?
2 Dri Kwalok Ekwojarjar: Noah ear kijenmij iumin 40 ñan 50 yiõ ko einwõt juõn “dri kwalok ekwojarjar.” (2 Pit. 2:5) Ro ri turin, meñe remaroñ kar bed iumin kilan ko an enjel ro renana ak jab, rar kajirere kake e kin an kwalok nan. Ekkã an armij ro jab kea im rej kajirere kin jerbal in kwalok nan eo ad, im men in ej kamol bwe jukjuk im bed in ebak an jako. (2 Pit. 3:3, 4) Meñe eindein, elõñ armij rej mõnõnõ kin jerbal ko ad im rej roñjake kij im “ibweptok” ñan kabuñ eo an Jehovah, im jab einwõt armij ro ilo ran ko an Noah. (Ais. 2:2) Ñe jej kate im kijenmij wõt, jenaj ‘mõke lomoren kij, kab ro rej roñjake kij.’ (1 Tim. 4:16) Men in elap an aorõk ñan ro jemen im jinen bwe ren katakin ro nejiir kin aorõkin jerbal in kwalok nan ilo nan im joñok jimor!—2 Tim. 4:2.
3 “Ein drein” Ear Kõmman: Lomor eo an Noah im family eo an ear wawa ion air lukkun lore nan in jiroñ ko an Jehovah. (Jen. 6:22) Bareinwõt eaorõk ñan kij rainin ñan “bojak ñan bokake” aolep nan in kakabilek ko jen Bible eo im jen ri karejar etiljek im meletlet. (Jem. 3:17, New World Translation) Juõn jemen ear lor nan in kakabilek eo jen dolul eo an Jehovah. Ñan wanjoñok, ear katak ibben family eo an kajjojo week im ear karõk ñan bõk family eo an ilo jerbal in kwalok nan aolep Saturday im Sunday. Ear kate ñan jerbal ibben juõn ian ajiri ro nejin ilo aolep kajjojo week ilo jerbal in kwalok nan. An tiljek in kõmman “ein drein” ear lukkun jelet ajiri ro jiljino nejin, im aolepeir rar rittolok im erom ri karejar ro retiljek an Jehovah.
4 Jemlokin lal in enaj itok ilo jidimkij. (Luk 12:40) Ilo ad anõk Noah im jerbale tõmak bwe jen ellã im mour, kij im family ko ad renaj bojak!—Hib. 11:7.