Kebojak Lok Iman Ej Menin Aikwij eo ñan Kõmman Bar Jeblak ko ilo Bolemen
1. Ilo wãwen et eo jerbal in kwalok nan enaj kar jededlok?
1 Ear let an Jesus keboj ri kalor ro an bwe ren ri kwalok ro rebolemen kin “gospel an ailiñ in lõñ.” (Mat. 4:23; 9:35) Ilo ien eo Jesus ear katakin ir, jerbal in kwalok nan eo ear walok wõt ilo Palestine. Bõtab, mokta jen an kar wanliñlok ñan lañ, Jesus ear kwalok bwe jerbal in kwalok nan eo an Ri Christian enaj kar jededlok bwe ren maroñ “kõmõn dri ailiñ ko otemjej bwe ren dri kalora.”—Mat. 28:19, 20.
2. Ta eo ej koba ilo ad bokake kien eo an Jesus ‘ñan kõmman ri kalor ro’?
2 Jerbal eo enaj kar koba bar jeblak ibben ro rar kwalok air itoklimo kin news eo emõn kin Ailiñ eo an Anij im katakin ir ñan bokake aolep men ko Christ ear kakien ir. Ñan kõmman bar jeblak ko ilo bolemen, jej aikwij lukkun bojak.
3. Ewi wãwen kwomaroñ kabellok juõn ial ñan bar jeblak ilo lolok eo moktata?
3 Bebe lok Iman: Jet ri kwalok ro rej kate ir ñan kwalok juõn kajitõk ilo jemlokin lolok eo moktata, inem kallimur ñan bar jeblak im bwebwenato kin uak eo. Rar lo bwe ilo air bwebwenato kin jet ian melele ko jen Jelãlokjen book eo ilo ien eo rej bar jeblak, men in ear kõmman bwe en bidodo air jino katak kin Bible eo.
4. Etke jejjab aikwij kõttar an itok magazine ko rekãl mokta jen ad bar jeblak ibben armij ro?
4 Meñe ewõr ruo wõt magazine ko kajjojo alliñ, ejjab melelen bwe jej aikwij kõttar mae ien ej itok magazine ko rekãl mokta jen ad bar jeblak. Jemaroñ kaitoklimoen ri mweo ilo ad bwebwenato kin kamelele ko rej walok ilo magazine eo emwij ad kar lelok ñan ir.
5. Etke ej aorõk bwe en wõr ad mejenkajjik?
5 En Wõr juõn Mejenkajjik: Mokta jen am bar jeblak, bõk jejjo minute ko ñan lale record ko am im bebe kin ta eo kwo kõnan kõtõbrake. Ñan wanjoñok, kwomaroñ bwebwenato kin juõn katak jen book eo kwar likiti ibbeir moktalok. Ak kwomaroñ likit book ko jet me rej ekkejellok ñan men eo kom ar bwebwenato kake mokta. Elañe kwar kwalok juõn kajitõk ilo ien eo mokta, mejenkajjik eo am enaj koba am uake kajitõk eo. Ñe kwoj kwalok juõn eon me ej kamol melele eo kwoj konono kake, kwon readi jen Bible eo.
6. Ta mejenkajjik eo ad ñe jej jeblak ibben armij ro?
6 Mejenkajjik Eo Ad: Emol, mejenkajjik eo ad ej ñan katak Bible ibben armij ro. Juõn brother ear kajitõk ñan katak kin Bible eo ibben juõn emaan ke ear jeblak ibben, ak leo ear makoko. Brother eo ear bar jeblak kin magazine ko rekãl im ear ba, “Ilo tõre in ke kimij bed ijin, kimij mõnõnõ in uake juõn kajitõk jen armij kin Bible eo.” Elikin an leo kwalok kajitõk eo an, brother eo ear readi juõn eon im juõn paragraph jen juõn book rej kajerbale ñan katak Bible ibben armij ro. Men in ear tellok an leo keini an katak kin Bible eo ibben brother eo.
7 Elap tokjen bwe jen bõk ien ñan kebojak ñan jeblak ibben armij ro. Lañliñ eo ad enaj laplok, im jemaroñ bõk jerammõn eo ñan jibañ juõn armij ettã buruen ñan etetal ilo ial eo ñan mour.—Jerb. 13:48.
7. Ewi wãwen kebojak ilo emõn ear jibañ yuk ñan jino katak Bible ibben armij ro?