Jelmaik Abañ eo kin Kwalok Nan ñon Lõmaro
1. Ta aikwij eo elap ej ber ñõn kejbãrok men ko kin Ailiñ eo?
1 Ke jerbal in kin Ailiñ eo ej laplok wõt ilo ran kein eliktata, eor juõn aikwij elap kin lõmaro im re ridto ilo tõmak bwe ren tel. (Mark 4:30-32; Jerb. 20:28; 1 Tim. 3:1-13) Bõtab, ilo jet jikin ko eietlok man ro rej reel kin Ailiñ eo jen kõra ro. Ilo jet ailiñ ko, lõmaro rej lelok erro ñõn limaro beleir bwe ren katakin ajiri ro nejiir kin Anij kab kin men ko lor jitõb. Ewi wãwen jemaroñ rejañ lõmaro bwe ren koba iber im kabuñ ilo mol im kile air aikwiji men ko lor jitõb?
2. Ta tõbrõk ko remõn Paul im Piter rar loi ke rar kwalok nan iben lõmaro?
2 Kabukot Lõmaro: Ñe leo bõran juõn baamle ej bõk mol eo, ekkã an naj jelet ro jet ilo baamle eo an bwe ren koba iben ilo kabuñ eo emol. Ñõn wanjoñok, ke rar ber ilo prisõn kin air kwalok nan, Paul im Sailas rar kennan iben eo ej lale prisõn eo. Lein im aolep ro nukin rar baptais. (Jerb. 16:25-34) Tokjen an Paul kwalok nan ilo Korint, “Krispõs, iroij eo an imõn kwelok, ej liki Iroij, kab ro nukin otemjej.” (Jerb. 18:8) Jeova ear kajerbal Piter bwe en kennan iben Korniliõs, juõn kapen in jarin tõrinae, eo “emõn mwilin, im e mijõk Anij.” Korniliõs, koba iben ro nukin im ro jeran rar baptais.—Jerb. 10:1-48.
3. Ñõn kajeoñwe Pilip, wõn ro “reutiej” kwo maroñ kwalok nan iben?
3 Ar kennan ñõn lõmaro “reutiej im kajur” emaroñ jelet elõñ. (1 Tim. 2:1, 2) Ñõn wanjoñok, enjel eo an Jeova ear kakabilek Pilip “juõn armij im eutiej” eo ear lale mweien otemjej iben leroij in Itiopia. Pilip ear roñ an lein “konono ilo buk in dri kanan Aisaia” im ear kemeleleik e gospel eo kin Jisõs. Dri Itiopia in ear erom juõn dri kalor im alikar ear kwalok nan kin gospel ke ear rol ñõn ailiñ eo an. Emaroñ kar kennan iben leroij eo im ro mõtõn, ro im en kar bin kwalok gospel eo ñõn ir.—Jerb. 8:26-39
4. Ewi wãwen jemaroñ kalaplok ien ñõn lõmaro bwe ren roñ nan eo emõn?
4 Kõtõbar Lõmaro Jet: Ke ekkã an lõmaro ber ilo jikin jerbal ko air ilo ran, kwomaroñ ke karõk ien am kwalok nan ilo jota, Jãdede im Jabõt, ak ilo ran in kakije ko? Am ekkeini am kwalok nan ilo mon wia ko ak jikin jerbal ko emaroñ kebellok ien ñõn am kennan iben lõmaro me ekkã air joko jen moko imweir. Lõmaro jeer im jãter remaroñ bar kate ir im kennan iben lõmaro dri jerbal ro mõtair ilo ien air kakije. Ilo air kwalok nan jen im ñõn im, elaptata ilo jikin ko ekkã air jerbal ie, lõmaro jeer im jãter remaroñ konono iben leo imweo.
5. Jeer im jãter kõra en it ñe ej ion juõn eman im ej kwalok an itoklimo kin ennan eo kin Ailiñ eo?
5 Jeer im jãter kõra im ej iion juõn eman eor an itoklimo kin mol eo, en jab jeblak mõkelok ian. Emõn bwe en añinlok leo belen ak bar juõn dri kwalok iben. Ilo an leo wõnmanlok wõt, emõnlok leloke ñõn juõn eridto ilo jitõb bwe en katak iben.
6. Ewi wãwen jemaroñ anõke dri jilik Paul ‘bwe en lõñ armij jej jibareki’?
6 Kãlet Katak ko Rej Kaitoklimoik Lõmaro: Dri jilik Paul ear lemnok kin ro ear kennan ibeir im kõkkar wãwen an konono bwe en “lõñlok an jibarek ir.” (1 Kor. 9:19-23) Eindrein, jen kar lemnok kin ta enaj kaitoklimo lõmaro jemaroñ iion ir im pojõk wõt. Ñõn wanjoñok, ekkã an lõmaro itoklimo kin abañ ko kin mõnni, makõtkit ko an kien im wãwen kejbãrok baamle ko air. Bareinwõt emaroñ or air itoklimo kin unin ar mour, im etke Anij ej kõtlok bwe nana en wõnmanlok wõt. Emaroñ bar lap air itoklimo kin unin mour, wãwen lõl ilo ran ko imar, im etke Anij ej kamelim bwe en or iñtan. Wãwen ar kwalok nan kin Ailiñ eo enaj emõn elañe emeletlet wãwen ar kapojõk.—Ken. 16:23.
7. Ewi wãwen aolep ilo congregation eo remaroñ jibõñ lõmaro rejjab tõmak ak rej kwelok iber?
7 Kõtõbar Lõmaro Dri Belele ro Rejjab Tõmak: Meñe mwil emõn an jeer im jãter rej Kristian elap an jibõñ lõmaro beleir rejjab tõmak, ro uan congregation eo rebar maroñ jibõñ. (1 Pit. 3:1-4) Ñe dri jab tõmak eo ej karwaan lio belen ñõn ien kwelok eo, joij eo ej bõk jen congregation eo enaj juõn kakõle ekajur. An ber ej kalikar eor an itoklimo ilo mol eo im emaroñ mõnõnõ in katak Baibel.
8. Ewi wãwen lõmaro jeer im jãter remaroñ jibõñ lõmaro dri belele im edrik air itoklimo kin mol eo?
8 Ak ro jet, ilo jinoin edrik air itoklimo kin men ko lor jitõb ak elikin jet ien remaroñ mõnõnõ in etale Baibel eo iben juõn ian lõmaro dri tõmak im rejela kajeir. Lõmaro jeer im jãter ilo juõn congregation, rar bebe in lolok juõn baamle ejibil ilo tõmak im bwebwenato iben leo ejjab tõmak kin men ko ear itoklimo kaki. Elikin jet ien, lein ear jino konono kin men ko ilo jitõb, im kiõ emwij an baptais. Ilo bar juõn ien, juõn jeer im jãter man ear jibõñ juõn eo ejoij ak ejjab tõmak ñon kalek juõn worwor itõrerein mweo imõn. Ilo an kwalok an itoklimo ilo wãwen in ear maroñ jino katak Baibel iben. (Gal. 6:10; Pil. 2:4) Elañe kwoj juõn jeer im jãter man Dri Kristian, etke kwojjab kate yuk ñõn jibõñ lõmarein im rejjab tõmak?
9. Katakin lõmaro dri Kristian emaroñ tel ñõn ta?
9 Pojõk kin Ran ko Reber Imar: Lõmaro rej bokake ennan kin Ailiñ eo im kõtõbar jerbal eo an Jeova remaroñ ian ro im renaj erom “men in yokwe ñõn armij rõn,” Kristian elder ro im rej kajerbal maroñ im kabel ko air ilo congregation ko an Jeova. (Ep. 4:8; Sam 68:18) Lõmarein rej s̃eperde congregation eo kin air kõnan im ilo mõnõnõ. (1 Pit. 5:2, 3) Rein rej juõn menin jerammõn elap ñõn jeer im jãter otemjej!
10. Ewi wãwen jibõñ eo Anenaiõs ear lelok ñõn Paul ear jibõñ elõñ?
10 Ñõn wanjoñok, Saul ear erom “dri jilik ñõn dri ailiñ ko,” meñe ekin matõrtõr dri Kristian ro. (Rom. 11:13) Eñin unin dri kalor eo Anenaiõs ilo jinoin, ear makoko in kwalok nan ñõn Saul. Ijoke, Anenaiõs ear lor wõt nan in kaiñi eo an Iroij im kennan iben lein eo ear erom dri jilik Paul. Iomin yiõ kein in an Paul kwalok nan ear jibõñ elõñ tausan ro ke rar roñ an kennan im bar elõñ million ro ikijen letter ko an ilo Nan in Anij.—Jerb. 9:3-19; 2 Tim. 3:16, 17.
11. Etke jen kar kõmõn jabrewõt oktõk ko jej aikwiji ñõn kwalok nan ñõn lõmaro?
11 Inem jen kõmõne jabrewõt oktõk ko jej aikwiji ñõn wõnmaik abañ eo ñõn kwalok nan iben lõmaro. Ilo ar jibarbar ñõn mejenkajik in, Jeova enaj kejerammõn jerbal eo ar ñõn kõmõnmõn ankil an im kejbãrok men ko an Ailiñ eo.