Jipañ Armej ñan Roñjake Anij

1. Ta bok ko rekããl kar kõjjel̦ã kaki ilo Kweilo̦k El̦ap eo “En itok Aelõñ eo an Anij!” im etke em̦m̦an bok kein?

¹ Ilo Kweilo̦k El̦ap eo etan “En Itok Aelõñ eo an Anij!” kar kõjjel̦ã kõn bok kein ruo rekããl, Roñjake Anij im Kwõnaaj Mour Indeeo im Roñjake Anij (Listen to God).a Em̦õkaj im epidodo ukoti bok kein kõnke ejjab lukkuun lõñ jeje ko ilo bok kein. Ilo m̦ool, em̦õj kadede kar kamãlim ukote bok eo Roñjake Anij im Kwõnaaj Mour Indeeo ilo 431 kajin ko m̦okta jãn aer kar kõjjel̦ã kake ilo kweilo̦k in el̦ap.

2. Wõn ro el̦aptata an naaj bok kein jipañ er?

² Wõn ro bok kein enaaj l̦aptata aer jipañ er? Jen lale wãween kein itulal̦ me ekkã aer wal̦o̦k ipel̦aakin lal̦ in:

• Juon ri kwal̦o̦k naan ej bwebwenato ippãn juon armej, bõlen ilo iien eo ej kab iioon armej eo ak iien eo ej bar jepl̦aak ippãn im ej kile bwe armej eo ejaje riit ak ejjab lukkuun jel̦ã riit.

• Juon ri kwal̦o̦k ej kwal̦o̦k naan ippãn armej ro me rej kõnono juon kajin me jet wõt iaan bok ko ad ewõr ilo kajin eo aer ak bõlen ejjel̦o̦k ilo kajin eo aer. Ak enañin aolep ilo jikin eo jej kwal̦o̦k naan ie ejjab em̦m̦an riit ippãer.

• Juon ri kwal̦o̦k naan ej jeknõl̦ wõt ak sign language ñan ri jarroñroñ ro ilo an kwal̦o̦k naan ippãer.

• Juon jemen ak jinen ekõn̦aan katakin ajri eo nejin kõn Baibõl̦ ilo iien eo ejjañin jel̦ã riit.

3. Ewi wãween kar kõm̦m̦ane bok eo Roñjake Anij?

³ Wãween Kar Kõm̦m̦ane Bok Kein: Ilo bok eo, Roñjake Anij, kar je jejjo naan ko me rekadu im juon eoon ilo lal̦in kajjojo peij me ej kwal̦o̦k kõn mel̦el̦e eo eaorõk ilo katak eo. Etke? Baj l̦õmn̦ak m̦õk, bõlen juon armej ear lewõj juon bok me kar je ilo bar juon kajin im kwõjjab maroñ mel̦el̦e im riiti jeje ko ie kõnke reoktak. Kwõnaaj ke kar itoklimo in riiti meñe ewõr pija ko reaiboojoj im rem̦m̦an ie? Alikkar kwõban kar. Ejjel̦o̦k oktak ippãn armej ro rejjab maroñ riit, redike bok ko me bwijin naan im jeje ie. Kõn men in, kar lukkuun jol̦o̦k iien im kõpooje pija ko ilo kajjojo peij ilo bok in im ewõr juon kakõl̦l̦e ej jitõñl̦o̦k pija eo tok juon.

4. Ewi wãween kar kõm̦m̦ane bok eo Roñjake Anij im Kwõnaaj Mour Indeeo?

⁴ Pija ko ilo bok eo Roñjake Anij im Kwõnaaj Mour Indeeo, rej ejja pija ko wõt ilo bok eo Roñjake Anij. Kar kõm̦m̦ane bok in ñan katak Baibõl̦ ippãn ro me epen aer riit ak ro me rej katak riit. Ri kwal̦o̦k ro remaroñ kõjerbal bok in ilo aer katak ippãn armej ro kõn bok eo Roñjake Anij. Ilo lõñ in kajjojo peij ko anmiiñ, ewõr juon kajjitõk im uwaak eo ej wal̦o̦k ilo ejja peij eo im peij eo anmoon̦. Bareinwõt ilo pija ko, ewõr kõmel̦el̦e ko im eoon ko. Ilo itulal̦in kajjojo katak, ewõr jeje ko redikl̦o̦k me rej kwal̦o̦k kajjitõk ko, jidik kõmel̦el̦e ko, im eoon ko me jemaroñ bwebwenato kaki ippãn ri katak ro ad, ekkar ñan joñan jel̦ã ko aer.

5. Ñããt im ewi wãween jemaroñ leto letak bok kein?

⁵ Wãween Kõjerbali: Meñe bok kein remaroñ jab bok in leto letak ko an allõñ eo, ak kwõmaroñ leto letak juon iaan bok kein jabdewõt iien kwõj kwal̦o̦k naan jãn em̦ ñan em̦ im lo bwe ekkar im em̦m̦an ñan lel̦o̦k ñan armej ro. (Lale bo̦o̦k eo “Wãween Leto Letak Bok Kein.”) Kwõmaroñ lel̦o̦k ñan ro kwõj jepl̦aak ippãer ilo am̦ baj ba ñan er bwe ewõr juon men kokõn̦aan kwal̦o̦ke ñan er. Innem, ñe em̦õj am̦ ba men in, kwõmaroñ lel̦o̦k ñan er bok eo.

6. Ewi wãween jemaroñ kõjerbal bok kein ñan katak Baibõl̦ ippãn armej ro?

⁶ Ñe kwõj katak ippãn armej ro kõn bok eo Katak ko Rem̦ool, kwõj kwal̦o̦k kajjitõk ko ilo bok eo bwe armej ro ren uwaak. Bõtab, kõnke ejjel̦o̦k kajjitõk ko kar jei ilo bok eo, Roñjake Anij, wãween am̦ katak ippãn armej ro kake ejjab ãinwõt am̦ kõjerbal bok eo Katak ko Rem̦ool. Ilo elõñ aelõñ ko, em̦m̦an ippãn armej ro roñjake bwebwenato ko. Kõn men in, kwõmaroñ kõjerbal pija ko ñan kwal̦o̦k bwebwenato ko ilo Baibõl̦. Kõmel̦el̦eik pija ko im en kaitoktoklimo am̦ bwebwenato. Innem, kwõn kajjitõk ippãn ri katak eo ñan kwal̦o̦k ta ko ej loi im ewi wãween an l̦õmn̦ak kaki. Riiti eoon ko ilo tulal̦in peij eo, im kõmel̦el̦eiki kõn ta ko eoon ko rej ba. Kwal̦o̦k kajjitõk ko ñan e bwe en kwal̦o̦k l̦õmn̦ak ko an im ñan lale el̦aññe emel̦el̦e. Ñe ej katak kõn bok eo Roñjake Anij im Kwõnaaj Mour Indeeo, komiro riiti ippãn doon kõmel̦el̦e ko im eoon ko ñe komiro ej bwebwenato kõn kajjojo pija.

7. Ewi wãween jemaroñ jipañ ri katak ro ad bwe ren kõm̦m̦an wõnm̦aanl̦o̦k ko?

⁷ Jipañ Ri Katak ro ñan Wõnm̦aanl̦o̦k: Jej kõjatdikdik bwe am̦ katak ippãn armej ro enaaj kõm̦akũt er ñan kõn̦aan katak riit bwe ren maroñ make kal̦apl̦o̦k aer jel̦ã kõn Jeova. (Jon 17:⁠3) Kõn men in, ñe kwõj katak ippãn juon armej kõn Roñjake Anij im kwõj loe bwe ejel̦ãl̦o̦k riit, kiiõ kwõmaroñ wõnm̦aanl̦o̦k im katak ippãn kõn bok eo Roñjake Anij im Kwõnaaj Mour Indeeo. Jekdo̦o̦n bok rot iaan bok kein ruo kwõj katak ippãn armej eo, im enaaj jem̦l̦o̦k amiro katak kake ak ri katak in eban pojak in peptaij. Kwõj aikuj in katak ippãn kõn bok eo Katak ko Rem̦ool ak bar juon bok me enaaj kal̦apl̦o̦k an jel̦ã im mel̦el̦e kõn Baibõl̦.

8. Ta unin am̦ kam̦m̦oolol kõn bok kein rekããl?

⁸ Armej ro rej aikuj roñjake Eo im ej Irooj Bõtata ioon aolepen lañ im lal̦ bwe ren mour indeeo. (Ais. 55:​3, UBS) Im ej ankilaan Jeova bwe “armej otemjej,” ekoba ro rejjab maroñ riit, ren katak ewi wãween remaroñ roñjake e. (1 Ti. 2:​3, 4) El̦ap ad kam̦m̦oolol bwe bok kein rekããl remaroñ jipañ kõj ñan katakin armej ro kõn wãween roñjake Anij!

[Kamelele eo itulal]

[Bo̦o̦k eo ilo peij 3]

Wãween Leto Letak Bok Kein

Kwal̦o̦k ñan armej eo peij 2-3, im ba: “Kokõn̦aan ke mour ilo juon lal̦ ãinwõt in? [Kõtl̦o̦k an uwaak.] Baibõl̦ ej kallim̦ur bwe m̦õttan jidik Anij enaaj kõm̦m̦an bwe lal̦ in en aiboojoj im juon jikin eaenõm̦m̦an im ejjel̦o̦k jeram̦õl im nañinmej. Jen lale ta eo jej aikuj kõm̦m̦ane ñan mour ijin. [Riit Aiseia 55:​3, UBS, me ej wal̦o̦k ilo itulõñ in peij 3.] Eoon in ej kwal̦o̦k bwe jej aikuj ‘roñjake’ Anij im ‘jenaaj mour.’ Ak ewi wãween ad roñjake Anij?” Ãlõkl̦o̦k ñan peij 4-5, im bwebwenato kõn uwaak eo ippãn. Ñe epoub im ejjel̦o̦k an iien, lel̦o̦k ñan e bok eo im kõm̦m̦an karõk ñan bar jepl̦aak im bwebwenato kõn uwaak eo.