L̦addik ro im Likao ro, Kom̦ij Ke Kate Kom̦ ñan Bõk Eddo ko Rel̦l̦apl̦o̦k?
1.Ñããt eo likao ro ak l̦addik ro em̦õj aer peptaij remaroñ jino aer l̦oore naan in kakapilõk eo ilo 1 Timote 3:1?
1 “El̦aññe juon em̦m̦aan ej lukkuun kõn̦aan bwe en juon ri tõl ilo eklejia, ej kããlõt jerbal eo epol̦õmãn.” (1 Ti. 3:1, UBS) Naan kein jãn Baibõl̦ rej rõjañ em̦m̦aan ro bwe ren kate er ñan bõk eddo ko rel̦l̦apl̦o̦k ilo eklejia ko. Juon l̦addik ak likao ej aikuj ke kõttar an rũtto im jino an kate? Ejjab. Em̦m̦antata ñe ej jino kate ke ejja dik ak jodrikdrik wõt. Ilo wãween in, emaroñ kamminene im kaalikkar bwe epojak in erom juon ri jipañ ñe enaaj rũttol̦o̦k. (1 Ti. 3:10, UBS) El̦aññe kwõj juon l̦addik ak likao im em̦õj am̦ peptaij, ta ko kwõj aikuj kõm̦m̦ani ñan bõk eddo ko rel̦l̦apl̦o̦k ilo eklejia?
2. (1) Ta ko kwõmaroñ kõm̦m̦ani bwe en wõr am̦ kõn̦aan ñan jipañ ro jet? (2) Ta ko kwõmaroñ kõm̦m̦ani ñan kaalikkar bwe kwõj m̦õn̦õn̦õ in jipañ ro jet?
2 Kaarmejjeteik Eok Make: Keememej bwe unin am̦ kate eok ej bwe kwõn jerbal ñan ro jet, ejjab bwe kwõn ebbõk am̦ taitõl̦. Kõn men in, kwõn kate eok bwe en wõr am̦ kõn̦aan ñan jipañ ri tõmak ro m̦õttam̦. Juon wãween kwõmaroñ kõm̦m̦ane men in ej ilo am̦ kõl̦mãnl̦o̦kjen̦ kõn joñak eo em̦m̦an an Jijej. (Matu 20:28, UBS; Jon 4:6, 7; 13:4, 5) Jar ñan Jeova im kajjitõk bwe en jipañ eok bwe kwõn kõn̦aan jipañ ro jet. (1 Ko. 10:24) Kwõj ke jipañ ro rerũtto ak ro renañinmej ilo eklejia eo? Kwõj ke kõm̦m̦an am̦ iien ñan lawnmower, rarõ, ak kõm̦m̦ani jerbal ko jet ñan kõjparok im karreoik Im̦õn Kweilo̦k eo? El̦aññe ewõr en̦ ear jab kõm̦m̦ane katak eo an ilo Jikuul̦ in Kwal̦o̦k Naan eo, kwõj ke volunteer ñan jipañ ilo katak eo? Kwõnaaj kile bwe am̦ kate eok ñan jipañ ro jet ej kõm̦m̦an bwe kwõn m̦õn̦õn̦õ.—Jrb. 20:35.
3. Ewi joñan an aorõk bwe en epaak kõtaan eo ad ippãn Anij, im ewi wãween jemaroñ kal̦apl̦o̦k ad epaake Anij?
3 Kõtaan eo Am̦ Ippãn Anij: Juon ri jipañ ilo eklejia ej aikuj epaak kõtaan eo an ippãn Anij. El̦apl̦o̦k an aorõk men in jãn ñe juon ej mãlõtlõt ak kapeel. Juon eo me epaake Anij ej l̦oori l̦õmn̦ak im kõm̦m̦an ko an Jeova im Jijej. (1 Ko. 2:15, 16, UBS) Ej kwal̦o̦k wãween ko rem̦m̦an ãinwõt yokwe, meanwõd, jouj, im ko ãierl̦o̦kwõt. (Ga. 5:22, 23) Im ej juon ri kwal̦o̦k naan ekijejeto me ej likũti kõn̦aan ko an Anij m̦oktata ilo mour eo an. (Matu 6:33) Juon wãween bwe kwõn maroñ kal̦apl̦o̦k am̦ epaake Anij ej ilo am̦ katak ippam̦ make. Men in ej kitibuj am̦ riit Baibõl̦ raan otemjej im riiti Naan in Keeañ ko im bok ko jet. Ebar aorõk bwe kwõn kõpooje bok ko am̦ im pãd ilo aolep kweilo̦k ko. (Sam 1:1, 2; Hi. 10:24, 25, UBS) Paul ear rõjañ likao eo etan Timote bwe en kõm̦m̦an wõnm̦aanl̦o̦k ko. Ear ba: “Kwõn kõjparok . . . am̦ katakin.” (1 Ti. 4:15, 16, UBS) Kõn men in, ñe ewõr am̦ katak ilo Jikuul̦ in Kwal̦o̦k Naan eo, kwõn kate eok joñan wõt am̦ maroñ ñan kõm̦m̦ane. Kwõj aikuj kõppojakl̦o̦k im̦aan ñan kwal̦o̦k naan im kwõn niknik ilo jerbal in. Kwõn kõm̦m̦an am̦ mejãnkajjik im kõm̦m̦ane jabdewõt men kwõj aikuji ñan tõpari. Jet iaan mejãnkajjik kein ej pioneer, jerbal ilo Betel̦, ak etal ñan Jikuul̦ in Baibõl̦ ñan L̦õm̦aro Ejjel̦o̦k Pãleer. Ñe kwõnaaj kate eok bwe en epaak kõtaan eo am̦ ippãn Anij, men in enaaj jipañ eok bwe “kwõn ko jãn m̦õm̦ ko an likao.”—2 Ti. 2:22.
4. Etke l̦addik ro im likao ro rej aikuj kate er bwe ren jet ro me retiljek im el̦ap ad lõke er?
4 Juon Eo Etiljek im Ro Jet Relõke: Ilo tõre ko an rijjelõk ro, kar kããlõt jet em̦m̦aan ñan ajej m̦õñã ñan Kũrjin ro rar pãd ilo aikuj. Rijjelõk ro rar jab aikuj inepata el̦aññe enaaj em̦m̦an an rein kõm̦m̦ane jerbal in aer kõnke em̦m̦aan rein me kar kããlõt er rar jet ro me retiljek im el̦ap an armej ro lõke er. Men in ear kamaroñ rijjelõk ro ñan kõm̦m̦ani jerbal ko jet raorõk. (Jrb. 6:1-4) Kõn men in, el̦aññe kar lewaj juon am̦ eddo ak jerbal ilo eklejia eo, kwõn kate eok joñan wõt am̦ maroñ ñan kajejjete. Anõke joñak eo an Noa, eo ear l̦oori aolep naan in tõl ko jãn Anij ke ear kalõk wa eo. (Jen. 6:22) Jeova ej lukkuun kaorõk ro me retiljek im epaak kõtaan eo aer ippãn.—1 Ko. 4:2, UBS; lale bo̦o̦k eo, “Unin An Aorõk Bwe Juon En Kamminene.”
5. Etke l̦addik ro ak likao ro rej aikuj kate er ñan bõk eddo ko rel̦l̦apl̦o̦k ilo eklejia eo?
5 Jeova ej ainitok armej ro ñan doulul in an, ãinwõt kar kanaan kake. (Ais. 60:22, UBS) Kajjojo iiõ, enañin 250,000 armej ro rej peptaij. Kõnke elõñ ro rekããl rej kobatok ñan doulul in, jelukkuun aikuji em̦m̦aan ro me rekkar im epaak kõtaan eo aer ippãn Jeova bwe ren tõl im jipañ ilo eklejia ko. Elõñ jerbal ko jej aikuj kõm̦m̦ani ilo doulul in an Jeova. (1 Ko. 15:58, UBS) El̦aññe kwõj juon l̦addik ak likao me em̦õj an peptaij, kwõj ke kate eok bwe kwõn maroñ bõk eddo ko rel̦l̦apl̦o̦k ilo eklejia eo? El̦aññe aet, jej nõbar eok kõn jerbal ko rem̦m̦an kwõj kõm̦m̦ani!
[Naan ko ilo peij 2]
Kõnke elõñ ro rekããl rej kobatok ñan doulul in, jelukkuun aikuji em̦m̦aan ro me rekkar im epaak kõtaan eo aer ippãn Jeova bwe ren tõl im jipañ ilo eklejia ko
[Bo̦o̦k eo ilo peij 3]
Unin An Aorõk Bwe Juon En Kamminene
El̦ap an l̦addik ro im likao ro me em̦õj aer peptaij bõk tokjãn ñe em̦m̦aan ro rej lale eklejia rej lel̦o̦k aer eddo im jipañ er ak kammineneik er. Juon iien ke ear m̦õj kweilo̦k, juon em̦m̦aan me ej lol̦o̦k eklejia ko ear jijet im̦aan stage eo im lel̦o̦k naan in rõjañ ñan juon ri kwal̦o̦k naan. Em̦m̦aan in ear reilo̦k im loe an juon l̦addik jutak iturin stage eo. Kõn men in, ear l̦õmn̦ak bwe l̦addik in ej kõttar bwe en kõnnaan ippãn. Bõtab, l̦addik eo ear ba bwe em̦m̦aan ro rej lale eklejia eo rar lel̦o̦k juon an eddo bwe en karreoik stage eo aolep iien ãlikin kweilo̦k. Jinen im jemãn l̦addik in rar kõn̦aan ro̦o̦l ak rar aikuj kõttar kõnke l̦addik eo ear kõn̦aan m̦okta kõm̦m̦ane jerbal eo an. Em̦m̦aan eo ear m̦õn̦õn̦õ in etal jãn ijo bwe l̦addik eo en maroñ karreoiki. Ear ba: “Em̦m̦aan ro rej lale eklejia eo rar jipañ l̦addik ro im likao ro ilo aer lel̦o̦k aer eddo ak jerbal ilo eklejia eo. Kõn men in, ñe ij lol̦o̦k eklejia eo aer, ekkã aer kwal̦o̦k ñan ña likao ro me rej pojak in erom ri jipañ ilo eklejia eo.”