Uwaakin Kajjitõk Ko
◼ M̦okta jãn an juon ri kwal̦o̦k maroñ peptaij, ewi joñan an aikuj pãd ilo kweilo̦k ko im bõk kun̦aan ilo kwal̦o̦k naan?
Peptaij ej pepe eo eaorõktata me juon armej ej kõm̦m̦ane ilo mour eo an. Kõn men in, m̦okta jãn an juon peptaij, ej aikuj jel̦ã im bwe an mel̦el̦e kõn men ko Anij ekõn̦aan bwe en̦ kõm̦m̦ani. Im ej aikuj kadede alikkar ilo kõm̦m̦an ko an bwe ej kate e ñan mour ekkar ñan kien ko an Anij.
Kũrjin ro rej aikuj l̦oor kien eo ñan jab kõjekdo̦o̦n iien ko jej kweilo̦k ippãn doon. Kõn men in, ri kwal̦o̦k eo ej aikuj niknik in pãd ilo kweilo̦k ko. (Hi. 10:24, 25, UBS) Bareinwõt, ej bõk kun̦aan ñan uwaak ilo iien kweilo̦k ko. Emaroñ pãd ilo Jikuul̦ in Kwal̦o̦k Naan eo, bõtab ejjab juon men ej aikuj bõk kun̦aan ie bwe en maroñ peptaij.
Bareinwõt, em̦õj lel̦o̦k ñan Kũrjin ro jerbal eo ñan kwal̦o̦k kõn nuuj eo em̦m̦an im ñan kõm̦m̦an rũkal̦oor. Kõn men in, ri kwal̦o̦k eo ej aikuj niknik in kwal̦o̦k naan m̦okta jãn an peptaij. (Matu 24:14; 28:19, 20) Jete allõñ ej aikuj kwal̦o̦k naan m̦okta jãn an maroñ peptaij? Eokwe, em̦m̦aan ro rej lale eklejia renaaj lel̦o̦k iien bwe armej in en kaalikkar an keini im kijejeto ilo kwal̦o̦k naan kajjojo allõñ. (Sam 78:37, UBS) Bõtab, ejjab aikuj aetok kitien iien in. Em̦m̦aan ro rej lale eklejia remaroñ kile el̦aññe armej in epojak in peptaij meñe ej kab jino kwal̦o̦k naan ium̦win jejjo wõt allõñ. Jete awa ko ri kwal̦o̦k eo ej aikuj tõpari kajjojo allõñ bwe en maroñ peptaij? Eokwe, ejjel̦o̦k juon kien kõn men in. Em̦m̦aan ro rej lale eklejia rej aikuj l̦õmn̦ak kõn joñan maroñ ko an kajjojo ri kwal̦o̦k ro.—Luk 21:1-4.
Em̦m̦aan ro rej lale eklejia (ak l̦õm̦aro me rej jipañ ilo juon eklejia me jejjo wõt em̦m̦aan ro rej lale) rej jijet ippãn eo ekõn̦aan peptaij im etali kajjitõk ko ippãn. Em̦m̦aan rein rej aikuj keememej bwe aolep armej reoktak jãn doon. Ren lukkuun lale im etale ñe ri kwal̦o̦k eo epojak in peptaij. Rej aikuj lale el̦aññe em̦ool an ri kwal̦o̦k eo kõn̦aan erom juon iaan Ri Kõnnaan ro an Jeova. Ej aikuj make kile bwe ej juon jeraam̦m̦an bwe ej m̦õttan doulul in an Jeova im ewõr kun̦aan ilo kwal̦o̦k naan. Em̦m̦aan rein remel̦el̦e bwe ri kwal̦o̦k in ejjañin tõpar aolep katak ko ej aikuj jel̦ã kaki ilo Baibõl̦. Kõnke ej kab jinoe an kwal̦o̦k naan, joñan jel̦ã eo an ejjab ãinwõt ri kwal̦o̦k ro me em̦õj aer peptaij im eto aer kwal̦o̦k naan. El̦aññe em̦m̦aan ro rej lo bwe ri kwal̦o̦k eo ejjañin pojak in peptaij, eokwe ilo jouj rej aikuj kwal̦o̦k jãn Baibõl̦ etke rar pepe bwe ejjañin pojak im kõm̦m̦an karõk bwe juon en jipañe.