O̦kwõj Enaaj Juon Allõñ El̦ap an Aorõk!

1. Ta jerbal eo ejejuwaan jenaaj kõm̦m̦ane ipel̦aakin lal̦ ilo iiõ in me enaaj jejjet 100 iiõ ñan Aelõñ eo an Anij?

¹ Ilo iiõ in enaaj jejjet 100 iiõ in an Aelõñ eo an Anij pãd. Kõn men in, ekkar bwe jen nõbar Jeova ilo ad kõm̦m̦ane juon jerbal el̦ap an aorõk! Ilo Allõñ in O̦kwõj, jenaaj leto letak juon peba ekããl ipel̦aakin lal̦ etan, Epãd Ia Uwaakin Kajjitõk ko me Ekkã an Armej Kajjitõk Kaki? Peba in ej rõjañ armej ro ñan pukot uwaakin kajjitõk ko aer ilo Baibõl̦. Im ej kõmel̦el̦e kõn ewi wãween Weep jait eo jw.org emaroñ jipañ er.

2. Ewi wãween jemaroñ “lam̦õj kõn ainikien el̦ap” im “nõbar Jeova” ilo allõñ in O̦kwõj?

² Jen Kõl̦l̦aaj Ainikied im Nõbare: Bwe rukwal̦o̦k ro ren maroñ kal̦apl̦o̦k ijo kun̦aaer ilo kwal̦o̦k naan, ewõr juon jeraam̦m̦an epel̦l̦o̦k ñan ro me rej l̦õmn̦ak in naaj akjel̦õri bainier (auxiliary pioneer) ilo O̦kwõj. Ro renaaj akjel̦õri bainier ilo O̦kwõj remaroñ kõm̦m̦ane wõt 30 awa. Im kõnke ewõr 5 Bõl̦aide, Jãdede, im Jabõt ilo naaj allõñ in O̦kwõj, enaaj pidodo an rijikuul̦ im rijerbal ro maroñ akjel̦õri bainier. Ewõr ke am̦ rũkkatak ak nejũm̦ me epojak ñan erom juon rukwal̦o̦k naan? El̦aññe aet, kwõn m̦õkaj im kõnnaanek em̦m̦aan eo ej lale jerbal ko an em̦m̦aan ro rej lale eklejia. Enaaj juon jeraam̦m̦an ñe renaaj erom rukwal̦o̦k ilo allõñ in me eaorõk! Kõnke O̦kwõj ej jem̦l̦o̦kin juon iiõ ilo jerbal in kwal̦o̦k naan, ekkã an jet rekũl̦ar bainier (regular pioneer) ro pepe in kakkije ilo allõñ in ñe em̦õj an uñ awa ko aer ñan juon iiõ. Bõtab, bwe ren maroñ kal̦apl̦o̦k ijo kun̦aaer ilo iien leto letak peba in me eaorõk, remaroñ kõm̦m̦an oktak ñan jikejuul̦ in iien kakkije ko aer. Bareinwõt, eiien kiiõ ñan an baam̦le ko pepe kõn wãween remaroñ “lam̦õj kõn ainikien el̦ap” im “nõbar Jeova” ilo naaj allõñ in O̦kwõj.​—Ezra 3:11; JK. 15:22.

3. Ta mejãnkajjik eo ad ñe jenaaj leto letak peba jiddik eo ekããl ilo O̦kwõj?

³ Meñe em̦õj ad kar bar leto letak peba jiddik ko ilo iien ko remootl̦o̦k, ak jej kõjatdikdik bwe O̦kwõj enaaj juon iien me jeban mel̦o̦kl̦o̦ke. Jej tõmak bwe ilo O̦kwõj, joñan awa ko, rukwal̦o̦k ro, im akjel̦õri bainier ro enaaj l̦apl̦o̦k ñan joñan ko me jejjañin kar tõpari. Ilo ad naaj kõjem̦l̦o̦kel̦o̦k iiõ in jerbal in kwal̦o̦k naan an 2014, jej kõjatdikdik bwe Jeova enaaj kajeraam̦m̦an kõj ñe jenaaj kate kõj bwe O̦kwõj en juon allõñ em̦m̦antata im l̦ap tõprak ko ie!​—Matu 24:14.