100 Iiõ in Kwal̦o̦k Naan kõn Aelõñ Eo!
1. Ta eo me kar rõjañ armej ro an Jeova ñan kõm̦m̦ane enañin 100 iiõ ko remootl̦o̦k?
1 “Em̦õj an Kiiñ eo jino an irooj! Kom̦ij aolep jerbal ãinwõt rũkeeañ ro an. Kõn men in, kom̦win ilo̦k im kwal̦o̦k naan, kwal̦o̦k naan, kwal̦o̦k naan kõn Kiiñ eo im aelõñ eo an.” Joseph Rutherford ear kwal̦o̦k naan kein rekairujruj enañin 100 iiõ ko remootl̦o̦k. Im ear rõjañ armej ro an Jeova ñan kajeeded nuuj eo em̦m̦an kõn Aelõñ eo ilo aolepen lal̦ in. Im em̦õj ad kõm̦m̦ane men in! Ãinwõt kar Kũrjin ro ilo raan ko an rijjilõk ro me rar kadedel̦o̦k territory ko aer, em̦õj ad kwal̦o̦k naan kõn nuuj eo em̦m̦aan kõn Aelõñ eo “ñan armej otemjej ilo lal̦” in. (Kol. 1:23, UBS) El̦aññe jej reilikl̦o̦k tarrin 100 iiõ ko remootl̦o̦k, ta tõprak ko jaar kõm̦m̦ani jãn ad kar kwal̦o̦k naan kõn Aelõñ eo an Anij? Ewi wãween ad maroñ wõnm̦aanl̦o̦k wõt im kwal̦o̦k naan kõn Aelõñ eo ke ej epaaktok raan eo me enaaj jejjet 100 iiõ in an kien ak Aelõñ eo an Anij jutak?
2. Ewi wãween an bok ko ad kajeeded nuuj eo em̦m̦an kõn Aelõñ eo an Anij?
2 Reilikl̦o̦k: Ium̦win elõñ iiõ, bok ko ad rar kajeeded nuuj eo em̦m̦an kõn Aelõñ eo an Anij. Jãn kar 1939, eñin taitõl̦in bok eo me el̦aptata ad kõjerbale ilo kwal̦o̦k naan: Naan in Keeañ kõn Aelõñ eo an Jeova. Ekkã wõt an bok in kwal̦o̦k kõn Aelõñ eo im ta ko enaaj kõm̦m̦ani. Bok eo etan Awake! ej bar kwal̦o̦k bwe kõjatdikdik eo wõt an armej ñan n̦amejal̦an apañ ko rej iiooni ej kien ak Aelõñ eo an Anij. El̦ap an jejjet im em̦m̦an bok kein ruo kõnke erkein bok ko me el̦aptata ad ukoti ilo elõñ kajin ko im lito litak ipel̦aakin lal̦ in!—Rev. 14:6.
3. Ta jet iaan kõl ko jaar kõm̦m̦ani ñan keeañ kõn Aelõñ eo?
3 Armej ro an Jeova rar kõjerbal kõl ko roktak jãn doon ñan keeañ kõn Aelõñ eo. Jem̦aan, jekõn kar kajeeded nuuj eo em̦m̦an ilo ad kõjo̦ katak ko ilo kaar ko waad, ilo reito ko, im ilo kein kõjañjañ CD ko rekkillep. Men kein rar jipañ kõj ñan kwal̦o̦k naan ñan jar in armej ro ilo iien ko me ear iiet rukwal̦o̦k naan ro. (Sam 19:4) Ilo raan kein, jej likũt katak ko ad ilo Internet ilo jw.org, bwe nuuj eo em̦m̦an kõn Aelõñ eo en maroñ tõpar elõñ milien armej ro, ekoba ro me rej jokwe ilo aelõñ ko em̦õj kamo ad kwal̦o̦k naan ie.
4. Ta kõl ko raorõk me jej bõk kun̦aad ie ñan tõpar armej ro?
4 Ewõr bar kõl ko raorõk ñan tõpar armej me armej ro an Jeova rej kõm̦m̦ane ñan kajeededl̦o̦k ennaan eo em̦m̦an kõn Aelõñ eo. Ñan waanjoñak, jãn kar 1990 jim̦a ko, ijello̦kun em̦ ñan em̦ wõt, jaar jino kwal̦o̦k naan ilo jikin ko ekkã an armej pãd ie ãinwõt jikin piknik ko, jikin baak wa ko, im peejnej ko. Im kiiõ ej kab m̦õj ad bar karõk juon kilen kwal̦o̦k naan ilo̦bwilej ilo jikin ko rel̦l̦ap ipel̦aakin lal̦ in. Bareinwõt, elõñ eklejia ko em̦õj aer jino kwal̦o̦k naan ilo̦bwilej ilo aer illik bok ilo waan bwilbwil ko im ioon tebõl̦ ko im jutak iturier ilo jikin ko me el̦ap an armej itoitak ie. Bõtab, men eo el̦aptata ad kõm̦m̦ane ñan kwal̦o̦k kõn Aelõñ eo ej jerbal in kwal̦o̦k naan jãn em̦ ñan em̦.—Jrb. 20:20.
5. Ta ko repel̦l̦o̦k ñan ad kõm̦m̦ani ilo ad naaj bar jino juon iiõ ekããl ñan kwal̦o̦k naan?
5 Reim̦aanl̦o̦k: Jino jãn Jeptõm̦ba in ñe jebar tõpar juon iiõ ekããl ñan kwal̦o̦k naan, elõñ renaaj jino rekũl̦ar bainier. Kwõmaroñ ke rekũl̦ar bainier? Ñe ejjab, kwõmaroñ ke kanne ñan akjel̦õri bainier jabdewõt iien? Meñe kwõmaroñ bainier ak jaab, Jeova enaaj kajeraam̦m̦an eok ñe kwõj kate eok ñan kal̦apl̦o̦k ijo kun̦aam ñan kwal̦o̦k kõn Aelõñ eo.—Mal. 3:10.
6. Etke allõñ in Oktoba 2014 enaaj juon allõñ el̦ap an aorõk?
6 Ilo naaj Oktoba 2014, enaaj jejjet 100 iiõ in an kien ak Aelõñ eo jutak. Kõn men in, elukkuun naaj jejjet Naan in Keeañ eo an Oktoba kõnke el̦ap wõt an naaj kõnnaan kõn Aelõñ eo an Anij. Kwõmaroñ ke kate eok ñan naaj leto letak bok in ñan aolep armej ro me kwõnaaj tõpar er? Ilo ad reim̦aanl̦o̦k ñan raan kan̦e tok im̦aan jen wõnm̦aanl̦o̦k wõt im ‘kwal̦o̦k ennaan eo em̦m̦an kõn Aelõñ in Anij’ ñan aolep ro me renaaj m̦õn̦õn̦õ in roñjake.—Jrb. 8:12.